Kuybꞌanile yinh naj tzꞌajom xi
18
Istzotiꞌ Komam Jahawil hul tet yaꞌ Jeremías, bꞌay chal hakaꞌ tiꞌ: 2 «Ahanhwanoj kat hawayto bꞌey yatut naj tzꞌajom xi, haꞌ bꞌey tuꞌ chiwaqꞌan intzotiꞌan hawabꞌeꞌ,» xhi Komam. 3 Waytojan bꞌey yatut naj tzꞌajom xi tuꞌ, lanhan xin ismunla naj yibꞌanh te teꞌ chꞌekꞌ petpon bꞌay chitzꞌajlax txꞌotxꞌ xi tuꞌ. 4 Haxa txꞌotxꞌ xi lanhan iswatxꞌen naj tuꞌ, mach kꞌulo eliko txꞌotxꞌ, yok naj iswatxꞌeno txꞌotxꞌ hunelxa, hakaꞌtikꞌa kaw yoche naj.5 Istzotel Komam Jahawil wetan, yalni hakaꞌ tiꞌ: 6 «¿Tom mach chu kexinwatxꞌenan hakaꞌ chute naj tzꞌajom xi yinh txꞌotxꞌ qꞌantxꞌotxꞌ tiꞌ, hex Israel? Hakaꞌ txꞌotxꞌ qꞌantxꞌotxꞌ yul isqꞌabꞌ naj tzꞌajom xi, hakex tuꞌ yul inqꞌabꞌan hex Israel, hanin heYahawilintiꞌan chiwalan huneꞌ tiꞌ. 7 Yinhnhena hunep chiwaliltojan yinh tzet chihul yibꞌanh ej konhobꞌ yebꞌ hunteqꞌan nime konhobꞌ, yunhe ishokꞌlaxkanokanh, kat yuchkꞌalaxtoj, kat istanhkaniloj, 8 yajaꞌ ta chisbꞌejkano hunteqꞌan konhobꞌ tuꞌ istxꞌojal chilaiswatxꞌe, yinh hakaꞌ tuꞌ matxa chinwatxꞌehan tzet xawalan yinh, matxa chiwatijan istxꞌojal yibꞌanh, hunteqꞌan nabꞌilxatikꞌa wuhan yinh. 9 Yinhnhena hunep chiwalnihan yinh ej konhobꞌ yebꞌ nime konhobꞌ, ta chinwatxꞌekanhan kat intzꞌunnihan. 10 Yajaꞌ ta chiswatxꞌe hunteqꞌan konhobꞌ tuꞌ, istxꞌojal yul insatan, mach xin chabꞌeto tzet chiwalan, yinh hakaꞌ tuꞌ, matxa chiwatijan iskꞌulal tuꞌ yibꞌanh, hunteqꞌan nabꞌilxatikꞌa wuhan yinh.
11 »Wal tinanh tzotelanh tet anma ah Judá yebꞌ tet anma ay yul konhobꞌ Jerusalén, chawalni: “Hak tiꞌ chiyute yalni Komam Jahawil: Wal tinanh chiwatojan isyaꞌtajil teyibꞌanh, chinwatxꞌenan tzet xaꞌekꞌ yinh innabꞌalan inwatxꞌenan, yuxin isbꞌejabꞌkano hunun mak isbꞌeybꞌalnhen istxꞌojal, kat isbꞌeybꞌalnhen istoholal, kat yok iswatxꞌeno iskꞌulal,” xhi Komam. 12 Yajaꞌ xin chal ebꞌnaj hakaꞌ tiꞌ: “Nabꞌnhe chachhul hawalaꞌ, yuto hanhonhtiꞌanh yinta kotioxhanh tzujan honhanh, haꞌ istxꞌojal chal janmahanh, haꞌ chikowatxꞌehanh,” xhiho ebꞌnaj,» xhi Komam.
13 Yuxin chal Komam Jahawil hakaꞌ tiꞌ:
«Qꞌambꞌewe yulaj ej konhobꞌ tato ayxa bꞌay chꞌabꞌelax hakaꞌ tiꞌ:
“¡Haꞌ konhobꞌ Israel kaw ay ismay istxꞌojal tzet chiswatxꞌe!
14 ¿Aymi hunelo tiꞌ chikꞌaykanh chꞌen chew yibꞌanh chꞌen nime chꞌen ay bꞌey txꞌotxꞌ Líbano?
¿Aymi hunelo tiꞌ chitanhkanh ha haꞌ kaw chew ay yul yojomal ha haꞌ chꞌekꞌ xolaj witz?”
15 Yajaꞌ wal inkonhobꞌan xin, xakinisnahulnhetojan, chisnhusni teꞌ pom tet tzet ye tuꞌ mach kꞌuloj.
Xaꞌishekꞌilo isbꞌa yul bꞌeh, haꞌ ton huneꞌ isbꞌeh yet payat tiempo, isto yul nixhte bꞌeh,
isto yul bꞌeh mach ohtabꞌilo yu, isto yul bꞌeh mach kꞌuloj.
16 Yu huneꞌ tuꞌ yuxin kankano tzꞌinhno istxꞌotxꞌ ebꞌnaj,
machi xin chisbꞌej anma isbꞌuchwah yinh ebꞌnaj Israel.
Sunil mak chꞌekꞌ bꞌey tuꞌ chikꞌaykanh iskꞌul, chisbꞌilen iswiꞌ.
17 Hakaꞌ issajlemito tzettaj ye tuꞌ yu jaqꞌeqꞌ chitit bꞌey bꞌay chiꞌahilo tzꞌayik,
hak tuꞌ chu issajlemito ebꞌnaj wuhan yinh sat ebꞌnaj ayko ishowal yinh.
Hayet chihul istzꞌayikal isyaꞌtajil yibꞌanh ebꞌnaj,
haꞌ wichinhan chiwatojan yinh ebꞌnaj,
mach chinakxitojan yinh ebꞌnaj,» xhi Komam.
Iskutxbꞌako isbꞌa konhobꞌ yu ishowal yinh yaꞌ Jeremías yebꞌ istxah yaꞌ Jeremías
18 Yalni anma hakaꞌ tiꞌ: «Titanhwej, kat konani tzet chiꞌutelax yaꞌ Jeremías. ¿Tom machi ebꞌyaꞌ sacerdote koxol chiꞌaqꞌni chejbꞌanile jet, yebꞌ ebꞌnaj ay yitzꞌatil iswiꞌ chonhkuyni, yebꞌ ebꞌnaj ischejabꞌ Komam Dios chiꞌaqꞌni istzotiꞌ Komam jabꞌeꞌ? Kobꞌalawekanh tzotiꞌ yinh yaꞌ, machi xin chikoyijeto tzet chal yaꞌ,» xhi anma.
19 Yalni yaꞌ Jeremías tet Komam: «Mam Wahawil,
okanh tꞌanhno winhan, abꞌe tzet chiyal ebꞌnaj ayko ishowal winhtiꞌan.
20 ¿Tom ay bꞌay chijabꞌe txꞌoj chiꞌaqꞌlax ispajo iskꞌulal tzet chikowatxꞌe.
Wal xin watxꞌebꞌilxa holan yu ebꞌnaj bꞌay chinmujlaxan? Natij tato kinok linhnojan tasataj,
yu inqꞌannihan tawet yinh ebꞌnaj, walnihan tawet tato matxa chawayo hahowal yibꞌanh ebꞌnaj.
21 Yaj wal tinanh xin, aqꞌ kamo yuninal ebꞌnaj yu wahil,
yebꞌ yu chꞌen espada xol howal. Kanojabꞌkano yixal ebꞌnaj manh uninal, kat iskan yixal ebꞌnaj hunixal,
kat iskampaxo yichamil ebꞌix ix yu howla yabꞌil,
kat iskam ebꞌnaj tzehtaj yu chꞌen espada yinh howal.
22 ¡Abꞌelaxojabꞌ yel aw yul yatut ebꞌnaj,
yuto chinhehul lemna ebꞌnaj soldado howal yinh ebꞌnaj hawu!
Yuto iswatxꞌe ebꞌnaj holan yul inbꞌehan yunhe kinistzabꞌnayojan,
yanipaxayo ebꞌnaj txꞌanh xol pojoj yul inbꞌehan, yunhe waykꞌayan.
23 Yajaꞌ hach tiꞌ Mam Jahawil, hawohtaj tato islahtiꞌnhe isbꞌa ebꞌnaj yunhe yilni yinh tzet chu kinyaqꞌnikamojan.
Mach chawaqꞌ nimankꞌulal yinh istxꞌojal ebꞌnaj, mach chahokanh ismul ebꞌnaj yinh hanabꞌal.
¡Txaqꞌmohojabꞌ ebꞌnaj tasataj, ayo isyaꞌtajil yibꞌanh ebꞌnaj yinh sunil hahowal,
hakaꞌ hawanayo isyaꞌtajil yibꞌanh anma yet chitit hahowal!» xhi yaꞌ Jeremías.