Yilal ishelni isbꞌeybꞌal anma Judá kat yok iswatxꞌeno tzet choche Komam Dios
7
Tzotel Komam Jahawil tet yaꞌ Jeremías, yalni hakaꞌ tiꞌ: 2 «Okanhlinhno yul ispultahil watutan, kat hawalni hunteqꞌan tzotiꞌ hakaꞌ tiꞌ: “Sunil hex ah Judá, hex chexokto yul Yatut Komam Dios yu heyinayo hebꞌa tet, abꞌewe istzotiꞌ Komam. 3 Hak tiꞌ chiyute yalni Komam Yahawil yinh sunil, Komam isDiosal Israel: Helwe hebꞌeybꞌal, kat heyok hewatxꞌeno iskꞌulal, hak tuꞌ xin chexwaqꞌ ehojan sat txꞌotxꞌ bꞌay ay hex tiꞌ. 4 Mach chikawxi hekꞌul yinh hunteqꞌan leqꞌtiꞌal tzotiꞌ chihal-lax teyet hakaꞌ tiꞌ: ‘Yatut Komam Dios, Yatut Komam Dios, Yatut Komam Dios huneꞌ tiꞌ,’ xhi.5 »”Tato cheyako yinh hekꞌul hehelni hebꞌeybꞌal, kat heyok hewatxꞌeno iskꞌulal, kat hewatxꞌen istoholal teyinh hunun hex; 6 yebꞌ ta mach cheyeta anma nan konhobꞌal ay texol, yebꞌ nixhte mebꞌaꞌ unin, yebꞌ ebꞌix hunix, yebꞌ ta mach chepotxꞌkamo anma machi ismul, yebꞌ ta mach cheyiyo hebꞌa tet hunteqꞌan nan diosal, hunteqꞌan kaw chꞌiniti istxꞌojal teyibꞌanh. 7 Hak tuꞌ xin chexehayo sat txꞌotxꞌ tiꞌ, txꞌotxꞌ waqꞌan yinh hunelnhe tet heyichmam.
8 »”Yajaꞌ hex tiꞌ chikawxi hekꞌul yinh leqꞌtiꞌal tzotiꞌ, matzet chaqꞌ teyet. 9 Chexelqꞌawi, chexpotxꞌwahi, chexixlipaxoj, cheyaqꞌ bꞌinaho isbꞌi Komam Dios yinh leqꞌtiꞌal cheyala, chenhusnipaxo pom tet tioxh Baal, kexokpaxo tzujno yinta hunteqꞌan dios mach ohtabꞌilo heyu. 10 Lahwi tuꞌ, kat heyul insatajan yul watutan, yul huneꞌ nha bꞌay chꞌaqꞌlax bꞌinaho inbꞌihan. Cheyalni hakaꞌ tiꞌ: ‘Bꞌejtzobꞌilonhxa kowatxꞌen bꞌaytet chijoche,’ kexchi. Chelahniko hewatxꞌen hunteqꞌan tzet yahbꞌetaj. 11 ¿Tom hakaꞌ hunu nhachꞌen bꞌay chebꞌa isbꞌa elqꞌom, hak tuꞌ ye watutan yul hesat? Huneꞌ nha bꞌay chꞌaqꞌlax bꞌinaho inbꞌihan. Chiwilan sunil hunteqꞌan tiꞌ. 12 Asiꞌwe heyilaꞌ watutan bꞌey konhobꞌ Silo, huneꞌ bꞌay insayilojan yet bꞌabꞌelal, yu wehikꞌojan yul, kat heyilni tzet inwatxꞌehan bꞌey tuꞌ, yu ismul ebꞌnaj Israel, inkonhobꞌan. 13 Yaj wal tinanh, yu xahewatxꞌe sunil hunteqꞌan tiꞌ. Waxanhka kaw walan teyet yettax yichebꞌanil, machi xin inbꞌejan walnihan teyet, mach heyabꞌe tzet walan; kexwawtehan, machi xin kextaqꞌwi. 14 Yuxin hakaꞌ inwatxꞌehan yinh watutan bꞌey Silo, hak tuꞌ chinwatxꞌepaxojan yinh watutan ay bꞌey tiꞌ, huneꞌ nha bꞌay chꞌaqꞌlax bꞌinaho inbꞌihan, huneꞌ nha waqꞌan teyet yebꞌ tet hemam icham, huneꞌ nha bꞌay chikawxi hekꞌul. 15 Chexinhekꞌilojan yinh insatan, hakaꞌ yu inhekꞌnilojan ebꞌnaj heyuxhta yinh insatan, ebꞌnaj Israel titna yinh yaꞌ Efraín,” xhi.
16 »Hach Jeremías, mach chachtxahli yinh huneꞌ konhobꞌ tiꞌ, mach chꞌel hawaw wetan yinh ebꞌnaj; mach chachok haqꞌanaꞌ, mach chachilbꞌa haqꞌanni, yuto mach chiwabꞌehan tzet chawala. 17 ¿Tom mach chawil tzet chiswatxꞌe ebꞌnaj yulaj konhobꞌ ay yul Judá yebꞌ yulaj bꞌeh chꞌekꞌ yul konhobꞌ Jerusalén? 18 Haꞌ ebꞌnaj kꞌahole chisayni teꞌ siꞌ, haxa ebꞌnaj mame chiꞌaniko qꞌaꞌ yinh, haxa ebꞌix ixale chisomni ixim harina, yu iswatxꞌen ixim nime pan, yunhe yaltelax tet tioxh chiyij, isreynahil satkanh. Chaltenpaxo ebꞌnaj vino isyebꞌalqꞌabꞌo tet nan diosal, hak tuꞌ xin kaw chaqꞌtij ebꞌnaj inhowalan. 19 Chaqꞌ tako ebꞌnaj inkꞌulan, yajaꞌ wal xin haꞌ kaw ebꞌnaj chaqꞌ tako iskꞌul; hanin Yahawilintiꞌan chiwalan huneꞌ tiꞌ. 20 Yuxin chiwayojan sunil inhowalan yibꞌanh huneꞌ konhobꞌ tiꞌ, yebꞌ yibꞌanh sunil anma, hakpax tuꞌ xin yibꞌanh sunil no noqꞌ, yibꞌanh sunil te teꞌ ay xol telaj, yebꞌ yibꞌanh sat tzꞌunubꞌ ay sat txꞌo txꞌotxꞌ. Chitzuji qꞌaꞌ yinh, matxa xin chitanhilo qꞌaꞌ yinh,» xhi Komam Jahawil.
Chiꞌalaxayo isyaꞌtajil yibꞌanh Judá yu ismanhkꞌomal
21 Komam Yahawil yinh Sunil, isDiosal Israel, chihalni hakaꞌ tiꞌ: «Aweko yaqꞌbꞌil ej no noqꞌ xahanbꞌalil, chetbꞌinhe isbꞌa yebꞌ hunteqꞌanxa hexahanbꞌal, kat hekꞌuxni ischibꞌehal noꞌ. 22 Yuto hayet winiltijan ebꞌnaj heyichmam yul konhobꞌ Egipto, machnhetaj huneꞌnhe ischejbꞌanil ebꞌnaj walan isnhusni isxahanbꞌal. 23 Wal xin haꞌ hunteqꞌan tiꞌ walan tet ebꞌnaj: “Yijewe tzet chiwalan, hak tuꞌ xin chinokan heDiosaloj, kat heyok inkonhobꞌojan, kat hebꞌeybꞌalnhe tzet chiwalan, yunhe kꞌul chiꞌekꞌ heyilaꞌ,” quinchihan. 24 Yajaꞌ machi yabꞌeto ebꞌnaj, yebꞌ xin machi istxalbꞌa istxikin ebꞌnaj, wal xin haꞌ tzet yal isnabꞌal ebꞌnaj, haꞌ isbꞌeybꞌalnhe ebꞌnaj, iswatxꞌen ebꞌnaj istxꞌojal tzet chal yanma, meltzo ebꞌnaj yintaj, machi bꞌelwito ebꞌnaj sataj. 25 Yettaxtikꞌa yel ebꞌnaj heyichmam sat txꞌotxꞌ Egipto masanto tinanh, inchejtojan inchejabꞌan texol, haꞌ ton ebꞌnaj chihalni intzotiꞌan, mach inlinhbꞌahan wanito inchejabꞌan texol. 26 Yajaꞌ mach cheyabꞌeto tzet walan, mach hetxalbꞌa hetxikin, wal xin kaw helutꞌnhe hebꞌa, ekꞌbꞌalto hemanhkꞌo hakaꞌ hemam icham.
27 »Hach tiꞌ Jeremías, chawal sunil hunteqꞌan tiꞌ tet ebꞌnaj, yaj xin mach chabꞌeto ebꞌnaj tzet chawala, chawawte ebꞌnaj, yajaꞌ mach chitaqꞌwi ebꞌnaj tawet. 28 Chawal tet ebꞌnaj hakaꞌ tiꞌ: “Haꞌ ton huneꞌ konhobꞌ tiꞌ mach yabꞌeto tzet yal Komam Dios, Jahawil isDiosal, mach xin yoche kachlaxo yu Komam. Xatanhilo isyelal, matxa nino isyelal chiꞌelti yul istiꞌ ebꞌnaj, kachi,”» xhi Komam.
29 Yalni Komam: «¡Hex konhobꞌ Jerusalén iwelo xil hewiꞌ, kat heqꞌojnitoj, oqꞌanhwe yinh kaw ip iswiꞌla wonhan,
yuto yahbꞌilxa konhobꞌ Jerusalén wuhan, yebꞌ xawintanhekaniltojan, kaw ayti inhowalan yinh!» xhi Komam tet yaꞌ Jeremías.
30 Chalnipaxo Komam Jahawil: «Ebꞌnaj ah Judá iswatxꞌe ebꞌnaj istxꞌojal yul insatan, yakto ebꞌnaj istioxh yahbꞌil wuhan yul watutan, huneꞌ nha bꞌay chꞌaqꞌlax bꞌinaho inbꞌihan, yinilo ebꞌnaj ispixan watuttuꞌan. 31 Iswatxꞌenpaxokanh ebꞌnaj huneꞌ ismexhahil xahanbꞌal yet Tofet, bꞌey akꞌal yet iskꞌahol naj Hinom, yu isnhusnito ebꞌnaj iskꞌahol yebꞌ iskutzꞌin yinh xahanbꞌalil, maxhtaj hinan chejnhe ebꞌnaj iswatxꞌeni, machi nino ekꞌ yinh innabꞌalan hakaꞌ tuꞌ. 32 Yuxin chul hunteqꞌan tzꞌayik, xhi Komam Jahawil bꞌay matxa chihal-laxo Tofet, matxa chihal-laxpaxo Akꞌal yet iskꞌahol naj Hinom wal xin chihal-lax Akꞌal potxꞌbꞌal anma haꞌ bꞌey Tofet tuꞌ chimujlax anma, yuto matxa bꞌay haman.a 33 Haxa isnimanil anma ay yul konhobꞌ tiꞌ, chiꞌok islobꞌeho noꞌ chꞌik chiꞌekꞌ satkanh, yebꞌ ej no noqꞌ ay sat txꞌo txꞌotxꞌ tiꞌ, machi hunu mak xin chixibꞌtento noꞌ. 34 Haxa yulaj iskonhobꞌ Judá yebꞌ yulaj bꞌeh yul konhobꞌ Jerusalén, matxa chiꞌabꞌelax bꞌit yet qꞌinh yebꞌ yet tzalahilal, yebꞌ bꞌit yet mohyilal, yuto sunil konhobꞌ tuꞌ kaw tzꞌinan chukanoj,» xhi Komam.