Konhobꞌ Jerusalén chiꞌuchkꞌalaxtoj
21
Tzotel Komam Jahawil tet yaꞌ Jeremías, yet ischejnito yaꞌ rey Sedequías naj Pasur, iskꞌahol naj Melquías, yebꞌ yaꞌ sacerdote Sofonías, iskꞌahol naj Maasías, tzotelo tet yaꞌ Jeremías hakaꞌ tiꞌ: 2 «Qꞌambꞌe tet Komam Jahawil jinh tinanh, yuto chul naj Nabucodonosor, isreyal Babilonia yaqꞌaꞌko howal jinh, kꞌuxantaxka isyenilo Komam sunil kꞌaybꞌalkꞌule isye jinh hakaꞌ yet yalanhtokanoj, kat isbꞌejni naj Nabucodonosor tuꞌ yaqꞌni howal jinh,» xhi ebꞌnaj.a3 Istaqꞌwi yaꞌ Jeremías: «Halwe tet yaꞌ Sedequías tuꞌ, 4 ta hak tiꞌ yalni Komam Jahawil, isDiosal Israel: “Chiwaqꞌ meltzohojan ebꞌnaj hasoldado yintaj, ebꞌnaj chꞌaniko howal yinh issoldado naj rey Nabucodonosor; haꞌ ebꞌnaj soldado caldeo ayilto yintalto kꞌubꞌ hoynhe hexxayo tuꞌ, chinkutxbꞌakojan ebꞌnaj yul konhobꞌ tiꞌ. 5 Hanintiꞌan chiwaqꞌ howalan yebꞌ hex, chiwikanhan inqꞌabꞌan teyinh yebꞌ yinh sunil wipan, chiwaqꞌan howal yebꞌ hex yinh sunil inhowalan. 6 Chiwaqꞌkamojan anma ay yul konhobꞌ tiꞌ, kat iskam ebꞌnaj winaj yebꞌ no noqꞌ yu nimeta howla yabꞌil. 7 Lahwi tuꞌ, kat wanikojan yaꞌ Sedequías, isreyal Judá yebꞌ ebꞌnaj chimunla yintaj yaꞌ, yebꞌ anma ay yul konhobꞌ tiꞌ yul isqꞌabꞌ naj Nabucodonosor, isreyal Babilonia. Haxa anma chito kolchalo tet nimeta isyaꞌtajil, yebꞌ xol howal, yebꞌ tet wahil, hanin Jahawil intiꞌan, chiwalan tato chiwapaxikojan yul isqꞌabꞌ naj Nabucodonosor tuꞌ, chiwakojan yul isqꞌabꞌ ebꞌnaj ayko ishowal yinh, yu ispotxꞌlaxkamoj. Naj Nabucodonosor tuꞌ chipotxꞌnikamo hunteqꞌan anma tuꞌ yu espada, mach xin chaqꞌ nimankꞌulal naj yinh, mach chitzꞌaypaxo iskꞌul naj yinh,” xhi Komam.
8 »Halwepaxo tet huneꞌ konhobꞌ tiꞌ: Hak tiꞌ yalni Komam Jahawil: Chiwayojan kabꞌebꞌ bꞌeh tesataj. “¿Bꞌaytet chesikꞌleloj, tom haꞌ isbꞌehal qꞌinale, mato haꞌ huneꞌ bꞌeh yet kamikal?” 9 Haꞌ mak chikankano yul konhobꞌ chikam yu chꞌen espada, maka chikamo yu wahil, maka yu howla yabꞌil. Wal mak chꞌelto yul konhobꞌ tiꞌ xin chaniko isbꞌa yul isqꞌabꞌ ebꞌnaj caldeo hoynhehayo konhobꞌ tiꞌ, mach chikami, chako isbꞌa yul isqꞌabꞌ ebꞌnaj, kat yilaxto preso, yunhe iskolni isbꞌa tet kamikal. 10 Hanin Yahawilintiꞌan, haninan kaw chiwalan tato xaꞌok yinh innabꞌalan wanayojan isyaꞌtajil yibꞌanh konhobꞌ tiꞌ, maxhtaj iskꞌulal chiwayojan yibꞌanh, chiwakojan yul isqꞌabꞌ naj rey ah Babilonia, kat isnhusnikanto naj huneꞌ konhobꞌ tiꞌ:
11 »Halwepaxo tet ebꞌnaj isreyal Judá:
“Abꞌewe istzotiꞌ Komam Jahawil,” kexchi.
12 Haxa tet yaꞌ rey yuninal yaꞌ rey David, hak tiꞌ chiyute yalni Komam Jahawil:
“Chawil yinh tzet chꞌeliko anma yinh hunun sahabꞌ sakꞌayal,
yinh istoholal, chakolilo makta chiꞌetalax yul isqꞌabꞌ ebꞌnaj etam anma,
yunhe mach chitit inhowalan hakaꞌ qꞌa qꞌaꞌ yu istxꞌojal chewatxꞌe,
yuto ta chitit inhowalan, matxa mak chu isbꞌutni.
13 Hex ah Jerusalén ay sat akꞌal, hex tiꞌ lahan hex hakaꞌ hunu niman chꞌen ay sat akꞌal,”
hanin Yahawilintiꞌan chiwalan tato ayko inhowalan teyinh. Hex tiꞌ cheyala:
“¿Mak hunu tiꞌ chu yaqꞌni howal jinh?
¿mak hunu tiꞌ chu yok yul kokonhobꞌ tiꞌ?” kexchi.
14 Hanin Yahawilintiꞌan chiwalan: “Chiwayojan isyaꞌtajil teyibꞌanh hatatikꞌa tzet chewatxꞌe,
chiwanitojan bꞌolobꞌ xolaj heqꞌebꞌtaj,
kat xin isnhusnito sunil tzet ayko yinhla ishoyanil,” xhi Komam,» xhi yaꞌ Jeremías.