4
Yalni Komam Jahawil:«Hex Israel, ta chal hekꞌul chexmeltzohi,
meltzanhweti inkꞌatanhan. Tato cheyilo hunteqꞌan hetioxh kaw yahbꞌeta yul insatan,
yebꞌ xin mach chexhulikꞌo bꞌey tiꞌ kat hetopaxo bꞌey tuꞌ,
yebꞌ tato chinheyaqꞌ bꞌinahojan yinh isyelal,
2 yebꞌ yinh istoholal yebꞌ yinh iskꞌulal, kat heyalni:
“Itzitz Komam Jahawil,” kexchi. Wal tuꞌ chischah sunil ej konhobꞌ isyaxil wetan, kat yaniko inmayan.
3 »Yuto hak tiꞌ yalni Komam Jahawil tet sunil ebꞌnaj ah Judá yebꞌ tet ebꞌnaj ah Jerusalén hakaꞌ tiꞌ:
Haꞌ txꞌo txꞌotxꞌ maxhto chimunlahi, haꞌ sat txꞌotxꞌ chexmunlahi,
matxa chetzꞌun hehinhat xol teꞌ txꞌix.
4 Haꞌ hex winaj ah Judá yebꞌ hex ah Jerusalén,
aweko istꞌinhanil chejbꞌanile yinh heyanma,
ohtanheweloj tato hanintiꞌan heYahawil.
Haxataxka chiꞌeliko yu istxꞌojal hebꞌeybꞌal tuꞌ,
chitit inhowalan teyibꞌanh hakaꞌ xaj qꞌa qꞌaꞌ, matxa mak chiyu isje isbꞌutnitanhoj.
Ta mach chisnah isbꞌa Judá chitanhtzelaxiloj
5 »Halwe hunteqꞌan tiꞌ bꞌey Judá, kat heyalnipaxo bꞌey Jerusalén:
“Oqꞌtzewe chꞌen trompeta bꞌey sunilal yulaj konhobꞌ,” kat heyalni hakaꞌ tiꞌ:
“¡Kokutxbꞌaweko kobꞌa,
kat xin jokto yulajla konhobꞌ hoyaniko iskꞌubꞌal!” kexchi.
6 Awekanh qꞌap bandera bꞌey Sión, kat heyelkanh,
kat hesayni bꞌay cheyebꞌato hebꞌa;
mach chexok linhnoj yuto hanintiꞌan chiwaqꞌtijan ebꞌnaj yet howal ay bꞌey txꞌotxꞌ norte,
yaqꞌayo isyaꞌtajil teyibꞌanh, kat kexistanhtzeniloj.
7 Hakaꞌ chu yelti noꞌ bꞌalam yul iswaybꞌal, hak tuꞌ chu yelti naj chexaqꞌni tanholoj;
haꞌ naj tuꞌ ayxako naj yinh isbꞌel, xaꞌelti naj yul iskonhobꞌ yu yetanto naj hetxꞌotxꞌ,
yebꞌ yunhe matxa anma chikankano sat hekonhobꞌ, kaw tzꞌinan chukanoj.
8 Yu tuꞌ yuxin aweko xil heqꞌap chiyenilo bꞌiskꞌulal,
chiꞌel heyaw yuto haꞌ ishowal Komam Jahawil,
maxhto chishekꞌilo isbꞌa kokꞌatanh, quexchi,» xhi Komam.
9 Yalnipaxo Komam: «Haꞌ yinh huneꞌ tzꞌayik tuꞌ chipax yip yanma naj rey,
kat ispaxpaxo yip yanma yahawil konhobꞌ,
kat iskꞌayilo iskꞌul ebꞌyaꞌ sacerdote,
kat isxiwpaxokanh ebꞌyaꞌ inchejabꞌan,» xhi Komam Jahawil.
10 Walnihan hanin Jeremías intiꞌan:
«¡Ay Mam Jahawil, ay Komam Dios!
¿Tzet yuxin kach etli yinh anma ah Jerusalén?
Hawalni tato chawaqꞌ aqꞌankꞌulal tet,
yajaꞌ wal tinanh xin chiꞌaqꞌlax ekꞌoyaꞌ yanma yu chꞌen espada,» kinchihan tet Komam.
11 Haꞌ yinh huneꞌ tiempohal tuꞌ chihal-lax tet konhobꞌ yu Komam Jahawil:
«Ay huneꞌ tajin jaqꞌeqꞌ chitit yinhla iswiꞌla witz bꞌey txꞌotxꞌ desierto,
huneꞌ jaqꞌeqꞌ chihul yibꞌanh inkonhobꞌan, mach lahano hakaꞌ nixhte jaqꞌeqꞌ chixunilo isqꞌal ixim trigo.
12 Huneꞌ jaqꞌeqꞌ tuꞌ kaw ekꞌna ay yip,
wal tinanh chiwalan tato chiwayojan isyaꞌtajil yibꞌanh anma,» xhi Komam.
13 Yalnipaxo Komam Jahawil: «Ilwekꞌanabꞌ istit ebꞌnaj ayko ishowal teyibꞌanh,
hakaꞌ isbꞌelwi moyan, haxa iscarruaje ebꞌnaj xin, lahan hakaꞌ nime howla jaqꞌeqꞌ,
haxa ischeh ebꞌnaj ekꞌbꞌal anhe chꞌekꞌ sata noꞌ tꞌiw. Cheyal hakaꞌ tiꞌ:
“¡Kaw kꞌanchꞌanonh yuto chonhalaxiko yul isqꞌabꞌ isyaꞌtajil!” kexchi.
14 Hex ah Jerusalén, txꞌahwe heyanma nohna yu istxꞌojal,
yu hekolchahi, ¿bꞌaqꞌinh chisbꞌej yekꞌ istxꞌojal yinh henabꞌal?
15 Yuto chitit huneꞌ mak bꞌey Dan, chitzotel yinh howal chihuli,
kat yal-laxpaxo isyaꞌtajil bꞌey txꞌotxꞌ witz Efraín.
16 Halwe yabꞌeꞌ ej nimeta konhobꞌ, yebꞌ tet Jerusalén: “Chitit ebꞌnaj yet howal kaw nahat aya,
chiꞌah yaw ebꞌnaj yinh Judá, yet chaniko howal yinh,” kexchi.
17 Yuto toxanhe chiꞌok hoyno ebꞌnaj yinh hakaꞌ mak chitanhen hunu munil;
yuto haꞌ anma tiꞌ ismanhkꞌo tzet walan,» xhi Komam Jahawil.
18 Yalnipaxo Komam: «Yu hebꞌeybꞌal yebꞌ yu tzetaj hewatxꞌe, yuxin chul hunteqꞌan isyaꞌtajil tiꞌ teyibꞌanh,
yuxin kaw chiqꞌaxponikꞌto iskꞌahil yul heyanma,» xhi Komam.
19 Yalni yaꞌ Jeremías: «¡Kaw chiwabꞌehan isyaꞌil yul wanmahan,
kaw chiwabꞌehan isyaꞌil! ¡Kaw chistxꞌumubꞌtanhe isbꞌa wanmahan yu isyaꞌil! Kaw chitinhxi wanmahan,
mach chiꞌok tuknoj, yuto chiyabꞌe yoqꞌ chꞌen trompeta,
¡chiyabꞌen yel yaw anma yet howal!
20 Haxanhetikꞌa isyaꞌtajil chihal-laxi,
yuto sunil txꞌo txꞌotxꞌ tiꞌ chiꞌetaxtoj.
¡Yinh hunepnhechꞌan chiꞌetalaxto ej inmantiadohan,
kat yetalaxto iscortinahil!
21 ¿Hayebꞌto taxka tzꞌayik chiwilikojan yinh qꞌap bandera yet ebꞌnaj soldado?
¿Hayebꞌto taxka tzꞌayik chiwabꞌenan yoqꞌ chꞌen trompeta?»a xhi yaꞌ.
22 Yalni Komam Jahawil: «Haꞌ inkonhobꞌtiꞌan kaw lutꞌkanoj,
mach ohtabꞌilo hinan yu, kaw sukkanoj, matzet yohtaj,
kaw helankano iswatxꞌen istxꞌojal, yajaꞌ wal iskꞌulal mach yohtajo iswatxꞌeni,» xhi Komam.
23 Yalnipaxo yaꞌ Jeremías: «Wilnihan txꞌo txꞌotxꞌ, kaw etabꞌilkanto txꞌotxꞌ,
yebꞌ xin kaw chitzꞌinhtzꞌoni; wilnihan satkanh, matxapaxo sajilqꞌinal satkanh.
24 Wilnihan ej witz, sunil witz tuꞌ chiqꞌexi,
wal sunil wonhan etaxkantoj.
25 Hayet wilnipaxojan matxa hunu anma, haxa sunil noꞌ chꞌik, to noꞌ.
26 Wilnihan txꞌo txꞌotxꞌ kaw yax sat,
meltzoko txꞌotxꞌ yinh tajin txꞌotxꞌal.
Iskanpaxo tzꞌinhno ej konhobꞌ sata Komam Jahawil, yu ishowal Komam,» xhi yaꞌ Jeremías.
27 Yuto hak tiꞌ yu yalni Komam Jahawil: «Sunil txꞌo txꞌotxꞌ chiꞌetaxtoj,
yajaꞌ mach chintanhtzelojan txꞌotxꞌ yinh hunelnhe.
28 Yuxin chiyiqꞌ bꞌiskꞌulal txꞌo txꞌotxꞌ, kat isqꞌejholilo satkanh.
Kintzotelan, intxumnihan tzet chinwatxꞌehan, machi xin chinhekꞌan yinh tzet chiwalan, mach chiꞌekꞌayo yijni isbꞌa tzet xawalan.
29 Hayet yel yaw ebꞌnaj yet howal ayahto yibꞌanh cheh, yebꞌ yel yaw ebꞌnaj iqꞌnhe islitꞌ,
yelkanh anma ay yulajla konhobꞌ; isto anma yebꞌano isbꞌa xolaj qꞌebꞌtaj yebꞌ yinh ej iswiꞌ chꞌen nime chꞌen,
sunil ej konhobꞌ kaw tzꞌinan yukanoj, matxa hunu mak tiꞌ kankano yulaj ej konhobꞌ.
30 Hach konhobꞌ uchkꞌabꞌil hach xato tiꞌ, ¿tzet wal hawuten habꞌa tinanh?
Waxanhka chawako xilqꞌape kaj tawinh; waxanhka chawako chꞌen oro hawelawiloj,
waxanhka chawako yelawil isbꞌaqꞌ hasat, nabꞌaxanhe chatzante habꞌa.
Matxa chachochelax yu ebꞌnaj chitikꞌa kach ocheni, wal xin chachsaylax yu ebꞌnaj yunhe kach ispotxꞌnikamoj.
31 Yuto wabꞌehan yel yaw hakaꞌ hunu ix ix lanhan iswatxꞌi iskꞌul, kaw chiꞌekꞌyaꞌ,
hakaꞌ hunu ix chipitzkꞌa bꞌabꞌel yunin, haꞌ ton konhobꞌ Sión chiꞌahwi, kat yoqꞌ yu bꞌiskꞌulal, chanikanh isqꞌabꞌ, chalni:
“¡Ay, kꞌanchꞌan hinan tinanh! ¡Chipax yip wanmahan yu xiwkilal yuto chinmaqꞌlaxkamojan yu ebꞌnaj potxꞌom anma!” xhi konhobꞌ Judá,» xhi Komam.