8
Haꞌ Komam Jahawil chalni hakaꞌ tiꞌ: «Hayet huneꞌ tiempohal tuꞌ, chiꞌilaxilti isbꞌajil ebꞌnaj isreyal Judá yul panteón bꞌay mujan, yebꞌpaxo ebꞌnaj yahawil konhobꞌ, yebꞌ ebꞌnaj sacerdote, yebꞌ ebꞌnaj yako isbꞌa inchejabꞌojan, yebꞌ anma ah Jerusalén, 2 kat iskankano pakꞌno xol yoj tzꞌayik yebꞌ ixahaw yebꞌ ej txꞌumel ay satkanh; haꞌ ton hunteqꞌan tuꞌ isxahannhe ebꞌnaj, yaniko isbꞌa ebꞌnaj yijemal tet, yinta xin ok tzujno ebꞌnaj; isqꞌambꞌenpaxo isbꞌa ebꞌnaj tet, yinipaxayo isbꞌa ebꞌnaj. Machi hunu mak chisikꞌnikanh isbꞌajil ebꞌnaj tuꞌ, machi hunu mak chimujni, wal xin chikan pakꞌno hakaꞌ istzaꞌ noꞌ wakax. 3 Haxa anma itzitz chitokankano yintajilo hunteqꞌan anma kaw txꞌojkano tiꞌ, bꞌajxanhetuꞌwal chipujnato wuhan, haꞌ kamikal chiyoche selelo iskawil,» xhi Komam Jahaw kaw aykano yip.4 Yalnipaxo Komam:
«Hach tiꞌ Jeremías chawal tet konhobꞌ tzet chiwalan tet:
“Tato ay hunu mak chiꞌaykꞌayi, tom mach chikanh isbꞌa xin,
yebꞌ tato ay hunu mak chikꞌaytoj, ¿tom mach chimeltzo yul bꞌeh hunelxa?
5 Yajaꞌ ¿tzet yinh xin konhobꞌ Jerusalén kaw manhkꞌom? Kaw manhkꞌomkano yinh hunelnhe.
Islaqꞌayo ebꞌnaj leqꞌtiꞌal, yuxin matxa yoche iskꞌul ismeltzohi.
6 Kaw ayinikojan wabꞌenan, yajaꞌ mach isyelal tzet chal ebꞌnaj.
Machi hunu mak chisnah isbꞌa kat isbꞌejnikano istxꞌojal, kat yalni hakaꞌ tiꞌ:
‘¿Bꞌaytet mach kꞌulo inwatxꞌehan?’ mach xhihoj.”
Nananta istokano ebꞌnaj yinh isbꞌel hakaꞌ tzet choche iskꞌul,
hakaꞌ noꞌ cheh chito yinh anhe yinh howal.
7 Hakaꞌ noꞌ cigüeña chiꞌekꞌ satkanh,
yohta noꞌ yinh tzetaj ixahawil chito yinh isbꞌel yebꞌ yet chimeltzohi,
hakaꞌpaxo noꞌ kuwis yebꞌ noꞌ grulla, yebꞌ noꞌ yalomtioxh,
yohta noꞌ bꞌaqꞌinh chishekꞌto isbꞌa noꞌ hunuxa bꞌaya.
Yajaꞌ wal inkonhobꞌtiꞌan xin, mach yohtajo chejbꞌanile chiwalan,» xhi Komam Jahawil.
8 Yalnipaxo Komam: «Yajaꞌ hex tiꞌ cheyal hakaꞌ tiꞌ:
“Hanhonhtiꞌanh kaw ay yitzꞌatil kowiꞌanh, aykano ischejabꞌ Komam Jahawil jetanh,” kexchi.
Yajaꞌ xaheyako chejbꞌanile yet Komam yinh leqꞌtiꞌal,
wal ebꞌnaj tzꞌibꞌlom xin leqꞌtiꞌalnhe chayo ebꞌnaj yu islapiz.
9 Ebꞌnaj ay yitzꞌatil iswiꞌ tuꞌ, txꞌixwikanh ebꞌnaj, xiwkanh ebꞌnaj,
yok niman bꞌiskꞌulal yinh yanma ebꞌnaj.
Wal xin yintanhekanilto ebꞌnaj istzotiꞌ Komam Dios,
¿tom ay yitzꞌatil iswiꞌ ebꞌnaj yinh hakaꞌ tuꞌ?
10 Yuxin haꞌ yixal ebꞌnaj,
nanxa mak tet chiwaqꞌaꞌkojan ebꞌix,
haxa istxꞌotxꞌ ebꞌnaj xin chiwaqꞌan tet ebꞌnaj chꞌaniko howal yinh ebꞌnaj;
yuto sunil ebꞌnaj tzehtaj masanta ebꞌnaj ichamtaj,
ok tzujno yinta yochento qꞌalomal. Hakpax tuꞌ ebꞌnaj inchejabꞌan yebꞌ ebꞌnaj sacerdote,
chaqꞌ subꞌchaho ebꞌnaj anma yu leqꞌtiꞌal.
11 Hanhe yibꞌanh islahwilal inkonhobꞌan chanhte ebꞌnaj, chalni ebꞌnaj hakaꞌ tiꞌ:
“Aqꞌankꞌulal, aqꞌankꞌulal,” xhi ebꞌnaj, yajaꞌ xin machi aqꞌankꞌulal.
12 ¿Chimxintxꞌixwi ebꞌnaj iswatxꞌen hunteqꞌan tzet chinyah tuꞌan?
Machoj, machi nino chitxꞌixwi ebꞌnaj, mach yohtajo ebꞌnaj txꞌixwilal;
yuxin chiꞌaykꞌay ebꞌnaj xol ebꞌnaj chiꞌaykꞌayi; yet chiwanayojan isyaꞌtajil, chiꞌaykꞌay ebꞌnaj,» xhi Komam Jahawil.
13 Chalnipaxo Komam: «Chinhokꞌkanhan inkonhobꞌtiꞌan; matxa hunu teꞌ uva chikan yinh isteꞌal,
matxapaxo hunu sat teꞌ higuera chikani, kat ishowayo xaj teꞌ. Haꞌ tzet waqꞌan tet ebꞌnaj chiꞌilaxiloj.
14 Chalni konhobꞌ hakaꞌ tiꞌ: “¿Tzet yinh xin chonhkan tzꞌonhno bꞌey tiꞌ?
Wal xin kokutxbꞌaweko kobꞌa, okojonhweto yul ej konhobꞌ ayko iskꞌubꞌal, yunhe kopotxꞌlaxkamo bꞌey tuꞌ,
yuto Komam Dios Jahawil, nabꞌilxa kamikal jinh yu, chaqꞌni Komam howla haꞌ jukꞌuꞌ, yuto jako komul yul sat Komam Jahawil.
15 Jechma aqꞌankꞌulal, yajaꞌ machi nino iskꞌulal hul jibꞌanh,
jechma jaqꞌlax kawxoj, yajaꞌ haꞌ xiwkilal hul jibꞌanh.
16 ¡Yulxa ebꞌnaj ayko ishowal jinh! Hata bꞌey Dan chꞌabꞌelax ishorla istxam ischeh ebꞌnaj;
yet chiꞌekꞌ chinhla noꞌ kaw chibꞌili txꞌo txꞌotxꞌ yu noꞌ. Chul ebꞌnaj yetato konhobꞌ yebꞌ sunil tzet ay yul konhobꞌ tiꞌ,
chul ebꞌnaj yaqꞌaꞌko howal yinh konhobꞌ yebꞌ yinh sunil anma,” xhi anma.
17 Chiwatijan noꞌ labꞌa teyinh, noꞌ labꞌa kaw how istiꞌ,
kat hechilax yu noꞌ, waxanhka chibꞌitniko naj ahbꞌe yinh noꞌ matxa chaqꞌ monte isbꞌa noꞌ,» xhi Komam Jahawil.
Isbꞌiskꞌulal yaꞌ Jeremías yinh konhobꞌ Judá yebꞌ Jerusalén
18 Yalni yaꞌ Jeremías: «Yu sunil isyaꞌil tzet chiwabꞌehan, chipax yip wanmahan.
19 Haꞌ bꞌey ej konhobꞌ kaw nahat, chiꞌabꞌelax yel yaw inkonhobꞌan,
¿tom mach ayokꞌo Komam Jahawil bꞌey konhobꞌ Sión? ¿Tom matxa ayokꞌo isreyal konhobꞌ bꞌey tuꞌ?» xhi yaꞌ.
Istaqꞌwi Komam hakaꞌ tiꞌ: «¿Tzet yinh xin heyaqꞌtij inhowalan? Heyinayo hebꞌa tet ej tioxh,
hunteqꞌan tioxh machi nino tzet wal iswatxꞌeni, yebꞌ mach ohtabꞌilo yip heyu,» xhi Komam.
20 Yalnipaxo yaꞌ Jeremías: «¡Xalahwi yahkano sat ej tzꞌunubꞌ, xaꞌekꞌto waresma,
yajaꞌ wal honhpaxo xin maxhto chonhkolchahi!
21 ¡Kaw chiwabꞌehan isyaꞌil isyaꞌtajil chaqꞌle iskutzꞌin inkonhobꞌan,
haꞌ bꞌiskꞌulal yebꞌ xiwkilal xahul wibꞌanhan!
22 ¿Tom machi anh bꞌey Galaad chimaslaxiko teyinh?
¿Tom machi ebꞌnaj anhlom bꞌey tuꞌ?
¿Tzet yinh xin mach ilcha yanhal iskutzꞌin inkonhobꞌtiꞌan?» xhi yaꞌ Jeremías.