Hunteqꞌan tioxh mach diosoj hanhechꞌan Komam Jahawil Dios yinh kaw isyelal
10
Yalnipaxo yaꞌ Jeremías: «Abꞌewe tzotiꞌ yal Komam Jahawil teyinh, hex Israel. 2 Hak tiꞌ yalni Komam Jahawil hakaꞌ tiꞌ:“Mach chebꞌeybꞌalnhe tzetaj chisbꞌeybꞌalnhe ej nimeta konhobꞌ,
mach chexxiw tet hunteqꞌan tzet ye tuꞌ chisye isbꞌa satkanh, hunteqꞌan bꞌay chixiw hunteqꞌan ej nimeta konhobꞌ.
3 Yuto haꞌ isbꞌeybꞌal ej konhobꞌ, kaw matzet chaliloj,
haꞌ te teꞌ chiꞌok siꞌal chibꞌey ebꞌnaj istzokꞌo xolaj qꞌebꞌtaj kat yiniti ebꞌnaj,
lahwi tuꞌ chꞌok naj hosom teꞌ iswatxꞌenilo tioxh yinh teꞌ yu chꞌen tzꞌujubꞌ.
4 Chiyaniko naj chꞌen oro yebꞌ chꞌen plata yelawilo hunteqꞌan tioxh tuꞌ,
lahwi tuꞌ chispahniko ebꞌnaj islawuxhal yu martillo, hak tuꞌ xin machi bꞌili.
5 Hunteqꞌan tuꞌ tohol yekanh, hakaꞌ teꞌ palma, yajaꞌ mach chitzoteli;
chiꞌijlaxikꞌoj yuto mach chu isbꞌelwi. Mach chexxiw tet, yuto mach chu yanayo isyaꞌtajil yibꞌanh anma,
machipaxo yip iswatxꞌen iskꞌulal yinh anma,” xhi Komam.
6 Machi hunu mak hakaꞌ hach tiꞌ, Mam Jahawil. Hach tiꞌ kaw nimankano hawelapnoj,
yebꞌ kaw aykano yelapno habꞌi, yuto kaw aykano hawip.
7 ¿Maktaxka mach chixiw tawet? Hach tiꞌ yahaw hach yinh sunil ej konhobꞌ,
yuxin tawetnhe bꞌay wal isxiw anma; yuto xol sunil ebꞌnaj winaj kaw helan yebꞌ xol ebꞌnaj yahaw konhobꞌ sat yibꞌanhqꞌinal tiꞌ,
machi hunu mak hakaꞌ hach tiꞌ.
8 Sunil ebꞌnaj winaj tuꞌ machi isnabꞌal ebꞌnaj,
machipaxo ishelanil ebꞌnaj.
Haꞌ hunteqꞌan tioxh chiswatxꞌe ebꞌnaj yinh te teꞌ,
machi hunu kuybꞌanile chꞌok yalaꞌ tet anma.
9 Yebꞌ yu chꞌen plata watxꞌebꞌilxa chiꞌilaxti bꞌey Tarsis,
yebꞌ chꞌen oro chiꞌilaxti bꞌey Ufaz,
haꞌ ebꞌnaj helan iswatxꞌeniko yinh hunteqꞌan tioxh tuꞌ;
lahwi tuꞌ chiswatxꞌeniko ebꞌnaj qꞌap qꞌap yax yebꞌ qꞌap kajhulonhe xilo isqꞌap.
Haꞌ sunil hunteqꞌan tuꞌ watxꞌebꞌil yu ebꞌnaj winaj helan iswatxꞌen tzetaj ye tuꞌ.
10 Wal Komam Jahawil, Dios yinh kaw yeli, Dios itzitz, yebꞌ xin yahaw yinh sunilbꞌal ej tiempo.
Hayet chitit ishowal Komam chibꞌili txꞌo txꞌotxꞌ. Mach chitecha yu nimeta konhobꞌ yet chitit ishowal Komam yinh.
11 »Halwe tet ebꞌnaj nan konhobꞌal hakaꞌ tiꞌ: “Haꞌ hunteqꞌan komon dios maxhtaj watxꞌenhe satkanh yebꞌ txꞌo txꞌotxꞌ, yuxin yilal iskꞌaytzelaxilo sat yibꞌanhqꞌinal yebꞌ yalanh satkanh tiꞌ,” kexchi.
12 Haꞌ Komam watxꞌenhe txꞌo txꞌotxꞌ yu yip, haꞌ Komam anheko sat yibꞌanhqꞌinal tiꞌ yinh istxolal yu ishelanil,
islehnito Komam satkanh yu ishelanil.
13 Hayet chibꞌili yul isnuqꞌ Komam chiqꞌanhi ha haꞌ ay yul satkanh;
haꞌ Komam chiꞌinikanh moyan islahobꞌal istiꞌla txꞌo txꞌotxꞌ,
chaniti kꞌuh chijepla yet chiyaqꞌni haꞌ nhabꞌ, kat yiniti Komam jaqꞌeqꞌ bꞌay kꞌuwan.
14 Sunil anma chisukbꞌilo isnabꞌal, yebꞌ xin machi ishelanil;
haꞌ ebꞌnaj watxꞌen tioxh chitxꞌixwilo ebꞌnaj yinh tioxh,
yuto haꞌ hunteqꞌan tioxh, leqꞌtiꞌal yehi, machi yespíritu.
15 Hunteqꞌan tioxh tuꞌ matzet chaliloj, matzet chiswatxꞌe,
hayet istzꞌayikal yet chiyaniti Komam isyaꞌtajil kat istanhkaniloj.
16 Wal Komam Jahawil, isDiosal yaꞌ Jacob, mach lahano hakaꞌ tioxh tuꞌ,
yuto haꞌ Komam watxꞌenhe sunil. Issikꞌilo Komam Israel yunhe yok ismajuloj,
Komam Jahawil kaw aykano yip, hak tuꞌ isbꞌi Komam.
Isyaꞌtajil chihul yibꞌanh anma Judá
17 »Kutxbꞌawekanh heqꞌuybꞌe heyayo sat txꞌotxꞌ, hex hoybꞌil hexayo tiꞌ.a
18 Yuto hak tiꞌ yu yalni Komam Jahawil hakaꞌ tiꞌ: “Hayet hunel tiꞌ kaw nahat chexwatojan hex ay hex yul konhobꞌ tiꞌ,
nahat chexapni hakaꞌ hunu qꞌojbꞌal yu noꞌ ula;
chexwaqꞌ ekꞌo yaꞌan yu heyabꞌen isyaꞌil,” xhi Komam.
19 ¡Ay, kaw kꞌanchꞌan hinan yu isyaꞌtajil chiꞌay wibꞌanhan!
Haꞌ istxꞌakil innimaniltiꞌan kaw yaꞌkanoj.
Wal xin chiwalan inchukilan hakaꞌ tiꞌ: “Kaw yeli huneꞌ yabꞌil tiꞌ ayayo wibꞌanhan,
yuxin kaw yilal waqꞌni techahojan,” kinchihan.
20 Xaꞌuchkꞌakanto qꞌap mantiado aykanh watutojan,
xatꞌijmokanto txꞌanh txꞌanh; xakinbꞌejlaxkanojan yu wuninalan, xatanhilo ebꞌnaj.
Matxa mak chiwatxꞌenkanh watutan, matxa mak chilitxꞌbꞌankanh incortinahan.
21 Yuto ebꞌnaj chitanhen konhobꞌ tiꞌ, meltzoko ebꞌnaj yinh manhnabꞌalehal,
machi issayilo ebꞌnaj Komam Jahawil,
yuxin machi alaxayo iskꞌulal yibꞌanh ebꞌnaj yu Komam, wal xin sajlemito sunil isnoqꞌ ebꞌnaj.
22 Chitit isqꞌumal howal kat yah wejna anma yu xiwkilal,
yuto chal-laxi ta chul anma bꞌey konhobꞌ ayko yinh yetkꞌulal norte,
kat istzꞌinhlokano ej konhobꞌ Judá,
kat yoknikaniko yatuto noꞌ oj.
23 Walnihan: “¡Mam Wahawil, wohtajan tato naj winaj,
mach yahawo naj yinh tzetaj chiswatxꞌe,
maxhtajpaxo naj chiswatxꞌeko isbꞌa yinh istxolal bꞌayejtuꞌwal chiꞌekꞌi!
24 Mamin, ayo isyaꞌtajil wibꞌanhan,
yajaꞌ tzꞌayojabꞌ hakꞌul winhan yinh istoholal,
machojabꞌ chitit hahowal winhan,
haxinwal mach chintanhilojan yinh hunelnhe.
25 Ayo hahowal yibꞌanh ej konhobꞌ machi kach ohtanheniloj,
yebꞌ yibꞌanh nimeta konhobꞌla mach awten habꞌi yinh.
Yuto haꞌ hunteqꞌan konhobꞌ tuꞌ tanhtzenilo iskonhobꞌ yaꞌ Jacob,
hunelnhe yuchkꞌakanto ebꞌnaj, kaw tzꞌinan yukano iskonhobꞌ yaꞌ Jacob tiꞌ yu ebꞌnaj,” kinchihan,» xhi yaꞌ Jeremías.b