Istxꞌojal Konhobꞌ Israel
7
«Kꞌanchꞌan hinan, lahan wekojan hakaꞌ mak chisayni teꞌ uva maka teꞌhigo yet xaꞌilaxkanh sat tzꞌunubꞌ,
yebꞌ yet xapitzꞌnhelaxkanh teꞌ, yet xaꞌel hajan.
Matxa xin hunu chayano teꞌ kankanoj yu islolaxi,
nitam hunu sat teꞌ kaw yoche wanmahan islobꞌ.
2 Matxa hunu mak ay sat txꞌo txꞌotxꞌ ayko iskꞌulchꞌanil iskꞌul Komam Dios yinh.
Matxa mak chiwatxꞌen istoholal xol ebꞌnaj winaj. Haꞌ tzet chissay ebꞌnaj,
haꞌ yaqꞌnikamo yet anmahil, chanayo ebꞌnaj latzꞌabꞌ sata yuxhtaj.
3 Kuywawom ebꞌnaj yinh iswatxꞌen istxꞌojal;
ebꞌnaj ayko yahawiloj chisqꞌan ebꞌnaj melyu tet anma;
haxa ebꞌnaj juez chꞌaqꞌlax sabꞌehal tet ebꞌnaj chiswatxꞌen ebꞌnaj tzet choche iskꞌul anma;
haxa ebꞌnaj niman yelapnoj, haꞌ tzet choche yanma ebꞌnaj,
haꞌ chal ebꞌnaj, chalni ebꞌnaj tato tꞌinhan yeko ebꞌnaj.
4 Ebꞌnaj kaw kꞌul, lahan ebꞌnaj hakaꞌ teꞌ txꞌix;
haxa ebꞌnaj kaw tohol, lahan hakaꞌ teꞌ zarza.
Chul istzꞌayikal bꞌay chul isyaꞌtajil yibꞌanh ebꞌnaj,
hakaꞌtikꞌa yu yalni ebꞌyaꞌ ischejabꞌ Komam Dios;
matxa xin chitxumcha yu ebꞌnaj tzet chute isbꞌa.
5 Yuxin mach chawayto yul hawanma yinh tzet chal ebꞌnaj hawamigo,
mach chikawxipaxo hakꞌul yinh ebꞌnaj yahaw konhobꞌ yebꞌ xin ix chiway takꞌatanh,
mach chawal tzet chꞌekꞌ yinh hanabꞌal tet ix.
6 Ebꞌnaj kꞌahole mach chisxahannhe ebꞌnaj ismam,
haxa ebꞌix uninale chiꞌah ebꞌix howal yinh ismiꞌ,
hakpax tuꞌ ebꞌix alibꞌe chiꞌah ebꞌix howal yinh ixnam alibꞌe.
Haꞌtikꞌa mak ayto ju kobꞌa yebꞌi haꞌ chiꞌok howal jinh.
7 Yajaꞌ wal hanintiꞌan haꞌ yinh Komam Jahawil chikawxi inkꞌulan,
chiwechmanan iskolwal Komam Dios inKolomalan;
haꞌ Komam inDiosalan chiꞌabꞌen tzet chiwalan.
Chaqꞌ Komam Jahawil sajilqꞌinal yebꞌ kolbꞌanile tet anma Israel
8 »Hach ayiko hahowal winhan, mach chaxhtzalahi yuto waxanhka kinaykꞌayan,
yajaꞌ chinahwanojan hunelxa; waxanhka kinehayojan xol qꞌejholo,
yajaꞌ Komam Jahawil, haꞌ sajilqꞌinal winhan.
9 Wako inmulan tet Komam Jahawil,
yuxin chiwaqꞌtechahojan ishowal Komam winhan
masanto yet chilni Komam tzet chinelikojan chiswatxꞌen istoholal winhan.
Haꞌ Komam chinanikojan xol sajilqꞌinal,
chiwilnihan istoholal chiswatxꞌe Komam winhan.
10 Hayet chawilni huneꞌ tuꞌ, hach ayko hahowal winhan,
chaxhtxꞌixwikanh. Hach hawal hakaꞌ tiꞌ:
“¿Bꞌaytuꞌwal ay Hawahawil haDiosal?” kachi.
Haxa tinanh xin haninan chiwilan haxanhobꞌtanhelaxi,
hakaꞌ isxanhlaxikꞌo tzꞌotzꞌew yulaj bꞌeh.
11 Jerusalén, chihul tzꞌayik bꞌay chiwatxꞌelaxpaxokanh hakꞌubꞌal yinh yakꞌtohal,
haꞌ yinh huneꞌ tzꞌayik tuꞌ chihitzto bꞌay chꞌalaxiko chꞌen kꞌubꞌ tuꞌ.a
12 Haꞌ yinh huneꞌ tzꞌayik tuꞌ, sunil ej konhobꞌ chihul tasataj, chiꞌichiti bꞌey Asiria masanta Egipto,
konhobꞌ hoybꞌil yu chꞌen kꞌubꞌ, kat istit anma bꞌey haꞌ Nilo masanta bꞌey haꞌ Éufrates;
chititpaxo anma ay bꞌey istiꞌ haꞌ mar masanta bꞌey istiꞌ hunxa haꞌ mar,
chititpaxo anma bꞌay ay ej wonhan masanta bꞌey hunteqꞌanxa wonhan.
13 Yuto haꞌ istxꞌotxꞌ hunteqꞌan anma tuꞌ,
chikankano tzꞌinhnoj, yu ismul, haꞌ ispaj selel chꞌaqꞌlax tet yu tzet iswatxꞌe.
Iskꞌulchꞌanil iskꞌul Komam Jahawil yinh konhobꞌ Israel
14 »Mamin, tanhe hakonhobꞌ. Tanhe hunbꞌulan hameꞌ hawet yehi,
aykano ischukil bꞌey ej qꞌebꞌtalaj bꞌay kaw kꞌul txꞌo txꞌotxꞌ.
Tanhe hameꞌ bꞌey Basán yebꞌ bꞌey Galaad hakaꞌtikꞌa yet payxa.
15 Yalni Komam: “Chinyehan kꞌaybꞌalkꞌule heyilaꞌ,
hakaꞌ wuhan yet huneꞌ tzꞌayik yet kexwiniltijan sat txꞌotxꞌ Egipto.
16 Hayet chilni ej txꞌotxꞌ nime konhobꞌ kat istxꞌixwikanh, waxanhka kaw aykano yip,
kat ismajchen istiꞌ yu isqꞌabꞌ, kat ismajchen istxikin,” xhi Komam.
17 Chisleqꞌ ej konhobꞌ tuꞌ pojoj hakaꞌ noꞌ labꞌa, hakaꞌ ej noꞌ labꞌa chꞌekꞌ sat txꞌo txꞌotxꞌ;
kat xin isbꞌilikanh yu xiwkilal yul isnhachꞌen.
Matxa xin yip sata Komam Jahawil koDiosal, yu xiwkilal.
18 ¿Mak hunu Dios hakaꞌ hach tiꞌ, yuto chawaqꞌ nimankꞌulal,
kat hanahulnhento ismul haywanhxa anma Israel chitokan yinh hakonhobꞌ?
Mach yinh hunelnhe hawakanayo hahowal yuto ekꞌbꞌal chaxhtzala yu iskꞌulchꞌanil hakꞌul jinhanh.
19 Tzꞌayojabꞌ hakꞌul jinhanh hunelxa, kat xin hamujnikanto kotxꞌojalanh,
kat hawanayto sunil komulanh yich haꞌ mar.
20 Ayojabꞌ iskꞌulchꞌanil hakꞌul; chonhhaxahannhenanh Mamin,
hakaꞌ yu hawalni yettax payat tet yaꞌ Abraham yebꞌ tet yaꞌ Jacob, jichmamanh.»