Haꞌ ismul ebꞌnaj Judá tzꞌibꞌnhebꞌiliko yinh yanma
17
Yalni Komam Jahawil:«Haꞌ ismul ebꞌnaj Judá, tzꞌibꞌnhebꞌiliko yinh yanma ebꞌnaj,
haꞌ yanma tuꞌ kaw kaw hakaꞌ chꞌen chꞌen, yuxin tzꞌibꞌnhebꞌiliko yu chꞌen tzꞌujubꞌ hierro,
yebꞌ yu chꞌen diamante qꞌaqꞌiꞌ iswiꞌ;
tzꞌibꞌnhebꞌilpaxiko yinh yukꞌaꞌ ismexhahil xahanbꞌal yu ebꞌnaj.
2 Ebꞌnaj kꞌahole chisnati ebꞌnaj ismexhahil xahanbꞌal yet istioxh Asera ayayo yich teꞌ qꞌebꞌtaj kaw how yeko xaj,
bꞌey wonhan nahat yekanh,
3 yebꞌ nimeta witz yebꞌ xolaj hetzꞌunubꞌ.
Yu heyiyo hebꞌa tet hetioxh ay bꞌey txꞌotxꞌ nahat yekanh sat sunil hetxꞌotxꞌ tiꞌ,
yuxin sunil heqꞌalomal chiꞌelqꞌalaxto yu ebꞌnaj chiꞌaniko howal teyinh.
4 Chebꞌejkano hetxꞌotxꞌ waqꞌan hemajuloj,
kat kexwanikojan ischejabꞌo ebꞌnaj ayko ishowal teyinh,
sat txꞌotxꞌ mach ohtabꞌilo heyu, yuto xaheyaqꞌtij inhowalan teyinh;
haꞌ inhowaltiꞌan xin lahan hakaꞌ qꞌa qꞌaꞌ machi bꞌaqꞌinh chitanhiloj,» xhi Komam.
5 Hak tiꞌ yalnipaxo Komam Jahawil:
«Kꞌanchꞌan ebꞌnaj winaj chikawxi iskꞌul yinh yet winajil.
Chanipaxiko yet anmahil yipo iskꞌul yuto ay yip huneꞌ anma tuꞌ.
Haxa yanma xin chishekꞌilo yinh Komam Jahawil.
6 Haꞌ mak hakaꞌ tuꞌ,
lahan hakaꞌ teꞌ txꞌix chichꞌibꞌkanh sat txꞌotxꞌ desierto, mach chil iskꞌulal,
wal xin chiꞌeyayo sat txꞌo txꞌotxꞌ tajin, sat txꞌotxꞌ desierto, bꞌay machi anma chꞌehayoj.
7 Saqꞌal yet naj winaj chikawxi iskꞌul yinh Komam Jahawil,
chanipaxiko naj Komam yipo iskꞌul.
8 Haꞌ mak hakaꞌ tuꞌ, lahan hakaꞌ hunu teꞌ qꞌebꞌtaj ayayo istiꞌ ha haꞌ,
chanayto teꞌ xeꞌ bꞌay chiꞌelto yojomal haꞌ.
Mach xin tzet chal iskꞌul teꞌ yet chihul qꞌaꞌ, kaw yaxnhetikꞌa.
Hayet chihul waresma, mach isnabꞌeto teꞌ, maxhtikꞌa xin chisbꞌej issatni.a
9 Haꞌ yul yanma anma kaw ay leqꞌtiꞌal sata hunuxa tzet ye tuꞌ,
yebꞌ kaw txꞌojkanoj; ¿Maktaxka yohtaj tzet ay yul yanma anma?
10 Hanin Yahawilintiꞌan, wohtajan tzet chꞌekꞌ yinh isnabꞌal anma;
chiwilwenpaxojan tzet ay yul yanma chiwaqꞌnihan ispaj selel tet, hatatikꞌa isbꞌeybꞌal, yebꞌ tzet chiswatxꞌe,» xhi Komam.
11 Haꞌ noꞌ chꞌik, hakaꞌ jilni noꞌ ahomtzꞌikin chispajilti noꞌ,
noꞌ komon hos, mach yetoj noꞌ yehi.
Hak tuꞌ ebꞌnaj chiꞌok qꞌalomal yu eleqꞌ;
hayet yikta yeh ebꞌnaj yinh istiempohal,
kat isbꞌejnikano ebꞌnaj isqꞌalomal,
haxa yet islahobꞌal chisyenilo isbꞌa ebꞌnaj tato mach isnabꞌal.
12 Haꞌ Yatut Komam Dios koxol, tzꞌonhobꞌal kaw nanxa yok iskꞌulchꞌanil,
kaw aykano ismay yettaxtikꞌa payat.
13 ¡Mam Yahawil, hach bꞌay chikawxi iskꞌul konhobꞌ Israel!
Sunil ebꞌnaj Israel chaxhbꞌejnikanoj, chikankano yinh txꞌixobꞌal.
Haꞌ mak chishekꞌilo isbꞌa tawinh, chikꞌaykanh hakaꞌ iskꞌaykanh hunu bꞌihe chitzꞌibꞌnhelaxayo xol pojoj,
yuto isbꞌejkanoj Yahawil, haꞌ ton isnuqꞌ ha haꞌ itzitz.
14 Anhte hinan Mam Wahawil, hak tuꞌ xin chu inkawxikanhan.
Kolinan hak tuꞌ xin chu inkolchahan.
Yuto hachnhechꞌan chachinbꞌitnhehan.
15 Chal anma wetan: «¿Bꞌaytuꞌwal ay istzotiꞌ Komam Jahawil?
¡Yijabꞌ isbꞌa tinanh!» xhi anma.
16 Yajaꞌ xin mach kinhitzikojan takꞌatanh,
yu inqꞌannihan ta chawayo isyaꞌtajil yibꞌanh anma tiꞌ.
Mach wochepaxojan ta chawati hunu huchanil yibꞌanh ebꞌnaj,
hach hawohtaj tzet inqꞌanan tawet, yuto tasata walan.
17 Machojabꞌ chinhawakojan yul isqꞌabꞌ xiwkilal,
yuto tawinh chinkolinbꞌahan yinh istzꞌayikal bꞌay chul isyaꞌtajil wibꞌanhan.
18 Ebꞌnaj chintzumbꞌenikꞌojan, kanojabꞌkano ebꞌnaj yinh txꞌixwilal,
machojabꞌtaj hinan chinkankanojan yinh txꞌixwilal;
takojabꞌilo iskꞌul ebꞌnaj, machojabꞌtaj hinan chitak inkꞌulan.
Ati istzꞌayikal bꞌay chihul istxꞌojal yibꞌanh ebꞌnaj,
kat hawaniti kayelo isyaꞌtajil yibꞌanh ebꞌnaj.
Isyijelax tzꞌayik xewilal
19 Hak tiꞌ yute yalni Komam wetan: «As linhbꞌa habꞌa yul ispultahil konhobꞌ, huneꞌ pulta bꞌay chiꞌoktoj ebꞌnaj isreyal Judá yebꞌ bꞌay chꞌelto ebꞌnaj. Haktikꞌapax tuꞌ chachok linhno yulaj ispultahil konhobꞌ Jerusalén. 20 Chawalni tet anma tuꞌ hakaꞌ tiꞌ: “¡Abꞌewe istzotiꞌ Komam Jahawil, hex isreyal Judá yebꞌ sunil konhobꞌ ay yul ismajul Judá, yebꞌ sunil anma ay yul konhobꞌ Jerusalén, hex chexokto yul hunteqꞌan pulta tiꞌ! 21 Hak tiꞌ chiyute yalni Komam Jahawil: Hayet istzꞌayikal xewilal, machi ijatz cheyijikꞌoj, yebꞌ xin mach cheyikꞌto ijatz bꞌey ispultahil Jerusalén tiꞌ. 22 Machi ijatz cheyipaxilti yul heyatut yinh istzꞌayikal xewilal, machi hunu munil chewatxꞌepaxo yinh huneꞌ tzꞌayik tuꞌ, wal xin kaw ayojabꞌ yelapno istzꞌayikal xewilal yul hesat, hakaꞌ yu inchejnihan yubꞌ heyichmam. 23 Yajaꞌ ebꞌnaj heyichmam tuꞌ mach yabꞌeto ebꞌnaj tzet walan, mach istxalbꞌa istxikin ebꞌnaj yabꞌeni, wal xin kaw kaw yute yanma ebꞌnaj, mach ischah yabꞌeꞌ ebꞌnaj kachbꞌanile.
24 »”Hanin Yahawilintiꞌan chiwalan: Yijewe tzet chiwalan teyet, machi ijatz cheyikꞌto yul ispultahil konhobꞌ tiꞌ yinh istzꞌayikal xewilal, wal xin ayojabꞌ yelapno tzꞌayik xewilal yul hesat, mach xin hunu munil chewatxꞌe yinh istzꞌayikal xewilal tiꞌ. 25 Ta cheyije hakaꞌ tuꞌ, aynhetikꞌa ebꞌnaj rey chiꞌay tzꞌonhno yul istzꞌonhobꞌal yaꞌ rey David, kat yokto ebꞌnaj yul ispultahil konhobꞌ tiꞌ yibꞌanh iscarruaje yebꞌ yibꞌanh noꞌ cheh, haꞌ hun xin ebꞌnaj yahawil konhobꞌ, yebꞌ anma ah Judá yebꞌ Jerusalén yinta ebꞌnaj. Haꞌ yul konhobꞌ Jerusalén tiꞌ aynhetikꞌa anma yinh sunilbꞌal ej tiempo. 26 Chitit anma ay yul konhobꞌ ay yul ismajul Judá yebꞌ konhobꞌ ayayo yinhla ishoyanil Jerusalén, yebꞌ anma ay bꞌey txꞌotxꞌ Benjamín, yebꞌ anma ay sat txꞌotxꞌ Sefela yebꞌ anma ay bꞌey chewal txꞌotxꞌ, yebꞌpaxo bꞌey txꞌotxꞌ Neguev. Haꞌ sunil anma tuꞌ, chul yul watutan, iqꞌbꞌil xin no noqꞌ chinhuslax yinh xahanbꞌal yu, iqꞌbꞌilpaxo isxahanbꞌal yebꞌ xin isyebꞌalqꞌabꞌ chiyaqꞌ wetan, yebꞌ teꞌ pom yebꞌ isyebꞌalqꞌabꞌ yu yaqꞌni yuchꞌandiosal yul watutan. 27 Yajaꞌ tato mach cheyabꞌeto heyijen istzꞌayikal xewilal wetan, yebꞌ ta mach cheyabꞌe cheyinikꞌto ijatz yul ispultahil konhobꞌ Jerusalén yinh istzꞌayikal xewilal, yinh hakaꞌ tuꞌ, chiwatijan qꞌa qꞌaꞌ yul ispultahil konhobꞌ Jerusalén, kat isnhusnito qꞌaꞌ palacio ay yul konhobꞌ Jerusalén; machi xin chitanhilo huneꞌ qꞌaꞌ tuꞌ,”» xhi Komam Jahawil.