Yechel yinh txꞌotxꞌ xi pohil
19
Yalni Komam Jahawil wetan hakaꞌ tiꞌ: «As loqꞌ hunu txꞌotxꞌ xi tet naj tzꞌajom xi, kat hawinito haywanho ebꞌnaj ichamta winaj ay yul konhobꞌ tawintaj, yebꞌ haywanho ebꞌyaꞌ sacerdote icham winajxa. 2 Lahwi tuꞌ kat hato yebꞌ ebꞌnaj bꞌey txꞌotxꞌ akꞌal yet iskꞌahol naj Hinom bꞌey pulta ayko yinh yetkꞌulal bꞌay chiꞌahilo tzꞌayik. Haꞌ bꞌey tuꞌ xin chawal tzotiꞌ halbꞌilxa tawet wuhan. 3 Chawal hakaꞌ tiꞌ: Hex isreyal Judá, yebꞌ hex ah Jerusalén, abꞌewe tzet chal Komam Yahawil, kaw aykano yip, Komam isDiosal Israel. Wal tinanh chiwatijan huneꞌ niman isyaꞌtajil yibꞌanh huneꞌ konhobꞌ tiꞌ; haꞌ mak chiꞌabꞌen isqꞌumal huneꞌ tiꞌ chikꞌayilo iskꞌul yabꞌeni, hakaꞌta kaw chipohto yul istxikin yabꞌeni. 4 Xakinisbꞌejkanojan anma Israel, xaꞌismeltzoko txꞌotxꞌ tiꞌ hakaꞌ istxꞌotxꞌ komon dios. Chisnhusni teꞌ pom tet komon dios sat txꞌotxꞌ, haꞌ hunteqꞌan dios tuꞌ mach ohtabꞌilo yu ebꞌnaj, yebꞌ yu yichmam ebꞌnaj, mach ohtabꞌilpaxo yu ebꞌyaꞌ isreyal Judá. Haꞌ sunil sat txꞌotxꞌ tiꞌ nohna yu ischikꞌil nixhte unin, suk iskꞌul, mach yohtajo mule. 5 Iswatxꞌenpaxokanh ebꞌnaj ismexhahil yet xahanbꞌal iswiꞌla witz bꞌay chiyako yuninal xahanbꞌalil tet tioxh Baal; haꞌ huneꞌ tuꞌ maxhtaj hinan chejnhe ebꞌnaj iswatxꞌeni; maxhtaj hinan walan tet, maxhtikꞌa huneꞌ tuꞌ maxhtikꞌa hunelo ekꞌ yinh innabꞌalan ta chiswatxꞌe ebꞌnaj. 6 Yuxin hanin Yahawilintiꞌan, chiwalan tato chul istzꞌayikal bꞌay matxa chal-laxo Tofet, nitam Akꞌal yet iskꞌahol naj Hinom yinh huneꞌ txꞌotxꞌ tiꞌ, wal xin chiyijkano isbꞌi txꞌotxꞌ: Akꞌal potxꞌbꞌal anma.7 »Haꞌ sat huneꞌ akꞌal tiꞌ chiwaqꞌ etaxotojan tzet chiꞌekꞌ yinh isnabꞌal anma ah Judá yebꞌ anma ah Jerusalén, kat waqꞌni aykꞌayojan yu espada sata ebꞌnaj ayko ishowal yinh, kat wanikojan ebꞌnaj yul isqꞌabꞌ ebꞌnaj chisaynikꞌoj kat ispotxꞌnikamoj. Chiwaqꞌnihan isnimanil ebꞌnaj lojlaxotoj yu noꞌ chꞌik chꞌekꞌ satkanh, kat iskꞌuxnito no noqꞌ ay sat txꞌo txꞌotxꞌ. 8 Chiwaqꞌ meltzohojan huneꞌ konhobꞌ tiꞌ hakaꞌ txꞌotxꞌ desierto, kat isbꞌuchwa anma yinh. Sunil mak chꞌekꞌ yul konhobꞌ tiꞌ kaw chitak iskꞌul yilni, kat yok bꞌuchwal yet chilni tato xaꞌuchkꞌalaxtoj konhobꞌ. 9 Chiwaqꞌnihan isnimanil iskꞌahol ebꞌnaj yebꞌ isnimanil iskutzꞌin ebꞌnaj iskꞌuxuꞌ, kat iskꞌuxnito hunun mak isnimanil yet anmahil yu wahil, yebꞌ yu isyaꞌtajil chꞌaqꞌlax tet yu ebꞌnaj chiꞌanoko howal yinh yet chishoynayo ebꞌnaj konhobꞌ, yebꞌ yu ebꞌnaj chisayni yu ispotxꞌnikamoj, kachi tet ebꞌnaj,» xhi Komam.
10 Yalnipaxo Komam: «Lahwi tuꞌ xin, kat hamaqꞌni poho txꞌotxꞌ xi tuꞌ yinh sat ebꞌnaj tzujan tawintaj. 11 Chawalni tet ebꞌnaj: “Hak tiꞌ chiyute yalni Komam Yahawil, kaw aykano yip: ‘Chintanhtzelojan huneꞌ konhobꞌ tiꞌ, hakaꞌ chiyu ispohto hunu txꞌotxꞌ xi, matxa xin chu isbꞌujlaxayo hunelxa; haꞌ bꞌey Tofet tiꞌ chimujlax anma chikami, yuto matxa hunuxa bꞌay hamam wal ismujlaxi. 12 Hanin Jahawil intiꞌan chiwalan tato hak tuꞌ chiwutehan huneꞌ konhobꞌ tiꞌ yebꞌ sunil anma ay yul, haꞌ huneꞌ konhobꞌ tiꞌ lahan chꞌelkaniko hakaꞌ Tofet. 13 Haꞌ teꞌ nha ay bꞌey Jerusalén yebꞌ yatut ebꞌnaj rey ah Judá yahbꞌeta chꞌelkaniko hakaꞌ Tofet, yebꞌ sunil yibꞌanh yakꞌalil teꞌ nha bꞌay chinhuslax teꞌ pom tet txꞌumel chitzejtzon satkanh, yebꞌ bꞌay chijobꞌlaxayo teꞌ vino yebꞌalqꞌabꞌehal tet komon tioxh,’ ” xhi Komam,» xhi yaꞌ Jeremías.
14 Lahwi tuꞌ ismeltzoti yaꞌ Jeremías bꞌey Tofet bꞌay ischejto Komam Jahawil yaꞌ yalaꞌ istzotiꞌ. Yok linhno yaꞌ yamaqꞌil Yatut Komam Jahawil, yalni yaꞌ tet konhobꞌ hakaꞌ tiꞌ: 15 «Hak tiꞌ chiyute yalni Komam Jahawil, kaw aykano yip, isDiosal Israel: “Chiwatijan isyaꞌtajil yibꞌanh konhobꞌ tiꞌ yebꞌ yibꞌanh sunilal ej yaldeahil ayko yinhla ishoyanil, hakaꞌ wute walnihan yinh, yuto haꞌ hunteqꞌan anma tiꞌ yaqꞌ kawbꞌolo yanma, yebꞌ xin mach chabꞌe intzotiꞌan,” xhi Komam,» xhi yaꞌ Jeremías.