HUM YET BꞌISKꞌULAL TZꞌIBꞌNHEBꞌILKANO YU YAꞌ JEREMÍAS
Isbꞌiskꞌulal konhobꞌ Sión ayko presohal
1
¡Haꞌ niman konhobꞌ Jerusalén bꞌay kaw aytikꞌa niman anma kaw makankano ischukil!Haꞌ huneꞌ konhobꞌ kaw niman yelapno xolaj nimeta konhobꞌ mameltzokaniko hakaꞌ hunu ix hunix xakam yichamil,
haꞌ konhobꞌ yettikꞌa isbꞌa ischukil ayko yalanh chꞌen tohlabꞌal tinanh.a
2 Haꞌ anma ah Jerusalén kaw chikam yoqꞌ yet aqꞌbꞌalil, chiꞌay tꞌultꞌun yal sat yinh istxꞌotxꞌ.
Haꞌ xol hunteqꞌan konhobꞌ bꞌay kawxi iskꞌul, machi hunu tiꞌ chiꞌaqꞌni yaqꞌlobꞌal iskꞌul.
Haꞌ sunil ebꞌnaj yamigo pakꞌiko ebꞌnaj yinh, ismeltzoko ebꞌnaj howal yinh.
3 Haꞌ anma ah Judá kaw lanhan yaqꞌlen isyaꞌtajil kat yaqꞌlax munil kaw yaꞌta tet, yuto ayko preso.
Haꞌ Judá yahawiltikꞌa ye xolaj konhobꞌ, yajaꞌ wal tinanh machi xewilal tet.
Matzujchahapno yu sunil ebꞌnaj chitzumbꞌenikꞌoj xaꞌalaxiko yinh ej isyaꞌtajil.b
4 Haꞌ isbꞌehal konhobꞌ Sión kaw bꞌiskꞌulal jilni,
yuto machi mak chito yinh qꞌinh kaw aykano yelapnoj.
Haꞌ ispultahil konhobꞌ kaw tzꞌinan.
Oqꞌilxanhe chu ebꞌyaꞌ sacerdote, haxa ebꞌix qꞌopo kaw lanhan yilni ebꞌix isyaꞌtajil,
kaw bꞌiskꞌulal ye anma ah Jerusalén.
5 Haꞌ ebꞌnaj ayko ishowal yinh Jerusalén alaxiko ebꞌnaj yahawilal,
haꞌ ebꞌnaj kaw chiyahni Jerusalén kaw yiqꞌkanokanh yip ebꞌnaj,
yuto lanhan yanayo Komam Jahawil isyaꞌtajil yibꞌanh anma ah Jerusalén yu sunil ismanhkꞌomal.
Haꞌ yuninal, ilaxto preso sata ebꞌnaj ayko ishowal yinh.
6 Haꞌ iskꞌulchꞌanil konhobꞌ Sión matanhkaniloj.
Haꞌ ebꞌnaj yahaw konhobꞌ Jerusalén lahan eliko ebꞌnaj hakaꞌ noꞌ sajche machi ilcha islobꞌe,
chipáxilo yip sata ebꞌnaj chitzumbꞌenikꞌoj.
7 Hayet yaykꞌay konhobꞌ Jerusalén yul isqꞌabꞌ ebꞌnaj aniko howal yinh, machi hunu mak tiꞌ kolniloj.
Hayet ay isyaꞌtajil yibꞌanh ebꞌnaj yu ismanhkꞌomal,
isnahniti ebꞌnaj sunil iskꞌulal yil ebꞌnaj yet payat tiempo.
Hayet chiꞌil-lax ebꞌnaj yu ebꞌnaj ayko ishowal yinh chibꞌuchwa ebꞌnaj yinh ebꞌnaj,
yuto maꞌaykꞌaykano ebꞌnaj.
8 Haꞌ anma ah Jerusalén yu ismul yuxin hekꞌlaxilo yul iskonhobꞌ.
Sunil konhobꞌ chitikꞌa aniko ismay Jerusalén kaw chiyahwa yinh Jerusalén tinanh, yuto lanhan yilni yel ispixan,
yuxin kaw chiꞌah iskꞌul anma ah Jerusalén yu bꞌiskꞌulal kat ismeltzo yinta yu txꞌixwilal.
9 Haꞌ isyahbꞌetaj iswatxꞌe anma ah Jerusalén bꞌakbꞌiliko yinh xil isqꞌap,
mach xin isnah ta chihul isyaꞌtajil yibꞌanh yet tzujanilxa.
Kaw kꞌaybꞌalkꞌule tanhe yu yaykꞌay konhobꞌ Jerusalén,
machi mak xin chiꞌaqꞌni yaqꞌlobꞌal iskꞌul.
Chalni konhobꞌ Sión hakaꞌ tiꞌ: «Mam Jahawil il isyaꞌtajil chiwaqꞌletiꞌan,
haꞌ ebꞌnaj ayko ishowal winhan kaw yiqꞌkanh yip ebꞌnaj.
10 Haꞌ ebꞌnaj ayko ishowal yinh Jerusalén,
yelqꞌato ebꞌnaj tzetaj ye tuꞌ kaw ochebꞌil ay Jerusalén,
yil ebꞌnaj ah Jerusalén yokto anma nan konhobꞌal yul hawatut,
hunteqꞌan anma hawala ta mach chu yoktoj.
11 Sunil anma ah Jerusalén kaw chiꞌah iskꞌul, chissayni tzet chislo.
Haꞌ tzetaj ye tuꞌ kaw ochebꞌil ay tet,
ishelto selelo itah yunhe machi kam wahil.
¡Mam Jahawil okanh tꞌanhno winhan kat hawilni hanta isbꞌiskꞌulalil chiwaqꞌlehan!
12 Hex chexekꞌto yul bꞌeh, ¿tom mach chitzꞌay hekꞌul kinheyilnihan?
Okanhwe linhnoj chetxumni ta ay hunuxa mak tiꞌ, chiyaqꞌle isyaꞌtajil hakaꞌ isyaꞌtajil chiwaqꞌletiꞌan.
Haꞌ isyaꞌtajil chiwaqꞌletiꞌan, haꞌ Komam Jahawil anayo wibꞌanhan yinh tzꞌayikal bꞌay tit lemna ishowal winhan.
13 Hata satkanh yati Komam Jahawil qꞌa qꞌaꞌ chinhusnito isbꞌajil innimanilan,
yayo txꞌanh hakꞌ yinh insatan, hak tuꞌ yu inmeltzohan wintajan.
Kinisbꞌejkanojan inchukilan, hunun tzꞌayik wabꞌenan isyaꞌtajil.
14 Haꞌ kaw isqꞌabꞌ Komam kꞌalnhehayo inmulan yibꞌanh innuqꞌan hakaꞌ hunu yugo,
yuxin lanhan ispaxilo wipan.
Komam Jahawil kinanikojan yul isqꞌabꞌ ebꞌnaj ayko ishowal winhan,
haꞌ sata ebꞌnaj tuꞌ, mach chu wahwanojan.
15 Kaw isxanhkanayo Komam Jahawil ebꞌnaj winaj aqꞌom howal kaw ay yip ay yul konhobꞌ Jerusalén,
yawteti Komam huneꞌ niman bꞌulan ebꞌnaj soldado tanhtzenkanilo ebꞌnaj tzehtaj.
Hakaꞌ chu isxanhlaxilti yal teꞌ uva, hak tuꞌ yu isxanhnikꞌo Komam Jahawil anma ay yul konhobꞌ Judá tuꞌ.
16 Yuxin kaw chinoqꞌan, kaw chiꞌay yal insatan hakaꞌ ha haꞌ,
yuto makinbꞌejlaxkanojan yu mak chitikꞌa aqꞌni yaqꞌlobꞌal inkꞌulan chaqꞌni xewilal tet wanmahan.
Haꞌ wuninalan tanhtzelaxkaniloj, yuto haꞌ ebꞌnaj ayko ishowal yinh, haꞌ ebꞌnaj qꞌoji yinh.
17 Haꞌ anma Sión lehanto isqꞌabꞌ chisqꞌanni kolwal,
yajaꞌ machi mak chiꞌaqꞌni yaqꞌlobꞌal iskꞌul.
Haꞌ Komam Jahawil chejnhe konhobꞌla yaqꞌaꞌ howal yinh yuninal yaꞌ Jacob,
haꞌ ton konhobꞌla ayko yinhla ishoyanil.
Haꞌ Jerusalén kaw yahbꞌeta elkaniko yu ebꞌnaj.
18 Komam Jahawil, kaw tohol Komam, wal hinan kaw manhkꞌom wute hinbꞌahan tet istzotiꞌ Komam.
Sunil hex konhobꞌlaj, wal tinanh abꞌewe tzet chiwaqꞌletiꞌan.
Haꞌ ebꞌix qꞌopotaj yebꞌ ebꞌnaj tzehtaj ah Jerusalén ilaxkanto preso.
19 Kinawihan tet konhobꞌ chitikꞌa kolwa winhan, yajaꞌ tonhe etli winhan,
haꞌ ebꞌyaꞌ sacerdote yebꞌ ebꞌnaj ichamta winaj kam ebꞌnaj yul konhobꞌ yet lanhan yekꞌ ebꞌnaj issayno tzetta chislo.
20 Mam Jahawil, il sunil bꞌiskꞌulal chiwaqꞌletiꞌan,
kaw yaꞌ chuko bꞌiskꞌulal tiꞌ yinh wanmahan, kaw kꞌaynajilo innabꞌalan,
yuto kaw manhkꞌomkano hinan yinh hunelnhe.
Haꞌ yintalto konhobꞌ maqꞌlaxkamo anma yu espada,
haxa yul konhobꞌ tiꞌ aypaxo kamikal oki.
21 Abꞌelax inqꞌajwihan, yajaꞌ, machi hunu mak tiꞌ aqꞌni yaqꞌlobꞌal inkꞌulan.
Sunil ebꞌnaj ayko ishowal winhan abꞌenilo isyaꞌtajil ay wibꞌanhtiꞌan,
kaw xin chitzala ebꞌnaj yu isyaꞌtajil hawayo wibꞌanhan,
yajaꞌ hayet chawanayo isyaꞌtajil yibꞌanh ebꞌnaj yinh istzꞌayikal bꞌay halbꞌilkano hawu,
lahan chiꞌelkaniko ebꞌnaj hakaꞌ chiwaqꞌletiꞌan.
22 Mamin, nati sunil ismul ebꞌnaj,
chawanayo isyaꞌtajil yibꞌanh ebꞌnaj hakaꞌ yu hawanayo isyaꞌtajil wibꞌanhan yu ej inmulan.
Yuto kaw naunhe chiꞌah inkꞌulan yu bꞌiskꞌulal, kaw yaꞌxa wanmahan,» xhi konhobꞌ Sión.