Miqueas 5

Bꞌey Belén chiꞌelti huneꞌ mak chikolni konhobꞌ Israel

«Hoybꞌaweko chꞌen kꞌubꞌ teyinh hex konhobꞌ Jerusalén, hex yuninal ebꞌnaj yet howal.

Yuto yulxa ebꞌnaj ayko ishowal teyinh.

Chixin alaxiko islahwilal isqꞌotx naj yahaw Israel yu huneꞌ teꞌ qꞌojoch.

2 Yaj wal hach tiꞌ konhobꞌ Belén Efrata,

kaw txannhechꞌan hach xol konhobꞌ ay bꞌey txꞌotxꞌ

Judá, tawinh chꞌelti huneꞌ mak chꞌok yahawo yinh konhobꞌ Israel;

haꞌ yichmam huneꞌ mak tuꞌ xin kaw payat tiempoxa, mach isbꞌi hayebꞌtaxam tiempo.^a

3 Yajaꞌ chꞌalaxkano ebꞌnaj Israel yu Komam masanto yet chꞌapni istzꞌayikal yet chiwatxꞌi iskꞌul ix yilaltikꞌa iswatxꞌi iskꞌul,

haxa hunteqꞌanxa yuxhta ebꞌnaj Israel tuꞌ, chul ebꞌnaj kat iskutxbꞌanpaxiko isbꞌa yebꞌ ebꞌnaj.

4 Chiꞌahwano yaꞌ chiꞌok yahawo tuꞌ, kat yok yaꞌ istanheno iskonhobꞌ,

haꞌ Komam Jahawil chꞌaqꞌni yip yaꞌ yok istanheno konhobꞌ Israel.

Chaqꞌni Komam Jahawil ismay isbꞌi tet yaꞌ, Komam isDiosal yaꞌ,

kat xin yehikꞌo ebꞌnaj Israel yinh aqꞌankꞌulal, kaw xin niman yelapno chꞌeliko yaꞌ sunil sat txꞌo txꞌotxꞌ.

5 Haꞌ yaꞌ chiꞌaqꞌni aqꞌankꞌulal jet. Haꞌ xin yet chul ebꞌnaj asirio yinh kotxꞌotxꞌ kat yokto ebꞌnaj yul kopalacio,

chijato hujwanh ebꞌnaj yahawil yet howal yinh ebꞌnaj,

yebꞌpaxo waxajwanh ebꞌnaj winaj niman yelapnoj,

6 chistanhtzekanilo ebꞌnaj txꞌotxꞌ Asiria yu chꞌen espada,

chistanhtzenpaxkanilo ebꞌnaj istxꞌotxꞌ naj Nimrod.

Chonhiskolilo yaꞌ rey tuꞌ tet ebꞌnaj asirio chihul yinh kotxꞌotxꞌ,

kat yokti ebꞌnaj yul ismohonal kotxꞌotxꞌ.

7 Haꞌ haywanhxa ebꞌnaj chikankano xol yuninal yaꞌ Jacob,

hakaꞌ yal chew chayo Komam Jahawil,

hak tuꞌ chukaniko ebꞌnaj xol txꞌiꞌal ej konhobꞌ,

yebꞌ hakaꞌ haꞌ nhabꞌ chꞌay yibꞌanh ej tzꞌunubꞌ.

Haꞌ Komam chiꞌaqꞌni yubꞌo huneꞌ tuꞌ,

mach yinho anma chitita.

8 Yebꞌ xin haywanhxa ebꞌnaj kankano xol yuninal yaꞌ Jacob,

lahan hakaꞌ noꞌ bꞌalam xol noꞌ xoltelajil noqꞌ,

hak tuꞌ ye ebꞌnaj xol txꞌiꞌal ej konhobꞌ.

Yebꞌ hakaꞌ noꞌ yunin bꞌalam xol hunbꞌulan noꞌ meꞌ;

chꞌekꞌto noꞌ bꞌalam tuꞌ,

chanayo noꞌ yoj yibꞌanh noꞌ, kat istzilnito noꞌ, noꞌ meꞌ tuꞌ,

machi xin hunu noꞌ chu iskolnilo isbꞌa tet noꞌ.

9 Yuxin ebꞌnaj Israel tuꞌ chiyikanh isqꞌabꞌ yinh ebꞌnaj ayko ishowal yinh,

kat xin istanhtzelaxkanilo ebꞌnaj yu ebꞌnaj.

10 Haꞌ Komam Jahawil chalni hakaꞌ tiꞌ: “Haꞌ yinh hunteqꞌan tzꞌayik tuꞌ,

chiwaqꞌkamojan hecheh yet howal, kat wetankantojan hecarruaje yet howal.

11 Kat intanhtzenilojan ej konhobꞌ ay sat hetxꞌotxꞌ,

kat wuchkꞌanayojan nha kaw kꞌul yehi,

bꞌay chekol hebꞌa tet mak chꞌaniko howal teyinh.

12 Chintanhtzelojan ebꞌnaj nawal texol,

yebꞌ xin matxa hunu ahbꞌelom chiꞌilchahi.

13 Chintanhtzenpaxilojan hunteqꞌan chꞌen chꞌen tzehbꞌil heyu bꞌay cheyiyo hebꞌa, yebꞌ ej hetioxh;

matxa bꞌaqꞌinhal cheyiqꞌaꞌyoj hebꞌa tet hunteqꞌan tioxh watxꞌebꞌil heyu.

14 Chinhokꞌkanhan texol hunteqꞌan teꞌ poste yechel tioxh Asera,

kat xin intanhtzenilojan ej hekonhobꞌ.

15 Yinh sunil inhowalan chinpajtzehan tet hunteqꞌan txꞌotxꞌ konhobꞌ mach yijemoj wetan,” xhi Komam.»