9
Yalnipaxo yaꞌ Jeremías:«Ayxikꞌa chꞌeliko inwiꞌan hakaꞌ ha haꞌ, yebꞌ ayxikꞌa chꞌeliko yal insatan hakaꞌ hunu isnuqꞌ ha haꞌ chꞌel yojomal,
yunhe wokan oqꞌo tzꞌayik aqꞌbꞌal yinh anma kamom yebꞌ iskutzꞌin inkonhobꞌan.
2 Majaltam ay hunu mak chꞌaqꞌni bꞌay chinehayojan sat txꞌotxꞌ desierto,
hakaꞌ bꞌay chꞌekꞌ ebꞌnaj bꞌelwom sat txꞌotxꞌ machi yahaw, yunhe welan xol ebꞌnaj wet konhobꞌtiꞌan;
yuto ixlom sunil ebꞌnaj,
sunil konhobꞌ tiꞌ aqꞌom subꞌchaho anma.
3 Kaw helan yaqꞌ ebꞌnaj yalni leqꞌtiꞌal, lahan hakaꞌ arco chiqꞌojnito teꞌ litꞌ.
Machi yiqꞌkanh yip ebꞌnaj yinh isyelal sat txꞌo txꞌotxꞌ.
Hunun tzꞌayik ip yahkanh yetanto isbꞌa ebꞌnaj. Yuxin chiyal Komam:
“Mach kinyotajojan anma tiꞌ,” xhi Komam Jahawil.
4 Cheyil hebꞌa hunun hex tet heyet lahan, mach chikawxi hekꞌul yinh heyuxhtaj;
xol ebꞌnaj yuxhta isbꞌa chaqꞌ subꞌchaho isbꞌa ebꞌnaj, sunil ebꞌnaj yet lahan isbꞌa tuꞌ,
chꞌekꞌ ebꞌnaj kat ishobꞌnikanh tzotiꞌ.
5 Haꞌ hunun ebꞌnaj tuꞌ chaqꞌ subꞌchaho yet lahan, machi hunu ebꞌnaj chitzotel yinh kaw isyelal.
Qꞌaynaxa yaqꞌ ebꞌnaj yalni leqꞌtiꞌal, Haxanhe istxꞌojal ayko ebꞌnaj iswatxꞌeni.
6 Yalnipaxo Komam Jahawil: “Haꞌ yehobꞌal ebꞌnaj ayko yiktabꞌal etal.
Haꞌ yaqꞌni subꞌchahoj kaw kꞌul ebꞌnaj yinh, mach chisje ebꞌnaj kinyohtanhelojan,” xhi Komam.
7 Yuxin chal Komam Yahawil yinh sunil:
“Haninan chinwatxꞌelojan, kat wilwenan inkonhobꞌan. Yuto ¿tzet wal wutenan iskutzꞌin inkonhobꞌtiꞌan?
8 Haꞌ yaqꞌ ebꞌnaj, lahan hakaꞌ isbꞌaqꞌ teꞌ litꞌ kaw xixiꞌ iswiꞌ,
hanhetikꞌa yaqꞌni subꞌchaho yet anmahil, haꞌ chu.
Chalni ebꞌnaj tet yamigo: Aqꞌankꞌulal, xhi.
Yajaꞌ wal yul isnabꞌal ebꞌnaj xin, ayiko yaqꞌni aykꞌayoj,” xhi Komam.
9 Yalni Komam: “¿Tom mach chiwayojan isyaꞌtajil yibꞌanh ebꞌnaj yu hunteqꞌan tuꞌ?”
“Yebꞌ ¿tom mach chiwayojan isyaꞌtajil yibꞌanh inkonhobꞌtiꞌan?” xhi Komam.
10 Yet chiwilnihan ej wonhan,
kat yah wawan yu oqꞌil,
kat wiqꞌnihan bꞌiskꞌulal yinh txꞌotxꞌ bꞌay chꞌekꞌ noꞌ wakax lowoj yuto kaw tzꞌinan,
matxa mak chiꞌekꞌi,
matxa chiꞌabꞌelax yel yaw noꞌ wakax.
Yelpaxokanh noꞌ chꞌik yebꞌ sunil no noqꞌ,
matxa noꞌ chiꞌekꞌi.
11 Yalnipaxo Komam: “Chiwuchkꞌayojan konhobꞌ Jerusalén, txꞌiꞌal xin yekꞌlenajil chikankanoj.
Chiꞌokkano yatuto noꞌ oj.
Haxa ej konhobꞌ ay yul ismajul txꞌotxꞌ Judá chikan tzꞌinhno hakaꞌ txꞌotxꞌ desierto,
matxa hunu mak chiꞌehayo bꞌey tuꞌ,” xhi Komam.
Chal-laxi tato chiꞌetalaxto konhobꞌ Jerusalén yebꞌ ta chiꞌilaxto anma bꞌey nan konhobꞌal
12 »¿Mak hunu tiꞌ kaw ay ishelanil isnabꞌal, yunhe istxumnilo hunteqꞌan tiꞌ? ¿Mak tet xayaqꞌ Komam Jahawil ohtanhelaxo hunteqꞌan tiꞌ, yunhe yalniloj? ¿Tzet yinh xin maꞌetalaxkanto konhobꞌ tiꞌ kat iskankano tzꞌinhno hakaꞌ txꞌotxꞌ desierto, matxa hunu mak xin chꞌekꞌi?
13 »Yalni Komam Jahawil hakaꞌ tiꞌ: “Isbꞌejkano ebꞌnaj Israel chejbꞌanile, huneꞌ waqꞌan tet ebꞌnaj. Machi xin isyije ebꞌnaj tzet walan. Mach isbꞌeybꞌalnhe ebꞌnaj hakaꞌ walnihan. 14 Wal xin haꞌ tzet yal yanma ebꞌnaj, haꞌ iswatxꞌe ebꞌnaj, yok tzujno ebꞌnaj yinta tioxh Baal, hakaꞌtikꞌa yu isyelaxkano ebꞌnaj yu ismam,” xhi Komam. 15 Yuxin haꞌ Komam Jahawil kaw aykano yip, isDiosal Israel halni hakaꞌ tiꞌ: “Chiwaqꞌan itah kaw kꞌah islobꞌoꞌ konhobꞌ tiꞌ, kat waqꞌnihan haꞌ howla haꞌ yukꞌuꞌ. 16 Chinpujbꞌatojan ebꞌnaj xolaj konhobꞌ, hunteqꞌan konhobꞌ mach ohtabꞌilo yu ebꞌnaj, mach ohtabꞌilopaxo yu yichmam ebꞌnaj. Bꞌajxanhetuꞌwal chito ebꞌnaj, tzujannhetikꞌa chꞌen espada yinta ebꞌnaj, masanta chitanhkanilo ebꞌnaj sunil,” xhi Komam.
17 Chalnipaxo Komam Yahawil kaw aykano yip:
“Abꞌewej, aqꞌwetij ebꞌix ix ay ismunil yoqꞌi, yet ay hunu bꞌiskꞌulal,” xhi Komam.
18 Yalabꞌ ebꞌnaj ah Jerusalén: “Hoꞌ hulujabꞌ ebꞌix yinh anhe, okojabꞌ ebꞌix oqꞌo jinh,
kat isnohpaxilo isbꞌaqꞌ sat ebꞌix yu yal sat, haxa istxow sat ebꞌix xin chiꞌay tꞌultꞌun haꞌ yinh.
19 Bꞌey Sión chiꞌabꞌelax bꞌit yet bꞌiskꞌulal. ¡Kaw makonhtanhtzelaxkaniloj!
Kaw maꞌelkano kopixan yuto makobꞌejkano kokonhobꞌ, maꞌuchkꞌalaxkanto jatut,” xhi.
20 Chalnipaxoj: “Haxa hex ix hex tiꞌ, abꞌewe istzotiꞌ Komam Jahawil,
hajbꞌawe hetxikin yinh tzet chala. Kuywe heyunin yinh tzet chu yoqꞌi.
Kuywepaxo heyet ixal yinh huneꞌ bꞌit yet kamom.
21 Mahul kamikal yul jatut, maꞌokti yul wentanah.
Maꞌapnipaxo yul palacio, chispotxꞌnikamo nixhte unin chiꞌekꞌ yulaj bꞌeh,
yebꞌ ebꞌnaj tzehtaj chiꞌekꞌ txonhbꞌal,” xhi.
22 Yalni Komam wetan: “Hal hakaꞌ tiꞌ tet anma: Hak tiꞌ chiyute yalni Komam Jahawil:
‘Haꞌ isnimanil ebꞌnaj chipotxꞌlaxkamoj chikankano pakꞌnoj,
hakaꞌ chu iskankano istzaꞌ noꞌ wakax bꞌay chilowi,
yebꞌ hakaꞌ yaykano isyachanil iswiꞌ ixim trigo sat txꞌotxꞌ yu naj kꞌupom trigo,
machi hunu mak xin chisikꞌnikanh isnimanil anma tuꞌ,’ kachi,” xhi Komam tet yaꞌ Jeremías.
Haꞌ yitzꞌatil iswiꞌ Komam Dios haꞌ yilal bꞌay yaqꞌni tzalaho iskꞌul naj winaj
23 »Komam Jahawil chihalni hakaꞌ tiꞌ: “Naj ay yitzꞌatil iswiꞌ,
mach chu isloloꞌnhe isbꞌa naj yinh yitzꞌatil iswiꞌ; hakpax tuꞌ naj kaw ay yip,
mach chu isloloꞌnhe isbꞌa naj yu yip;
hakpax tuꞌ xin naj qꞌalom,
mach chu isloloꞌnhe isbꞌa naj yu isqꞌalomal.
24 Wal xin aqꞌwe tzalaho hekꞌul yinh bꞌaytet yilal heyaqꞌni tzalaho hekꞌul:
haꞌ ton intxumchalojan heyu, yebꞌ heyohtanheni tato hanintiꞌan Yahawil hinan. Kaw kꞌulchꞌan inkꞌulan,
haꞌ isyelal yebꞌ istoholal chinwatxꞌehan sat txꞌotxꞌ tiꞌ; haꞌ hunteqꞌan tiꞌ chiwochehan,” xhi Komam Jahawil.
25 »Chalnipaxo Komam Jahawil hakaꞌ tiꞌ: “Wal xin chul istzꞌayikal bꞌay chiwayojan isyaꞌtajil yibꞌanh sunil mak ayko circuncisión yinh, yebꞌ yibꞌanh mak mach ayoko circuncisión yinh. 26 Haꞌ ton anma ah Egipto, anma ah Judá, anma ah Edom, anma ah Amón, anma ah Moab, yebꞌ anma chikꞌobꞌoxnhen xil iswiꞌ, anma ay bꞌey txꞌotxꞌ desierto, yuto sunil hunteqꞌan konhobꞌ tuꞌ mach ayoko circuncisión yinh. Hakpax tuꞌ ebꞌnaj Israel mach circuncisión yinh yanma ebꞌnaj,”a xhi Komam,» xhi yaꞌ Jeremías.