4
Haꞌ yinh hunteqꞌan tiempo tuꞌ matxa ebꞌnaj winaj chikankanoj,chiyaqꞌlekaniko howal hujwanh ebꞌix ix yinh huneꞌ naj winaj,
chiyalni ebꞌix tet naj:
«¡Okojonhanh hawixaloj, hanhkawonhanh chikolotze kobꞌahanh,
chikoqꞌaptzenpaxo kobꞌahanh, tanhe chaxhbꞌinako jichamilojanh,
haxinwal mach chꞌel kopixananh!» xhi ebꞌix.a
Iskꞌulchꞌanil chꞌeliko Jerusalén yet bꞌaqꞌinh
2 Haꞌ yinh hunteqꞌan tiempo tuꞌ chiyati Komam Dios Jahawil huneꞌ Mak hakaꞌ iswol te teꞌ xol konhobꞌ Israel.
Haꞌ huneꞌ Mak tuꞌ, haꞌ iskꞌulchꞌanil konhobꞌ, yebꞌ haꞌ ismay konhobꞌ.
Haxa sat tzꞌunubꞌ chaqꞌ sat txꞌo txꞌotxꞌ kaw kꞌulkanoj,
haꞌ chꞌok ismayo anma Israel chikankanoj.b
3 Haꞌ tzet chꞌelkanikoj, haꞌ makta chikankano bꞌey Sión, haꞌ ton anma itzitzto bꞌey Jerusalén, chihal-lax yinh tato yet Komam Jahawil yehi. 4 Hayet chilni Komam Jahawil tzet chiꞌeliko anma, chaniti isyaꞌtajil yu isxobꞌ istiꞌ, chistxꞌahni istxꞌojal ebꞌix ah Sión, chissajnhen Komam konhobꞌ Jerusalén tet ischikꞌil anma maqꞌbꞌilkano yu ebꞌnaj maqꞌom. 5 Yet tzꞌayikal chiyati Komam Jahawil qꞌej moyan yibꞌanh sunil wonhan Sión, yebꞌ yibꞌanh bꞌay chiskutxbꞌa isbꞌa anma, haxa yet aqꞌbꞌalil chiyati xaj qꞌa qꞌaꞌ chitzejlahi, chiꞌay isqꞌaqꞌal yip Komam yenhelo yibꞌanh konhobꞌ. 6 Haꞌ chiꞌok yenhelo konhobꞌ tet qꞌaꞌ yet tzꞌayikal, kat iskolnilo tet nime jaqꞌeqꞌ yebꞌ tet nhabꞌ.