3
»Chihal-lax hakaꞌ tiꞌ: “Tato ay hunu naj winaj chispoh isbꞌa yebꞌ yixal kat yiqꞌni ix hunxa winaj,yajaꞌ tato chispohpaxo isbꞌa ix yebꞌ hunxa naj tuꞌ, haꞌ naj bꞌabꞌel yichamil ix tuꞌ matxa chu yiqꞌni naj ix hunelxa,” xhi.
Yajaꞌ ta chiyiqꞌlekanh isbꞌa hunelxa, yinh hakaꞌ tuꞌ chꞌokkano konhobꞌ yinh txꞌixobꞌal.
Hanin heYahawilintiꞌan chiwalan tato hak tuꞌ maxeyu hex Israel hex tiꞌ winhan.
Kinhebꞌejkanojan, heyochento komon dios, yajaꞌ tinanh xin cheyoche chexmeltzo yul inqꞌabꞌan hunelxa, xhi Komam Jahawil.a
2 Tꞌanhxanhweto iswiꞌla witz, kat kam heyilni tato ay hunu bꞌay tiꞌ mach heyako hemul.
Chexay tzꞌonhno istiꞌla bꞌeh heyechman mak yebꞌ chewatxꞌe mule hakaꞌ yay tzꞌonhno ebꞌix árabe istiꞌla bꞌeh bꞌey txꞌotxꞌ desierto,
hak tuꞌ yu heyetanto txꞌo txꞌotxꞌ yu hemul yebꞌ yu istxꞌojal.b
3 Yu tuꞌ yuxin matxa haꞌ nhabꞌ yinh istiempohal,
matxa chaqꞌpaxo haꞌ nhabꞌ chitikꞌa yaqꞌ yinh waresmahil;
hakaꞌ chiyute isbꞌa ebꞌix ix txꞌoj ye iswiꞌ,
hak tuꞌ cheyute, yaj maxhtikꞌa chitxꞌixwi nino hesat.c
4 ¿Tom mach chiꞌeliko heyaw winhan tinanh xin?
“Mamin, ijbꞌa honhanh hakaꞌ yinh kotzehalanh.
5 ¿Tom aynhetikꞌako ischiwa hakꞌul jinhanh?
¿tom xin mach chiꞌekꞌayo hahowal tuꞌ jinhanh?” kexchi.
Hak tuꞌ heyalni, yajaꞌ ip heyahkanh hewatxꞌen sunil istxꞌojal hantatikꞌa chu heyu hewatxꞌeni,» xhi Komam.
Kachwa Komam Jahawil yinh Israel yebꞌ yinh Judá yu isbꞌejnikano istxꞌojal
6 Tzotel Komam Jahawil wetan yinh istiempohal yet ayko yaꞌ Josías reyal, yalni hakaꞌ tiꞌ: «¿Xam hawil tzet chiswatxꞌe anma Israel kaw manhkꞌomkanoj? Haꞌ anma tiꞌ chito iswiꞌla wonhan nahat yekanh, yebꞌ yichla sunil teꞌ nime qꞌebꞌtaj kaw how xaj, chiswatxꞌen mule bꞌey tuꞌ.
7 »Hayet wilnihan tzet chiswatxꞌe tuꞌ, walnihan: “Hayet chilahwi iswatxꞌen anma sunil hunteqꞌan tiꞌ kat ismeltzoko yul inqꞌabꞌan,” kinchihan; yajaꞌ xin machi meltzoko yul inqꞌabꞌan. Sunil tzet iswatxꞌe anma Israel tiꞌ il-lax yu anma ah Judá, hunteqꞌan yet konhobꞌ Israel; wal anma Judá tuꞌ kaw manhkꞌompaxoj. 8 Haꞌ konhobꞌ Judá yilah yet inpohni hinbꞌahan yebꞌ konhobꞌ Israel, kaw manhkꞌom, waqꞌnihan carta yet pohlebꞌahil tet, yu ismul yako wetan hakaꞌ ismul ebꞌix ix chissay iswinaj, yajaꞌ machi xiw anma Judá yet konhobꞌ Israel, yet yilni huneꞌ tuꞌ, wal xin manhkꞌom yute isbꞌa iswatxꞌen istxꞌojal, yaniko ismul wetan hakaꞌ ismul ebꞌix ix chissay iswinaj.d 9 Kaw subꞌuta yu yaniko ismul yetaxkanto txꞌo txꞌotxꞌ, yaniko ismul yet yinayo isbꞌa sata tioxh, chꞌen chꞌen watxꞌebꞌilayoj, yebꞌ teꞌ siꞌ watxꞌelaxayo tioxhal. 10 Waxanhka yil yet konhobꞌ Judá tuꞌ sunil hunteqꞌan tuꞌ, yajaꞌ maxhtikꞌa meltzoko yul inqꞌabꞌan yinh sunil yanma yu ismanhkꞌomal, wal xin tonhe etli winhan,» xhi Komam Jahawil.
11 Yalnipaxo Komam Jahawil wetan hakaꞌ tiꞌ: «Haꞌ konhobꞌ Israel manhkꞌom, txannhe ismul sata konhobꞌ Judá, yuto haꞌ Judá chiꞌetli winhan. 12 Asiꞌ bꞌey Israel ayko yinh norte, kat hawalni hakaꞌ tiꞌ:
“Hex manhkꞌom Israel hex tiꞌ, meltzanhweko yul inqꞌabꞌan, mach chiwayojan inhowalan teyibꞌanh,
yuto hanintiꞌan kaw chitzꞌaykano inkꞌulan teyinh,
machi nahatli inhowalan teyinh yinh sunilbꞌal ej tiempo.
13 Txumwelo hetxꞌojal yuto hanin Yahawilintiꞌan,
heDiosal bꞌay heyako hemul.
Heyinayo hebꞌa sata komon tioxh yichla sunil teꞌ nimeta qꞌebꞌtaj,
hak tuꞌ yu heyaniko hemul hakaꞌ ismul ebꞌix ix chissay hunxa winaj,
machi xin heyabꞌe yul innuqꞌan yinh hunteqꞌan tzet walan,” xhi Komam Jahawil.
14 »Yalnipaxo Komam: “Hex anma manhkꞌom hex tiꞌ, meltzanhweko yul inqꞌabꞌan, yuto hanintiꞌan heYahawil wehan. Hunun hex chexwitijan yul hunun konhobꞌ, katawanh hex chexwilnilojan xol hunun majan ikꞌale hex Israel hex tiꞌ, chexwinitijan bꞌey Sión. 15 Chiwanikojan mak chiꞌok kexistanheꞌ hakaꞌ chal wanmahan, chexistanhe ebꞌnaj yinh sunil ishelanil yebꞌ yu sunil isnabꞌal. 16 Hanin Yahawilintiꞌan chiwalan, tato yet chexpohchakanokanh, kat ischꞌibꞌkanh hebꞌisil sat txꞌo txꞌotxꞌ, yinh hunteqꞌan tiempohal tuꞌ, matxa chꞌaqꞌlax bꞌinaho ‘isKaxhahil istrato Komam’. Matxa chiꞌekꞌpaxo teꞌ yinh henabꞌal, yuto yinh henabꞌal ta ay teꞌ maka machi teꞌ, mach yilaloj, yuxin matxa chu iswatxꞌelax hunuxa teꞌ akꞌ Kaxha.e 17 Haꞌ yinh huneꞌ tiempo tuꞌ, chihal-lax Konhobꞌ Jerusalén Intzꞌonhobꞌalan, kat iskutxbꞌaniko isbꞌa sunil anma ay yulaj nimeta konhobꞌ bꞌey Jerusalén yinh inbꞌihan, hanin Jahawil intiꞌan; matxa xin chisyijeto istxꞌojal tzet chal yanma yu islutꞌal.f
18 »”Haꞌ yinh huneꞌ tiempo tuꞌ, hunxanhe chꞌeliko konhobꞌ Judá yebꞌ konhobꞌ Israel, hun xin chu istit bꞌey txꞌo txꞌotxꞌ ayko yinh norte, kat yul sat txꞌo txꞌotxꞌ waqꞌan ismajulo heyichmam.
19 »”Chinqꞌambꞌehan hakaꞌ tiꞌ:
‘¿Tzet chu kexinchanihan wuninalojan,
chiwaqꞌnihan txꞌo txꞌotxꞌ kaw ochebꞌilikoj,
huneꞌ txꞌotxꞌ kaw qꞌalomkano xol sunil txꞌo txꞌotxꞌ ay yul sat yibꞌanhqꞌinal tiꞌ?’ kinchihan.
Walnipaxojan: ‘Chinheyalan hemamoj,
matxam xin chepohilo hebꞌa winhan.
20 Yajaꞌ hakaꞌ chu isbꞌejnikano hunu ix ix yichamil,
kat isto yinta hunuxa winaj, hak tuꞌ yu heyaniko hemul wetan,
hex Israel hex tiꞌ,’ xhi Komam Jahawil.
21 Chiꞌabꞌelax yul nuqꞌe yibꞌanh ej wonhan, haꞌ ton ebꞌnaj Israel chꞌoqꞌi,
chisqꞌanni kolwal,
yuto yaqꞌ kotxqꞌato ebꞌnaj isbꞌeh,
kinisnahulnhentojan ebꞌnaj, kinchihan hanin Yahawilintiꞌan, isDiosal ebꞌnaj.
22 ¡Hex anma manhkꞌom hex tiꞌ, meltzanhweko yul inqꞌabꞌan, chiwanhtenan hemul!”» xhi Komam.
Istaqꞌwi anma Israel hakaꞌ tiꞌ: «Mamin, hanhonhtiꞌanh chonhmeltzokojanh yul haqꞌabꞌ,
yuto hach tiꞌ Jahawilanh, hach koDiosalanh.
23 Yinh kaw yeli nabꞌanhe konhbꞌeykꞌojanh jiqꞌayo kobꞌahanh tet komon tioxh iswiꞌla wonhan;
yinh kaw yeli, Mam Jahawilanh, koDiosalanh,
hachnhechꞌan chawaqꞌ kolbꞌanile tet anma Israel.
24 Yu yiyo isbꞌa ebꞌnaj jichmamanh tet komon dios,
yuxin etaxto ismunil iswatxꞌe yettaxtikꞌa tzehonhtohanh,
tanhilo ismeꞌ ebꞌnaj yebꞌ noꞌ wakax, istanhpaxilo ebꞌnaj kꞌahole, istanhpaxilo ebꞌix kutzꞌine.
25 Wal tinanh jiqꞌaweyo kobꞌa, kat istak kokꞌul yu txꞌixwilal, yuto jako komul tet Komam Jahawil, koDiosal.
Hanhonhtiꞌanh jako komulanh, yanipaxiko ismul ebꞌnaj jichmamanh,
yichtaxtikꞌa kotzehalanh masanto tinanh, machi jabꞌe yul isnuqꞌ Komam Jahawil, koDiosal,» xhi anma Israel.