Isyaꞌtajil hul yibꞌanh anma Judá yu Komam Dios
16
Istzotel Komam Dios Jahawil wetan, yalni hakaꞌ tiꞌ: 2 «Mach chawiqꞌ hawixal, hak tuꞌ xin machi hakꞌahol yebꞌ hakutzꞌin bꞌey txꞌotxꞌ tiꞌ. 3 Yuto hanin Yahawilintiꞌan, chiwalan tawet tzet chihul yibꞌanh ebꞌnaj kꞌahole yebꞌ ebꞌix kutzꞌine chipitzkꞌa sat huneꞌ txꞌotxꞌ tiꞌ, yebꞌ yibꞌanh ebꞌix miꞌe chiꞌuninwi, yebꞌ yibꞌanh ebꞌnaj mame chipohchan uninale. 4 Chikam anma tuꞌ yu howla yabꞌil, machi mak xin chiꞌok oqꞌo yinh yet chikami, machi mujlaxpaxoj, wal xin chikankano pakꞌno isnimanil sat txꞌotxꞌ, hakaꞌ yaykano tꞌijo istzaꞌ no noqꞌ ay sat yibꞌanhqꞌinal. Chitanhtzelaxilo anma yu howal yebꞌ yu wahil, haxa isnimanil xin chitꞌojlaxto yu noꞌ chꞌik chꞌekꞌ satkanh, kat iskꞌuxlaxpaxto yu no noqꞌ xoltelajil,» xhi Komam.5 Yalnipaxo Komam Dios Jahawil wetan: «Mach chachokto yul hunu nha bꞌay ay bꞌiskꞌulal yinh hunu kamom, mach chawiqꞌpaxo bꞌiskꞌulal yinh. Mach chawaqꞌpaxo yaqꞌlobꞌal iskꞌul anma tuꞌ yuto xawilojan aqꞌankꞌulal yul konhobꞌ tiꞌ, huneꞌ aqꞌankꞌulal wetan yehi, matxa xahano ay wuhan, matxa chitzꞌay inkꞌulan yinh,» Hanin Yahawilintiꞌan chiwalan huneꞌ tiꞌ. 6 Chikam ichamta anma yebꞌ nixhte unin yul huneꞌ konhobꞌ tiꞌ, machi xin chimujlaxi, machi mak chiꞌoqꞌpaxo yinh. Machi mak chako islahwilal isnimanil yebꞌ machi mak chiꞌinilo xil iswiꞌ yu bꞌiskꞌulal yinh. 7 Machi mak chꞌinito pan yu yel isbꞌiskꞌulal anma ay iskamom, machi aqꞌlaxpaxo nichꞌano haꞌ chꞌaqꞌni yaqꞌlobꞌal iskꞌul mak tuꞌ, waxanhka haꞌ ismam maka ismiꞌ chikami. 8 Mach chachokpaxto yul hunu nha bꞌay chiwaꞌ anma yinh hunu qꞌinh, mach chu haway tzꞌonhno xol, mach chu hawaꞌi, mach chu hawukꞌni tzet chiyukꞌ anma. 9 Yuto intiꞌan, Yahawil kaw aykano yip yebꞌ isDiosal Israel, chiwalan hakaꞌ tiꞌ: «Haninan chintanhtzelojan yul konhobꞌ tiꞌ sunil bꞌit chiꞌalaxiko yinh qꞌinh, yebꞌ yet ay tzalahilal yebꞌ bꞌit chiꞌalaxiko yinh mohyilal, hunteqꞌan tiꞌ chiyelax yinh hesat, yebꞌ yinh istzꞌayikal yet ayexikꞌo bꞌey tiꞌ.
10 »Hayet chawalni sunil hunteqꞌan tiꞌ tet anma ay yul konhobꞌ tiꞌ, chisqꞌambꞌen tawet hakaꞌ tiꞌ: “¿Tzet yinh yuxin yal Komam ta chihul huneꞌ niman isyaꞌtajil tiꞌ jibꞌanhanh? ¿Tzet istxꞌojal xakowatxꞌehanh? ¿Tzet kowatxꞌehanh yul sat Komam Jahawil, koDiosalanh?” xhiho anma. 11 Chawal tet anma: “Hak tiꞌ chiyute yalni Komam Jahawil teyet: Yuto kinisbꞌejkanojan ebꞌnaj hemam icham, yok tzujno ebꞌnaj yinta hunteqꞌanxa nan diosal, yaniko isbꞌa ebꞌnaj yijemal tet, yinayo isbꞌa ebꞌnaj tet, kinyanikanojan ebꞌnaj, machi xin isyije ebꞌnaj chejbꞌanile waqꞌan. 12 Haxa hex tiꞌ ekꞌbꞌalto istxꞌojal tzet hewatxꞌe sata hemam icham tuꞌ; yuto hunun hex tiꞌ lanhan hebꞌeybꞌalnhen istxꞌojal tzet chal heyanma, mach xin heyabꞌeto tzet walan. 13 Yuxin chexwilojan sat txꞌo txꞌotxꞌ bꞌay ay hex tiꞌ, chexwanitojan sat huneꞌxa txꞌotxꞌ mach ohtabꞌilo heyu, mach ohtabꞌilopaxo yu hemam icham, bꞌey tuꞌ xin tzꞌayik aqꞌbꞌal cheyiyo hebꞌa tet hunteqꞌanxa nan diosal, machi xin chitzꞌay inkꞌulan teyinh,” kachi,» xhi Komam.
14 Yalnipaxo Komam: «Wal xin, chul istzꞌayikal bꞌay matxa chal-lax hakaꞌ tiꞌ: “Itzitz Komam Jahawil, Komam inilti ebꞌnaj jichmam Israel sat txꞌotxꞌ Egipto,” mach xhihoj. 15 Wal xin hak tiꞌ chiyu yal-laxi: “Itzitz Komam Jahawil, Komam inilti ebꞌnaj Israel bꞌey konhobꞌ ay yinh yetkꞌulal norte, yebꞌ bꞌey hunteqꞌan konhobꞌ bꞌay pujnatoj,” xhiho anma. Wal xin chexwaqꞌ meltzohojan sat hetxꞌotxꞌ, txꞌotxꞌ waqꞌan tet ebꞌnaj heyichmam.a
16 »Chiwatijan hunteqꞌan ebꞌnaj tzabꞌom kay, xhi Komam Jahawil, kat istzabꞌlaxayo ebꞌnaj Israel yu. Chilahwi tuꞌ xin, chiwanipaxtojan hunteqꞌanxa ebꞌnaj ustem noqꞌ, kat issayni ebꞌnaj ebꞌnaj Israel yinhla witz, yebꞌ yinhla tzalan, yebꞌ yulajla chꞌen nhachꞌen. 17 Yuto chiwilan sunil isbꞌeybꞌal ebꞌnaj, wal xin mach ewano ye yul insatan, yebꞌ istxꞌojal tzet chiswatxꞌe ebꞌnaj mach chu yebꞌan isbꞌa yul insatan. 18 Yuxin yinh bꞌabꞌelal, kayel chintohlahan ebꞌnaj ispajo selel istxꞌojal chiswatxꞌe, yebꞌ ismul ebꞌnaj chakoj, yuto bꞌakchato intxꞌotxꞌan yu ebꞌnaj, yu hunteqꞌan kamom tioxh, mach itzitzoj. Sunil sat intxꞌotxꞌan waqꞌan tet ebꞌnaj, iswatxꞌe ebꞌnaj isyahbꞌetajil,» xhi Komam.
19 Walnihan tet Komam: «Mam Wahawil, hach chawaqꞌ wipan,
tawet chitit wipan, hach ayachiko wenhelojan yet istzꞌayikal isyaꞌtajil.
Chihul sunil ej konhobꞌ ay sat txꞌo txꞌotxꞌ tiꞌ chalni hakaꞌ tiꞌ:
“Yinh kaw yeli hanhe hunteqꞌan tioxh machi yelapnoj, matzet chꞌel yinh,
machi yip, ischah ebꞌnaj komam jichmamanh ismajuloj,” xhi.
20 ¿Tom chisje iswatxꞌen ebꞌnaj winaj isdiosal?
Tato haꞌ ebꞌnaj watxꞌeni mach Dioso, chal tuꞌ,» kinchihan.
21 Yalni Komam: «Yuxin hayet hunel tiꞌ, chinkuykanojan anma, chiwaqꞌan yohtanhekaniloj tzet chiswatxꞌe inqꞌabꞌan,
kat yohtanhenilo wipan, hak tuꞌ chu yohtanhenkaniloj tato Yahawil inbꞌihan,» xhi Komam.