Huneꞌ niman tajintiꞌal matxa haꞌ nhabꞌ chaqꞌa
14
Tzotel Komam Jahawil tet yaꞌ Jeremías,yibꞌanhilo huneꞌ niman waresma, yalni hakaꞌ tiꞌ:
2 «Chꞌoqꞌ anma ah Judá yu bꞌiskꞌulal,
matxa anma chꞌekꞌ yulajla ispultahil ej konhobꞌ,
toxanhe tzꞌonhanayo anma sat txꞌotxꞌ yu bꞌiskꞌulal.
Kaw chꞌel yaw anma ah Jerusalén yu isyaꞌtajil.
3 Ebꞌnaj qꞌalom chischejto ischejabꞌ iqꞌo haꞌ bꞌay chipanhi ha haꞌ,
yajaꞌ machi haꞌ chiꞌilcha yu kat ismeltzo yebꞌ istzꞌahabꞌ manhhaꞌil,
kat istxꞌixwikanh, matxa chinawi yu tzet chute isbꞌa,
chahnato yenhel iswiꞌ yu txꞌixwilal.
4 Kaw tajin sat txꞌotxꞌ, chihatto txꞌotxꞌ yu matxa haꞌ nhabꞌ chaqꞌa,
ebꞌnaj munlawom matxa chinawi yu ebꞌnaj tzet chute isbꞌa, chiyahto ebꞌnaj yenhel iswiꞌ.
5 Haꞌ noꞌ miꞌe sajche chisbꞌejkano noꞌ nixhte yunin lanhanto ispitzkꞌahi xolaj te teꞌ,
yuto machi yaxla telaj chislo noꞌ.
6 Hakpax tuꞌ noꞌ xoltelajil burro chꞌok linhno noꞌ yinh ej istzalanil wonhan, chishiqꞌni noꞌ jaqꞌeqꞌ hakaꞌ noꞌ oj;
kat ispaxilo yip ismujlubꞌal noꞌ yuto machi telaj chislo noꞌ,» xhi Komam.
7 Yalni anma Israel tet Komam: «Mam Jahawil, waxanhka komulanh chiqꞌanniti isyaꞌtajil jibꞌanhanh,
kólonhilojanh yu hanta isxahanil ay habꞌi hawu, yuto hanhonhtiꞌanh kaw manhkꞌom honhanh, yu jako komulanh tawet.
8 Mam hach ayachiko yipo iskꞌul Israel, hachnhechꞌan chakolilo yinh istiempohal isyaꞌtajil.
¿Tzet yinh xin hakaꞌ hunu nan konhobꞌal, hak tuꞌ chawute habꞌa sat txꞌotxꞌ tiꞌ?
Hakaꞌ hunu bꞌelwom, tonhe chꞌekꞌ tuklahi, huneꞌnhe aqꞌbꞌal chꞌekꞌ wayoj.
9 ¿Tzet yinh xin lahan chawute habꞌa hakaꞌ hunu naj winaj tonhe chikꞌay iskꞌul,
maka hakaꞌ hunu naj yet howal kaw helan, mach chu iskolwahi?
Mam Jahawilanh, hach tiꞌ ayachikꞌo koxolanh, kat isbꞌina habꞌi jinhanh, yuxin mach chonhhabꞌejkanojanh,» xhi anma Israel.
10 Hak tiꞌ yalni Komam Jahawil yinh konhobꞌ Israel hakaꞌ tiꞌ: «Haꞌ huneꞌ konhobꞌ tiꞌ kaw istzan yekꞌ iskꞌayaꞌ istzꞌayik yinta ej tioxh, maxhtikꞌa chixewninoj, yuxin mach chintzalahan yinh; wal xin chinnatijan ismul tinanh, kat wanayojan isyaꞌtajil yibꞌanh yu ismul,» xhi Komam.
11 Yalni Komam Jahawil wetan: «Mach chꞌeliko hawaw yinh iskꞌulal huneꞌ konhobꞌ tiꞌ. 12 Hayet mach chiwaꞌ yu istxahli wetan mach chiwabꞌehan tzet chisqꞌana, haxa yet chisnhusni no noqꞌ xahanbꞌalil wetan kat yaqꞌni isyebꞌalqꞌabꞌ wetan mach chinchahan; wal xin chintanhtzelojan ebꞌnaj yu espada, yu wahil, yebꞌ yu howla yabꞌil,» xhi Komam.
13 Intaqꞌwihan tet Komam, walnihan: «Ay, ay, Mam Wahawil, haꞌ ebꞌnaj hachejabꞌ chal ebꞌnaj ta machi howal chuli, machipaxo wahil chuli, wal xin chal ebꞌnaj ta chawaqꞌ aqꞌankꞌulal yinh hunelnhe bꞌay ayonh tiꞌanh,» kinchihan.
14 Yuxin yal Komam Jahawil wetan: «Haꞌ hunteqꞌan ebꞌnaj tuꞌ, tonhe chisbꞌaliko isbꞌa ebꞌnaj inchejabꞌojan, chalni ebꞌnaj leqꞌtiꞌal yinh inbꞌihan; wal xin matzet inchejan yalaꞌ ebꞌnaj, mach bꞌay kintzotelan tet ebꞌnaj, haꞌ hunteqꞌan waqꞌan yalaꞌ ebꞌnaj yalni tuꞌ, mach yelo, yuxin mach yelapnoj, haꞌ tzet chal ebꞌnaj tuꞌ leqꞌtiꞌal, tonhe chisnakanh ebꞌnaj. 15 Hanin Yahawilintiꞌan, chiwalan yinh hunteqꞌan ebꞌnaj chejabꞌ chischilbꞌa yalni yinh inbꞌihan ta machi howal, ta machi wahil chihul yibꞌanh konhobꞌ tiꞌ, yajaꞌ maxhtaj hinan chinchejan yalaꞌ ebꞌnaj, yuxin haꞌ hunteqꞌan ebꞌnaj chejabꞌ tuꞌ chikam ebꞌnaj xol howal yebꞌ wahil. 16 Haxa anma ay yul konhobꞌ bꞌay yal ebꞌnaj chejabꞌ leqꞌtiꞌal tuꞌ, chiꞌaqꞌlaxkamo ebꞌnaj yu espada, kat iskam yu wahil. Chikamo ebꞌnaj winaj yebꞌ yixal, yebꞌ iskꞌahol yebꞌ iskutzꞌin; chikankano pakꞌno isnimanil ebꞌnaj yulaj bꞌeh chꞌekꞌ yul konhobꞌ Jerusalén, machi mak xin chimujni isnimanil ebꞌnaj tuꞌ, chiꞌay isyaꞌtajil tuꞌ yibꞌanh ebꞌnaj yu ismul yakoj.
17 »Hal hunteqꞌan tzotiꞌ tiꞌ tet anma tuꞌ hakaꞌ tiꞌ:
“Mach chinbꞌejan woqꞌan,
mach islinhbꞌa yay tꞌultꞌun yal insatan,
woqꞌan tzꞌayik aqꞌbꞌal,
yu niman isyaꞌtajil chiꞌaqꞌni ekꞌoyaꞌ yanma inkonhobꞌan,
yuto kaw chiyabꞌe isyaꞌil isyaꞌtajil.
18 Ta chineltojan xolaj munil chiwilnihan isnimanil anma aqꞌbꞌil kamo yu chꞌen espada,
haxa yet chinoktojan yul konhobꞌ chiwilnihan iskamilo anma yu wahil.
Haꞌ ebꞌnaj chisbꞌaliko isbꞌa inchejabꞌojan yebꞌ ebꞌyaꞌ sacerdote,
toxanhe chiꞌekꞌ kolo ebꞌnaj yul hunuxa nan konhobꞌal
mach yohtajo ebꞌnaj,” kachi,» xhi Komam wetan.
19 Walnihan tet Komam: «Mamin, ¿Tom kaw yinh hunelnhe chawintanhekanilto anma ah Judá?
¿Tom kaw chayahkano konhobꞌ Sión?
¿Tzet yinh yuxin hawako kolahwilalanh,
matxa xin chonhanhchahanh?
Echmabꞌil aqꞌankꞌulal juhanh, yajaꞌ mach jilanh iskꞌulal,
echmabꞌil istzꞌayikal bꞌay chonhaqꞌlax kawxojanh,
yajaꞌ aqꞌlax somchahokanh konabꞌalanh.
20 Mam Jahawilanh, chijohtanhelojanh kotxꞌojalanh yebꞌ istxꞌojal komamanh,
yuto tawet jako komulanh.
21 Yu hanta xahan ay habꞌi hawu, mach chonhhawintanhekaniltojanh,
mach chawilo ispixan hatzꞌonhobꞌal,
kaw aykano ismay isqꞌaqꞌal, natij,
mach chatanhtze tzet tꞌinhbꞌabꞌilkano hawu jetanh.
22 ¿Aymi hunu istioxh ej nimeta konhobꞌ tiꞌ chu istit nhabꞌ yu?
¿Chimyu yaniti satkanh haꞌ nhabꞌ yul yet ischukil?
¿Mam Jahawilanh, tom maxhtaj hach tiꞌ, koDiosalanh?
Wal xin tawinhnhe chikawxi kokꞌulanh,
yuto hach watxꞌenhe sunil tzetaj ye tuꞌ,» kinchihan.