ISAÍAS
1. HUNEꞌ BꞌABꞌEL MAJAN KUYBꞌANILE
(1:1–39:8)
Huneꞌ niman konhobꞌ mulum
1
Isye Komam Dios yinh sajsatil tet yaꞌ Isaías, iskꞌahol yaꞌ Amoz tzetaj chiyij isbꞌa yinh Judá yebꞌ Jerusalén yinh istiempohal yaꞌ Uzías, yaꞌ Jotam, yaꞌ Acaz yebꞌ yaꞌ Ezequías, ebꞌyaꞌ isreyal Judá.a2 Hach satkanh yebꞌ txꞌo txꞌotxꞌ abꞌewej,
yuto chitzotel Komam Jahawil:
«Waqꞌ chꞌibꞌojan wuninalan, yok anmahil wuhan,
yajaꞌ meltzoko manhkꞌomal wetan.
3 Haꞌ noꞌ wakax, yohta noꞌ yahaw,
hakpax tuꞌ noꞌ burro yohta noꞌ bꞌay chilow yu yahaw,
yajaꞌ wal anma Israel, machi txumcha yu,
machi yitzꞌatil iswiꞌ inkonhobꞌtiꞌan,» xhi Komam.
4 ¡Hex tiꞌ kaw mulum hexkanoj,
tzetkꞌakano istxꞌojal ayko teyibꞌanh,
hex tiꞌ titnaj hex yinh anma kaw txꞌoj, uninale kaw machiswalil heyehi!
¡Xahebꞌejkano Komam Jahawil, xaheyaqꞌtij ishowal isDiosal Israel,
Komam machi nichꞌano istxꞌojal; wal xin xakexmeltzo teyintaj!
5 ¿Tzet yinh xin chito heyoche chiꞌay isyaꞌtajil teyibꞌanh?
¿Tzet yinh xin chito helahiko heyok manhkꞌomal?
Haꞌ sunil hewiꞌ ayxako isyabꞌil, cheyabꞌenpaxo isyaꞌil yul heyanma.
6 Machi nichꞌano iskꞌulal chiꞌilchalo yinh henimanil,
wal xin chiꞌichiti yabꞌil yalanh ispaqꞌanil heyoj masanta chiꞌahapno yinh hechꞌuj.
Ayko islahwilal henimanil tuꞌ, kaw chimali yebꞌ xin lanhan isqꞌatoj.
Haꞌ helahwilal tuꞌ mach anhtebꞌiloj,
mach ayoko ispichil; mach ayoko aceite yinh.
7 Xaꞌetaxkanto hetxꞌotxꞌ, xanhuslaxkanto hekonhobꞌ,
nan anmahil chilonito sat hetzꞌunubꞌ ay sat hetxꞌotxꞌ yinh hesat.
Haꞌ hetxꞌotxꞌ kaw tzꞌinan, hakaꞌ iskan tzꞌinhno txꞌotxꞌ yu ebꞌnaj nan konhobꞌal.b
8 Xabꞌejlaxkano konhobꞌ Siónc hakaꞌ isbꞌejnikano naj tanhem uva ispat aykanh xol teꞌ uva,
maka hakaꞌ yet chisbꞌejnikano naj tanhem melón ispat aykanh xol teꞌ melón;
maka hakaꞌ konhobꞌ hoyaniko ebꞌnaj soldado yinh yu istanhtzeniloj.
9 Tato mach el yinh iskꞌul Komam,
Yahawil kaw aykano yip,
konhyanikano haywanhohonh tiꞌ, lahanmi yu kotanhkanilo yinh hunelnhe
hakaꞌ konhobꞌ Sodoma yebꞌ konhobꞌ Gomorra.
Awtebꞌil anma ishelni isbꞌeybꞌal yinh kaw istoholal
10 ¡Hex yahaw konhobꞌ Jerusalén,
lahan hex hakaꞌ konhobꞌ Sodoma yebꞌ konhobꞌ Gomorra,
abꞌewe istzotiꞌ Komam Jahawil, abꞌewe chejbꞌanile chal koDiosal!
11 Yal Komam Jahawil hakaꞌ tiꞌ:
«¿Tzet chꞌokniko niman hexahanbꞌal wuhan?
Xatibꞌayo wuhan henhusni noꞌ meꞌ wetan yebꞌ ismantecahil no noqꞌ bꞌaqꞌich;
mach chiwochehan ischikꞌil noꞌ wakax, nitam ischikꞌil noꞌ meꞌ,
nitam ischikꞌil noꞌ winaj chiw.
12 ¿Mak chihalni teyet yuxin chexhul insatajan,
cheyiniti hexahanbꞌal wetan, chexanhobꞌtanhen yamaqꞌil watutan?
13 Matxa cheyiti heyebꞌalqꞌabꞌ wetan yuto nabꞌnhe cheyitij,
haꞌ pom chenhus wetan chinyahan,
haꞌ heqꞌinh yet unin ixahaw yebꞌ istzꞌayikal xewilal yebꞌ yet chekutxbꞌan hebꞌa,
mach chischah inwiꞌan; haꞌ heqꞌinh kaw ay yelapnoj cheyekꞌtze,
mach kꞌulo yul insatan.
14 Haꞌ qꞌinh cheyekꞌtze yet unin ixahaw,
yebꞌ qꞌinh kaw ay yelapno yul hesat, kaw chisyah wanmahan,
sikom inxahan tet, matxa chitecha wuhan.
15 Hayet cheyanikanh heqꞌabꞌ wetan,
chiwebꞌato insatan teyet, hakpax tuꞌ xin yet chextxahli wetan,
waxanhka kaw nimajal cheyuteyoj hetxah, mach chiwabꞌehan,
yuto bꞌakbꞌiliko chikꞌ yinh heqꞌabꞌ.
16 Iwelo istxꞌojal teyinh, sajnhewe hebꞌa,
bꞌejwe hewatxꞌen istxꞌojal yinh insatan,
bꞌejwe hewatxꞌen ismachiswalilal.
17 Kuywe hebꞌa hewatxꞌen iskꞌulal,
saywelo istoholal,
kolwelo anma chiꞌetalaxi; watxꞌewe iskꞌulal yinh nixhte unin machi ismam machi ismiꞌ,
kolwahanhwe yinh ebꞌix hunix mebꞌaꞌ.
18 Titanhwe yinh anhe, kowatxꞌewe kobꞌa.
Waxanhka kaw kaj jilni hemul,
yajaꞌ kaw sajxa chiꞌelkaniko hakaꞌ chꞌen sajbꞌat;
waxanhka lahan jilni hemul tuꞌ hakaꞌ qꞌap qꞌap kaj jilni,
wal xin hakaꞌ jilni noꞌ sajla lana chꞌelkanikoj.
19 Tato cheyoche heyabꞌeꞌ tzet chiwaltiꞌan,
chelobꞌ iskꞌulal tzet chꞌel sat txꞌo txꞌotxꞌ.
20 Yajaꞌ ta mach cheyoche xin yu hemanhkꞌomal,
chextanhtzelaxilo yu chꞌen espada,» xhi Komam.
Haꞌ istiꞌ Komam Jahawil halni huneꞌ tiꞌ.
Isyaꞌtajil chitit yibꞌanh Jerusalén yebꞌ yet chikol-laxilo yu Komam
21 Hex konhobꞌ Jerusalén, hex yijem hextikꞌa,
¿tzet yu hemeltzoko txꞌojal hakaꞌ hunu ix ix txꞌoj ye iswiꞌ?
Hayet yalanhtokanoj,
haꞌ istoholal yebꞌ iskꞌulal chebꞌeybꞌalnhe,
¡yajaꞌ wal tinanh nohnaxalo hekonhobꞌ tiꞌ yu ebꞌnaj maqꞌom anma!
22 Haꞌ heplata xameltzoko qꞌalemal,
haxa hevino sombꞌilxa yebꞌ ha haꞌ.
23 Haꞌ ebꞌnaj heyahaw xaꞌok ebꞌnaj manhkꞌomal,
yet lahan isbꞌa ebꞌnaj yebꞌ ebꞌnaj elqꞌom,
sunil ebꞌnaj chiyoche ischabꞌ chꞌen melyu yinh leqꞌtiꞌal,
tzujaniko ebꞌnaj yinta sabꞌehal yet istxꞌojal.
Mach chiswatxꞌe ebꞌnaj iskꞌulal yinh nixhte unin machi ismam machi ismiꞌ,
mach chiskol ebꞌnaj ebꞌix hunix chꞌaqꞌlax ekꞌoyaꞌ.
24 Haꞌ Komam, Yahawil yinh sunil,
Komam kaw aykano yip, isDiosal Israel, chalni hakaꞌ tiꞌ:
«Wal tinanh, yetzanxa, chiwalan tzet chiꞌelkaniko ebꞌnaj ayko ishowal winhan,
chiwaqꞌnihan ispaj tet ebꞌnaj mach chinochenan.
25 Chimeltzo inqꞌabꞌan teyinh,
kat wanayojan isyaꞌtajil teyibꞌanh.
Chiwinilojan sunil istzꞌilal ay teyinh,
kat kexinsajnhenkanojan.
26 Chinwatxꞌekojan ebꞌnaj hejuez yebꞌ ebꞌnaj chiꞌaqꞌni hekuybꞌanil
kat xin yelkaniko ebꞌnaj hakaꞌ yet bꞌabꞌelal.
Hak tiꞌ chihal-lax teyinh: Konhobꞌ yet istoholal yebꞌ konhobꞌ yijem, xhi anma,» xhi Komam.
27 Haꞌ anma ay yul Konhobꞌ Sión chinkolilojan yu istoholal,
anma chisnah isbꞌa yu chishel isbꞌeybꞌal.
28 Yajaꞌ wal anma manhkꞌom yebꞌ mulum chiꞌay isyaꞌtajil yibꞌanh,
haxa mak chinbꞌejnikanojan xin maqꞌbꞌil intanhtzenkanilojan.
29 Hak tuꞌ chu hetxꞌixwikanh yu kexekꞌ jahla yichla teꞌ hih kaw ochebꞌil heyu,
kat yel hepixan yu hesikꞌilo xol hetzꞌunubꞌ bꞌay kexekꞌ jahla sat hetioxh.
30 Yuto lahan chexelkaniko hakaꞌ teꞌ hih chihohayo xaj,
yebꞌ hakaꞌ tzꞌunubꞌ chitajilo manhhaꞌil.
31 Haꞌ ebꞌnaj winaj kaw ay yip,
lahan chiꞌelkaniko ebꞌnaj hakaꞌ teꞌ chꞌim,
haꞌ tzet chiswatxꞌe ebꞌnaj tuꞌ xin chutepaxiko isbꞌa hakaꞌ tzꞌitqꞌaꞌ,
huneꞌnhe xin chu istzꞌato iskabꞌ majanil,
haꞌ qꞌaꞌ chinhusnito tuꞌ, machi mak chu isbꞌutni.