Yet chiꞌok Komam Jahawil yahawilo yinh sunil
2
Haꞌ tzet yil yaꞌ Isaías, iskꞌahol yaꞌ Amoz yinh konhobꞌ Judá yebꞌ yinh konhobꞌ Jerusalén.2 Haxa chꞌeliko yinh islahobꞌal tiempo chiyiqꞌkanh yip wonhan bꞌay ay Yatut Komam Jahawil;
haꞌ wonhan tuꞌ kaw ekꞌbꞌal ay yelapno chiꞌelkaniko xol sunil ej wonhan,
kat yalaxiko ismay xol sunil ej wonhan;
haꞌ tuꞌ chiskutxbꞌa isbꞌa sunil anma ay yul nimeta konhobꞌ.a
3 Chiskutxbꞌako isbꞌa txꞌiꞌal anma chitit yul nime konhobꞌ, chiyalni hakaꞌ tiꞌ:
«Titanhwej kat jahto iswiꞌ wonhan yet Komam Jahawil,
bꞌay ay Yatut Komam Dios, isDiosal yaꞌ Jacob, chonhiskuy Komam kobꞌelwi yinh isbꞌeh,
kat kobꞌelwi yul isbꞌeh tuꞌ,» xhi anma. Yuto haꞌ bꞌey Sión chitit chejbꞌanile,
haxa bꞌey Jerusalén chitit istzotiꞌ Komam Jahawil.b
4 Haꞌ Komam chiꞌok juesal xol nime konhobꞌ,
chiskachni Komam txꞌiꞌal konhobꞌ; haꞌ yespada ebꞌnaj winaj chiꞌoknoko yinh tꞌoko,
haxa istxam islanza ebꞌnaj chiꞌoknoko yinh kꞌupo trigo,
matxa chiyaqꞌle nime konhobꞌ howal yebꞌ hunxa niman konhobꞌ yu chꞌen espada,
matxa chiskuy isbꞌa ebꞌnaj winaj yaqꞌlen howal.
5 Hex yuninal yaꞌ Jacob,
titanhwej kat kobꞌelwi yalanh issajilqꞌinal Komam Jahawil.
Isyaꞌtajil chiyati Komam Jahawil yibꞌanh ebꞌnaj winaj chikanh isbꞌa
6 Mam Jahawil, yeltoni xahabꞌejkano hakonhobꞌ,
haꞌ ton yuninal yaꞌ Jacob,
yuto nohna konhobꞌ tiꞌ yu bꞌeybꞌal hakaꞌ isbꞌeybꞌal anma ay bꞌey yetkꞌulal bꞌay chiꞌahilo tzꞌayik,
yebꞌ yu ebꞌnaj ahbꞌelom hakaꞌ anma ay xol ebꞌnaj filisteo;
iswatxꞌenpaxo ebꞌnaj iskꞌahol yaꞌ Jacob istrato yebꞌ ebꞌnaj nan konhobꞌal.
7 Haꞌ istxꞌotxꞌ ebꞌnaj, nohna yu chꞌen plata yebꞌ yu chꞌen oro,
matxa isbꞌi hanta isqꞌalomal ebꞌnaj.
Nohnapaxo sat istxꞌotxꞌ ebꞌnaj yu noꞌ cheh,
matxa chibꞌischahi hanta iscarruaje ebꞌnaj.
8 Nohnapaxo istxꞌotxꞌ ebꞌnaj yu tioxh,
chꞌay jahno ebꞌnaj sata tzet watxꞌebꞌil yu yiximal isqꞌabꞌ.
9 Chiyinayo isbꞌa ebꞌnaj sata tioxh tuꞌ,
chiyinilo ebꞌnaj ispixan, yuxin mach chawaqꞌ nimankꞌulal yinh ebꞌnaj.
10 ¡Okanhweto yul chꞌen nhachꞌen,
kat heyebꞌanto hebꞌa yul iskꞌul txꞌo txꞌotxꞌ
yu xiwkilal sata Komam Jahawil yu isqꞌaqꞌal ismay!
11 Haꞌ ebꞌnaj loloꞌ chiꞌayo xulno ebꞌnaj, haxa ebꞌnaj kaw chikanh isbꞌa chiꞌilaxayo ebꞌnaj.
Haꞌ yinh huneꞌ tzꞌayikal tuꞌ hanhe Komam Jahawil chiꞌilaxkanh.
12 Yuto chihul istzꞌayikal bꞌay chiꞌay ishowal Komam Jahawil yibꞌanh ebꞌnaj kaw chikanh isbꞌa,
yebꞌ xin ebꞌnaj kaw loloꞌ chute isbꞌa,
kat yel ispixan ebꞌnaj kaw txꞌoj yu Komam Yahawil yinh sunil.
13 Chitit ishowal Komam yinh teꞌ cedro kaw tohol
yebꞌ kaw nime istel ay bꞌey txꞌotxꞌ Líbano,
yebꞌ yinh sunil teꞌ hih ay bꞌey txꞌotxꞌ Basán.
14 Yebꞌ yinh sunil nime witz
yebꞌ yinh sunil wonhan nahat yekanh,
15 yebꞌ yinh sunil torre kaw nahat yekanh,
yebꞌ yinh sunil chꞌen kꞌubꞌ kaw ay yip,
16 yebꞌ yinh sunil teꞌ barco ay bꞌey Tarsis,
kat xin yetalaxpaxto sunil teꞌ barco kaw saqꞌal jilni watxꞌebꞌil.
17 Haꞌ ismay ebꞌnaj nime winaj chute isbꞌa chitanhtzelaxiloj,
haxa ebꞌnaj chiyikanh isbꞌa chiꞌilaxayoj.
Haꞌ yinh huneꞌ tzꞌayik tuꞌ hanhe Komam Jahawil chiꞌilaxkanh.
18 Chistanhtzenilo Komam sunil tioxh,
matxa hunu chikani.
19 Chiyebꞌato isbꞌa anma yulaj chꞌen nhachꞌen
yebꞌ yulaj holan ay sat txꞌo txꞌotxꞌ yu xiwkilal tet isqꞌaqꞌal yip Komam Jahawil,
Komam kaw aykano yelapnoj,
yet chiꞌahwano Komam kat yanayo isyaꞌtajil yibꞌanh txꞌo txꞌotxꞌ.
20 Haꞌ yinh huneꞌ tzꞌayik tuꞌ chisqꞌojayo ebꞌnaj winaj istioxh plata,
yebꞌ istioxh oro tet noꞌ txꞌow yebꞌ tet noꞌ sotzꞌ;
hunteqꞌan iswatxꞌe ebꞌnaj yu yay jahno ebꞌnaj sataj.
21 Chiyebꞌanto isbꞌa anma yulaj isholanil iskꞌul chꞌen chꞌen
yebꞌ yulaj chꞌen nhachꞌen yu xiwkilal tet isqꞌaqꞌal yip Komam Jahawil,
Komam kaw aykano yip, yet istzꞌayikal chꞌah lemna Komam yanoyo isyaꞌtajil yibꞌanh txꞌo txꞌotxꞌ.
22 ¡Bꞌejwe heyaniko naj winaj yipo hekꞌul,
yuto naj winaj haꞌ iskawil naj hanhkꞌanhe yu ishiqꞌni ishaqꞌo yu istxam!
Yuxin ¿tzet yelapnoj ye naj winaj?