2. YINH TZET YAQꞌLE YAꞌ JEREMÍAS YEBꞌ KOLBꞌANILE CHAQꞌ KOMAM DIOS
(26:1–45:5)
Yoche anma ta chipotxꞌlaxkamo yaꞌ Jeremías
26
Hayet tolto ok yaꞌ Joacim iskꞌahol yaꞌ Josías reyal yinh Judá, istzotel Komam Jahawil tet yaꞌ Jeremías, 2 yalni Komam: «Chaxhok linhno yamaqꞌil watutan, kat hawalni sunil tzet inchejan hawalaꞌ tet sunil anma ispeto yulajla konhobꞌ yul ismajul Judá, chiꞌapni yiqꞌayo isbꞌa yul watuttuꞌan. Mach hunu tzotiꞌ tiꞌ chawebꞌayo tet. 3 Kꞌuxantaxka yabꞌeni, kat isbꞌejnikano istxꞌojal chisbꞌeybꞌalnhe, hak tuꞌ xin matxa chiwatojan isyaꞌtajil xaꞌekꞌ yinh innabꞌalan yinh, yu istxꞌojal chilaiswatxꞌe. 4 Hal tet anma tuꞌ: “Hak tiꞌ yalni Komam Jahawil hakaꞌ tiꞌ: ‘Ta mach cheyabꞌe tzet chiwalan, mach xin cheyije chejbꞌanile wakanojan texol, 5 yebꞌ ta mach cheyabꞌe tzet chiyal ebꞌyaꞌ inchejabꞌan chilan inchejnihan texol, ebꞌyaꞌ maxhtikꞌa cheyije tzetaj chala. 6 Chiꞌeliko watuttiꞌan hakaꞌ wute watutan bꞌey Silo, chiwanayojan tzꞌaktiꞌ yibꞌanh konhobꞌ tiꞌ sat sunil ej konhobꞌ ay sat yibꞌanhqꞌinal tiꞌ,’ xhi Komam Jahawil,” kachi,» xhi Komam.7 Ebꞌyaꞌ sacerdote yebꞌ ebꞌnaj chisbꞌaliko isbꞌa ischejabꞌo Komam Dios yebꞌ sunil konhobꞌ abꞌen tzet yal yaꞌ Jeremías bꞌey Yatut Komam Jahawil. 8 Hayet lahwi yalni yaꞌ Jeremías sunil tzet ischej Komam Jahawil yalaꞌ tet konhobꞌ, istzabꞌlaxayo yaꞌ tuꞌ yu ebꞌyaꞌ sacerdote yebꞌ yu ebꞌnaj chisbꞌaliko isbꞌa ischejabꞌo Komam, yebꞌ yu sunil konhobꞌ. Yalni ebꞌnaj tet yaꞌ: «¡Yinh kaw yeli chachkamoj! 9 ¿Tzet yinh xin chawal yinh isbꞌi Komam Jahawil tato lahan chukano Yatut Komam hakaꞌ yu bꞌey Silo, yebꞌ ta chiꞌuchkꞌalaxto konhobꞌ tiꞌ, matxa xin anma chikankano yul?» xhi ebꞌnaj tet yaꞌ Jeremías. Hak tuꞌ yu iskutxbꞌaniko isbꞌa sunil konhobꞌ yinh yaꞌ Jeremías bꞌey Yatut Komam Jahawil.
10 Hayet yabꞌen ebꞌnaj yahaw Judá huneꞌ tuꞌ yel ebꞌnaj bꞌey ispalacio yaꞌ rey, yahto ebꞌnaj Yatut Komam Jahawil, yay tzꞌonhno ebꞌnaj bꞌay ay huneꞌ akꞌ pulta bꞌey Yatut Komam. 11 Istzotel ebꞌyaꞌ sacerdote yebꞌ ebꞌnaj chisbꞌaliko isbꞌa ischejabꞌo Komam tet ebꞌnaj yahaw konhobꞌ yebꞌ tet anma ay yul konhobꞌ, yalni ebꞌnaj: «Haꞌ huneꞌ naj winaj tiꞌ txꞌoj istzotel naj yinh kokonhobꞌ. Hex kaw hex maxeyabꞌe tzet mayal naj,» xhi ebꞌnaj. 12 Istzotel yaꞌ Jeremías tet sunil ebꞌnaj yahaw konhobꞌ yebꞌ tet sunil konhobꞌ, yalni yaꞌ: «Haꞌ Komam Jahawil kinchejnihan walnihan hunteqꞌan tzotiꞌ tuꞌ yinh Yatut Komam tiꞌ, yebꞌ yinh konhobꞌ hakaꞌ maxeyabꞌe tiꞌ. 13 Wal tinanh, watxꞌewe hebꞌeybꞌal yebꞌ sunil tzetaj cheyu, kat heyabꞌen tzet chiyal Komam Jahawil koDiosal, hak tuꞌ xin matxa chati Komam isyaꞌtajil xayala tato chiyati teyibꞌanh. 14 Wal hanintiꞌan ayinikojan yul heqꞌabꞌ, watxꞌewe tzet chal hekꞌul winhan, ta haꞌ heyekoj, hakaꞌ hetxumni tiꞌ. 15 Yajaꞌ yilal heyohtanheniloj ta chinhepotxꞌan nabꞌanhe cheyako hemul yebꞌ konhobꞌ tiꞌ, yuto hanintiꞌan machi inmulan, yuto yinh kaw yeli haꞌ Komam Jahawil kinchejnihan walaꞌan sunil hunteqꞌan tzotiꞌ tiꞌ teyet, yunhe heyabꞌeni,» xhi yaꞌ Jeremías.
16 Yalni ebꞌnaj yahaw konhobꞌ yebꞌ sunil konhobꞌ tuꞌ tet ebꞌyaꞌ sacerdote yebꞌ tet ebꞌnaj chisbꞌaliko isbꞌa ischejabꞌo Komam hakaꞌ tiꞌ: «Haꞌ huneꞌ naj tiꞌ mach ismul naj, yuxin mach chu iskam naj yuto haꞌ yinh isbꞌi Komam Jahawil, koDiosal xatzotel naj jet,» xhi ebꞌnaj. 17 Ay xin haywanh ebꞌnaj ichamta winaj yul konhobꞌ tuꞌ ah linhnoj, yalni ebꞌnaj tet konhobꞌ kutxaniko tuꞌ: 18 «Haꞌ yinh istzꞌayikal yaꞌ Ezequías, isreyal Judá, tzotel yaꞌ Miqueas ah Moreset, yaꞌ chitzotel yu Komam Dios yinh tzetaj ye tuꞌ chitohuli, yal yaꞌ tet sunil konhobꞌ Judá, hakaꞌ tiꞌ:
“Hak tiꞌ yalni Komam Yahawil yinh Sunil: ‘Haꞌ Sión tiꞌ chitꞌoklaxoj, kat istzꞌunlax tzꞌunubꞌ sat;
haꞌ konhobꞌ Jerusalén chiꞌuchkꞌalaxtoj, qꞌalemxanhe chikani.
Haxa wonhan bꞌay ay watutan chimeltzoko yinh telajbꞌalil,’ xhi Komam,” xhi yaꞌ Miqueas.a
19 »¿Tom xin maqꞌlaxkamo yaꞌ Miqueas tuꞌ yu yaꞌ Ezequías, isreyal Judá yebꞌ yu konhobꞌ Judá? ¡Machoj! Wal xin kaw xiw konhobꞌ tet Komam Jahawil, istxahli konhobꞌ tuꞌ sata Komam, hak tuꞌ xin matxa yati Komam isyaꞌtajil xatikꞌa yala ta chati yinh konhobꞌ. Yuxin mach chisje janiko komul kopotxꞌnikamo yaꞌ Jeremías tiꞌ,» xhi ebꞌnaj.
20 Aypaxo xin huneꞌxa ischejabꞌ Komam Jahawil, haꞌ ton yaꞌ Urías, iskꞌahol naj Semaías, ah konhobꞌ Quiriat-jearim, tzotelpaxo yinh isbꞌi Komam Jahawil yet yalni ta chati Komam isyaꞌtajil yibꞌanh konhobꞌ tiꞌ, yebꞌpaxo xin yibꞌanh ej txꞌotxꞌ tiꞌ hakaꞌtikꞌa yalni yaꞌ Jeremías.
21 Yabꞌenilo yaꞌ rey Joacim, yebꞌ ebꞌnaj nime winaj, yebꞌ ebꞌnaj yahaw konhobꞌ tzet yal yaꞌ Urías tuꞌ, yuxin yoche yaꞌ rey tuꞌ ispotxꞌoꞌkamo yaꞌ Urías; yajaꞌ hayet yabꞌenilo yaꞌ Urías huneꞌ tuꞌ isxiwkanh, isto bꞌey Egipto. 22 Yanito yaꞌ rey Joacim issayomal yaꞌ Urías tuꞌ bꞌey Egipto, ischejnito yaꞌ yaꞌ Elnatán, iskꞌahol naj Acbor yebꞌ hunteqꞌanxa ebꞌnaj. 23 Yinilti ebꞌnaj yaꞌ Urías tuꞌ yul konhobꞌ Egipto, yinito ebꞌnaj yaꞌ tet yaꞌ rey Joacim, ischejni yaꞌ potxꞌlaxokamo yaꞌ Urías tuꞌ, yu espada, isqꞌojlaxayto isnimanil yaꞌ bꞌay chimujlax komon anma.
24 Haꞌ naj Ahicam, iskꞌahol naj Safán, kolnilo yaꞌ Jeremías, hak tuꞌ xin matxa alaxiko yaꞌ yul isqꞌabꞌ konhobꞌ yunhe machi kami.