Tzotiꞌ hal-lax yibꞌanhilo ebꞌyaꞌ rey yet Judá
22
Yal Komam Jahawil wetan hakaꞌ tiꞌ: «Asiꞌ bꞌey ispalacio yaꞌ isreyal Judá, kat hawalni hunteqꞌan tzotiꞌ tiꞌ. 2 Hal hakaꞌ tiꞌ: “Hach isreyal Judá tzꞌonhan yul istzꞌonhobꞌal yaꞌ rey David, abꞌe istzotiꞌ Komam Jahawil, kat yabꞌenpaxo ebꞌnaj hachejabꞌ, yebꞌ sunil anma ay yul konhobꞌ chiꞌokto yul ej pulta tiꞌ. 3 Hak tiꞌ chiyute yalni Komam Jahawil hakaꞌ tiꞌ: ‘Watxꞌewe istoholal yebꞌ istꞌinhanil yinh anma, kat hekolnilo anma yul isqꞌabꞌ ebꞌnaj etam anma, mach cheyaqꞌ subꞌchahoj yebꞌ xin mach chexelqꞌawi yinh anma nan konhobꞌal ay texol, yebꞌ yinh mak machi ismam machi ismiꞌ yebꞌ yinh ebꞌix hunix. Mach chemaqꞌkamo anma machi ismul ay yul huneꞌ konhobꞌ tiꞌ; 4 yuto ta kaw yeli cheyije hunteqꞌan tzet chiwaltiꞌan, chꞌok ebꞌnaj yuninal yaꞌ rey David reyal, chꞌahto ebꞌnaj yul carruaje, aypaxo ebꞌnaj xin chꞌahto yibꞌanh cheh, kat yokto ebꞌnaj yul ispultahil palacio tiꞌ, haꞌ hun ismunlawom ebꞌnaj yebꞌ konhobꞌ tzujan yintaj yet chiꞌoktoj. 5 Yajaꞌ ta mach cheyabꞌe yinh tzet chiwaltiꞌan xin, hanin Yahawilintiꞌan chiwaqꞌ bꞌinaho inbꞌihan, chiwalnihan tato chiꞌuchkꞌalaxto huneꞌ palacio tiꞌ,’ ”» xhi Komam.6 Hak tiꞌ chute yalnipaxo Komam Jahawil yinh ispalacio ebꞌyaꞌ isreyal Judá:
«Haꞌ ispalacio ebꞌnaj isreyal Judá lahan iskꞌulchꞌanil yul insatan hakaꞌ jilni txꞌotxꞌ Galaad,
yebꞌ hakaꞌ iswiꞌ witz Líbano; yajaꞌ xin chiwuchkꞌatojan ispalacio ebꞌnaj rey tuꞌ,
kat istzꞌinhlokano hakaꞌ konhobꞌ bꞌay matxa anma chꞌekꞌi.
7 Chiwatijan ebꞌnaj winaj chiꞌuchkꞌanto palacio tiꞌ,
haꞌ hunun ebꞌnaj tuꞌ iqꞌbꞌil ischꞌen ebꞌnaj yet howal,
kat isqꞌajnayo ebꞌnaj teꞌ cedro kaw ochebꞌil, kat isnhusnito ebꞌnaj teꞌ xol qꞌaꞌ.
8 »Kaw txꞌiꞌal anma chꞌekꞌ iskawilal huneꞌ konhobꞌ tiꞌ, hayet chiyilni, kat isqꞌambꞌen tet yetbꞌi hakaꞌ tiꞌ: “¿tzet yinh xin xayuchkꞌato Komam Jahawil huneꞌ niman konhobꞌ tiꞌ?” xhi. 9 Yajaꞌ chipajtzelax tet: “Yuto isbꞌejkano hunteqꞌan anma tiꞌ tzet tꞌinhbꞌabꞌilkano yu tet yahawil ebꞌnaj, isDiosal, yok yinoyo isbꞌa tet komon tioxh, yok tzujno yinta tioxh tuꞌ,” xhi ebꞌnaj,» xhi Komam.
10 Mach chexoqꞌ yinh iskamikal yaꞌ Josías,
mach cheyiqꞌ bꞌiskꞌulal yinh yaꞌ,
wal xin oqꞌanhwe yinh yaꞌ Salum iskꞌahol yaꞌ, yuto yaꞌ Salum tuꞌ chiꞌilaxto yaꞌ,
matxa xin chimeltzohi, matxa bꞌaqꞌinh chil txꞌo txꞌotxꞌ bꞌay pitzkꞌahi.
11 Yuto haꞌ Komam Jahawil halni yinh yaꞌ Salum tato chiꞌilaxto yaꞌ. Haꞌ yaꞌ Salum tuꞌ, iskꞌahol yaꞌ Josías isreyal Judá, haꞌ ok reyalo selelo ismam: «Matxa bꞌaqꞌinh xin chimeltzo yaꞌ iskonhobꞌ tiꞌ hunelxa. 12 Yuxin haꞌ yul konhobꞌ bꞌay ilaxto yaꞌ preso, haꞌ tuꞌ chikami, hak tuꞌ xin matxa chil iskonhobꞌ tiꞌ hunelxa.
13 ¡Ay, kꞌanchꞌan mak chiwatxꞌelaxkanh yatut yaj mach yinho istoholal,
chiwatxꞌelaxpaxo iscuartohal, yajaꞌ maxhtaj yinh iskꞌulal,
chiyaniko anma munil yinh, yaj mach chistohla!
14 Chiyalni hakaꞌ tiꞌ: “Chinwatxꞌekanhan hunu niman watutan yebꞌ nimeta cuarto yinh iskabꞌ piso yu yekꞌ jaqꞌeqꞌ yul,
kat ishajlax isventanahil, kat yok teꞌ aqꞌinteꞌ cedro yichoj,
kat yok pintura yinh,” xhi huneꞌ naj rey.
15 ¿Tajka chatxumu ta yu haweh yulaj nha nabꞌa cedro yuxin ayachikto reyal?
Haꞌ hamam yaqꞌ tzalaho iskꞌul iswaꞌi, yukꞌni tzet yoche iskꞌul, yajaꞌ iswatxꞌe hamam tuꞌ istoholal,
yebꞌ iskꞌulal yinh anma, yuxin kꞌul ekꞌ yu hamam.
16 Hamam tuꞌ iswatxꞌe iskꞌulal yinh anma chiꞌetalaxi, yebꞌ yinh anma mebꞌaꞌ, yuxin kꞌul eliko hamam tuꞌ.
Hanin Yahawilintiꞌan, chiwalan ta haꞌ mak chibꞌeybꞌalnhen hakaꞌ tuꞌ chisyeloj tato ohtabꞌil hinan yu.
17 Yajaꞌ wal hach tiꞌ, maxhtaj iskꞌulal chawatxꞌe, hanhkꞌanhe hamajnayo qꞌalomal,
haꞌ xin bꞌay ayko hamujlubꞌal yebꞌ hawanma; chachejni potxꞌlaxokamo anma machi ismul,
chawetan hakonhobꞌ, chawatxꞌen istxꞌojal yinh,» xhi Komam.
18 Yuto hak tiꞌ yu yalni Komam Jahawil yinh yaꞌ Joacim, iskꞌahol yaꞌ Josías, isreyal Judá hakaꞌ tiꞌ:
«Machi mak chiꞌok oqꞌo yinh iskamikal, chiyalni hakaꞌ tiꞌ:
“¡Ay, wuxhtaj! ¡Ay wanabꞌ! Machi mak chiyiqꞌ bꞌiskꞌulal chiyalni hakaꞌ tiꞌ:
‘¡Kꞌanchꞌan jahawil! komam rey kaw niman yelapnoj,’ mach xhihoj,” xhi Komam.
19 Haꞌ bꞌay chimujlax noꞌ kamom burro, haꞌ tuꞌ chimujlaxi,
chihatxlaxilto yul ispultahil konhobꞌ Jerusalén.
20 Hex ah Jerusalén, ahanhweto iswiꞌ witz Líbano kat yel heyaw,
kat heyahwipaxo yinh kaw ip iswiꞌ witz Basán,
yebꞌ sunil bꞌayejtuꞌwal yilal yel heyaw, yuto sunil ebꞌnaj ayko yanma teyinh xatanhiloj.
21 Hayet kaw saqꞌal heyehi, heyalni hakaꞌ tiꞌ: “¡Mach chijabꞌetojan tzet chawala!” quexchi.
Hakextikꞌa tuꞌ yettaxtikꞌa tzeh hex, machi hunelo tiꞌ heyabꞌe tzet chiwalan.
22 Haꞌ sunil ebꞌnaj yahawil yeko teyinh, chiꞌilaxto ebꞌnaj yu jaqꞌeqꞌ,
kat yilaxto ebꞌnaj ayko yanma teyinh preso, hak tuꞌ xin chu heyokkano yinh txꞌixwilal, kat issomchakanh cheyilah, yu sunil istxꞌojal xahewatxꞌe.
23 Kexehikꞌo bꞌey Líbano. Hewatxꞌen heyatut iswiꞌ teꞌ cedro.
¡Yajaꞌ wal xin, kaw chexqꞌajwoj yet chihul isyaꞌtajil teyibꞌanh, hakaꞌ isyaꞌil yet chiwatxꞌi iskꞌul ebꞌix ix!
24 »“¡Itzitz hinan!” xhi Komam Jahawil. Ta hach Conías, iskꞌahol yaꞌ Joacim, isreyal Judá, lahan hach hakaꞌ chꞌen jolqꞌabꞌ ayiko yinh yiximal inwatxꞌqꞌabꞌan, haꞌtikꞌa bꞌey tuꞌ xin chaxhinqꞌojilojan yinh inqꞌabꞌan. 25 Chach wanikojan yul isqꞌabꞌ ebꞌnaj chaxhsaynikꞌoj, yul isqꞌabꞌ ebꞌnaj bꞌay chaxhxiwi; hoꞌ, chachwakojan yul isqꞌabꞌ naj Nabucodonosor, isreyal Babilonia, yebꞌ yul isqꞌabꞌ ebꞌnaj caldeo. 26 Chachwatojan preso yebꞌ hamiꞌ kach aqꞌni pitzkꞌahoj, sat huneꞌ txꞌotxꞌ kaw nahata bꞌey bꞌay mach taj tuꞌ kaxhpitzkꞌahi, haꞌ bꞌey tuꞌ xin chaxhkam yebꞌ hamiꞌ. 27 Matxa xin chexmeltzo sat txꞌotxꞌ tiꞌ, bꞌay kaw cheyocheꞌ chexmeltzohi.a
28 Haꞌ yaꞌ Conías tiꞌ, ¿tom lahan yaꞌ hakaꞌ hunu xi pohil chiyahlaxi?
¿lahanmi yaꞌ hakaꞌ hunu xi mach chiyaꞌilnhelaxi?
¿Tzet yinh xin qꞌojlaxto yaꞌ yebꞌ yuninal bꞌey huneꞌ txꞌotxꞌ mach ohtabꞌilo yu?
29 ¡Hex txꞌotxꞌ, hex txꞌotxꞌ, hex txꞌotxꞌ, abꞌewe tzet chal istzotiꞌ Komam Jahawil!»
30 Hak tiꞌ yalni Komam Jahawil hakaꞌ tiꞌ: «Tzꞌibꞌnhewekano tzet chihul yinh huneꞌ yaꞌ tiꞌ.
Haꞌ yaꞌ tiꞌ lahan chukano hakaꞌ hunu winaj maxhtikꞌa hunu iskꞌahol, yebꞌ xin maxhtikꞌa iskꞌulal yil yulbꞌal sunilbꞌal tzꞌayik.
Itzitz sat yibꞌanhqꞌinal tiꞌ, yaj machi hunu iskꞌahol chꞌok isreyalo Judá selelo yaꞌ rey David,» xhi Komam.