JEREMÍAS
1. KACHBꞌANILE YINH JUDÁ YEBꞌ YINH JERUSALÉN
(1:1–25:38)
Awtelax yaꞌ Jeremías yu yok ischejabꞌo Komam Dios
1
Tzotiꞌ yal yaꞌ Jeremías iskꞌahol yaꞌ sacerdote Hilcías, ekꞌlena bꞌey konhobꞌ Anatot, ay yul ismajul istxꞌotxꞌ ebꞌnaj Benjamín. 2 Hayet 13 (oxlahonhebꞌxa) habꞌil yok yaꞌ Josías, iskꞌahol yaꞌ Amón isreyalo ebꞌnaj Judá, yichi istzotel Komam Jahawil tet yaꞌ Jeremías; 3 tzotelpaxo Komam tet yaꞌ yinh istiempohal yet ayko yaꞌ Joacim, iskꞌahol yaꞌ Josías isreyalo Judá masanto yinh yet 11 (hunlahonhebꞌxa) habꞌil yok yaꞌ Sedequías, iskꞌahol yaꞌ Josías, isreyalo Judá, haꞌ ton yet yilaxto anma Jerusalén preso bꞌey txꞌotxꞌ Babilonia yinh ishoꞌ ixahaw yul huneꞌ habꞌil tuꞌ.a4 Tzotel Komam Jahawil wetan, hanin Jeremías intiꞌan, yalni hakaꞌ tiꞌ:
5 «Hayet yalanhto maxhto chachpitzkꞌati yinh hamiꞌ ohtabꞌil hachxa wuhan,
hayet maxhto chachpitzkꞌahi,
kach inpohnilojan yu hawok inchejabꞌojan xolaj nimeta konhobꞌ,» xhi Komam wetan.
6 Intaqꞌwihan tet Komam, walnihan:
«¡Ay! Mamin, Wahawilan, hanintiꞌan mach wohtajojan yinh tzet chu intzotelan,
yuto nichꞌan tzeh intohan,» kinchihan.
7 Yalni Komam Jahawil wetan:
«Mach chawala tato nichꞌan tzeh hach,
yuto sunil bꞌayejtuꞌwal chachinchejtojan chachtohi, kat hawalni sunil tzet chinchejan hawalaꞌ.
8 Mach chachxiw tet ebꞌnaj winaj,
yuto hanin Yahawilintiꞌan ayinikojan hawetbꞌihoj yu kach inkolnihan,» xhi Komam Jahawil.
9 Yaniti Komam Jahawil isqꞌabꞌ, istzabꞌni intiꞌan, yalni wetan:
«Haꞌ tinanh mawakanikojan intzotiꞌan yinh hatiꞌ.
10 Ilkꞌanabꞌi, haꞌ yinh huneꞌ tzꞌayik tiꞌ
mawaqꞌkanojan hawip yibꞌanh ej nime konhobꞌ yebꞌ yibꞌanh ej nixhte konhobꞌ,
yu hahokꞌnikanokanh,
yu hakꞌaytzeniloj,
yu hawuchkꞌantoj,
yu yaykano wuynahi.
Aypaxo xin chawatxꞌekanh, aypaxo xin chatzꞌunayoj,» xhi Komam wetan.
11 Istzotelpaxo Komam Jahawil wetan: «Hach Jeremías, ¿tzet lanhan hawilni tiꞌ?» xhi wetan. Intaqꞌwihan: «Huneꞌ isqꞌabꞌ teꞌ almendro chiwilan,» kinchihan. 12 Yalni Komam Jahawil wetan: «Yel chawala, yuto hanintiꞌan ayinikojan wilnojan yijni isbꞌa intzotiꞌan yinh anhe,» xhi Komam.
13 Istzotelpaxo Komam Jahawil wetan yinh iskayelal yalni hakaꞌ tiꞌ: «¿Tzet chawil tiꞌ?» xhi Komam. Intaqꞌwihan: «Huneꞌ txꞌotxꞌ xi chihuji, chiwilan, lanhanxa ismaltij, qꞌeyanxalo yinh iskꞌul norte,» kinchihan.b
14 Yalni Komam Jahawil wetan:
«Haꞌ yinh yetkꞌulal norte tuꞌ chibꞌejtzolaxti isyaꞌtajil,
kat yul yibꞌanh sunil anma ay bꞌey tiꞌ.
15 Haninan kaw chiwalan tawet,
tato chiwawtetijan ebꞌnaj isreyal nimeta konhobꞌ ay bꞌey yetkꞌulal norte kat yuli,
kat iswatxꞌenkanh iscampamento istiꞌ ispultahil Jerusalén yebꞌ yinhla ishoyanil sunil iskꞌubꞌal,
chiswatxꞌenpaxo iscampamento yinhla ishoyanil sunil konhobꞌ ay yul ismajul Judá.
16 Chiwatijan isyaꞌtajil yibꞌanh anma tiꞌ yu sunil ismul,
yuto kinisbꞌejkanojan,
isnhusni pom tet istioxh chiyal isdiosaloj;
chiyinayo isbꞌa sata hunteqꞌan tioxh haꞌ kaw isqꞌabꞌ watxꞌenhe.
17 Yuxin ahanhwanoj,
kawxeko iskꞌalil hawiktaj yinh kaw kꞌul,
kat hato hawalnokꞌo sunil tzet chinchejan hawalaꞌ.
Mach chachxiw tet ebꞌnaj hawet konhobꞌ tiꞌ, haxinwal mach chachwaqꞌxiwojan sata ebꞌnaj.
18 Yuto haꞌ yinh huneꞌ tzꞌayik tiꞌ chachwakanikojan hakaꞌ hunu konhobꞌ kaw ay yip hoyaniko iskꞌubꞌal,
yebꞌ hakaꞌ hunu oy ayko chꞌen hierro xol,
yebꞌ hakaꞌ hunu kꞌubꞌ bronce ayko ischꞌenaloj,
yunhe ay hawip hawalnikꞌo intzotiꞌan sata anma tiꞌ,
yebꞌ tet ebꞌnaj isreyal Judá,
yebꞌ tet ebꞌnaj yahaw konhobꞌ,
yebꞌ tet ebꞌyaꞌ sacerdote,
yebꞌ tet konhobꞌ tiꞌ.
19 Chiyaqꞌako ebꞌnaj howal tawinh,
yajaꞌ mach chiqꞌoji ebꞌnaj yuto ayinikojan hawetbꞌihoj,
yu kach inkolnihan,» xhi Komam Jahawil.