Mach chiꞌekꞌayo ishowal Komam Dios yinh Judá
15
Yalni Komam Jahawil wetan: «Waxanhka chihul yaꞌ Moisés yebꞌ yaꞌ Samuel, kat yok linhno ebꞌyaꞌ yinh insatan, maxhtikꞌa chitzꞌay inkꞌulan yinh konhobꞌ tiꞌ. Hal tet konhobꞌ, elojabꞌ yinh insatan, tojabꞌi. 2 Ta xin chisqꞌambꞌe ebꞌnaj tawet: “¿Bꞌaytuꞌwal chonhtohanh?” ta xhi, chawal hakaꞌ tiꞌ: Hak tiꞌ chiyute yalni Komam:“Haꞌ mak yetxatikꞌa ay iskami, chikami, haxa mak yetxatikꞌa ay istejlax yu chꞌen espada, espada chꞌaqꞌni kamoj,
haxa mak yetxatikꞌa ay iskam yu wahil, wahil chꞌaqꞌni kamoj,
haxa mak yetxatikꞌa yilaxto preso, chiꞌilaxto preso,” xhi Komam.a
3 »Chiwatijan kanhebꞌ majan isyaꞌtajil yibꞌanh ebꞌnaj. Ay ebꞌnaj chꞌaqꞌlaxkamo yu espada, ay ebꞌnaj chixitlaxkamo yu metx txꞌiꞌ, aypaxo ebꞌnaj chitꞌojlaxkamo yu noꞌ chꞌik, yebꞌ xin ay ebꞌnaj chikꞌuxlaxkamo yu noꞌ howla noqꞌ ay sat txꞌo txꞌotxꞌ tiꞌ, hak tuꞌ chu istanhkanilo ebꞌnaj. 4 Kaw chixiwokanh ej konhobꞌ yilni tzetta chinwatxꞌehan yinh ebꞌnaj, yu istxꞌojal iswatxꞌe yaꞌ Manasés, isreyal Judá, iskꞌahol yaꞌ Ezequías. Hunteqꞌan istxꞌojal iswatxꞌe bꞌey Jerusalén.b
5 ¿Mak chitzꞌayo iskꞌul teyinh hex ah Jerusalén?
¿Mak chiqꞌni bꞌiskꞌulal teyinh? ¿Mak chexqꞌambꞌeni ta aqꞌankꞌulal heyehi?
6 Hanin Yahawilintiꞌan, chiwalan hakaꞌ tiꞌ: “Xakinhebꞌejkanojan,” quinchihan.
Hemeltzo teyintaj; yuxin wato inqꞌabꞌan teyibꞌanh yu kexintanhtzenilojan.
¡Sikinaxa ayinan istzꞌay inkꞌulan teyinh!
7 Kexsajlemito wuhan yulaj ej konhobꞌ kaw nahat ay sat txꞌo txꞌotxꞌ tiꞌ,
hakaꞌ yijlaxto ismatzꞌikal ixim trigo yu jaqꞌeqꞌ,
matxa hunu yuninal inkonhobꞌan kankanoj.
Intanhtzelojan yuto mach isbꞌejkano ebꞌnaj isbꞌeybꞌalnhen istxꞌojal.
8 Haꞌ ebꞌix ix kan hunixal ekꞌbꞌal isbꞌisil ebꞌix sata arena ay istiꞌ haꞌ mar.
Haꞌ yinh chuman tzꞌayik watijan kamikal yibꞌanh ebꞌix miꞌe,
yebꞌ yibꞌanh ebꞌnaj uninale.
Yinhnhena tuꞌ wanitojan bꞌiskꞌulal yebꞌ isyaꞌtajil yibꞌanh konhobꞌ.
9 Haꞌ ix miꞌe hujwanh yunin pitzkꞌahi, paxkanilo yip ix, okkano isyaꞌil yinh yanma ix,
qꞌejholilo yil ix yet tzꞌayikal yuxin txꞌixobꞌalxa yaqꞌle ix, yokkano ix yinh sukal.
Haꞌ mak chitokankano xin, chiwakojan yul isqꞌabꞌ ebꞌnaj ayko ishowal yinh, yunhe ispotxꞌlaxkamo yu chꞌen espada,
hanin Yahawilintiꞌan, chiwalan huneꞌ tiꞌ,» xhi Komam.
10 Yalni yaꞌ Jeremías: «¡Miyay, hach kinhawaqꞌ pitzkꞌahojan,
kꞌanchꞌan hinan, yuto aynhetikꞌako anma howal yebꞌ bꞌuchwal winhan sat yibꞌanhqꞌinal tiꞌ!
Machi hunu mak tet xawaqꞌan chꞌen melyu kꞌamil, machipaxo hunu mak tet xaꞌinkꞌamnhehan chꞌen,
yajaꞌ xin sunil mak chintzꞌaktiꞌnhenan,» xhi yaꞌ tet ismiꞌ.
11 Yalnipaxo yaꞌ tet Komam Jahawil: «Yijabꞌ isbꞌa tzꞌaktiꞌ tuꞌ winhan,
yaj tato mach inqꞌanan iskꞌulal yibꞌanh konhobꞌ tiꞌ tawet,
yebꞌ ta mach kintxahlihan yinh yet yul isyaꞌtajil yebꞌ bꞌiskꞌulal yinh,» xhi yaꞌ Jeremías.
12 Chalni Komam Jahawil tet konhobꞌ Israel: «¿Aymi hunu mak tiꞌ chu isqꞌahnito chꞌen hierro,
chꞌen chitit yinh yetkꞌulal norte, yebꞌpaxo chꞌen bronce?
13 Yu sunil hemul yuxin chiwakojan heqꞌalomal yebꞌ tzet kaw ay istohol kꞌuwan heyu yul isqꞌabꞌ ebꞌnaj ayko ishowal teyinh,
yebꞌ sunil tzet ay sat hetxꞌotxꞌ chito ebꞌnaj matanil.
14 Chexwakojan ischejabꞌo ebꞌnaj ayko ishowal teyinh bꞌey txꞌotxꞌ mach heyohtajoj,
yuto xatit inhowalan, inhowal tuꞌan xatzuji qꞌaꞌ yinh chextzꞌato yu,» xhi Komam.
Chaqꞌ Komam Jahawil yip yanma yaꞌ Jeremías
15 Walnihan tet Komam: «Hach hawohta sunil, Mam Wahawil,
nahintijan tinanh, hulanh kolwal winhan, pajtze tet ebꞌnaj ayko ishowal winhan.
Mach chinhawintanheltojan yulbꞌal ayti hahowal.
Kaw hawohtaj tato chinbꞌuchlaxan yu xahan ayach wuhan, yajaꞌ xawaqꞌ techahojan.
16 Hayet yilcha hatzotiꞌ wuhan, inlonaytojan, haꞌ xin hatzotiꞌ aqꞌni tzalahilal yebꞌ aqꞌankꞌulal yinh wanmahan,
yuto hawet wehan, Mam Wahawil, kaw aykano hawip.
17 Mach inhunbꞌa hinbꞌahan yebꞌ ebꞌnaj bꞌuchwawom,
mach wipaxkanh hinbꞌahan yu hatzotiꞌ hawaqꞌ walaꞌan;
inchukilan kinay tzꞌonhnojan,
yuto wabꞌehan isyaꞌil hahowal yu istxꞌojal chiswatxꞌe anma.
18 ¿Tzet yinh xin chiwabꞌehan isyaꞌil yinh sunilbꞌal tzꞌayik?
¿Tzet yinh xin mach chiꞌanhcha inlahwilalan? ¿Tzet yinh xin mach chaqꞌ anhchaho isbꞌa?
¿Tzet yinh xin hakaꞌ hunu tzet ye tuꞌ tonhe chiꞌekꞌ yinh konabꞌal?
¿Chimhawute habꞌa winhan hakaꞌ hunu ha haꞌ chitanhkanh?» Kinchihan tet Komam.
19 Yalni Komam Jahawil wetan hakaꞌ tiꞌ: «Tato chachmeltzoko yul inqꞌabꞌan,
chachinchahan hunelxa, kat hawok hayijeno tzet chiwalan. Ta haꞌ iskꞌulchꞌanil chawala,
maxhtaj xin hunteqꞌan matzet chal yelapnoj.
Yinh hakaꞌ tuꞌ chachinchejan hawalaꞌ intzotiꞌan tet anma.
Meltzojabꞌiko konhobꞌ tiꞌ tawintaj yu tzet chawala, machojabꞌtaj hach chachmeltzoto yinta ebꞌnaj.
20 Chachwakojan yul konhobꞌ tiꞌ, hakaꞌ hunu kꞌubꞌ sombꞌiliko bronce xol, machi mak chiꞌuchkꞌantoj.
Chiꞌalaxiko howal tawinh, yajaꞌ machi hunu mak chiqꞌoji tawinh, yuto ayinikojan takꞌatanh,
chachinkꞌubꞌahan, chachinkolnilojan.
21 Chachinkolilojan yul isqꞌabꞌ ebꞌnaj txꞌoj, chachinkolnipaxilojan yul isqꞌabꞌ ebꞌnaj winaj kaw ay yip,» xhi Komam.