Isyaꞌtajil chiyati Komam Dios yibꞌanh konhobꞌ Judá yebꞌ yibꞌanh Jerusalén
3
Yuto Komam Jahawil, kaw aykano yip,haꞌ chiꞌinilo ebꞌnaj winaj kolwawom yinh anma yebꞌ ebꞌnaj winaj
bꞌay chikawxi iskꞌul anma bꞌey konhobꞌ Jerusalén yebꞌ konhobꞌ Judá,
chiyinipaxilo Komam tzet chislo ebꞌnaj yebꞌ ha haꞌ chukꞌ ebꞌnaj.
2 Chiyinipaxilo Komam ebꞌnaj winaj kaw ay yip,
yebꞌ ebꞌnaj helan yinh howal, ebꞌnaj juez,
ebꞌnaj ischejabꞌ Komam, yebꞌ ebꞌnaj ahbꞌelom,
yebꞌ ebꞌnaj ichamta winaj ijbꞌalom.
3 Chiyinilo Komam ebꞌnaj yahaw yeko yinh 50 (lahonhebꞌ yoxkꞌal) soldado
yebꞌ ebꞌnaj ay yelapno sata anma,
yebꞌ ebꞌnaj chiꞌaqꞌni kuybꞌanile,
yebꞌ ebꞌnaj chiwatxꞌen tzetaj ye tuꞌ kaw kꞌul,
yebꞌ ebꞌnaj kaw helan istzoteli.
4 Chiyaniko Komam ebꞌnaj tzehtaj yahawiloj,
yebꞌ ebꞌnaj nixhte tzehtaj iswiꞌehaloj.
5 Chiyaqꞌlenkanh anma howal yinh yet anmahil,
haꞌtikꞌa mak ayayo yatut iskawilal hunxa maka,
haꞌ yebꞌ chaqꞌlekanh howal.
Ebꞌnaj tzehtaj chiꞌok ebꞌnaj howal yinh ebꞌnaj ichamtaj,
haꞌ anma komon chiꞌok howal yinh anma kaw ay yelapnoj.
6 Hayet tuꞌ chiꞌoktzabꞌno hunu naj yinh isqꞌabꞌ hunu yet konhobꞌ ayto yu isbꞌa yebꞌ ismam,
chalni naj tet naj: «Hach tiꞌ kaw ay xil haqꞌap,
chaxhok jahawilojanh tinanh, chonhhakolilojanh xol isyaꞌtajil ayayo koxol,» xhi naj.
7 Haꞌ yinh huneꞌ tzꞌayik tuꞌ, chitaqꞌwi naj,
chaqꞌni bꞌinaho naj isbꞌi Komam Dios, chalni naj:
«¡Mach chinokan yinh huneꞌ munil tiꞌ,
haꞌ yul watutan matzet chinlohan,
machipaxo xil inqꞌapan, mach chinhawakojan yahawo konhobꞌ!» xhi naj.
8 Yuto haꞌ Jerusalén xaꞌuchkꞌalaxkantoj,
haxa Judá xatanhiloj, yuto txꞌoj istzotel anma tuꞌ yinh Komam Jahawil,
yebꞌ xin txꞌoj tzet chiswatxꞌe sata Komam;
xayaqꞌ tij ishowal Komam, Komam kaw aykano isqꞌaqꞌal yip.
9 Haꞌ sat ebꞌnaj chalnilo istxꞌojal chiswatxꞌe,
yuto lahan yebꞌ anma Sodoma chalikꞌo ebꞌnaj ismul, mach chebꞌa nino ismul.
¡Kaw kꞌanchꞌan yanma hunteqꞌan anma tuꞌ!
Lanhan istenbꞌaniko ismul yibꞌanh.
10 Hal tet anma tohol isbꞌeybꞌal tato kꞌul chiyila,
yuto chischah ispaj iskꞌulal chiswatxꞌe.
11 ¡Kꞌanchꞌan anma txꞌoj chiswatxꞌe, txꞌoj chischah!
Yuto haꞌ tzet chiswatxꞌe, haꞌ chiꞌaqꞌlax ispajo tet.
12 Tzehtaj ebꞌnaj chiꞌetan inkonhobꞌtiꞌan,
ixpaxo ebꞌix chꞌaqꞌni yahawilal yibꞌanh. Hex inkonhobꞌ,
haꞌ mak chexijbꞌani chiyako leqꞌtiꞌal teyet,
chexyaqꞌni kꞌayoto yinh hebꞌel.
13 Haꞌ Komam Jahawil linhankanh,
hakaꞌ juez yu yilni tzet chiꞌeliko ej konhobꞌ.
14 Chul yilaꞌ tzet chiꞌeliko ebꞌnaj ichamta winaj ijbꞌalom yinh iskonhobꞌ
yebꞌ ebꞌnaj yahawil yeko yinh iskonhobꞌ.
Chalni Komam hakaꞌ tiꞌ: «Hex tiꞌ xahetanhtzelo teꞌ uva yu heloyto sat teꞌ;
yebꞌ xin haꞌ tzet cheyelqꞌalo tet anma mebꞌaꞌ kꞌuwan heyu yul heyatut.
15 ¿Tzet hetxumni yuxin cheyeta inkonhobꞌan,
hakaꞌto chexanhobꞌtanhe sat anma mebꞌaꞌ?» xhi Komam Jahawil, kaw aykano yip.
Isyaꞌtajil chitit yibꞌanh ebꞌix ix ay bꞌey Sión
16 Chalnipaxo Komam Jahawil tato ebꞌix ix ah Sión, ebꞌix kaw loloꞌ chute isbꞌa,
kaw nahat yekanh isnuqꞌ yet chiꞌekꞌi, machi txꞌixwi nino isbꞌaqꞌ sat,
hayet chꞌekꞌ ebꞌix chikanhalwi, toxanhe chitzꞌinhtzꞌon tzet ayko yinh yoj ebꞌix yet chibꞌelwi.
17 Yuxin haꞌ Komam Jahawil chiꞌinilo xil iswiꞌ ebꞌix ah Sión, yu yel ispixan ebꞌix.
18 Hayet huneꞌ tzꞌayik tuꞌ,
haꞌ Komam chiꞌinilo yelawil yoj ebꞌix,
yebꞌ yelawil iswiꞌ ebꞌix yebꞌ yelawil isnuqꞌ ebꞌix.
19 Chiyinilo chꞌen uwe, chꞌen ome, chꞌen yelawil isnuqꞌ isqꞌabꞌ ebꞌix.
20 Chiꞌelkano yenhel iswiꞌ ebꞌix yebꞌ xin istxꞌambꞌal ebꞌix,
yebꞌ yelawil xil iswiꞌ ebꞌix, yebꞌ isperfume ebꞌix, yebꞌ yelawil istxikin ebꞌix;
21 yebꞌ chꞌen jolqꞌabꞌ yebꞌ chꞌen ayiko yelawilo istxam ebꞌix,
22 yebꞌ xil isqꞌap ebꞌix, qꞌap kaw kꞌul,
qꞌap chishukbꞌako ebꞌix yibꞌanh xil isqꞌap,
qꞌap yenhel sat ebꞌix, yebꞌ istxꞌuy ebꞌix.
23 Chꞌen espejo yebꞌ qꞌap lino kaw kꞌul,
yelawil chisutꞌnayo xil iswiꞌ, yebꞌ ispix ebꞌix.
24 Haꞌ selelo anh kaw xuqꞌ sam,
haꞌ tzet ye tuꞌ kaw ay sam chiꞌaqꞌlax tet ebꞌix,
kat yalaxiko txꞌanh yinh yikta ebꞌix selelo iskꞌalil yiktaj,
xil iswiꞌ kaw kꞌulchꞌan jilni chihowayoj,
haꞌ xilqꞌape kaw kꞌulchꞌan jilni,
haxa qꞌap yet bꞌiskꞌulal chiꞌaqꞌlax seleloj,
chinhuslaxpaxo isnimanil ebꞌix hakaꞌ yalaxiko yechel no noqꞌ,
selelo istzanten isbꞌa ebꞌix.a
25 Haꞌ ebꞌnaj winaj
chitanhtzelaxilo ebꞌnaj yu chꞌen espada,
haꞌ yip ebꞌnaj xin chitanhilo yu howal.
26 Haꞌ konhobꞌ chꞌoqꞌkanokanh, kat xin iskankano yinh bꞌiskꞌulal.
Chibꞌejlaxkano konhobꞌ tuꞌ,
kat yaykano tzꞌonhno sat txꞌotxꞌ.