Ismul Jerusalén yebꞌ Judá tet Komam Dios
5
Komam Jahawil halni hakaꞌ tiꞌ:«Ekꞌanhwe yulaj iscallehal konhobꞌ Jerusalén;
kaw kam cheyila, kat hesaynipaxo yul txonhbꞌal,
yu heyilni tato ay hunu mak chiwatxꞌen istoholal yebꞌ chisayni isyelal,
ta chiꞌilcha hunu mak heyu,
chiwaqꞌ nimankꞌulalan yinh konhobꞌ.
2 Ay mak tiꞌ chalni ta chal isyelal chaqꞌni bꞌinaho inbꞌihan,
yajaꞌ mach yelo chala,» xhi Komam Jahawil.
3 Yalni yaꞌ Jeremías:
«Mamin, haꞌ anma yel chala, haꞌ chasaya.
Chahate ebꞌnaj, yajaꞌ mach yabꞌe ebꞌnaj isyaꞌil, hawaqꞌ ekꞌoyaꞌ yanma ebꞌnaj,
yajaꞌ mach yaqꞌ yul iswiꞌ ebꞌnaj. Kaw hipbꞌikanilo ebꞌnaj,
ekꞌbꞌal iskawil hakaꞌ chꞌen chꞌen, mach chisje ebꞌnaj meltzoko yul haqꞌabꞌ.
4 Yajaꞌ walan hakaꞌ tiꞌ, hunteqꞌan anma tuꞌ mebꞌaꞌ yebꞌ kaw suk,
mach yohtajo isbꞌeybꞌal Komam Jahawil, yebꞌ istoholal chalte Komam.
5 Wal tinanh chintohan tzotelo tet ebꞌnaj kaw ay yelapnoj,
yuto yohta ebꞌnaj isbꞌeybꞌal Komam, yebꞌ istoholal chiyoche Komam.
¡Yajaꞌ hakpax tuꞌ ebꞌnaj, xaꞌok ebꞌnaj manhkꞌomal, xayilo isbꞌa yalanh yip Komam!
6 Yuxin chihul noꞌ bꞌalam ay xolaj qꞌebꞌtaj potxꞌwal yinh ebꞌnaj,
kat isxitlaxpaxto ebꞌnaj yu noꞌ oj ay bꞌey txꞌotxꞌ desierto, kat yul noꞌ leopardo yinh iskonhobꞌ ebꞌnaj,
haxa yet chiꞌelto hunu maka, kat yok lemna noꞌ yinh; yuto ahkanokanh ebꞌnaj iswatxꞌen istxꞌojal,
yebꞌ kaw xayakaniko ismanhkꞌomal,» xhi yaꞌ Jeremías.
7 Yalni Komam: «¿Tzet chu waqꞌni nimankꞌulalan teyinh yu hunteqꞌan tiꞌ?
Haꞌ heyuninal xakinisbꞌejkanojan,
chaqꞌni bꞌinaho ebꞌnaj hunteqꞌan tzet ye tuꞌ mach diosoj.
Kaw noh iskꞌul ebꞌnaj wuhan,
yajaꞌ ok ebꞌnaj manhkꞌomal wetan,
iskutxbꞌan isbꞌa sunil ebꞌnaj yul yatut ix ix txꞌoj ye iswiꞌ.
8 Hakaꞌ hunu noꞌ winaj cheh kaw lotzebꞌil, chiꞌekꞌ chinhlahi,
hak tuꞌ chute isbꞌa ebꞌnaj yinh yixal yet anmahil.
9 ¿Tom mach chiwayojan isyaꞌtajil yibꞌanh ebꞌnaj yu hunteqꞌan tuꞌ?» xhi Komam Jahawil.
Yalnipaxo Komam: «Huneꞌ konhobꞌ tiꞌ,
¿tom mach chiyaqꞌ wanmatiꞌan ispaj selel tet?
10 Hulujabꞌ ebꞌnaj ayko ishowal yinh konhobꞌ tiꞌ,
kat yok ebꞌnaj yetanoto teꞌ uva, yajaꞌ mach suniloj.
Ishokꞌabꞌilo ebꞌnaj isqꞌabꞌ te, yuto mach yeto Komam Jahawil yehi.
11 Yuto yinh kaw hunelnhe ok ebꞌnaj Israel yebꞌ ebꞌnaj Judá manhkꞌomal wetan,» xhi Komam Jahawil.
12 Yalnipaxo yaꞌ Jeremías: «Ebꞌnaj Israel yebꞌ ebꞌnaj Judá,
ismanhkꞌo ebꞌnaj Komam Jahawil.
Yalni ebꞌnaj hakaꞌ tiꞌ:
“Machi Dios, machi mak chul yebꞌ yespada jinh,
yebꞌ xin machipaxo wahil chul jibꞌanh.
13 Ebꞌnaj ischejabꞌ Dios, lahan ebꞌnaj hakaꞌ jaqꞌeqꞌ,
machi istzotiꞌo Dios chal ebꞌnaj.
Yuxin yibꞌanh ebꞌnaj chul isyaꞌtajil yinh tzet chala,”
xhi ebꞌnaj tuꞌ,» xhi yaꞌ Jeremías.
14 Hak tiꞌ yute yalni Komam Jahawil, kaw aykano yip,
tet yaꞌ Jeremías:
«Yu yal ebꞌnaj hunteqꞌan tzotiꞌ tuꞌ,
yuxin intzotiꞌan chꞌelti yul hatiꞌ hakaꞌ qꞌa qꞌaꞌ,
haxa huneꞌ konhobꞌ tuꞌ xin lahan hakaꞌ teꞌ siꞌ,
kat istzuji qꞌaꞌ yinh, kat istzꞌakantoj.
15 Hex Israel, hankawhinan chiwitijan huneꞌ konhobꞌ kaw nahat,
kat yul howal teyinh. Huneꞌ konhobꞌ kaw aykano yip, yebꞌ kaw payat konhobꞌ,
huneꞌ konhobꞌ mach heyohtajo yabꞌxubꞌal, mach xin chitxumcha heyu tzet chala.
16 Sunil ebꞌnaj tuꞌ, kaw helan ebꞌnaj yinh howal; haxa yatut isbꞌaqꞌ islitꞌ ebꞌnaj,
lahan yebꞌ hakaꞌ bꞌay chimuji kamoj, hajan istiꞌ.
17 Chul ebꞌnaj kat islohni ebꞌnaj sat hetzꞌunubꞌ yebꞌ tzet cheloh,
kat xin istanhtzenilo ebꞌnaj hekꞌahol yebꞌ hekutzꞌin,
kat xin iskꞌuxnito ebꞌnaj hemeꞌ yebꞌ hewakax,
kat islohni ebꞌnaj sat teꞌ uva tzꞌunbꞌil heyu yebꞌ sat hehiguera.
Haxa hekonhobꞌ hoyaniko iskꞌubꞌal bꞌay chikawxi hekꞌul,
chuchkꞌato ebꞌnaj yu espada.a
18 »Haꞌ kaw Komam Jahawil halni wetan: “Yajaꞌ yinh hunteqꞌan tzꞌayik tuꞌ, mach chexintanhtzelojan,” xhi Komam. 19 Yet chalni ebꞌnaj tawet: “¿Tzet yinh xin chiswatxꞌe Komam Dios, koDiosal, hunteqꞌan tiꞌ jinh?” ta xhi ebꞌnaj. Chawalni tet ebꞌnaj hakaꞌ tiꞌ: “Hakaꞌtikꞌa yu hebꞌejnikano Komam Dios, heyok heyinoyo hebꞌa tet nan diosal sat hetxꞌotxꞌ bꞌay ay hex; yu huneꞌ tuꞌ xin chexok ischejabꞌo anma nan konhobꞌal sat txꞌo txꞌotxꞌ mach heyetoj,” kachi, xhi Komam.
20 Yalnipaxo Komam tiꞌ xol yuninal yaꞌ Jacob,
halwe yabꞌepaxo ebꞌnaj Judá, cheyalnikꞌo hakaꞌ tiꞌ:
21 “Abꞌewe tinanh xin yinh hunteqꞌan tiꞌ, konhobꞌ kaw ekꞌnaj, machi heyanma.
Ay isbꞌaqꞌ hesat, yaj mach chu heyilni, ay hetxikin, yaj mach cheyabꞌe,” kachi.
22 Yalnipaxo Komam: “¿Tzet yinh mach chexxiw wetan?
Mach chexluylun yu xiwkilal. Wal xin haninan wakojan arena yechel bꞌay chikachna yekꞌ haꞌ mar;
mach chu ispalkꞌon haꞌ yibꞌanh huneꞌ yechel wakotuꞌan. Chismaqꞌiko isbꞌa haꞌ yinh, kat yekꞌpaxo poqꞌla haꞌ,
yajaꞌ mach chipalkꞌon haꞌ yibꞌanh yechel ayayo tuꞌ,” xhi Komam.
23 Yajaꞌ wal hex tiꞌ xin,
kaw kawkano heyanma,
kaw manhkꞌom hex, kinhebꞌejkanojan heyelkanh.
24 Machi xin heyal hakaꞌ tiꞌ:
“Xiwojonhwe tet Komam Jahawil tinanh,
Komam chꞌanayo haꞌ bꞌabꞌel nhabꞌ yebꞌ haꞌ islahobꞌal, yinh istiempohal.
Chaqꞌni Komam hamanil jet yet chijinikanh sat kotzꞌunubꞌ,” mach kexchihoj.
25 Yajaꞌ yu hetxꞌojal xahewatxꞌe, haꞌ chitanhtzen hunteqꞌan tiꞌ; haxa hemul,
haꞌ kexhitznilo tet iskꞌulal.
26 Yuto yul inkonhobꞌan, ay ebꞌnaj kaw txꞌojkanoj,
kaw chiyechma yaykꞌay anma yul istxꞌanh, chiswatxꞌe latzꞌabꞌ yu istzabꞌcha anma yu.
27 Hakaꞌ hunu kꞌokꞌom teꞌ bꞌay ayejikto noꞌ chꞌik, nohnakto noꞌ yul,
hak tuꞌ ye yul heyatut, kaw nohna yu heyeleqꞌ, hak tuꞌ xin kaw cheyiqꞌkanokanh heyip, yebꞌ kaw qꞌalom hex.
28 Kaw bꞌaqꞌich hex, kaw chextꞌaltꞌoni, kaw xapalkꞌon hewatxꞌen istxꞌojal.
¡Mach chewatxꞌe istoholal yinh mak mebꞌaꞌ unin,
machipaxo yelapno ebꞌnaj mebꞌaꞌ yul hesat, wal xin kaw kexqꞌalombꞌikanh!» xhi Komam.
29 Yalnipaxo Komam Jahawil: «¿Tom xin mach chiwayojan isyaꞌtajil yibꞌanh hunteqꞌan tiꞌ?
¿Tom xin mach chiyaqꞌ wanmahan isyaꞌtajil tet?» xhi Komam.
30 Yalnipaxo Komam: «Kaw xiwkilal yebꞌ yahbꞌetaj chiwatxꞌelax yul konhobꞌ tiꞌ.
31 Ebꞌnaj chihalni intzotiꞌan, leqꞌtiꞌalnhe chal ebꞌnaj, haxa ebꞌyaꞌ sacerdote haꞌ tzet chal iskꞌul,
haꞌ chiswatxꞌe. ¡Haꞌ huneꞌ tiꞌ chiswatxꞌe ebꞌnaj, haꞌ tuꞌ chochepaxo inkonhobꞌan!
Yuxin ¿tzet wal yuten isbꞌa ebꞌnaj yet chꞌilchahoti huneꞌ tuꞌ yinh islahobꞌal tzꞌayik?» xhi Komam.