Isqꞌambꞌebꞌal yaꞌ Jeremías yebꞌ ispajtzebꞌal Komam Dios
12
Kaw tohol hachkanoj, Mam Wahawil,yuxin mach intzanojan wokan inteyeleno hinbꞌahan yebꞌ hach,
yajaꞌ xin chinokan walaꞌan tawet yinh tzet chinqꞌambꞌehan.
¿Tzet yinh yuxin kaw kꞌul chꞌekꞌ yilaꞌ ebꞌnaj txꞌoj isbꞌeybꞌal?
¿Tzet yinh xin ay tzet ay ebꞌnaj chiꞌaniko leqꞌtiꞌal?
2 Hach hatzꞌunayo ebꞌnaj,
yanayto xeꞌ yul txꞌotxꞌ, ischꞌibꞌkanh, yaqꞌni sat.
Chach yaqꞌ bꞌinaho ebꞌnaj yu istiꞌ,
yajaꞌ yanma ebꞌnaj xin nahat yelo tawinh.
3 Yajaꞌ hach tiꞌ Mam Jahawil, ohtabꞌil hinan hawu, tꞌanhan hach winhan,
kinhawilwehan hawilni ta ayko wanmahan tawinh.
Ito hunteqꞌan ebꞌnaj tuꞌ hakaꞌ chu yilaxto noꞌ meꞌ kamoj,
chapohnikanilo ebꞌnaj yunhe ismaqꞌlaxkamo ebꞌnaj yinh istzꞌayikal bꞌay chiꞌaqꞌlaxkamo anma.
4 ¿Hayebꞌtom tzꞌayik tajin sat txꞌo txꞌotxꞌ tiꞌ,
yebꞌ hayebꞌtom tzꞌayik chitajayo teꞌ telaj sat txꞌotxꞌ?
Yu ismul anma ay sat txꞌotxꞌ tiꞌ,
yuxin matxa no noqꞌ yebꞌ noꞌ chꞌik,
yuto yal ebꞌnaj hakaꞌ tiꞌ:
«Mach chil Komam Dios tzet chonhtanhi,» xhi ebꞌnaj.
5 Istaqꞌwi Komam wetan: «Tato mach chaxhqꞌoji hawaqꞌni anhe yinta ebꞌnaj chiyaqꞌ anhe yu yoj,
¿tzettaxka chu halahbꞌan hawaqꞌni anhe yinta ebꞌnaj ayahto yibꞌanh cheh?
Ta mach tꞌinhano haweh chawabꞌe bꞌay matzet chihul tawinh,
¿tzettokꞌanabꞌ chu hawekꞌ xolaj teꞌ qꞌebꞌtaj ayayo istiꞌla haꞌ Jordán?
6 Yuto haꞌ kaw ebꞌnaj hawuxhtaj yebꞌ ebꞌnaj yuxhta hamam ah wejna howal tawinh,
yahpaxo yaw ebꞌnaj tawintaj.
Hayet kꞌul istzotel ebꞌnaj tawet, mach chawayto yul hawanma yinh tzet chal ebꞌnaj,» xhi Komam.
7 Yalnipaxo Komam Jahawil: «Xahinbꞌejkanojan watutan,
xahinbꞌejpaxkanojan inmajulan,
haꞌ inkonhobꞌan kaw ochebꞌil yu wanmahan wakojan yul isqꞌabꞌ ebꞌnaj ayko ishowal yinh inkonhobꞌtuꞌan.
8 Haꞌ inmajultiꞌan lahan yul insatan hakaꞌ noꞌ bꞌalam chꞌekꞌ xolaj nimeta qꞌebꞌtaj;
chꞌel yaw nhisanti istiꞌ winhan, yuxin yahbꞌil wuhan.
9 Haꞌ inmajultiꞌan lahan yul insatan hakaꞌ noꞌ chꞌik lojom chibꞌe tzꞌibꞌinhtanhe jilni jinh,
yajaꞌ hoybꞌilpaxayo yu hunteqꞌanxa noꞌ chꞌik lojom chibꞌe.
Tijabꞌ sunil noꞌ xoltelajil noqꞌ, iskutxbꞌahabꞌ isbꞌa noꞌ, kat iskꞌuxni noꞌ yet.
10 Txꞌiꞌal ebꞌnaj yilomal anma nan konhobꞌal hul etanoto teꞌ uva tzꞌunbꞌil,
isxanhobꞌtanhen ebꞌnaj inmajulan,
haꞌ inmajul tuꞌan kaw saqꞌal jilni.
Elkaniko txꞌotxꞌ desiertohal yu ebꞌnaj, kaw tzꞌinlokanoj.a
11 Uchkꞌalaxkanto inkonhobꞌan yu ebꞌnaj,
kaw oqꞌ yu bꞌiskꞌulal chiwilan,
kaw tzꞌinan yukano sunil istxꞌotxꞌ,
yuto machi hunu ebꞌnaj winaj tiꞌ istxum isbꞌa iskꞌul.
12 Tit sunil ebꞌnaj yet howal ay yinhla istzalanil witz ay sat txꞌotxꞌ desierto,
istanhtzenilo ebꞌnaj inkonhobꞌan, yuto hanin Yahawilintiꞌan,
ay huneꞌ wespadahan chitanhtzenilo anma ayko yinh isqꞌaxepal iskꞌul txꞌo txꞌotxꞌ tiꞌ masanta yinh hunxa isqꞌaxepal txꞌotxꞌ.
Matxa hunu mak tiꞌ chiꞌilni aqꞌankꞌulal.
13 Istxihayo inkonhobꞌan ixim trigo, yajaꞌ txꞌix teꞌ kutxbꞌalaxkanh,
yaqꞌ yanma ebꞌnaj ismunlahi yajaꞌ nabꞌanhe ismunil ebꞌnaj;
txꞌixwikanh ebꞌnaj yinh sat istzꞌunubꞌ yu wayojan inhowalan yibꞌanh ebꞌnaj,» xhi Komam.
14 Tzotel Komam Jahawil yinh ej konhobꞌ kaw machiswalil ayayo iskawilal Israel, haꞌ ton hunteqꞌan konhobꞌ etanto txꞌotxꞌ yaqꞌ Komam ismajulo konhobꞌ Israel. Yalni Komam hakaꞌ tiꞌ: «Haninan chiwilojan ebꞌnaj sat istxꞌotxꞌ, chiwinilojan anma ah Judá xol ebꞌnaj. 15 Haxa yet lahwi winilojan ebꞌnaj, chinmeltzohan, kat istzꞌayo inkꞌulan yinh ebꞌnaj kat waqꞌni meltzohojan hunun ebꞌnaj sat ismajul yebꞌ sat istxꞌotxꞌ hunelxa. 16 Ta chako hunteqꞌan konhobꞌ tuꞌ yinh iskꞌul yabꞌen ischejbꞌanil inkonhobꞌan, kat yaqꞌni bꞌinaho inbꞌihan, hakaꞌ yu iskuyni ej konhobꞌ tuꞌ inkonhobꞌan yaqꞌni bꞌinaho tioxh Baal; wal tuꞌ chiꞌehayo ebꞌnaj xol inkonhobꞌan, kat yay isyaxil yibꞌanh ebꞌnaj. 17 Yajaꞌ ta machi yabꞌe ebꞌnaj xin, chiwilojan ebꞌnaj hakaꞌ chu ishokꞌlaxkanh hunu te teꞌ yebꞌ sunil isxeꞌ, hak tuꞌ chiwutehan ebꞌnaj, kat intanhtzenkanilojan ebꞌnaj,» xhi Komam Jahawil.