3. ISTXꞌOJAL ANMA ISRAEL YEBꞌ ISKꞌULCHꞌANIL ISKꞌUL KOMAM DIOS
(6:1–7:20)
Komam Jahawil chaqꞌ howal yebꞌ Israel
6
Abꞌewe tinanh yinh tzet chal Komam Jahawil:«Ahanhwewanoj, halwe tzotiꞌ chexkolnilo yinh sat ej wonhan,
kat yabꞌen ej witz yul henuqꞌ.
2 Hex wonhan yebꞌ isxeꞌal txꞌo txꞌotxꞌ kaw mach chibꞌili,
abꞌewe howal chiyaqꞌ Komam.
Ay huneꞌ howal chaqꞌ Komam Jahawil yebꞌ iskonhobꞌ,
chiskajle isbꞌa yebꞌ konhobꞌ Israel.
3 Hex inkonhobꞌtiꞌan,
¿tzet kexwutehan maka tzet istxꞌojal xaꞌinwatxꞌehan teyinh?
Halwe wetan tzet xaꞌinwatxꞌehan teyinh.
4 Haninan kexwilojan sat txꞌotxꞌ Egipto,
kexinkolnilojan bꞌay ayexiko chejabꞌoj.
Wanitojan yaꞌ Moisés yebꞌ yaꞌ Aarón yebꞌ ix María tesataj.
5 Hex inkonhobꞌtiꞌan, nawetij yinh tzet istxumiko naj Balac teyinh, naj isreyal Moab,
yebꞌ tzet ispaj yaqꞌ naj Balaam teyet, naj iskꞌahol naj Beor;
yebꞌ nawetij yet heyekꞌ bꞌey konhobꞌ Sitim,
heyapni bꞌey Gilgal, yu heyohtanhen istoholal chinwatxꞌehan,
hanin Yahawilintiꞌan,» xhi Komam.
6 Yalni ebꞌnaj Israel: «¿Tzettaxka chijalte tet Komam Jahawil yet chonhok sata Komam,
yebꞌ yu jinayo kobꞌa tet Komam Dios kaw niman yelapnoj?
¿Chimkonhok sata Komam, chijaqꞌni noꞌ wakax huneꞌ habꞌil yinh xahanbꞌal chitzꞌay tet Komam?
7 ¿Chimtzala Komam Jahawil ta chijalte hayebꞌtam mil noꞌ meꞌ xahanbꞌalil tet Komam,
maka 10 (lahonhebꞌ) mil litro teꞌ aceite chꞌel yojomal hakaꞌ ha haꞌ? ¿Chimjaqꞌ
kobꞌabꞌel kꞌahol tet Komam istoholo komanhkꞌomal yebꞌ komul?» xhi ebꞌnaj Israel.
8 «Hex wet konhobꞌ, xayal Komam teyet tzet ye tuꞌ kꞌul, yebꞌ tzet chisqꞌan Komam teyet,
wal xin haꞌ hewatxꞌen istoholal yebꞌ iskꞌulchꞌanil hekꞌul,
yebꞌ heyinayo hebꞌa sata Komam Dios heDiosal.»
9 Chiꞌawi Komam Jahawil tet konhobꞌ:
«¡Haꞌ mak chixiw wetan hanin Yahawilintiꞌan, haꞌ ay ishelanil!
Abꞌewe isyaꞌtajil chihal-laxi ta chul teyibꞌanh,
yebꞌ abꞌewe tet mak chihalni ta chij isbꞌa.
10 ¿Tom chito kꞌaykꞌulal wuhan, to haꞌ bꞌey yatut ebꞌnaj txꞌoj, tzetkꞌaxa qꞌalomal kꞌuwan;
hunteqꞌan iqꞌbꞌil yu ebꞌnaj yinh istxꞌojal,
yebꞌpaxo xin hunteqꞌanxa malbꞌal mach tzꞌajanoj, hunteqꞌan chinyahan?
11 Ebꞌnaj chiyaqꞌbꞌalnhe malbꞌal mach tzꞌajanoj yebꞌ txꞌuy malbꞌal chꞌelqꞌawi,
¿tom chiꞌekꞌayo wanayojan isyaꞌtajil yibꞌanh ebꞌnaj?
12 Ebꞌnaj qꞌalom ay yul konhobꞌ tuꞌ, kaw tzetkꞌakano yeleqꞌ ebꞌnaj,
haxa anma ay yul konhobꞌ tuꞌ xin, leqꞌtiꞌalnhetikꞌa chala,
haxa yaqꞌ xin chꞌaqꞌni subꞌchaho anma.
13 Yuxin chiwayojan isyaꞌtajil teyibꞌanh,
chexintanhtzenilojan yu hemul.
14 Hayet chexwaꞌi, mach chinoh hekꞌul,
tonhetikꞌa xin cheyaqꞌle wahil,
haꞌ sat hetzꞌunubꞌ chekutxbꞌakanh, matxa nichꞌano chikolchalo heyu,
haꞌ xin tzet chiqꞌoji hekolniloj chintanhtzelojan xol howal.
15 Chetzꞌun hetzꞌunubꞌ, yajaꞌ maxhtaj hex cheyikanh.
Chexanhilti teꞌ aceituna yunhe yelti teꞌ aceite yinh teꞌ,
yajaꞌ mach chꞌahlaxayo teꞌ aceite tuꞌ yibꞌanh hewiꞌ;
chexanhpaxilti yal teꞌ uva, yajaꞌ mach cheyukꞌ yal teꞌ.
16 Haꞌ ischejbꞌanil naj Omri cheyije,
chewatxꞌen tzet iswatxꞌe naj Acab yebꞌ yuninal,
haꞌ xin yinta iskuybꞌanil ebꞌnaj tzujan hex;
yuxin chexintanhtzekanilojan, haxa anma yul hekonhobꞌ chitzeyelaxi.
Hak tuꞌ chu heyabꞌen isyaꞌil txꞌixwilal sata ebꞌnaj inkonhobꞌan,»a xhi Komam Jahawil.