Yechel yinh teꞌ higo kꞌul yebꞌ teꞌ mach kꞌuloj
24
Hayet lahwi yilaxto yaꞌ Jeconías, iskꞌahol yaꞌ Joacim, isreyal Judá preso bꞌey Babilonia yu naj rey Nabucodonosor, yebꞌ yet yilaxto ebꞌnaj yahawil konhobꞌ, yebꞌ ebꞌnaj watxꞌem nha yebꞌ ebꞌnaj chakꞌom hierro ah Jerusalén, isyeni Komam Jahawil kabꞌ motx teꞌ higo wetan ayayo sata istiꞌ Yatut Komam. 2 Haꞌ yul huneꞌ teꞌ motx ayayto sat teꞌ higo kaw kꞌul, teꞌ bꞌabꞌel sat, yebꞌ xin kaw qꞌan; haxa yul hunxa teꞌ motx xin haꞌ sat teꞌ higo kaw mach kꞌulo ayayto yul, mach chisje koloni, yuto mach kꞌulo teꞌ. 3 Isqꞌambꞌen Komam Jahawil wetan: «Jeremías, ¿tzet chawila?» xhi wetan. Intaqꞌwihan: «Chiwilan sat teꞌ higo, huneꞌ motx teꞌ kaw kꞌul koloni, haxa hunxa motx teꞌ xin mach kꞌulo koloni,» kinchihan.4 Lahwi tuꞌ istzotel Komam Jahawil wetan, yalni hakaꞌ tiꞌ: 5 «Hanin Yahawilintiꞌan, isDiosal Israel, chiwalan; hakaꞌ teꞌ sat higo kaw kꞌul tuꞌ, hak tuꞌ ye anma Judá yul insatan, haꞌ ton anma wilojan yul iskonhobꞌ tiꞌ winitojan preso sat istxꞌotxꞌ ebꞌnaj caldeo, yunhe inyenilojan inkꞌulalan yinh. 6 Yuto chintanhehan yunhe kꞌul chila, chiwaqꞌni meltzohojan yul iskonhobꞌ tiꞌ hunelxa, kat ischꞌibꞌ isbꞌisil, mach xin chintanhtzelojan, hakaꞌto chintzꞌunayojan, matxa chinhokꞌkanhan. 7 Chiwaqꞌnihan labꞌanbꞌolo yanma yu yohtanheniloj tato hanintiꞌan Yahawil hinan, kat yok inkonhobꞌojan kat wokan isDiosaloj, yuto chimeltzoko yul inqꞌabꞌan yinh sunil yanma.
8 »Walpaxo naj Sedequías isreyal Judá yebꞌ ebꞌnaj yahaw konhobꞌ yebꞌ hunteqꞌanxa anma Jerusalén chikankano bꞌey tiꞌ, yebꞌ anma ehayo bꞌey Egipto,a lahan hakaꞌ sat teꞌ higo mach kꞌulo islolax tuꞌ yul insatan. Haꞌ huneꞌ tiꞌ hanin Yahawilintiꞌan chiwalan: 9 Chiwatijan niman isyaꞌtajil yibꞌanh, kaw chixiw ej nime konhobꞌ ay sat yibꞌanhqꞌinal tiꞌ yilni. Haꞌ xin yechel chukaniko sata ej konhobꞌ bꞌay waqꞌ pujnatojan, yu chꞌel ispixan, kat yintanhelaxkaniltoj, kat yay tzꞌaktiꞌ yibꞌanh. 10 Chiwanitojan howal xol, yebꞌ wahil, yebꞌ howla yabꞌil, masanto chitanhkanilo sat txꞌo txꞌotxꞌ waqꞌan tet, yebꞌ tet yichmam,» xhi Komam.