Ismanhkꞌomal ebꞌnaj Israel tet Komam Jahawil
2
Tzotel Komam Jahawil wetan, yalni hakaꞌ tiꞌ:2 «Asiꞌ, kat hawalni tet anma ah Jerusalén hakaꞌ tiꞌ,
hak tiꞌ yalni Komam Jahawil: “Chinnatijan yet yijem hex wetan yet hakaꞌ nichꞌan qꞌopo hex,
yebꞌ yet kaw chextzala winhan,
hakaꞌ istzala ix qꞌopo tolto mohyi yebꞌ yichamil yet tzujan hex wintajan bꞌey txꞌotxꞌ desierto,
bꞌay mach tzet chitzꞌunlaxi.
3 Hex Israel, wettikꞌahan heyehi,
lahan hex yebꞌ hakaꞌ bꞌabꞌel sat tzꞌunubꞌ yul insatan.
Sunil mak low isqꞌabꞌ teyinh,
yako ismul,
wanayojan isyaꞌtajil yibꞌanh,”» xhi Komam.
4 ¡Abꞌewe istzotiꞌ Komam Jahawil, sunil hex yuninal yaꞌ Jacob,
yebꞌ yuninal yuninal yaꞌ Israel!
5 Hak tiꞌ yu yalni Komam Jahawil:
«¿Tzet istxꞌojal ilchalo winhan yu ebꞌnaj heyichmam,
yuxin hitzilo ebꞌnaj winhan, kinisbꞌejnikanojan ebꞌnaj?
Yok tzujno ebꞌnaj yinta tzetaj ye tuꞌ matzet chal yelapnoj,
yuxin matxa yelapno elkaniko ebꞌnaj.
6 Machi xin isqꞌambꞌe ebꞌnaj: “¿Bꞌaytuꞌwal ay Komam Jahawil konhinilo sat txꞌotxꞌ Egipto;
konyijbꞌanikꞌo sat txꞌotxꞌ desierto bꞌay kaw tzꞌinan,
bꞌay machi konhobꞌ,
bꞌay kaw tajin sat txꞌotxꞌ,
bꞌay ay ismay iskam anma,
bꞌay machi mak chꞌekꞌi,
bꞌay machi anma ehikꞌoj?” mach isqꞌambꞌe ebꞌnaj.
7 Winitijan ebꞌnaj sat txꞌo txꞌotxꞌ kaw kꞌul tiꞌ,
yu islohni ebꞌnaj sat tzꞌunubꞌ chꞌel sat txꞌotxꞌ yebꞌ yu yochen ebꞌnaj iskꞌulal chaqꞌ txꞌotxꞌ,
yajaꞌ hex tiꞌ hex yuninal ebꞌnaj heyichmam tuꞌ heyetato intxꞌotxꞌtiꞌan yu hetxꞌojal,
yahbꞌeta elkaniko inmajultiꞌan yu isyahbꞌetajil hewatxꞌe.
8 Machi xin isqꞌambꞌepaxo ebꞌyaꞌ sacerdote hakaꞌ tiꞌ:
“¿Bꞌaytuꞌwal ay Komam Jahawil?” mach xhihoj.
Haxa ebꞌnaj ayko inleyan yul isqꞌabꞌ,
machi kinyohtanhelojan ebꞌnaj;
haxa ebꞌnaj chitanhen konhobꞌ meltzoko ebꞌnaj manhkꞌomal wetan,
haxa ebꞌnaj inchejabꞌan yalikꞌo ebꞌnaj tzotiꞌ yinh isbꞌi tioxh Baal,
yok tzujno ebꞌnaj yinta tzetaj ye tuꞌ matzet chal yelapnoj.a
9 Yalnipaxo Komam:
Yuxin hanin Yahawilintiꞌan chiwalan tato chiwaqꞌan howal yebꞌ hex.
Chiwaqꞌnipaxojan howal yebꞌ yuninal heyuninal.
10 Ekꞌanhweto bꞌey konhobꞌla ayko yul ismajul txꞌotxꞌ Quitim,
ayayo xol haꞌ mar kat kam heyilni.
Chechejnito hechejabꞌ bꞌey txꞌotxꞌ Cedar,
kat kam yilnipaxoj kat hetxumni tato ayxa bꞌay chiyu hakaꞌ tiꞌ:
11 ¿Ayxam hunu nime konhobꞌ tuꞌ xaꞌishel istioxh chiyal isdiosaloj,
waxanhka yinh kaw yeli hunteqꞌan tioxh tuꞌ mach diosoj?
Yajaꞌ wal inkonhobꞌtiꞌan kinishelan hanin ayinikojan isDiosaloj selelo hunteqꞌan tzet ye tuꞌ matzet chaliloj.
12 Hanin Yahawilintiꞌan chiwalan tet satkanh:
“Hach satkanh xiwanhkanh yu huneꞌ tiꞌ,
kat iskꞌaykanh hakꞌul,
kat habꞌilikanh yu xiwkilal,” quinchihan.
13 Ay kabꞌ majan ismul inkonhobꞌtiꞌan yakoj;
kinisbꞌejkanojan,
hanin lahan hinan hakaꞌ isnuqꞌ ha haꞌ maxhtikꞌa chitajayoj, iswatxꞌen ebꞌnaj iskꞌuh,
hunteqꞌan kꞌuh tuꞌ ay ishatilal, machi etxi ha haꞌ yul.
14 Haꞌ konhobꞌ Israel mach chejabꞌoj,
mach txonhbꞌilo yu yok chejabꞌoj,
¿tzet yinh xin chiꞌutelax hakaꞌto chejabꞌ chukoj?b
15 Ok wejna anma howal yinh, yah yaw anma hakaꞌ noꞌ bꞌalam,
etalaxkanto istxꞌotxꞌ ebꞌnaj, isnhuslaxkanto iskonhobꞌ,
matxa mak kan yulaj iskonhobꞌ.
16 Haꞌ hun ebꞌnaj ah Menfis yebꞌ ebꞌnaj ah Tafnes,
ismaqꞌnipoho ebꞌnaj hewiꞌ, hex Israel.
17 Haꞌ hunteqꞌan tiꞌ hul teyibꞌanh yu kinhebꞌejkanojan,
hanin Jahawil intiꞌan, heDiosal, hanin chitikꞌa kexwijbꞌakꞌojan yul bꞌeh.
18 Wal tinanh xin, ¿tzet cheyiqꞌ yinh yuxin chexto bꞌey Egipto,
yu heyukꞌni haꞌ Nilo? yebꞌ xin ¿tzet cheyiqꞌ yinh yuxin chexto bꞌey Asiria,
yu heyukꞌni ha haꞌ ay yul haꞌ Éufrates?c
19 Haꞌ hetxꞌojal chiꞌiniti isyaꞌtajil teyibꞌanh,
haxa hemanhkꞌomal chiꞌiniti tzꞌaktiꞌ teyibꞌanh.
Wal tinanh xin kaw txumweloj, kat henaniti hetxꞌojal,
yu kinhebꞌejkanojan,
hanin Yahawilintiꞌan, heDiosal.
Kaw cheyilkano isyaꞌtajil yuto matxa chexxiw wetan, xhi Komam Yahaw yinh sunil.
20 Yalnipaxo Komam: Yuto payxatax hebꞌejtzolo hebꞌa heyinilo hebꞌa yul inqꞌabꞌan, heyalni hakaꞌ tiꞌ:
“Mach chisje kokꞌulanh koyijeꞌanh tzet chal Komam Dios,” kexchi.
Yalni Komam: Machnhetaj tuꞌ, wal xin hewatxꞌe mule
iswiꞌla wonhan nahat yekanh, yebꞌ yichla teꞌ qꞌebꞌtaj kaw ay xaj,
hakaꞌ chute ebꞌix ix txꞌoj ye iswiꞌ.
21 Hakaꞌ hunu yoj teꞌ uva kaw sikꞌbꞌililoj,
hak tuꞌ yu kexintzꞌunnihan,
yebꞌ lahan hexpaxo yebꞌ hakaꞌ teꞌ hinhat uva kaw kꞌul,
¿tzet xin yu hemeltzoko hakaꞌ teꞌ xoltelajil uva?
22 Waxanhka cheyaxhnhe habꞌa yu yal tanh,
yebꞌ xin waxanhka kaw niman xapun cheyako teyinh,
maxhtikꞌa chꞌel istzꞌilal hemul, wal xin ixtanhnhetikꞌa hemul tuꞌ yinh insatan, xhi Komam Jahawil.
23 Yalnipaxo Komam: ¿Tzet yinh xin hak tiꞌ heyalni:
“Hanhonhtiꞌan mach kotxꞌojalanh,
machi bꞌay konhok tzujnojanh yinta tioxh Baal”? quexchi. ¿Tom xin mach chenati tzet hewatxꞌe sat akꞌal?
Istxumabꞌ isbꞌa hekꞌul yinh tzet hewatxꞌe;
hex tiꞌ lahan hex hakaꞌ noꞌ miꞌe camello chꞌekꞌ yinh anhe,
chiꞌel yul bꞌeh kat yok yul bꞌeh hunelxa.
24 Lahan hexpaxo hakaꞌ noꞌ xoltelajil miꞌe burro,
qꞌayna yekꞌ sat txꞌotxꞌ desierto; chisxuqꞌxe jaqꞌeqꞌ yet ayiko yinh istiempohal issajchi, machi mak chikachni.
Mach chisiki noꞌ icham issayni, yuto elna noꞌ issajchi, hakex tuꞌ.
25 Hex Israel bꞌej heyekꞌ hesayno komon dios, mach nabꞌanheho cheyaqꞌ lahwo heyoj,
mach nabꞌanheho cheyaqꞌle tajintiꞌal heyekꞌi, yajaꞌ xin hex tiꞌ heyala:
“Machoj, mach chuhi. Hanhonhtiꞌan ekꞌna chonhtzalahanh yinh komon tioxh,
kat jok tzujnojanh yintaj,” kexchi.
26 Hakaꞌ istxꞌixwikanh hunu elqꞌom yet chiꞌilchahi,
hak tuꞌ chu hetxꞌixwikanh hex Israel hex tiꞌ, chitxꞌixwikanh konhobꞌ, yebꞌ ebꞌnaj rey,
yebꞌ ebꞌnaj yahaw konhobꞌ, yebꞌ ebꞌnaj sacerdote yebꞌ ebꞌnaj inchejabꞌan.
27 Haꞌ ebꞌnaj tuꞌ chalni tet hunu teꞌ siꞌ hakaꞌ tiꞌ: “Hach tiꞌ, hach inmaman,” xhi.
Chalnipaxo ebꞌnaj tet chꞌen chꞌen: “Hach chawaqꞌ kokawilanh,” xhi.
Wal wetan xin yichinh ebꞌnaj chati, maxhtaj sat ebꞌnaj.
Yajaꞌ hayet ayko ebꞌnaj yinh isyaꞌtajil chiꞌah yaw ebꞌnaj wetan, chalni ebꞌnaj hakaꞌ tiꞌ:
“¡Mamin, ahanhwanoj, kat konhhakolnilojanh!” xhi ebꞌnaj.
28 “Hex Judá ¿bꞌaytuꞌwal ay ej hediosal hewatxꞌe tuꞌ? ¡Haꞌojabꞌ wano hunteqꞌan tioxh cheyal hediosalo tuꞌ,
kat kexiskolnilo tet ej isyaꞌtajil tuꞌ! Yuto hatatikꞌa isbꞌisil hekonhobꞌ,
hex Judá hex tiꞌ, hak tuꞌ isbꞌisil hediosal.
29 ¿Tzet yinh xin ayko hehowal winhan?
Sunil hex tiꞌ ayiko hehowal winhan, chemanhkꞌon tzet chiwalan,” xhi Komam Jahawil.
30 Nabꞌanhe wayojan isyaꞌtajil yibꞌanh heyuninal,
yuto maxhtikꞌa chikuychahi. Hex kaw hex hemaqꞌkamo ebꞌyaꞌ inchejabꞌan yu heyespada,
lahan hex hakaꞌ noꞌ bꞌalam chikꞌuxnayto anma.
31 ¡Hex ah Israel, aweko yinh hekꞌul heyabꞌen intzotiꞌan!
¿Tom lahan hinan hakaꞌ txꞌotxꞌ tajin txꞌotxꞌ yul hesat, maka hakaꞌ txꞌo txꞌotxꞌ ayko xol qꞌejholo?
¿Tzet yinh xin chal inkonhobꞌtiꞌan:
“Hanhonhtiꞌanh bꞌejtzobꞌilonanh, matxa bꞌaqꞌinh chonhhulanh takꞌatanh,” xhimi ebꞌnaj?
32 ¿Chimto nahul yu ix qꞌopo yaniko xil isqꞌap yet mohyilal yet chito mohyoj?
Yajaꞌ wal hex inkonhobꞌtiꞌan xakinhenahulnhetojan yinh txꞌiꞌalxa tiempo.
33 ¡Inkonhobꞌtiꞌan kaw lahan hakaꞌ ebꞌix ix txꞌoj ye iswiꞌ!
¡Yohta yanayo yelawil yulaj bꞌeh yet chito issayaꞌ iswinaj!
¡Kaw helan isbꞌeybꞌalnhen isbꞌelal istxꞌojal!
34 Chikꞌtaxanhe xil heqꞌap yu ischikꞌil anma mebꞌaꞌ yebꞌ anma machi ismul,
hunteqꞌan anma tuꞌ, machi bꞌay chálo heyu lanhan yaniko ismul, tonhe hemaqꞌkamoj; yajaꞌ xin cheyal hakaꞌ tiꞌ:
35 “Hanhonhtiꞌanh machi komulanh, yuxin mach chati Komam ishowal jibꞌanhanh,” kexchi.
Yajaꞌ wal tinanh wokxahan wilaꞌan yinh tzet chexelikoj, yuto cheyala ta machi hemul.
36 ¿Tzet yinh xin kaw lahbꞌiliko heyu hesayni mak chiꞌok kolwal teyinh?
Haꞌ Egipto bꞌay chikawxi hekꞌul chextxꞌixwopaxokanh tet,
hakaꞌ yu hetxꞌixwikanh tet Asiria.
37 Ayahto heqꞌabꞌ yinh hewiꞌ yu txꞌixwilal yet chexelopaxokanh bꞌey Egipto tuꞌ,
yuto hanin Yahawilintiꞌan chintanhtzelojan konhobꞌ bꞌay chikawxi hekꞌul,
nabꞌanhe chikawxi hekꞌul yinh konhobꞌ tuꞌ, matzet chechabꞌ tet ebꞌnaj.