Mach isyije ebꞌnaj Israel istrato Komam Dios yaqꞌ tet ebꞌnaj
11
Tzotiꞌ tit yu Komam Jahawil tet yaꞌ Jeremías, xhi hakaꞌ tiꞌ: 2 «Abꞌe trato tꞌinhbꞌabꞌilkano wuhan kat hawalnipaxo yabꞌe sunil ebꞌnaj winaj ah Judá yebꞌ sunil anma ay bꞌey Jerusalén, 3 kat hawalni tet: “Hak tiꞌ yalni Komam Jahawil, isDiosal Israel, hakaꞌ tiꞌ: ‘Tijabꞌ tzꞌaktiꞌ yibꞌanh mak mach chiyijen tzet chal huneꞌ tꞌinhbꞌabꞌil wuhan teyet, 4 haꞌ ton huneꞌ trato waqꞌan tet ebꞌnaj heyichmam yinh huneꞌ tzꞌayik bꞌay inhekꞌilojan ebꞌnaj sat txꞌotxꞌ Egipto, huneꞌ konhobꞌ lahan hakaꞌ horno bꞌay chinhuslax chꞌen hierro. Walnihan tet ebꞌnaj: Abꞌewe tzet chiwalan kat heyijen intzotiꞌan, huneꞌ tzet chinchejan heyubꞌ. Ta cheyije tzet chiwalan, chexok inkonhobꞌojan kat wokan heDiosaloj,’ kinchihan. 5 Yuxin ta cheyije tzet chiwalan, chinyijehan tzet walan tet heyichmam, waqꞌni bꞌinaho inbꞌihan ta chiwaqꞌan huneꞌ txꞌotxꞌ teyet, txꞌotxꞌ kaw yax sat bꞌay chꞌekꞌ yojomal noꞌ lech yebꞌ noꞌ kabꞌ, hakaꞌ ha haꞌ, haꞌ ton txꞌotxꞌ bꞌay ay hex tiꞌ tinanh,”» xhi Komam.Intaqꞌwihan tet Komam Jahawil: «Yubꞌojabꞌi,» kinchihan.
6 Yalni Komam wetan: «Halikꞌo sunil hunteqꞌan tzotiꞌ tiꞌ yulajla konhobꞌ ay yul ismajul Judá, kat hawalnipaxikꞌo yulaj bꞌeh ayko yul konhobꞌ Jerusalén hakaꞌ tiꞌ: “Abꞌewe tzet chal huneꞌ trato tꞌinhbꞌabꞌilkano tiꞌ, kat heyaniko yinh ismunil,” kachi. 7 Yuxin hayet winiltijan ebꞌnaj heyichmam bꞌey txꞌotxꞌ Egipto yichi walnihan tato chiyabꞌe ebꞌnaj tzet chiwalan, hataxtikꞌa tuꞌ masanto tinanh yexnheto walnihan hakaꞌ tiꞌ: “Abꞌewe tzet chiwalan,” kinchihan. 8 Yajaꞌ machi istxalbꞌa ebꞌnaj istxikin yabꞌeni, mach isyije ebꞌnaj tzet walan. Wal xin ok tzujno ebꞌnaj yinta istxꞌojal tzet chal islutꞌal yanma, yuxin chiwatijan isyaꞌtajil yibꞌanh ebꞌnaj hakaꞌ sunil tzet tꞌinhbꞌabꞌilkano wuhan yebꞌ ebꞌnaj, yinh tzet waqꞌan yunhe isyijen ebꞌnaj, yajaꞌ xin mach isyije ebꞌnaj,» xhi Komam wetan.
9 Yalnipaxo Komam Jahawil wetan: «Haꞌ anma ah Judá yebꞌ anma ah Jerusalén, pakꞌiko howal winhan, 10 ismeltzo iswatxꞌen istxꞌojal, hakaꞌ istxꞌojal iswatxꞌe ebꞌnaj bꞌabꞌel yichmam ebꞌnaj, mach isje ebꞌnaj yabꞌeto intzotiꞌan, yok tzujno ebꞌnaj yinta hunteqꞌan komon dios, chiyinayo isbꞌa ebꞌnaj tet. Haꞌ ebꞌnaj Israel yebꞌ ebꞌnaj Judá tiꞌ, ok ebꞌnaj ismanhkꞌo huneꞌ tzet intꞌinhbꞌakanojan tet yichmam ebꞌnaj. 11 Yuxin hanin Yahawintiꞌan, hankawhinan chiwalan: Chiwatijan isyaꞌtajil yibꞌanh ebꞌnaj, huneꞌ yabꞌil matxa chisje iskolni isbꞌa ebꞌnaj tet. Chꞌeliko yaw ebꞌnaj winhan, yajaꞌ matxa chiwabꞌetojan. 12 Yuxin anma ah Judá yebꞌ anma ay bꞌey Jerusalén, chito isqꞌanaꞌ kolwal tet istioxh bꞌay chisnhus teꞌ pom; yajaꞌ mach chu iskolcha anma yu istioxh tuꞌ. 13 Yuto hakaꞌtikꞌa isbꞌisil konhobꞌ ay yul ismajul Judá, hak tuꞌ isbꞌisil istioxh ebꞌnaj, haxa anma ah Jerusalén xin hakaꞌtikꞌa isbꞌisil bꞌeh yul konhobꞌ, hak tuꞌ isbꞌisil mexha yet xahanbꞌal bꞌay chisnhus teꞌ pom sata tioxh Baal.
14 »Hach tiꞌ xin mach chu hawok tzotelo yinh huneꞌ konhobꞌ tiꞌ, machi eliko hawaw winhan yu ebꞌnaj, mach chachtxahli wetan yinh ebꞌnaj, yuto mach chiwabꞌehan yet chisqꞌanni ebꞌnaj tato chinkolilojan ebꞌnaj yinh istzꞌayikal yet chul isyaꞌtajil yibꞌanh ebꞌnaj.
15 ¿Tom ayto yokbꞌalti inkonhobꞌan ochebꞌil wuhan yul watuttiꞌan,
lahwi iswatxꞌenkano txꞌiꞌal isyahbꞌetajil yul insatan?
¿Tajka chenah tato hayet chenhusni no noqꞌ xahanbꞌalil wetan,
kat winilojan isyaꞌtajil yibꞌanh konhobꞌ tiꞌ, kat iskolchaloj?
16 Yalanhtokanoj, lahan inkonhobꞌtiꞌan,
hakaꞌ hunu teꞌ olivo kaw yax, yebꞌ kaw saqꞌal yeko sat,
huneꞌ teꞌ olivo tuꞌ kaw ochebꞌal jilnikano teꞌ,
yajaꞌ tinanh xin chintanhtzelojan teꞌ hakaꞌ chu isqꞌahto te teꞌ yu nimeta jaqꞌeqꞌ,
kat istzꞌato isqꞌabꞌ teꞌ yu kꞌuh.
17 »Yuto hanin Yahawilintiꞌan, Yahawil kaw aykano yip, haninan tzꞌunnhe konhobꞌ Israel yebꞌ konhobꞌ Judá, yajaꞌ chiwalan ta chiꞌay isyaꞌtajil yibꞌanh yu sunil istxꞌojal xaꞌiswatxꞌe. Xayaqꞌ tij inhowalan, yuto chisnhus teꞌ pom tet tioxh Baal,» xhi Komam.
Yabꞌelo yaꞌ Jeremías tato ay hunteqꞌan ebꞌnaj chiyoche yaqꞌaꞌ kamoj
18 Yalnipaxo yaꞌ Jeremías: «Haꞌ Komam Jahawil aqꞌni wohtanhelojan tato chiyoche ebꞌnaj ayko ishowal winhan kinyaqꞌaꞌ kamojan, hak tuꞌ yu wohtanhenilojan tzet chiyoche ebꞌnaj iswatxꞌeꞌ winhan. 19 Hanintiꞌan lahan hinan hakaꞌ hunu meꞌ tonhe tukan chiꞌilaxto kamoj, mach intxuman ta chinalaxiko istxꞌojal winhan, chalni ebꞌnaj winhan hakaꞌ tiꞌ: “Koqꞌajaꞌweyo huneꞌ qꞌebꞌtaj tiꞌ yebꞌ sunil sat aykoj, kotanhtzekanilo xol anma itzitz sat yibꞌanhqꞌinal tiꞌ, hak tuꞌ xin matxa mak chꞌaqꞌni bꞌinahoj,” xhi ebꞌnaj.
20 Yajaꞌ wal hach tiꞌ Mam Yahawil kaw aykano yip,
hach chawila yinh tzet chꞌeliko anma yinh kaw istoholal,
hach hawohta tzetta chꞌekꞌ yinh isnabꞌal yebꞌ yinh yanma anma;
ati isyaꞌtajil yibꞌanh hunteqꞌan anma tiꞌ yinh insatan,
yuto yul haqꞌabꞌ wabꞌekanto hinbꞌahan yinh ej isyaꞌtajil chinahlaxkanh winhan.
21 »Yuxin hak tiꞌ yalni Komam Jahawil yinh ebꞌnaj ay bꞌey Anatot, ebꞌnaj choche chinkaman, ebꞌnaj halni wetan hakaꞌ tiꞌ: “Mach chawalikꞌo istzotiꞌ Komam Jahawil. Ta chawalikꞌo xin, chachkam yul koqꞌabꞌanh,” xhi ebꞌnaj. 22 Chalni Komam, Yahawil yinh Sunil, hakaꞌ tiꞌ: “Haninan chiwayojan isyaꞌtajil yibꞌanh ebꞌnaj. Haꞌ ebꞌnaj tzehtaj chitejlaxkamo ebꞌnaj yu espada, haxa iskutzꞌin yebꞌ iskꞌahol ebꞌnaj xin chikamkanh yu wahil. 23 Matxa hunu ebꞌnaj chikan xol ebꞌnaj, yuto chihul istiempohal bꞌay chiwatijan isyaꞌtajil yibꞌanh ebꞌnaj ay bꞌey konhobꞌ Anatot,” xhi Komam,» xhi yaꞌ Jeremías.