Istxꞌojal chiswatxꞌe ebꞌnaj yahawil yinh konhobꞌ Israel
3
Walnihan hakaꞌ tiꞌ:«Wal tinanh abꞌewe tzet chiwalan hex yahawil yinh anma yuninal yaꞌ Jacob,
yebꞌ iswiꞌehal yinh konhobꞌ Israel:
¿Tom mach heyohtajo xin tato haꞌ istoholal yilal hewatxꞌeni?
2 Yajaꞌ wal hex tiꞌ, chexyahwa yinh iskꞌulal kat hexahannhen istxꞌojal;
hex tiꞌ hepatzꞌilo istzꞌumal anma, heyinilo ischibꞌehal ayko yibꞌanh isbꞌajil.
3 Chekꞌuxni ischibꞌehal inkonhobꞌan,
chehokꞌkanh istzꞌumal isnimanil cheqꞌahnito isbꞌajil isnimanil tuꞌ.
Kokꞌ xin cheyuteyoj, hakaꞌta yul txꞌotxꞌ xi chiꞌaytoj,
hakaꞌ chiꞌutelax noꞌ chibꞌe chiꞌayto yul xi.
4 Hayet istzꞌayikal yet chextxahli tet Komam Jahawil mach chispajtze Komam teyet,
wal xin chébꞌalo isbꞌa Komam teyet yuto haꞌ istxꞌojal haꞌ hewatxꞌe.
5 Hak tiꞌ chiyute yalni Komam Jahawil tet ebꞌnaj chejabꞌ chꞌaqꞌni subꞌchaho iskonhobꞌ Komam:
“Hex tiꞌ cheyal hakaꞌ tiꞌ: ‘¡Ay aqꞌankꞌulal!’
kexchi tet mak chꞌaqꞌni tzet cheloh;
haxa tet mak mach chꞌaqꞌni tzet cheloh xin,
cheyala ta chihul howal yinh.
6 Matxa tzet chiyelax tet ebꞌnaj yinh sajsatil yet aqꞌbꞌalil,
matxa chu yalni ebꞌnaj yinh tzꞌayikal tzet chul sata ebꞌnaj.
Chꞌok linhno tzꞌayik yibꞌanh ebꞌnaj,
kat yok qꞌejholo yibꞌanh ebꞌnaj yinh tzꞌayikal,” xhi Komam.
7 Ebꞌnaj chejabꞌ chihalnikꞌo tzet chuli,
chikankano ebꞌnaj yinh txꞌixwilal;
haxa ebꞌnaj ahbꞌelom chꞌah somna yul iswiꞌ ebꞌnaj,
matxa chu istzotel ebꞌnaj yuto mach ispajtze Komam Dios tet ebꞌnaj.
8 Yajaꞌ wal hanintiꞌan, nohnako yip Yespíritu Komam Jahawil winhan,
yebꞌ istoholal yebꞌ wipan walnihan ismanhkꞌomal
anma yikꞌal yaꞌ Jacob,
yebꞌ walnilojan ismul anma Israel.a
9 Wal tinanh abꞌewe hex yahawil yinh anma titna yinh yaꞌ Jacob,
yebꞌ hex iswiꞌehal yinh anma Israel,
hex tiꞌ chexyahwa yinh istoholal,
kat hekotxbꞌan hunteqꞌan chejbꞌanile tohol yehi.
10 Hex tiꞌ chewatxꞌekanh konhobꞌ Sión yibꞌanh ischikꞌil anma malnato heyu,
yebꞌ konhobꞌ Jerusalén yibꞌanh tzet mach toholo chewatxꞌe yinh anma.
11 Ebꞌnaj ayko yahawilo yinh anma, yet chilni ebꞌnaj tzet chꞌeliko anma,
chisqꞌan ebꞌnaj niman melyu.
Haxa ebꞌnaj ayko sacerdotehal xol anma chiskuy ebꞌnaj anma yaj chisqꞌan ebꞌnaj istohol;
haxa ischejabꞌ Komam, chal ebꞌnaj tzet chubꞌ yinh tzꞌayik chul satajiloj, yaj yu chꞌen melyu.
Chalni ebꞌnaj ta Komam Jahawil ayko yetbꞌiho ebꞌnaj, chalni hakaꞌ tiꞌ:
“¿Tom mach ayoko Komam Jahawil kokꞌatanh?
Wal xin machi hunu isyaꞌtajil chihul jibꞌanhanh,” xhi ebꞌnaj.
12 Yu hemul tuꞌ, yuxin konhobꞌ Sión chiꞌokkano bꞌay chitzꞌunlax tzꞌunubꞌ,
haxa Jerusalén chiꞌahkano tenno bꞌitzꞌabꞌ yet chiꞌuchkꞌalaxtoj;
haxa wonhan bꞌay aykanh Yatut Komam Dios, chiꞌokkano telajbꞌal.»