Isyaꞌtajil chiꞌay yibꞌanh Jerusalén yebꞌ yibꞌanh Judá
6
Yalni Komam:«¡Hex yuninal yaꞌ Benjamín, elanhwekanh yul konhobꞌ Jerusalén!
¡Oqꞌtzewe bocina bꞌey konhobꞌ Tecoa! ¡Aqꞌwe hunu yechel yu nhubꞌ bꞌey konhobꞌ Bet-haquerem!
Yuto maꞌichiti istxꞌojal yebꞌ isyaꞌtajil yinh yetkꞌulal norte.
2 Chiwetatojan yuninal konhobꞌ Sión, konhobꞌ kaw kꞌulchꞌan yebꞌ kaw tzꞌeꞌ.
3 Chul ebꞌnaj tanhem meꞌ yebꞌ ismeꞌ, kat yanikanh ebꞌnaj ismantiado yinhla ishoyanil konhobꞌ.
Haꞌ bꞌey tuꞌ xin chistanhe ebꞌnaj ismeꞌ yinhla bꞌay chakanh ismantiado,» xhi Komam.
4 Chalni ebꞌnaj ayko ishowal yinh konhobꞌ tuꞌ: «Jaqꞌaꞌweko howal yinh,
ahanhwewanoj okojonhwe lemna yinh yet chuman tzꞌayik.a Yajaꞌ nabꞌaxanhe, yuto lanhan isto tzꞌayik, yayxa numnahi.
5 Ahanhwewanoj, Jaqꞌaꞌweko howal yinh yet aqꞌbꞌalil,
kat juchkꞌanayo palacio,» xhi ebꞌnaj.
6 Hak tiꞌ yute yalnipaxo Komam Yahawil yinh sunil:
«Tzokꞌweyo teꞌ qꞌebꞌtaj,
kat hewatxꞌenkanh teꞌ bꞌehal chꞌahapno teꞌ yinh iswiꞌ iskꞌubꞌal konhobꞌ Jerusalén.
Huneꞌ konhobꞌ tiꞌ chꞌay isyaꞌtajil yibꞌanh yuto nohna yu istxꞌojal.
7 Hakaꞌ hunu isnuqꞌ ha haꞌ machi linhi isbꞌelwi,
hak tuꞌ konhobꞌ Jerusalén machi islinhbꞌa isbꞌa iswatxꞌen istxꞌojal,
yebꞌ mach chiswatxꞌe istoholal,
yebꞌ mach isbꞌej yelqꞌawi, hanhetikꞌa tuꞌ chiswatxꞌe insatajan,
hanhe lahwilal yebꞌ isyaꞌil chiwilan yinh.
8 ¡Nah habꞌa Jerusalén,
hak tuꞌ xin mach chiwilo wanmahan tawinh,
yunhe mach chacheliko hakaꞌ txꞌotxꞌ desierto,
hakaꞌ txꞌo txꞌotxꞌ bꞌay machi anma!» xhi Komam.
9 Hak tiꞌ chiyute yalnipaxo Komam Yahawil yinh sunil:
«Hakaꞌ chu issaylax islahobꞌal sat teꞌ uva xolaj isqꞌabꞌ,
hak tuꞌ chu issaylaxikꞌo ebꞌnaj Israel chitokani.
Kaw chisaylax teꞌ machi hunu sat teꞌ chikani,» xhi Komam.
10 Intaqꞌwihan hakaꞌ tiꞌ: «¿Mak tet xin chintzotelan yebꞌ chinkachwahan yunhe yabꞌeni?
Wal xin majan istxikin ebꞌnaj, Mamin, mach chabꞌe ebꞌnaj;
chibꞌuchwa ebꞌnaj yinh hatzotiꞌ, mach chitzala ebꞌnaj yinh.
11 Yuxin hakaꞌ istit hahowal Mamin, hak tuꞌ istit inhowalan yinh ebꞌnaj,
matxa xin chitecha inhowalan wuhan,» xhi yaꞌ Jeremías. Yalni Komam hakaꞌ tiꞌ:
«Ayo hahowal yibꞌanh nixhte unin chiꞌekꞌ yulaj bꞌeh,
yebꞌ bꞌay chiskutxbꞌako isbꞌa ebꞌnaj tzehtaj.
Wal xin naj ichamile yebꞌ yixal chiꞌilaxto preso,
yebꞌpaxo xin mak ayxakanh ishabꞌilal, yebꞌ ebꞌnaj kaw ichamtaxa.
12 Haꞌ yatut ebꞌnaj yebꞌ istxꞌotxꞌ, yebꞌ yixal ebꞌnaj,
nanxa mak chiꞌok yahawoj; yuto chiwatojan inqꞌabꞌan kat wanayojan isyaꞌtajil yibꞌanh huneꞌ konhobꞌ tiꞌ.
Hanin Yahawilintiꞌan,
chiwalan huneꞌ tiꞌ,» xhi Komam.
13 Yalnipaxo Komam: «Nixhte unin masanta ichamta anma,
hanhe yok qꞌalomal haꞌ chissaya;
haxa ebꞌnaj chihalni intzotiꞌan yebꞌ ebꞌnaj sacerdote,
sunil ebꞌnaj tuꞌ leqꞌtiꞌwom ebꞌnaj.
14 Chalni ebꞌnaj ta nixhchꞌan islahwilal inkonhobꞌan,
yajaꞌ machi anhcha yu ebꞌnaj,
chalni ebꞌnaj tato aqꞌankꞌulal ye sunil, yajaꞌ xin mach aqꞌankꞌulal yehi.
15 ¿Chimxintxꞌixwi ebꞌnaj yu hunteqꞌan isyahbꞌetajil xaꞌiswatxꞌe tuꞌ?
Yinh kaw yeli, machi txꞌixwi ebꞌnaj,
mach yohtajo ebꞌnaj txꞌixwilal.
Yuxin yet chiwanayojan isyaꞌtajil yibꞌanh ebꞌnaj,
kat yaykꞌay ebꞌnaj xol ebꞌnaj chiꞌaykꞌayi,» xhi Komam Jahawil.
16 Chalnipaxo Komam Jahawil tet iskonhobꞌ hakaꞌ tiꞌ:
«Okanhwe linhno yul bꞌeh, kat heyilni,
kat heqꞌambꞌen yinh hunteqꞌan icham bꞌeh payat,
hunteqꞌan bꞌeh kaw kꞌul, kat heto yul hunteqꞌan bꞌeh tuꞌ,» xhi Komam.
Istaqꞌwi ebꞌnaj tet Komam: «Machoj, machi kobꞌeybꞌalnhehanh huneꞌ tuꞌ,» xhi ebꞌnaj.
17 Yalni Komam: «Wanipaxikojan ebꞌnaj chitanhen konhobꞌ, yunhe yalni ebꞌnaj:
“Chehajbꞌawe hetxikin yet chiꞌoqꞌ chꞌen trompeta,” xhi ebꞌnaj.
Heyalni: “Mach chijoche jabꞌehanh,” kexchi.»
18 Yuxin chiwalan hakaꞌ tiꞌ: «Abꞌewekaniloj hex nime konhobꞌ,
kat heyohtanhenilo tzet chihul teyibꞌanh.
19 Abꞌewe hex txꞌotxꞌ hex tiꞌ: “Chiwatijan istxꞌojal yibꞌanh huneꞌ konhobꞌ tiꞌ,
haꞌ ton ispaj istxꞌojal chaqꞌ isnabꞌal ebꞌnaj iswatxꞌeꞌ,
yuto mach yabꞌeto ebꞌnaj intzotiꞌan,
isyahni ebꞌnaj chejbꞌanile aqꞌbꞌil wuhan.
20 ¿Tzet yinh cheyaqꞌ teꞌ pom wetan,
hunteqꞌan cheyiti bꞌey Sabá yebꞌ hunteqꞌan teꞌ itah kaw xuqꞌ sam cheyiti bꞌey hunteqꞌan konhobꞌ kaw nahat?
Wal xin mach chitzala inkꞌulan yinh.
Haꞌ no noqꞌ chenhus xahanbꞌalil wetan,
mach chischah inwiꞌan; yebꞌ hunteqꞌanxa hexahanbꞌal cheyaqꞌa,
mach chintzalahan yinh,”» xhi Komam.
21 Chalnipaxo Komam hakaꞌ tiꞌ: «Chiwaqꞌ txaqꞌmohojan huneꞌ konhobꞌ tiꞌ,
kat yaykꞌayi, ebꞌnaj mame yebꞌ ebꞌnaj kꞌahole yebꞌ mak ayayo iskawilal yatut yebꞌ ej yamigo ebꞌnaj,
chiꞌaykꞌayi kat istanhkaniloj,» xhi Komam.
22 Hak tiꞌ yu yalnikano Komam Jahawil: «Ay huneꞌ konhobꞌ tiꞌ chitit yetkꞌulal norte,
huneꞌ konhobꞌ kaw nimajalkanoj ay bꞌay chikachnakan apno txꞌo txꞌotxꞌ.
23 Iqꞌbꞌil islanza ebꞌnaj yu, yebꞌ yespada,
kaw txꞌojkano ebꞌnaj,
machi nino chitzꞌay iskꞌul teyinh.
Kaw chibꞌili istit ebꞌnaj hakaꞌ ishaxon haꞌ mar,
ayahto xin ebꞌnaj yibꞌanh cheh,
chul ebꞌnaj howal yinh konhobꞌ Sión,» xhi Komam.
24 Chalni anma ay yul konhobꞌ Jerusalén: «Xajabꞌehanh isqꞌumal huneꞌ konhobꞌ tuꞌ,
ispaxilo yip koqꞌabꞌanh yu xiwkilal, kaw xin bꞌiskꞌulal jehanh,
kaw yaꞌ yekaniko yinh janmahanh hakaꞌ isyaꞌil yet chiwatxꞌi iskꞌul hunu ix ix.
25 ¡Mach chexelto xol hetzꞌunubꞌ, mach chextopaxo yulaj bꞌeh;
yuto ebꞌnaj ayko ishowal jinh,
iqꞌbꞌil ischꞌen ebꞌnaj yet howal; kaw chonhxiw kotoh bꞌajxanhetuꞌwalil!» xhi ebꞌnaj.
26 Yalnipaxo Komam: «¡Hex inkonhobꞌtiꞌan,
aweko xil heqꞌap yet bꞌiskꞌulal,
bꞌalwekꞌo hebꞌa xol tanh! ¡Okanhwe yinh bꞌiskꞌulal hakaꞌ yet chikam hunu heyuninal huneꞌnhechꞌan.
Oqꞌanhwe sikꞌlebꞌil, yuto naj chul konhistanhtzeloj kawilxa yeko naj jinh!
27 Yalni Komam wetan: “Kach wakojan xol inkonhobꞌan hakaꞌ hunu mak kaw ay yip,
hakaꞌ hunu nha chiꞌahapno istel satkanh, yilal awohtanheniloj yebꞌ hawilni isbꞌeybꞌal inkonhobꞌan.
28 Sunil ebꞌnaj tuꞌ kaw manhkꞌomkano ebꞌnaj,
kaw halom qꞌumal ebꞌnaj, kaw kꞌaynakanto ebꞌnaj.
Kaw kaw yanhyonhe ebꞌnaj hakaꞌ chꞌen bronce yebꞌ chꞌen hierro.
29 Xatzꞌato chꞌen xuhum qꞌaꞌ,
yu isnhuslax chꞌen plomo,
nabꞌnhe isnhus naj chakꞌom chꞌen, machi el istzꞌilal chꞌen,” xhi Komam wetan.
30 Plata yahbꞌililoj chihal-lax yinh hekonhobꞌ yuto hanin Yahawilintiꞌan wintanheltojan ebꞌnaj,» xhi Komam.