70 (Lahonhebꞌ iskanhwinaj) habꞌil chꞌay isyaꞌtajil yibꞌanh anma ah Judá
25
Hayet kanhebꞌxa habꞌil yok yaꞌ Joacim, iskꞌahol yaꞌ Josías isreyal Judá, istzotel Komam Jahawil tet yaꞌ Jeremías yinh konhobꞌ Judá. Yal Komam huneꞌ tuꞌ yet bꞌabꞌel habꞌil yok naj Nabucodonosor isreyalo Babilonia. 2 Haꞌ tzet yal Komam tet yaꞌ Jeremías tuꞌ, yal yaꞌ tet sunil ej konhobꞌ yet Judá yebꞌ tet sunil anma ay bꞌey Jerusalén, yalni yaꞌ hakaꞌ tiꞌ: 3 «Hatax yet 13 (oxlahonhebꞌxa) habꞌil yok yaꞌ Josías, iskꞌahol naj Amón, isreyalo Judá masanta tinanh, chal yelapnoj ayxa 23 (oxebꞌ iskawinaj) habꞌil tinanh, yichi istzotel Komam Jahawil wetan, chilannhetikꞌa xin walnihan teyet tzet chal Komam wetan, yajaꞌ xin mach cheyabꞌe. 4 Yanipaxti Komam Jahawil hunteqꞌanxa ebꞌnaj ischejabꞌ yalno istzotiꞌ teyet, yajaꞌ xin maxhtikꞌa heyabꞌe tzet yal ebꞌnaj. Chilannhetikꞌa xin yaniti Komam ebꞌnaj ischejabꞌ tuꞌ, yajaꞌ mach hehajbꞌa hetxikin heyabꞌen yinh tzet yal ebꞌnaj, 5 yet yalni ebꞌnaj teyet hakaꞌ tiꞌ: “Wal tinanh bꞌejwe hebꞌeybꞌalnhen istxꞌojal, kat hebꞌejni hewatxꞌen ismachiswalilal, hak tuꞌ xin chexehayo sat txꞌo txꞌotxꞌ yinh hunelnhe, txꞌotxꞌ yaqꞌ Komam Jahawil tet heyichmam bꞌay ay hex tiꞌ tinanh. 6 Mach chexoktzujno yinta komon tioxh, mach cheyiyo hebꞌa tet, mach chexay jahno sataj. Mach cheyaqꞌtij ishowal Komam cheyinayo hebꞌa tet tioxh chewatxꞌe yu heqꞌabꞌ, haxinwal machi isyaꞌtajil chati Komam texol,” xhi ebꞌnaj teyet. 7 Yuxin chal Komam Jahawil hakaꞌ tiꞌ: “Yajaꞌ xin mach heyabꞌe tzet walan, wal xin heyaqꞌtij inhowalan yet hewatxꞌen hetioxh yay isyaꞌtajil teyibꞌanh,” xhi Komam.8 »Yu tuꞌ yuxin yal Komam Yahawil, kaw aykano yip hakaꞌ tiꞌ: “Yu mach heyabꞌe intzotiꞌan, 9 yuxin chinchejtijan ej konhobꞌ ayko yinh norte teyinh, kat inchejnitijan naj inchejabꞌana Nabucodonosor, isreyal Babilonia teyinh, kat yaniko naj howal yinh konhobꞌ tiꞌ, yebꞌ yinh anma ay yul konhobꞌ tiꞌ, yebꞌ yinh ej konhobꞌ ayko yinhla ishoyanil. Chintanhtzelojan, kat wanikojan xibꞌtebꞌaloj, kat isbꞌuchlaxi. Hunteqꞌan konhobꞌ tiꞌ xin chiwetatojan yinh hunelnhe. 10 Chiwaqꞌ kꞌayolojan tzalahilal yul konhobꞌ tiꞌ, matxa chiꞌabꞌelax bꞌit yet qꞌinh yebꞌ bꞌit yet mohyilal, matxa chiꞌabꞌelax yok chꞌen molino, matxa chiꞌil-lax istzejtzon isqꞌaqꞌal chꞌen lámpara. 11 Sunil konhobꞌ tiꞌ chiꞌetaxtoj, haxanhe yekꞌlenal chikankanoj, kat yokkano yinh xibꞌtebꞌal. Chꞌokkanto huneꞌ konhobꞌ tiꞌ yebꞌ ej konhobꞌ ayayo iskawilal, yalanh yip naj rey Babilonia yulbꞌal 70 (lahonhebꞌ iskanhwinaj) habꞌil. 12 Hanin Yahawilintiꞌan, chiwalan: Hayet xalahwi yekꞌto 70 (lahonhebꞌ iskanhwinaj) habꞌil, kat wanayojan isyaꞌtajil yibꞌanh naj rey Babilonia yebꞌ yibꞌanh anma ah Babilonia yu istxꞌojal, chiwanipaxayojan isyaꞌtajil yibꞌanh ebꞌnaj ah caldeo, kat intanhtzenkanilojan iskonhobꞌ ebꞌnaj yinh hunelnhe. 13 Chiwanitijan sunil isyaꞌtajil walan yinh hunteqꞌan nime konhobꞌ tuꞌ, haꞌ ton sunil tzet tzꞌibꞌnhebꞌilkano yul huneꞌ libro tiꞌ, sunil tzet yalkano yaꞌ Jeremías yinh hunteqꞌan nimeta konhobꞌ tuꞌ. 14 Yuto chiwakojan yul isqꞌabꞌ hunteqꞌanxa nime konhobꞌ yebꞌ yul isqꞌabꞌ hunteqꞌan ebꞌnaj rey kaw aykano yip, hak tuꞌ chu inpajtzenpaxojan tet, hakaꞌtikꞌa sunil istxꞌojal iswatxꞌe,” xhi Komam,» xhi yaꞌ Jeremías.
Huneꞌ vaso yechel isyaꞌtajil chꞌay yibꞌanh nimeta konhobꞌ
15 Yuto hak tiꞌ yute yalni Komam Jahawil, isDiosal Israel wetan hakaꞌ tiꞌ: «Chálo huneꞌ vaso nohna yu vino ayko yul inqꞌabꞌtiꞌan, haꞌ huneꞌ tiꞌ yechel inhowalan, kat hawaqꞌni yukꞌuꞌ sunil nimeta konhobꞌ bꞌay chachinchejtojan. 16 Hayet chiyukꞌni ebꞌnaj, kat isluylunkanh ebꞌnaj, kat yetaxto yul iswiꞌ ebꞌnaj, yuto chiwatojan howal xol ebꞌnaj yu chꞌen espada,» xhi Komam.
17 Inchahnilojan huneꞌ copa tuꞌ yul isqꞌabꞌ Komam Jahawil, waqꞌnihan yukꞌuꞌ sunil nimeta konhobꞌ bꞌay kinischejtojan. 18 Waqꞌnihan yukꞌuꞌ anma ah Jerusalén yebꞌ tet anma ay yul ej konhobꞌ yul yet Judá yebꞌ tet isreyal, yebꞌ tet ebꞌnaj yahaw, yunhe istanhtzelaxkaniloj, kat yokkano xibꞌtebꞌaloj, kat istzeyelaxi, kat isbꞌuchlaxi, hakto tuꞌ xin ye tinanh. 19 Waqꞌnipaxojan yukꞌuꞌ isreyal Egipto, yebꞌ tet ebꞌnaj yahaw, yebꞌ tet sunil konhobꞌ, 20 yebꞌ tet konhobꞌ bꞌay soman ye anma nananta konhobꞌal, yebꞌ tet sunil ebꞌnaj isreyal txꞌotxꞌ Uz, yebꞌ tet sunil ebꞌnaj isreyal txꞌotxꞌ Filistea, yebꞌ tet konhobꞌ Ascalón, konhobꞌ Gaza, konhobꞌ Ecrón, yebꞌ anma kantokano bꞌey Asdod. 21 Waqꞌnipaxojan yukꞌuꞌ konhobꞌ Edom, konhobꞌ Moab yebꞌ tet ebꞌnaj iskꞌahol naj Amón, 22 yebꞌ tet sunil isreyal Tiro, yebꞌ tet sunil ebꞌnaj isreyal Sidón yebꞌ tet sunil ebꞌnaj isreyal konhobꞌ ayikꞌti isqꞌaxebꞌikꞌti haꞌ mar, 23 yebꞌ tet konhobꞌ Dedán, yebꞌ tet konhobꞌ Tema, yebꞌ tet konhobꞌ Buz yebꞌ tet ebꞌnaj chiskꞌupilo xil iswiꞌ, 24 yebꞌ tet sunil ebꞌnaj isreyal Arabia, yebꞌ tet sunil ebꞌnaj isreyal hunteqꞌan konhobꞌ bꞌulanayo sat txꞌotxꞌ desierto, nananta yikꞌal. 25 Waqꞌnipaxojan yukꞌuꞌ sunil ebꞌnaj isreyal Zimri, yebꞌ tet sunil ebꞌnaj isreyal Elam, yebꞌ tet sunil ebꞌnaj isreyal Media, 26 yebꞌ tet sunil ebꞌnaj isreyal ej konhobꞌ ayko yinh yetkꞌulal norte, konhobꞌ kawil yebꞌ nahat yelo yinh hunun, yebꞌ tet sunil ej konhobꞌ ay sat sunil yibꞌanhqꞌinal tiꞌ. Haxa yinh islahobꞌal xin chukꞌni isreyal Babilonia.
27 Yalni Komam wetan: «Chawalni tet ebꞌnaj hakaꞌ tiꞌ: “Hak tiꞌ yalni Komam Jahawil kaw aykano yip, isDiosal Israel: ‘Ukꞌwej kat heyukꞌikanh yu, kat hexabꞌi, kat heyaykꞌayi, matxa xin chexahwanoj, yuto chexpotxꞌlaxkamo yu chꞌen espada xol howal chiwatojan texol,’ kachi,” xhi Komam. 28 Yajaꞌ ta mach isje ebꞌnaj yukꞌuꞌ tzet ayayto yul copa ayko yul haqꞌabꞌ tuꞌ, chawal tet hakaꞌ tiꞌ: “Haꞌ Komam Jahawil kaw aykano yip, chalni tato yilal heyukꞌni, 29 yuto haꞌ bꞌey konhobꞌ bꞌay chibꞌina inbꞌihan, haꞌ bꞌey tuꞌ chinichikojan wanayojan isyaꞌtajil. ¿Hatom xin hex nan konhobꞌal tiꞌ chexkolchalo tet isyaꞌtajil? Wal xin mach chexkolchaloj, yuto iqꞌbꞌil chꞌen espada wuhan chitanhtzenilo sunil anma ay sat yibꞌanhqꞌinal tiꞌ,” xhi Komam, Yahawil yinh Sunil.
30 »Hach Jeremías hach tiꞌ xin, chawalaꞌ sunil hunteqꞌan tzotiꞌ tiꞌ tet anma ay yulajla konhobꞌ hakaꞌ tiꞌ:
“Chꞌel yaw Komam Jahawil yul satkanh,
chꞌelayti yaw Komam bꞌay ay yehobꞌal,
huneꞌ ehobꞌal yetnhe Komam yehi, chꞌelayti yaw yinh kaw ip yinh iskonhobꞌ,
kat isbꞌitnhen Komam bꞌit yinh sunil anma ay sat txꞌo txꞌotxꞌ hakaꞌ bꞌit chako ebꞌnaj chixanhnilti yal teꞌ uva.
31 Chiꞌabꞌelax isbꞌili yul isnuqꞌ Komam sunil bꞌay chikachnakan apno txꞌo txꞌotxꞌ tiꞌ, yuto chiyayo Komam Jahawil isyaꞌtajil yibꞌanh nimeta konhobꞌ.
Haꞌ Komam chiꞌilni tzet chiꞌeliko sunil anma,
kat xin yaniko Komam kamikal yu chꞌen espada yinh ebꞌnaj txꞌoj,” kachi tet anma,» xhi Komam.
32 Hak tiꞌ chute yalnipaxo Komam Jahawil kaw aykano yip:
«Kaw yeli haꞌ isyaꞌtajil tiꞌ, istxolal yay yibꞌanh hunun nimeta konhobꞌ,
ay huneꞌ niman isyaꞌtajil hakaꞌ howla jaqꞌeqꞌ
chitit bꞌey bꞌay chiꞌichikanh txꞌo txꞌotxꞌ masanta bꞌay chikachnakan apno txꞌotxꞌ,» xhi Komam.
33 Haꞌ anma chikamo yu Komam Jahawil yinh huneꞌ tzꞌayik tuꞌ,
toxanhe chikankano pakꞌno sat txꞌo txꞌotxꞌ sat yibꞌanhqꞌinal tiꞌ.
Machi mak chiꞌoqꞌ yinh, machi mak chiꞌinikanh isnimanil kat ismujni.
Wal xin tonhe chikankano pakꞌno isnimanil anma sat txꞌotxꞌ hakaꞌ istzaꞌ no noqꞌ.
34 ¡Oqꞌanhwej! ¡Hex yilomal noꞌ meꞌ, elojabꞌ heyaw!
¡Ekꞌanhwe bꞌalbꞌon xol pojoj hex chetanhe noꞌ meꞌ!
Yuto xayijkano isbꞌa hunteqꞌan tzꞌayik bꞌay chexkami, kat heyaykꞌayi,
kat hepohto hakaꞌ hunu vaso kaw xahan aya.
35 Haꞌ ebꞌnaj tanhem meꞌ matxa bꞌay chu iskolni isbꞌa ebꞌnaj,
haxapaxo ebꞌnaj ijbꞌalom yinh noꞌ meꞌ xin matxa chu yelkanh ebꞌnaj.
36 ¡Haꞌ ebꞌnaj chitanhen noꞌ meꞌ kaw chꞌel yaw ebꞌnaj!
Haxa ebꞌnaj ijbꞌalom yinh noꞌ meꞌ kaw chiqꞌajwipaxo ebꞌnaj yu isyaꞌtajil,
yuto xayuchkꞌato Komam Jahawil bꞌay kutxan noꞌ meꞌ.
37 Haꞌ bꞌay chilow noꞌ meꞌ kaw saqꞌalkanoj,
chꞌetalaxkanto yu ishowal Komam Jahawil.
38 Elti Komam Jahawil yul yatut,
hakaꞌ yelti noꞌ bꞌalam yul isnhachꞌen,
yok yetanto iskonhobꞌ anma ay sat txꞌo txꞌotxꞌ,
yuto tit lemna ishowal Komam,
ishowal Komam kaw aykano ismay.