Tzotiꞌ hal-lax yinh naj Pasur
20
Naj sacerdote Pasur, iskꞌahol naj Imer, yahawil yinh ebꞌnaj chitanhen Yatut Komam Jahawil, yabꞌe naj yinh tzet yal yaꞌ Jeremías; 2 yuxin ishate naj Pasur yaꞌ Jeremías, ischejabꞌ Komam Dios, yalaxikto yoj yaꞌ yul teꞌ cepo bꞌey bꞌabꞌel pulta yet Yatut Komam Dios yibꞌanh yetkꞌulal ismajul yaꞌ Benjamín. 3 Haxa yet hunxa tzꞌayik yinilo naj Pasur yaꞌ Jeremías yul teꞌ cepo. Yalni yaꞌ Jeremías tet naj hakaꞌ tiꞌ: «Haꞌ Komam Jahawil mahelni habꞌi, mayaniko Magor-misabib habꞌihoj, yuxin matxa chal-lax Pasur tawinh. 4 Yuto hak tiꞌ yalni Komam Jahawil hakaꞌ tiꞌ: “Chiwayojan huneꞌ huchanil tawibꞌanh yebꞌ yibꞌanh ebꞌnaj xahan chaxhilni. Chexpotxꞌlaxkamo yu espada yu ebꞌnaj ayko ishowal teyinh; haꞌ huneꞌ tuꞌ haꞌ kaw isbꞌaqꞌ hasat chiꞌilni. Chiwaqꞌaꞌkojan sunil anma ah Judá yul isqꞌabꞌ naj rey Babilonia, kat kexyinito naj preso bꞌey Babilonia, kat kexispotxꞌnikamo naj yu espada. 5 Chiwakojan sunil isqꞌalomal konhobꞌ tiꞌ yul isqꞌabꞌ ebꞌnaj ayko ishowal teyinh, yebꞌ sunil hemunil yebꞌ sunil tzet kaw ochebꞌil heyu, chiwanipaxikojan sunil isqꞌalomal ebꞌnaj isreyal Judá yul isqꞌabꞌ ebꞌnaj ayko ishowal teyinh, kat yinito ebꞌnaj bꞌey Babilonia. 6 Haxa hach tiꞌ hach Pasur chachilaxto preso bꞌey Babilonia yebꞌ sunil mak ay yul hawatut. Haꞌ bꞌey Babilonia tuꞌ chachkami, kat hamujlax bꞌey tuꞌ yebꞌ sunil ebꞌnaj xahan chaxhilni, ebꞌnaj bꞌay hawal leqꞌtiꞌal,” xhi Komam,» xhi yaꞌ Jeremías. Isbꞌiskꞌulal yaꞌ Jeremías
7 Yalni yaꞌ Jeremías: «¡Mam Wahawil, hach tiꞌ kinhamontehan, inyijenan tzet hawala!
¡Kaw ekꞌbꞌalkano hawip insatajan, haqꞌoji winhan! ¡Hunun tzꞌayik intzeyelaxan, kat inbꞌuchlaxan yu hunun anma!
8 Hunta el chintzotelan, chinawihan yinh kaw ip hakaꞌ tiꞌ: “¡Chiꞌalaxiko howal teyinh, kat hetanhtzelaxiloj!”
kinchihan tet anma.» Yu istzotiꞌ Komam Jahawil, yuxin chiꞌalaxiko howal winhan, kat intzeyelaxan hunun tzꞌayik.
9 Yuxin walan yul wetan hakaꞌ tiꞌ: «¡Matxa chinnatijan Komam, matxa chintzotelan yinh isbꞌi!» kinchihan.
Yajaꞌ hakaꞌ qꞌa qꞌaꞌ chiyute isbꞌa istzotiꞌ Komam yinh wanmahan,
chisnhusni inbꞌajilan chiwabꞌehan.
Wochebꞌalan chiwebꞌayojan hatzotiꞌ,
yajaꞌ mach chitecha wuhan ta mach chiwalikꞌojan.
10 Chiwabꞌehan issason anma chinisbꞌuchnihan, chalni hakaꞌ tiꞌ:
«¡Haꞌ naj tiꞌ chal naj ta chihul xiwkilal sunil bꞌayejtuꞌwal,
wal xin okojonh aqꞌokꞌule yinh!» xhi anma winhan.
Hakpax tuꞌ sunil ebꞌnaj wamigohan chissay ebꞌnaj yinh tzet chu waykꞌayan.
Yuxin chal ebꞌnaj hakaꞌ tiꞌ:
«¡Kꞌuxantaxka issubꞌcha ju, kat jaqꞌni aykꞌayoj,
kat jinilo kohowal yinh!» xhi ebꞌnaj winhan.
11 Yajaꞌ hach tiꞌ Mam Wahawil ayachiko inkꞌatanhan,
hakaꞌ hunu naj winaj kaw ay yip,
kaw helan yinh howal;
yuxin haꞌ ebꞌnaj chintzumbꞌenikꞌojan, chitxaqꞌmo ebꞌnaj,
mach xin chiqꞌoji ebꞌnaj winhan.
Chꞌokkano ebꞌnaj yinh niman txꞌixwilal, yuto machi isyaxil chiꞌay yibꞌanh ebꞌnaj.
Matxa chinawi yu ebꞌnaj tzet chute isbꞌa yinh sunilbꞌal ej tzꞌayik, huneꞌ tuꞌ machi nahulnhelaxtoj.
12 Mam Yahawil, kaw aykano yip, hach chawilwe makta tohol isbꞌeybꞌal.
Hach hawohta tzet chꞌekꞌ yinh isnabꞌal,
yebꞌ tzet chꞌekꞌ yul yanma ebꞌnaj winaj.
¡Ayo hahowal yibꞌanh ebꞌnaj ayko ishowal winhan yinh insatan
yuto yul haqꞌabꞌ chiwabꞌenhekanto hinbꞌahan yinh tzet chinutelaxtiꞌan!
13 ¡Bꞌitnhewe Komam Jahawil,
halwe kꞌul-la tzotiꞌ yinh Komam,
yuto haꞌ Komam chikolni yanma anma mebꞌaꞌ yul isqꞌabꞌ ebꞌnaj txꞌoj!
14 ¡Ayojabꞌ tzꞌaktiꞌ yibꞌanh tzꞌayik bꞌay kinpitzkꞌahan!
¡Machojabꞌ chiqꞌanlax iskꞌulal yinh huneꞌ tzꞌayik yet inpitzkꞌahan yinh inmiꞌan!
15 ¡Ayojabꞌ tzꞌaktiꞌ yibꞌanh naj halni tet inmaman hakaꞌ tiꞌ:
«Winaj unin, nichꞌan hakꞌahol mapitzkꞌahi,» xhi.
Yu huneꞌ tuꞌ xin kaw ay tzalahilal!
16 Haꞌ huneꞌ naj tuꞌ tanhojabꞌilo naj,
hakaꞌ yu iskꞌaytzenilo Komam Jahawil hunteqꞌan konhobꞌ,
mach xin yiqꞌ bꞌiskꞌulal Komam yinh yet iskꞌaytzeniloj.
Yabꞌehabꞌ naj aw yet oqꞌil yet sahabꞌ kat yabꞌen naj aw yet howal yinh chumanil.a
17 ¿Tzet yinh xin machi kinpitzꞌlaxkamojan yet iqꞌbꞌil intokojan yu inmiꞌan?
Hak tuꞌ xin yu yokkano inmiꞌan inmujbꞌalojan.
Hak tuꞌ xin ayxanhe tikꞌa chiꞌini inmiꞌan yinh sunilbꞌal ej tiempo.
18 ¿Tzet yinh xin kinpitzkꞌahan?
¿Tzet yinh kinpitzkꞌahan yu wilnihan isyaꞌtajil yebꞌ isyaꞌil yinh tzet chinutelaxan,
kat xin islahwi intiempohan yinh txꞌixwilal?