Yet chimeltzo anma Judá yul iskonhobꞌ hunelxa
23
Chal Komam Jahawil: «¡Ay, kꞌanchꞌan ebꞌnaj yilomal inmeꞌan, tonhe chaqꞌ kꞌayoto ebꞌnaj noꞌ, kat issajlemito noꞌ yu ebꞌnaj!» xhi Komam.2 Haꞌ Komam Jahawil, isDiosal Israel, chalni tet ebꞌnaj ayko yahawilo yinh istanhen iskonhobꞌ Komam, hakaꞌ tiꞌ: «Hex tiꞌ sajlemito inmeꞌan heyu, hexibꞌtentoj, mach xin hetanhe, yuxin hanin Yahawilintiꞌan chiwalan tato chiwayojan isyaꞌtajil teyibꞌanh yu istxꞌojal chewatxꞌe. 3 Hankawhinan chiwitijan haykonhxa inmeꞌan sunil bꞌayejtuꞌwal sat txꞌotxꞌ bꞌay watojan, kat waqꞌni meltzohojan sat istxꞌotxꞌ bꞌay chilowi, hak tuꞌ xin chu ischꞌibꞌkanh isbꞌisil noꞌ, kat ispohchakanh. 4 Chiwalan tato haninan chiwaqꞌaꞌkojan ebꞌnaj chitanheno inkonhobꞌtiꞌan, haꞌ yinh hunteqꞌan tzꞌayik tuꞌ matxa xiwkilal, matxapaxo kabꞌkꞌulal, haꞌ inkonhobꞌtiꞌan tzꞌajan chu inkutxbꞌanikojan, machi hunu ebꞌnaj chikꞌaytoj,» xhi Komam Jahawil.
5 Chalnipaxo Komam: «Chihul istzꞌayikal bꞌay chiwakojan huneꞌ yikꞌal yaꞌ David, isreyalo inkonhobꞌan.
Chiswatxꞌeꞌ istoholal yebꞌ iskꞌulal.
Kaw kꞌulkano yijbꞌali yinh anma sat txꞌotxꞌ tiꞌ.
6 Haꞌ yinh hunteqꞌan tzꞌayik tuꞌ, anma Judá chikolchahi,
haxa anma Israel chiꞌehayo yinh sunil iskꞌul.
Haꞌ huneꞌ tiꞌ xin chꞌalaxiko isbꞌihoj: “Haꞌ Komam Jahawil chiwatxꞌen istoholal jinh,” xhi.
7 »Yuxin hanin Yahawilintiꞌan chiwalan ta chul hunteqꞌan tzꞌayik bꞌay matxa chal-lax hakaꞌ tiꞌ: “¡Itzitz Komam Jahawil inilo anma Israel sat txꞌotxꞌ Egipto!” mach xhihoj. 8 Wal xin chal-laxoj: “¡Itzitz Komam Jahawil, Komam inilo anma Israel bꞌey txꞌotxꞌ norte, yebꞌ yulaj sunil konhobꞌ bꞌay sajlemitoj!” xhi. Hak tuꞌ yalni yuto haninan waqꞌ sajlemotojan anma tuꞌ yulajla sunil konhobꞌ, yajaꞌ chiwaqꞌ meltzohojan kat yehayo sat istxꞌotxꞌ hunelxa,» xhi Komam.
Tzotiꞌ hal-lax yinh ebꞌnaj chisbꞌaliko isbꞌa ischejabꞌo Komam Dios
9 Kaw yaꞌ chuko bꞌiskꞌulal yinh wanmahan yu ebꞌnaj leqꞌtiꞌ chisbꞌaliko isbꞌa ischejabꞌo Komam Dios,
sunil inbꞌajilan chiluyluni. Hak tuꞌ wehan sata Komam Jahawil,
yu istzotiꞌ xayal yinh ebꞌnaj yebꞌ sata istzotiꞌ kaw niman yelapnoj,
ispax wipan hakaꞌ hunu mak chikan kupnoj yuto kaw niman vino chukꞌu.
10 Yuto txꞌo txꞌotxꞌ tiꞌ kaw nohna yu ebꞌnaj winaj ixlom;
yu tzꞌaktiꞌ ayayo yibꞌanh anma,
yuxin tajilo sat txꞌotxꞌ, tajkanilo istelaj no noqꞌ sat txꞌotxꞌ desierto.
Yuto hanhkꞌanhetikꞌa istxꞌojal ayiko anma iswatxꞌeꞌ.
Haꞌ ebꞌnaj kaw ay yip yul konhobꞌ tiꞌ matxa istoholal chiswatxꞌe.
11 Yalni Komam: «Haꞌ ebꞌnaj chisbꞌaliko isbꞌa inchejabꞌojan yebꞌ ebꞌnaj sacerdote,
lahan istxꞌojal ebꞌnaj yul insatan,
ilchalo ismul ebꞌnaj wuhan yul watutan,» xhi Komam Jahawil.
12 Yalnipaxo Komam: «Yuxin haꞌ bꞌay chꞌekꞌ ebꞌnaj, lahan hakaꞌ hunu bꞌeh kaw yolan xol qꞌejholo bꞌay chitenlaxto ebꞌnaj, kat yaykꞌaykanoj.
Yuto haninan chiwalan ta chiwayojan isyaꞌtajil yibꞌanh ebꞌnaj yinh istiempo
bꞌay chischah ebꞌnaj isyaꞌtajil,» xhi Komam Jahawil.
13 Yalnipaxo Komam: «Wilan istxꞌojal chiswatxꞌe ebꞌnaj chisbꞌaliko isbꞌa inchejabꞌojan ay bꞌey Samaria,
chiyalikꞌo ebꞌnaj tzotiꞌ yinh isbꞌi tioxh Baal, hak tuꞌ yu yaqꞌni kꞌayoto ebꞌnaj, ebꞌnaj Israel, inkonhobꞌan.
14 Wilpaxojan issukal chiswatxꞌe ebꞌnaj chisbꞌaliko isbꞌa inchejabꞌojan ay bꞌey Jerusalén. Chiꞌixli ebꞌnaj,
kat yekꞌ ebꞌnaj yinh leqꞌtiꞌal, chiyiptzenpaxo ebꞌnaj ebꞌnaj txꞌoj islahniko iswatxꞌen istxꞌojal,
yunhe mach chisbꞌej anma iswatxꞌen istxꞌojal. Sunil ebꞌnaj tuꞌ,
lahan yute isbꞌeybꞌal hakaꞌ konhobꞌ Sodoma yebꞌ hakaꞌ anma ay bꞌey Gomorra.
15 Yuxin Komam Jahawil, kaw aykano yip,
hak tiꞌ yalni yinh ebꞌnaj chisbꞌaliko isbꞌa ischejabꞌo Komam:
Chiwaqꞌan kꞌahla tzet ye tuꞌ islobꞌ ebꞌnaj,
chiwaqꞌnipaxojan haꞌ howla haꞌ yukꞌuꞌ ebꞌnaj,
yuto yu ebꞌnaj chisbꞌaliko isbꞌa inchejabꞌojan ay bꞌey Jerusalén,
yuxin xaꞌahkanh istxꞌojal sunil yul konhobꞌ tiꞌ,» xhi Komam.
16 Hak tiꞌ chute yalni Komam Jahawil, Yahawil kaw aykano yip:
«Mach cheyabꞌeto tzet chal ebꞌnaj chisbꞌaliko isbꞌa inchejabꞌojan,
yuto haꞌ tzet chal ebꞌnaj yipo hekꞌul tuꞌ, leqꞌtiꞌal.
Haꞌ tzet chal yanma ebꞌnaj haꞌ chal ebꞌnaj yibꞌanhilo tzet chalilo iswayik,
maxhtaj tzet chꞌelti yul intiꞌan.
17 Haꞌ ebꞌnaj chiyahni tzet chiwalan, haꞌ ebꞌnaj chalni hakaꞌ tiꞌ:
“¡Haꞌ Komam Jahawil chalni tato ay aqꞌankꞌulal texol!” xhi ebꞌnaj.
Haxa tet makta chisyije tzet chal islutꞌal yanma,
chal ebꞌnaj hakaꞌ tiꞌ: “Machi isyaꞌtajil chihul teyibꞌanh,” xhipaxo ebꞌnaj,» xhi Komam.
18 Yalnipaxo yaꞌ Jeremías hakaꞌ tiꞌ: «Yuto ¿mak ohtanhen isnabꞌal Komam Jahawil,
yilni yebꞌ yabꞌen istzotiꞌ Komam? ¿Mak kaw ishajbꞌa istxikin yabꞌen istzotiꞌ Komam?
19 Haꞌ ishowal Komam Jahawil chitit hakaꞌ ismaqꞌwa kꞌuh;
haꞌ ishowal Komam tuꞌ istitxa, chꞌaykꞌay yibꞌanh iswiꞌ ebꞌnaj txꞌoj.
20 Mach chiꞌekꞌayo ishowal Komam tuꞌ masanto chiyij isbꞌa tzet chiyoche,
yebꞌ xin masanto chiyij isbꞌa tzet chal yanma.
Haꞌ yinh islahobꞌal tzꞌayik chitxumchalo hunteqꞌan tiꞌ heyu yinh hakaꞌ kaw yehi,» xhi yaꞌ.
21 Yalni Komam Jahawil: «Maxhtaj hinan chejnhe hunteqꞌan ebꞌnaj chisbꞌaliko isbꞌa inchejabꞌojan,
yajaꞌ xin chꞌekꞌ ebꞌnaj yinh anhe yalaꞌkꞌo tzotiꞌ yinh inbꞌihan;
matzet walan tet ebꞌnaj, yajaꞌ xin yalikꞌo ebꞌnaj.
22 Yajaꞌ ta yabꞌelo ebꞌnaj tzet chiꞌekꞌ yinh innabꞌalan,
ham intzotiꞌ tuꞌan chiyaliko ebꞌnaj tet inkonhobꞌan,
hakmi tuꞌ yu yaqꞌni meltzoko ebꞌnaj inkonhobꞌtuꞌan yul inqꞌabꞌan,
isbꞌejnikano isbꞌeybꞌalnhen istxꞌojal yebꞌ isbꞌejni iswatxꞌen ismachiswalilal.
23 Hanin Yahawilintiꞌan, chiwalan: “¿Tom Diosnhe hinan yinh bꞌay kawil?
Haxa bꞌay nahat, ¿tom man Diosojan?” walan.
24 Yalnipaxo Komam Jahawil: “¿Aymi hunu bꞌay chu yebꞌan isbꞌa hunu mak bꞌay ewantaj,
yunhe mach chu wilnihan?” xhi Komam.
Yalnipaxo Komam: “¿Tom machi hinan ayinikꞌojan sunil yul satkanh yebꞌ sunil sat yibꞌanhqꞌinal tiꞌ?” xhi Komam.
25 »Yalni Komam: “Hanintiꞌan xawabꞌehan tzotiꞌ chiyal hunteqꞌan ebꞌnaj chisbꞌaliko isbꞌa inchejabꞌojan, chalikꞌo ebꞌnaj leqꞌtiꞌal yinh inbꞌihan, chalni ebꞌnaj hakaꞌ tiꞌ ‘Xakowaykehanh, xakowaykehanh,’ xhi ebꞌnaj. 26 ¿Bꞌaqꞌinh chilo ebꞌnaj yinh yanma yalnikꞌo leqꞌtiꞌal tuꞌ, kat xin isbꞌejni ebꞌnaj yalni leqꞌtiꞌal tzet chal yanma? 27 ¿Mach chistxum ebꞌnaj ta yu wayik chal-le tet hunun yuxin lanhan kinisnahulnhentojan inkonhobꞌan, hakaꞌ yu kinisnahulnhetojan yichmam ebꞌnaj yu tioxh Baal? 28 Ta ay hunu inchejabꞌan chiwaykeli, yalabꞌ iswayik tuꞌ, huneꞌ tuꞌ wayike; haxa mak chichahni intzotiꞌan xin, haꞌojabꞌ intzotiꞌ tuꞌan chalikꞌoj, yuto intzotiꞌan kaw yel chala. ¿Tzet yok ischꞌimal yoj ixim trigo yinh ixim issat trigo?” xhi Komam Jahawil. 29 Yalnipaxo Komam: “¿Tom mach lahano intzotiꞌan hakaꞌ qꞌa qꞌaꞌ? ¿Tom mach lahano intzotiꞌan hakaꞌ chꞌen martillo chimaqꞌnipoho chꞌen chꞌen?” xhi Komam.
30 »Yalni Komam: “Hanintiꞌan chiwalan ta kaw ayko inhowalan yinh hunteqꞌan ebꞌnaj chejabꞌ, chiꞌelqꞌanikꞌo intzotiꞌan tet hunun,” xhi Komam Jahawil. 31 Chalnipaxo Komam: “Hanintiꞌan kaw ayko inhowalan yinh ebꞌnaj chisbꞌaliko isbꞌa inchejabꞌojan, kat yalni: ‘Haꞌ Komam mahalni hunteqꞌan tzotiꞌ tiꞌ,’ xhi ebꞌnaj,” xhi Komam. 32 Hanin Yahawilintiꞌan, chiwalpaxojan: “Kaw ayko inhowalan yinh ebꞌnaj chihalnikꞌo leqꞌtiꞌal wayike chiswayke, chaqꞌni kꞌayoto ebꞌnaj inkonhobꞌan yu leqꞌtiꞌal chiyal tuꞌ, yebꞌ yu kaw nanxa islow chu istzoteli. Maxhtaj hinan chejnhe hunteqꞌan ebꞌnaj tuꞌ, matzet waqꞌpaxojan yalaꞌ ebꞌnaj. Haꞌ tzet chiswatxꞌe ebꞌnaj tuꞌ machi nino iskꞌulal chꞌaqꞌ tet konhobꞌ tiꞌ,” xhi Komam.
33 »Yalni Komam wetan hakaꞌ tiꞌ: “Ta ay hunu mak yul konhobꞌ tiꞌ, maka hunu ebꞌnaj chisbꞌaliko isbꞌa inchejabꞌojan, maka hunu naj sacerdote chiqꞌambꞌen tawet, chalni: ‘¿Tzet xhi ischejbꞌanil Komam Jahawil?’ ta xhi. Kat hataqꞌwi tet: ‘Haꞌ ischejbꞌanil Komam Jahawil to xayala ta chexbꞌejlaxkano yu Komam,’ kachi. 34 Ta xin ay hunu naj chisbꞌaliko isbꞌa inchejabꞌojan, maka hunu naj sacerdote, maka hunu mak ay yul konhobꞌ chihalni: ‘Ischejbꞌanil Komam Jahawil,’ ta xhi, chiwayojan isyaꞌtajil yibꞌanh yebꞌ yibꞌanh makta ay yul yatut. 35 Wal xin hak tiꞌ cheyute heyalni teyet hunun hex, maka tet heyuxhtaj: ‘¿Tzet yute ispajtzen Komam Jahawil?’ maka ‘¿Tzet chute yalni Komam Jahawil?’ xhi. 36 Matxahojabꞌ bꞌaqꞌinh chꞌekꞌ yinh henabꞌal cheyalni hakaꞌ tiꞌ: ‘Ischejbꞌanil Komam Jahawil,’ mach kexchihoj; yuto ta cheyal hakaꞌ tiꞌ, ‘haꞌ ischejabꞌ Komam,’ chiꞌok ijatzil teyibꞌanh, yuto heyetato intzotiꞌan, hanin Dios itzitz intiꞌan, Yahawil kaw aykano yip, yebꞌ xin heDiosal. 37 Wal xin hak tiꞌ cheyute heqꞌambꞌen tet ebꞌnaj inchejabꞌan hakaꞌ tiꞌ: ‘¿Tzet ispajtze Komam Jahawil? maka ¿tzet yal Komam Jahawil?’ kexchi. 38 Yajaꞌ ta chito yal ebꞌnaj: ‘Ischejbꞌanil Komam Jahawil,’ ta xhi ebꞌnaj, chaxhtaqꞌwi hakaꞌ tiꞌ: ‘Haꞌ kaw Komam Jahawil,’ chalni: ‘Yu cheyal hunteqꞌan tzotiꞌ tiꞌ, Ischejbꞌanil Komam Jahawil, hunteqꞌan bꞌay kexinkachan ta mach cheyala, 39 yuxin chexinnahulnhekantojan, chexwinilojan yinh insatan, chiwuchkꞌankantojan konhobꞌ waqꞌan teyet, huneꞌ iskonhobꞌpaxo heyichmam, 40 kat yelkano hepixan yinh sunilbꞌal ej tiempo, kat heyokkano yinh txꞌixobꞌal. Haꞌ huneꞌ cheyaqꞌle tuꞌ machi bꞌaqꞌinhal chito nahul heyu,’ xhi Komam Jahawil,” kachi,» xhi Komam tet yaꞌ Jeremías.