Kꞌanchꞌan ebꞌnaj chiꞌetan anma mebꞌaꞌ
2
«¡Kꞌanchꞌan ebꞌnaj hanhetikꞌa istxꞌojal chꞌekꞌ yinh isnabꞌal yet ay sat istxꞌat,chistxumni iswatxꞌen ismachiswalilal,
haxa yet chisajbꞌilo xin kat yok ebꞌnaj iswatxꞌen tzet isnah tuꞌ, yuto ayko yip ebꞌnaj yul isqꞌabꞌ!
2 Chocheko ebꞌnaj istxꞌotxꞌ anma, kat istziknilo ebꞌnaj tet,
chochenpaxiko ebꞌnaj yatut anma, kat yelqꞌanilo ebꞌnaj tet.
Kaw chiyeta ebꞌnaj anma yebꞌ xin yuninal anma tuꞌ, kat yinikanilo ebꞌnaj istxꞌotxꞌ.»
3 Yuxin chal Komam Jahawil hakaꞌ tiꞌ:
«Hakintuꞌan, lanhan intxumnihan wanayojan isyaꞌtajil yibꞌanh hunteqꞌan ebꞌnaj tuꞌ,
matxa xin chiyu iskolni isbꞌa ebꞌnaj.
Matxa chu iskolni ebꞌnaj isnuqꞌ, matxa chu yah tꞌanhno ebꞌnaj,
yuto ayxayo istzꞌayikal isyaꞌtajil.
4 Haꞌ yinh huneꞌ tiempo tuꞌ, chal anma hunteqꞌan tzotiꞌ yet bꞌiskꞌulal teyinh,
chisbꞌitnhen hakaꞌ tiꞌ: “Chonhtanhtzelaxkanilo yinh hunelnhe.
Haꞌ txꞌotxꞌ kokonhobꞌ aqꞌbꞌil yu Komam Dios, ¡xaꞌishelto Komam txꞌotxꞌ!
¡Xayilo Komam kotxꞌotxꞌ, yaqꞌni tet nan maka,
ispohnito Komam!” xhi anma yinh isbꞌit.
5 Yuxin matxa mak chipohni txꞌo txꞌotxꞌ yinh suertehal yu matxa mak ay yip xol iskonhobꞌ Komam Jahawil.
6 Chalni anma tet ebꞌyaꞌ ischejabꞌ Komam: “Mach chexhul heyalaꞌ isyaꞌtajil chihul jibꞌanhanh,
mach chul hunteqꞌan txꞌixwilal tuꞌ jibꞌanhanh.
7 Wal xin mach ayayo istzꞌaktiꞌ Komam Dios yibꞌanh yikꞌal yaꞌ Jacob.
¿Tom lemanti ishowal Yespíritu Komam Jahawil cheyilaꞌ?
¿Tom hak tiꞌ tzet chiswatxꞌe Komam Dios heyalni?” xhi anma.
Istaqꞌwi Komam: ¿Tom maxhtaj iskꞌulal chal intzotiꞌan yinh mak tohol isbꞌeybꞌal?
8 Ebꞌnaj inkonhobꞌtiꞌan xaꞌok ebꞌnaj howal winhan.
Haꞌ anma kaw chikawxi iskꞌul yinh isbꞌel,
cheyilo iscapa hukaniko yibꞌanh xil isqꞌap, cheyute hakaꞌ mak chul anoko howal yinh.
9 Haꞌ ebꞌix ix ay yul inkonhobꞌan, hetzumbꞌelti ebꞌix yul yatut bꞌay kaw chitzalakto iskꞌul,
haxa nixhte yunin ebꞌix xin, heyilo ispixan yebꞌ ismay aqꞌbꞌil wuhan tet.
10 Ahanhwewanoj kat hetohi, yuto huneꞌ bꞌay ay hex tiꞌ,
mach yeto xewilal yehi,
yuto bꞌakbꞌilto yu istxꞌojal, etaxnato sikꞌlebꞌil.
11 Yajaꞌ tato ay hunu mak chinanikanh tzotiꞌ,
chaniko leqꞌtiꞌal chalni:
“Haꞌ teꞌ vino yebꞌ licor chiwalikꞌojan teyet,” ta xhi.
Haꞌ kꞌul yok inchejabꞌojan teyinh, cheyute heyalni.
12 Yinh kaw yeli chexinkutxbꞌakojan hesunil hex yuninal yaꞌ Jacob,
chinkutxbꞌakojan yinh isyelal haywanhto mak kantokano yinh konhobꞌ Israel.
Chinkutxbꞌakojan anma Israel hakaꞌ noꞌ meꞌ ay bꞌey Bosra.
Hakaꞌ hunu majan noꞌ meꞌ ayikto yiktabꞌal ispeyabꞌ,
haꞌ xin yet chꞌel yaw, lahan yebꞌ huneꞌ niman majan noꞌ meꞌ.
13 Chinbꞌabꞌihan, kat inhajnihan bꞌeh sata ebꞌnaj, kat yelto ebꞌnaj yul pulta.
¡Hanin Yahawilintiꞌan, Isreyal ebꞌnaj, chinbꞌabꞌihan sata ebꞌnaj;
haninan iswiꞌehal yinh ebꞌnaj!» xhi Komam.