Yechel yinh huneꞌ qꞌap txꞌambꞌale xaqꞌatoj
13
Yalni Komam Jahawil wetan hakaꞌ tiꞌ: «Asiꞌ, kat haloqꞌni hunu hatxꞌambꞌal lino, kat hawaniko yinh hawiktaj, yajaꞌ mach chawayto qꞌap txꞌambꞌale tuꞌ xol haꞌ,» xhi Komam. 2 Inloqꞌnihan qꞌap txꞌambꞌale tuꞌ hakaꞌtikꞌa yu yalni Komam wetan, wanikojan qꞌap iskꞌalilo wiktajan. 3 Lahwi tuꞌ istzotelpaxo Komam wetan yinh iskayelal, yalni hakaꞌ tiꞌ: 4 «Ito huneꞌ iskꞌalil hawikta maxaloqꞌ tiꞌ, kat hato istiꞌ haꞌ Éufrates kat hawebꞌanto yul islotꞌil iskꞌul chꞌen nimeta chꞌen, istiꞌ haꞌ,» xhi Komam. 5 Hak tuꞌ yu intohan istiꞌ haꞌ, webꞌantojan qꞌap txꞌambꞌale tuꞌ, hakaꞌtikꞌa yu yalni Komam wetan.6 Haxa yet yekꞌto txꞌiꞌal tzꞌayik yalni Komam wetan hakaꞌ tiꞌ: «Ahanhwanoj kat hato istiꞌ haꞌ Éufrates kat hawiniti iskꞌalil hawikta inchejan hawebꞌatoj bꞌey tuꞌ,» xhi Komam. 7 Hak tuꞌ yu intohan istiꞌ haꞌ Éufrates, bꞌay webꞌakaniktojan iskꞌalil wikta tuꞌan, winiltijan qꞌap, yajaꞌ xin xaqꞌato qꞌap, matxa xin tzet okniko qꞌap.
8 Lahwi tuꞌ istzotel Komam Jahawil wetan hunelxa, yalni: 9 «Hakaꞌ yu isqꞌato huneꞌ txꞌambꞌale tiꞌ hak tuꞌ chu waqꞌni qꞌajotojan isloloꞌal anma ah Judá yebꞌ isloloꞌal anma ah Jerusalén. 10 Haꞌ huneꞌ konhobꞌ kaw txꞌojkano tiꞌ, mach isje yabꞌeꞌ intzotiꞌan, tzujaniko yinta tzet choche yanma yebꞌ yinta hunteqꞌan tioxh chal isdiosaloj chiyinayo isbꞌa tet, kat yay jahno sataj, haꞌ hunteqꞌan anma tiꞌ lahan chꞌelkaniko hakaꞌ qꞌap txꞌambꞌale qꞌatoj, matxa tzet chꞌoknikoj. 11 Hakaꞌ hunu mak chiꞌaniko hunu txꞌambꞌal yinh yiktaj, hak tuꞌ wehan yebꞌ konhobꞌ Israel yebꞌ konhobꞌ Judá, kaw huneꞌnhe wehan yebꞌi yu yok inkonhobꞌojan, kat isbꞌinakanoj yu yalni kꞌul-la tzotiꞌ winhan, kat yaniko inmayan; yajaꞌ mach yabꞌeto tzet walan,» xhi Komam Jahawil.
Yechel yinh hunteqꞌan tzꞌahabꞌ nohnaj
12 Yalnipaxo Komam wetan: «Hal hunteqꞌan tzotiꞌ tiꞌ tet konhobꞌ, hak tiꞌ yalni Komam Jahawil, isDiosal Israel: “Hunun isnet havino masan chinohtzelax yu vino,” kachi. Chiyalno ebꞌnaj tawet: “¿Tom mach johtajojanh hawalni ta sunil isnet havino yilal isnohtzelaxi?” xhi ebꞌnaj. 13 Yajaꞌ chachtaqꞌwo tet ebꞌnaj hakaꞌ tiꞌ: “Haꞌ Komam Jahawil chalni hakaꞌ tiꞌ: Chiwayojan isyaꞌtajil yibꞌanh sunil anma ay yul konhobꞌ tiꞌ hakaꞌto kaw niman vino chiwaqꞌan yukꞌuꞌ, chiyukꞌ ebꞌnaj rey titna yinh yaꞌ rey David, ebꞌnaj chitzꞌonhi yul istzꞌonhobꞌal yaꞌ, yebꞌ ebꞌyaꞌ sacerdote, yebꞌ ebꞌnaj chiyal isbꞌa inchejabꞌojan, yebꞌ sunil ebꞌnaj ay yul konhobꞌ Jerusalén tiꞌ.a 14 Chinmaqꞌ pohojan ebꞌnaj hakaꞌ chu ispeylenqꞌalo isbꞌa txꞌotxꞌ tzꞌahabꞌ yet chitenlaxikoj, lahan chiyute isbꞌa ebꞌnaj mame yebꞌ ebꞌnaj kꞌahole. Hanin Jahawil intiꞌan chiwalan: ‘Matxa chiwaqꞌ nimankꞌulalan yinh ebꞌnaj, wal xin mach chiwiqꞌ bꞌiskꞌulalan, yebꞌ mach chitzꞌay inkꞌulan intanhtzenkanilojan,’”» xhi Komam Jahawil.
Ebꞌnaj Judá ilaxto ebꞌnaj preso
15 Yalni yaꞌ Jeremías: «Hex konhobꞌ tiꞌ, kaw hajbꞌawe hetxikin, abꞌewej.
Mach cheyikanh hebꞌa, yuto xatzotel Komam Jahawil teyet.
16 Aweko ismay Komam Jahawil, koDiosal, yalanhto maxhto chiyati Komam qꞌejholo,
yalanhto maxhto chextxaqꞌmo yinh ej wonhan xol qꞌejholo,
yalanhto maxhto chismeltzo Komam huneꞌ sajilqꞌinal echmabꞌil heyu yinh kamikal yebꞌ yinh qꞌejholohal.
17 Yajaꞌ ta mach cheje heyabꞌeꞌ hunteqꞌan tiꞌ, chinokan oqꞌo yinh ewantajil, yu heyikanh hebꞌa,
kaw chinoqꞌan yinh bꞌiskꞌulal, kat yay tꞌultꞌun yal insatan,
yuto chexilaxto chejabꞌoj yu nan konhobꞌal, hex tiꞌ hakaꞌ ismeꞌ Komam Jahawil heyehi,» xhi yaꞌ Jeremías.
18 Yalni Komam tet yaꞌ Jeremías hunelxa: «Hal tet yaꞌ rey yebꞌ tet ix reina hakaꞌ tiꞌ:
“Iweyo hebꞌa ayanhwe tzꞌonhno sat txꞌotxꞌ, yuto haꞌ hecorona chiꞌaniko hemay ayahto yinh hewiꞌ, chiꞌaykꞌayoti yinh hewiꞌ,” kachi.
19 Haꞌ ispultahil ej konhobꞌ ay bꞌey txꞌotxꞌ Neguev chimajikanoj, matxa hunu mak chu ishajni ispultahil.
Sunil anma ah Judá chihekꞌlaxilo yul iskonhobꞌ tiꞌ, kat yilaxoto preso bꞌey nan konhobꞌal.
20 Ilwe istit ebꞌnaj ayko ishowal teyinh yinh yetkꞌulal norte.
¿Bꞌaytuꞌwal ay hunbꞌulan inkonhobꞌan wakojan yul haqꞌabꞌ yu hatanheni? Haꞌ hunbꞌulan anma tuꞌ haꞌ ayko hamayoj.b
21 ¿Tzet kexchi hex ah Jerusalén yet chexok yalanh ischejbꞌanil hunteqꞌan ebꞌnaj heyamigo tikꞌa hebꞌa yebꞌi?
¿Mataxka mach cheyabꞌe isyaꞌil hakaꞌ isyaꞌil chiyabꞌe hunu ix ix yet chiwatxꞌi iskꞌul?
22 Hach Jerusalén, kꞌuxanta chawal yebꞌ hawanma hakaꞌ tiꞌ,
“¿Tzet yinh xin chihul sunil hunteqꞌan tiꞌ wibꞌanhan?” ta chawala. Chitaqꞌwi Komam:
“¡To yu sunil nimeta mule hawakoj, yuxin chiyu hakaꞌ tuꞌ, yuxin chaxhtꞌilbꞌalaxi, kat yilaxilo hapixan!
23 ¿Chimyu ishelni hunu naj etíope istzꞌumal qꞌej?
¿Chimyu ishelni noꞌ leopardo isnimanil tzꞌibꞌinhtanhe?
Hakexpax tuꞌ ¿chimisje hewatxꞌen iskꞌulal ta kaw qꞌayna hexxa hewatxꞌen istxꞌojal?
24 Yuxin haninan chexwaqꞌ pujnahotojan
hakaꞌ chu issajlemito matzꞌik yu jaqꞌeqꞌ chitit bꞌey txꞌotxꞌ desierto.
25 Haꞌ ton heyinhbꞌal hex konhobꞌ hex tiꞌ,
haꞌ xin hemajul chiwaqꞌan,
yuto kinhenahulnhetojan, iskawxi hekꞌul yinh leqꞌtiꞌal.
Haꞌ hunteqꞌan tiꞌ hankaw Yahawilintiꞌan, chiwalan.
26 Hakinpax tuꞌan chexintꞌilbꞌahan,
kat kexwanikojan yinh txꞌixobꞌal.
27 Xawilan hanta hemul yinh ixloj yebꞌ winajloj,
chewatxꞌen istxꞌojal yinh tzet choche henimanil,
yebꞌ mule chewatxꞌe iswiꞌla wonhan yebꞌ xolaj te teꞌ. ¡Ay, kaw kꞌanchꞌan hex, hex ah Jerusalén!
¿Bꞌaqꞌinh chexsajbꞌikano tinanh?
¿Hayebꞌto tzꞌayik chitoj katto hesajbꞌikanoj?”» xhi Komam.