Yaꞌ Sedequías tuꞌ kaw manhkꞌom yute isbꞌa yaꞌ tet naj isreyal Babilonia.

4 Hayet 10 (islahonhebꞌ) tzꞌayik yinh 10 (islahonhebꞌ) ixahaw yet bꞌalonhebꞌxa habꞌil yok yaꞌ Sedequías reyal, yapni naj rey Nabucodonosor yebꞌ sunil issoldado yinh Jerusalén. Iswatxꞌen ebꞌnaj ah Babilonia iscampamento yinhla ishoyanil Jerusalén, iswatxꞌenpaxo ebꞌnaj bꞌay chiyebꞌa isbꞌa yet chiyaqꞌni howal yinh Jerusalén. 5 Hoybꞌilayo konhobꞌ tuꞌ, masanto tzꞌajna 11 (hunlahonhebꞌ) habꞌil yok yaꞌ Sedequías reyal.

6 Haxa yet isbꞌalonhebꞌ tzꞌayik yinh iskanh ixahaw yinh huneꞌ habꞌil tuꞌ yiqꞌnikanh yip wahil yul konhobꞌ Jerusalén, matxa tzet chislo anma yul konhobꞌ tuꞌ. 7 Isholni ebꞌnaj huneꞌ holan yinh iskꞌul iskꞌubꞌal konhobꞌ Jerusalén, yelkanh sunil ebꞌnaj winaj yet howal ah Jerusalén yet aqꞌbꞌalil, yelto ebꞌnaj xolaj istzꞌunubꞌ yaꞌ rey, yelapno ebꞌnaj yul huneꞌ pulta ayko xolbꞌal kabꞌebꞌ majan kꞌubꞌ. Hak tuꞌ yu yok ebꞌnaj yul isbꞌelal txꞌotxꞌ Arabá. Wal ebꞌnaj caldeo xin hoybꞌilayo konhobꞌ Jerusalén tuꞌ yu ebꞌnaj. 8 Yuxin hayet yilni ebꞌnaj soldado ah Caldea yelkanh ebꞌnaj, yok tzujno ebꞌnaj yinta yaꞌ rey Sedequías, istzujchapno yaꞌ yu ebꞌnaj bꞌey yakꞌalil Jericó, isbꞌejlaxkano yaꞌ rey Sedequías tuꞌ yu sunil ebꞌnaj issoldado.

9 Istzabꞌnayo ebꞌnaj yaꞌ rey Sedequías, yinito ebꞌnaj yaꞌ tet naj Nabucodonosor isreyal Babilonia bꞌey konhobꞌ Ribla ay yul ismajul Hamat. Haꞌ bꞌey tuꞌ yal naj Nabucodonosor tzet chꞌeliko yaꞌ rey Sedequías. 10 Ischejni naj rey Babilonia hojlaxokamo ebꞌnaj iskꞌahol yaꞌ rey Sedequías yinh sat, ishojlaxpaxkamo sunil ebꞌnaj nime winaj yahaw konhobꞌ Judá bꞌey Ribla tuꞌ. 11 Wal yaꞌ rey Sedequías ilaxilti isbꞌaqꞌ sat yaꞌ yu naj rey ah Babilonia, iskꞌalbꞌalax yaꞌ yu chꞌen cadena, yilaxto yaꞌ preso bꞌey Babilonia, haꞌ yul preso tuꞌ ayilo istzꞌayikal bꞌay kam yaꞌ.

12 Hayet 10 (lahonhebꞌ) tzꞌayik yinh ishoꞌ ixahaw yet 19 (bꞌalonhlahonhebꞌxa) habꞌil yok naj Nabucodonosor isreyalo Babilonia, yul naj Nabuzaradán bꞌey Jerusalén. Haꞌ naj Nabuzaradán tuꞌ yahawil naj yinh ebꞌnaj chitanhen naj rey Nabucodonosor, yuxin aynhetikꞌako naj sata naj Nabucodonosor yul palacio. 13 Hayet yapni naj Nabuzaradán bꞌey Jerusalén, isnhusnito naj Yatut Komam Dios, yebꞌ yatut yaꞌ rey, yebꞌ sunil teꞌ nha ay bꞌey Jerusalén, isnhusnipaxto naj sunil teꞌ nimeta nha ay yul konhobꞌ 14 Haxa sunil ebꞌnaj soldado caldeo tzujan yinta naj capitán Nabuzaradán yuchkꞌato ebꞌnaj iskꞌubꞌal konhobꞌ Jerusalén. 15 Yinito naj Nabuzaradán haywanh anma mebꞌaꞌ ay yul konhobꞌ Jerusalén bꞌey Babilonia yebꞌ sunil anma kantokano yul konhobꞌ, yebꞌ anma yako isbꞌa yeto naj rey Nabucodonosor, yebꞌ sunil hunteqꞌanxa anma aytokano yul konhobꞌ. 16 Wal naj Nabuzaradán, capitán yinh ebꞌnaj soldado chitanhen naj rey, yakano naj haywanhxa ebꞌnaj mebꞌaꞌ yul konhobꞌ tuꞌ, yu istzꞌunni teꞌ uva yebꞌ yu ismunla sat txꞌotxꞌ.

17 Haꞌ ebꞌnaj caldeo maqꞌnipoho hunteqꞌan yoyal Yatut Komam Jahawil, bronce ayko yinh, yebꞌ huneꞌ niman pila nabꞌa bronce, yet ha haꞌ ay yul Yatut Komam; yinito ebꞌnaj sunil chꞌen bronce bꞌey Babilonia. 18 Yinipaxto ebꞌnaj isnetal tanh, yebꞌ pala, yebꞌ texhelexh chikꞌupnilto ismechahil cantil, yebꞌ nime sekꞌ yebꞌ cuchara yebꞌ sunil munlabꞌal nabꞌa broncenhe chiꞌokniko yinh ismunil yul Yatut Komam Dios. 19 Yinipaxto ebꞌnaj lesen bꞌay chinhuslax pom, yebꞌ nime sekꞌ, yebꞌ chꞌen copa yebꞌ chꞌen xi, yebꞌ candelero, yebꞌ pechꞌan yebꞌ nime sekꞌ; ay munlabꞌal tiꞌ oronhe, aypaxo platanhe, sunil tuꞌ yito naj capitán Nabuzaradán bꞌey Babilonia.

20 Haꞌ hunteqꞌan yaqꞌ watxꞌe yaꞌ rey Salomón yul Yatut Komam Dios kaw machi bꞌischa hanta yalil, haꞌ ton kabꞌebꞌ oy yebꞌ huneꞌ niman pila yet ha haꞌ, yebꞌ kabꞌlahonhebꞌ yechel wakax ayko isbꞌatxobꞌal huneꞌ pila tuꞌ, haꞌ sunil hunteqꞌan tuꞌ broncenhe. 21 Hunun oy tuꞌ ekꞌbꞌal waxajebꞌ metro istel, yebꞌ xin holan yul, hujebꞌ centímetro ispimal, haꞌ xin huneꞌ yelawil hakaꞌ lasu bꞌekꞌbꞌiliko yinh oy tuꞌ howebꞌ metro yok yiktaxa metro istel. 22 Haꞌ iswiꞌta hunun oy tuꞌ, ayko yelawil, broncenhe, ekꞌbꞌal kabꞌ metro yekanh yibꞌanh iswiꞌ oy tuꞌ, haꞌ yinhla ishoyanil tuꞌ, ayko yelawil hakaꞌ txꞌanh hakꞌ, aypaxiko yechel sat teꞌ granada yelawiloj, haꞌ sunil tuꞌ broncenhe. Haktikꞌapax tuꞌ xin huneꞌxa iskabꞌ oy, ayko yechel sat teꞌ granada yelawiloj. 23 Haꞌ yinh hunun txol ay 96 (wajlahonhebꞌ ishokꞌal) yechel teꞌ granada ayko yelawiloj, yajaꞌ yinh sunil, 100 (hokꞌal) yechel teꞌ granada ayko yelawilo yinhla ishoyanil hunun oy tuꞌ.

24 Istzabꞌnayo naj capitán Nabuzaradán yaꞌ Seraías yahawil yinh ebꞌyaꞌ sacerdote yebꞌ yaꞌ Sofonías, iskabꞌ sacerdote, yebꞌ oxwanh ebꞌnaj chitanhen istiꞌ Yatut Komam Dios. 25 Istzabꞌnipaxayo naj capitán huneꞌ naj yahaw ebꞌnaj winaj yet howal, yebꞌ hujwanh ebꞌnaj winaj ay yul konhobꞌ chitzꞌajbꞌan iskꞌul yaꞌ rey, haꞌ ebꞌnaj tuꞌ kaw ismam yuxhta isbꞌa yebꞌ yaꞌ rey, yebꞌ huneꞌ naj yahawil tzꞌibꞌlom xol ebꞌnaj soldado, naj chibꞌisni hanta isbꞌisil ebꞌnaj winaj yet howal ay yul konhobꞌ, yebꞌ 60 (oxkꞌalwanh) ebꞌnaj winaj aytokꞌo yul konhobꞌ. 26 Yinito naj capitán Nabuzaradán sunil ebꞌnaj istzabꞌayo tuꞌ tet naj rey Nabucodonosor bꞌey Ribla. 27 Ismaqꞌnikamo naj rey ah Babilonia ebꞌnaj tuꞌ bꞌey Ribla ay yul ismajul txꞌotxꞌ Hamat.

Hak tuꞌ yu yilaxilo ebꞌnaj Judá sat istxꞌotxꞌ. 28 Haꞌ anma yito naj Nabucodonosor preso, haꞌ ton anma tiꞌ: Hayet hujebꞌxa habꞌil yok naj Nabucodonosor reyalil, yito naj 3,023 anma ah Judá preso. 29 Haxa yet 18 (waxajlahonhebꞌxa) habꞌil yok naj Nabucodonosor reyalil, yito naj 832 anma ah Jerusalén preso. 30 Haxa yet 23 (oxebꞌ iskawinaj) habꞌilxa yok naj reyal, yinito naj capitán, naj Nabuzaradán, 745 anma ah Judá preso. Yuxin haꞌ isbꞌisil anma yinh sunil 4,600.

31 Yet 37 (hujlahonhebꞌxa iskawinaj) habꞌilxa yilaxto yaꞌ Joaquín, isreyal Judá, preso bꞌey Babilonia, yok naj Evil-merodac isreyalo Babilonia. Haꞌ naj rey Evil-merodac tuꞌ kaw kꞌul yil naj yaꞌ rey Joaquín, yuxin yilti naj yaꞌ yul preso yinh kabꞌlahonhebꞌ ixahaw yulbꞌal tzꞌayik 25 (howebꞌ iskawinaj) yet hunxa habꞌil yok naj reyal. 32 Kaw xin kꞌul yu istzotel naj tet yaꞌ hakaꞌto yamigo isbꞌa, yaniko naj ismay yaꞌ istzꞌonhbꞌan naj yaꞌ yul ischem sata hunteqꞌanxa ebꞌnaj rey ayko preso bꞌey Babilonia. 33 Ischejni naj rey Babilonia ta chiyilo yaꞌ Joaquín xil isqꞌap yet ebꞌnaj presowom yinh; hunun tzꞌayik xin iswaꞌ yaꞌ Joaquín iskꞌatanh naj rey ah Babilonia sat ismexha. 34 Haꞌ naj rey Babilonia yaqꞌ naj hunun tzꞌayik tzet chislo yaꞌ Joaquín, yebꞌ tzet chiꞌokniko yu yaꞌ; haknhetikꞌa tuꞌ yu hunun tzꞌayik masanto kamto yaꞌ rey Joaquín.