2. YET CHꞌOK KOMAM DIOS YAHAWILAL YINH SUNIL ANMA YUL SAT YIBꞌANHQꞌINAL
(4:1–5:15)
Chꞌok Komam Yahawil sat yibꞌanhqꞌinal
4
«Haꞌ yinh islahobꞌal tiempo, haꞌ wonhan bꞌay ay Yatut Komam Jahawil,haꞌ chꞌok iswiꞌehalo yinh ej hunteqꞌanxa wonhan.
Kaw xin ekꞌbꞌal nahat yekanh, kat yapni anma ay yul sunil ej txꞌotxꞌ konhobꞌ bꞌey tuꞌ.
2 Kaw txꞌiꞌal anma yulaj konhobꞌ chihuli chiyalni hakaꞌ tiꞌ:
“Hulanhwej, ahojonhweto yinh iswiꞌ wonhan yet Komam Jahawil.
Ahojonhwetoj kat jokto yul Yatut Komam Dios, isDiosal Jacob,
yu isyeni Komam isbꞌeh jet, kat jekꞌ yul isbꞌeh Komam,” xhi anma.
Yuto haꞌ bꞌey wonhan Sión chal Komam chejbꞌanile jet,
haꞌ bꞌey Jerusalén chaqꞌ Komam istzotiꞌ jet.
3 Haꞌ Komam chiꞌilni yinh tzet chꞌeliko txꞌiꞌal ej konhobꞌ,
kat iskachwa Komam yinh ej txꞌotxꞌ nime konhobꞌ kaw ay yip,
yebꞌpaxo txꞌotxꞌ nahat aya. Haꞌ yespada anma, chꞌalaxiko asaronhal,
haxa chꞌen lanza chaqꞌbꞌalnhe ebꞌnaj,
chꞌalaxiko chꞌen yinh chꞌen kꞌupom trigo.
Matxa hunu txꞌotxꞌ konhobꞌ chꞌah howal yinh hunuxa txꞌotxꞌ konhobꞌ,
matxa mak xin chiswatxꞌe isbꞌa yu isto yinh howal.
4 Chixin ay tzꞌonhno anma xewo yalanh yenhel isqꞌabꞌ yuva,
yebꞌ yalanh yenhel isqꞌabꞌ yiguera,
kaw xin aqꞌankꞌulalxanhe yehi; matxa mak chꞌaqꞌni xiwoj.
Haꞌ Komam Yahawil yinh Sunil, chihalni hakaꞌ tuꞌ yu istiꞌ:a
5 Waxanhka hunteqꞌanxa ej konhobꞌ chiyiyo isbꞌa tet ej istioxh,
yajaꞌ wal kosunil xin haꞌ tet Komam Jahawil,
koDiosal chikoyije yinh sunilbꞌal tiempohal.
Chimeltzo anma Israel yul iskonhobꞌ hunelxa yu Komam
6 »Komam Jahawil chalni hakaꞌ tiꞌ: “Haꞌ yinh huneꞌ tzꞌayik tuꞌ,
chiwitijan inmeꞌan chikotxxi,
kat inkutxbꞌanikojan inmeꞌan kꞌaynatoj,
yebꞌpaxo hunteqꞌan kaw yeta iskꞌul wuhan.b
7 Haꞌ noꞌ chikotxxi tuꞌ, haꞌ ton haywanhxa Israel chitokani, haxa yinh noꞌ kꞌaynatoj,
chinwatxꞌehan huneꞌ niman konhobꞌ,
hanin Yahawilintiꞌan xin, chinokan isreyalo bꞌey wonhan
Sión, rey hinan tinanh yebꞌ sunilbꞌal tiempo.
8 Hach konhobꞌ Jerusalén, lahan hach hakaꞌ hunu torre,
yebꞌ hakaꞌ bꞌay chiskol isbꞌa yuninal Sión.
Lahan chaxheliko hakaꞌ yet yalanhtokanoj,
hach bꞌabꞌel konhobꞌ yinh sunil konhobꞌ,” xhi Komam.
9 Yajaꞌ wal tinanh konhobꞌ Jerusalén,
¿tzet yinh xin kaw chꞌel hawaw chawabꞌen isyaꞌil hakaꞌ hunu ix ix chiwatxꞌi iskꞌul?
¿Tom machi harey xin? ¿Tom xatanhilo ebꞌnaj chꞌaqꞌni hakuybꞌanil?
10 Wal xin elojabꞌ heyaw yebꞌ chexqꞌajwi,
hex konhobꞌ Sión, hakaꞌ hunu ix ix chiwatxꞌi iskꞌul, yuto chexeloto yul konhobꞌ,
kat heyehayo xolaj telaj masanto xin chexapni bꞌey Babilonia, haꞌ bꞌey tuꞌ xin chexkol-laxiloj,
chexyilo Komam Jahawil yul isqꞌabꞌ ebꞌnaj ayko ishowal teyinh.
11 Yajaꞌ kaw txꞌiꞌal ej txꞌotxꞌ konhobꞌ xaꞌiskutxbꞌako isbꞌa, chalni teyinh hakaꞌ tiꞌ:
“Elojabꞌ istxꞌixobꞌal, kat yilni isbꞌaqꞌ kosat tzet xajoche jilaꞌ yinh konhobꞌ Sión,” xhi.
12 Yajaꞌ hunteqꞌan txꞌotxꞌ konhobꞌ tuꞌ,
mach yohtajo tzet chistxum Komam Jahawil yinh,
yebꞌ tzet nabꞌilxa yu Komam iswatxꞌen yinh.
Wal xin chiskutxbꞌako Komam hakaꞌ iskutxbꞌalaxiko iswiꞌ ixim trigo bꞌay chixanhlaxilti sat.
13 ¡Ahanhwewanoj, hex yuninal konhobꞌ Sión,
kat hexanhnikꞌo hunteqꞌan txꞌotxꞌ konhobꞌ tuꞌ!
Chiwaqꞌan heyukꞌaꞌ, lahan hakaꞌ chꞌen hierro, wal heyisqꞌaj xin hakaꞌ chꞌen bronce.
Chexitto txꞌiꞌal ej konhobꞌ, cheyaqꞌni tet Komam Jahawil tzet xayilo hunteqꞌan konhobꞌ tuꞌ tet anma,
cheyaqꞌni isqꞌalomal tet Komam Yahawil yinh sunil txꞌo txꞌotxꞌ.»