Hunteqꞌan yugo ok yecheloj ta chiꞌok ej konhobꞌ yalanh yip naj rey Nabucodonosor
27
Hayet tolto ok yaꞌ Joacim, iskꞌahol yaꞌ Josías isreyalo Judá, istzotel Komam Jahawil tet yaꞌ Jeremías. 2 Yalni Komam tet yaꞌ: «Watxꞌe hayebꞌo noꞌ tzꞌum yebꞌ yugo, kat hawaniko yibꞌanh hanuqꞌ. 3 Chawanito tzotiꞌ tet naj isreyal Edom, naj isreyal Moab, naj isreyal Amón, naj isreyal Tiro yebꞌ naj isreyal Sidón yinta ebꞌnaj chejabꞌ chihul ilno yaꞌ Sedequías, isreyal Judá bꞌey Jerusalén. 4 Chawalni tet ebꞌnaj chejabꞌ tuꞌ ta chiyal ebꞌnaj tet yahaw, tato hanin Yahawilintiꞌan, Yahaw yinh sunil, isDiosal Israel, chiwalan hakaꞌ tiꞌ: 5 Tato hanintiꞌan watxꞌenhe txꞌo txꞌotxꞌ, yebꞌ anma yebꞌ no noqꞌ ay sat yibꞌanhqꞌinal tiꞌ, haninan watxꞌenhe yu sunil wipan kaw aykano yelapnoj yebꞌ yu inqꞌabꞌan leyantoj, yuxin chisje waqꞌnihan txꞌotxꞌ tet mak bꞌay chal inkꞌulan. 6 Wal tinanh xin chiwakojan sunil txꞌo txꞌotxꞌ tiꞌ yul isqꞌabꞌ inchejabꞌan Nabucodonosor, isreyal Babilonia, chiwanipaxikojan no noqꞌ yalanh yip naj. 7 Sunil nimeta konhobꞌ chiꞌok ischejabꞌo naj, kat yokpaxo ischejabꞌo iskꞌahol naj yebꞌ ischejabꞌ iskꞌahol iskꞌahol naj masanto chiꞌapni istzꞌayikal bꞌay chiꞌoko istxꞌotxꞌ naj yalanh yip hunteqꞌanxa nime konhobꞌ yebꞌ yul isqꞌabꞌ hunteqꞌanxa ebꞌnaj rey kaw aykano yip.8 »Ta ay hunu konhobꞌ, maka hunu naj rey mach isje yaqꞌaꞌko isbꞌa ischejabꞌo naj Nabucodonosor yebꞌ xin mach chisje yaqꞌaꞌko isbꞌa yalanh yip naj, chiwayojan isyaꞌtajil yibꞌanh, chiwaqꞌnikamojan yu espada, yu wahil yebꞌ yu howla yabꞌil. 9 Yuxin mach cheyabꞌeto tzet chiyal ebꞌnaj chisbꞌaliko isbꞌa inchejabꞌojan, ebꞌnaj txumlum, ebꞌnaj wayiklom, ebꞌnaj ahbꞌelom, ebꞌnaj chalni tato yohta tzet chiyu bꞌaqꞌinh yet chalni ebꞌnaj teyet: “Mach chexok ischejabꞌo naj rey Babilonia,” xhi ebꞌnaj. 10 Yuto haꞌ tzet chal ebꞌnaj tuꞌ, leqꞌtiꞌal, haꞌ leqꞌtiꞌal tuꞌ xin chexitznilo yinh hetxꞌotxꞌ tiꞌ, yebꞌ yu kexinqꞌojnitojan nahat bꞌey nan konhobꞌal, kat hetanhiloj. 11 Yajaꞌ wal konhobꞌ chiyako isbꞌa yalanh yip naj rey Nabucodonosor, kat yok ischejabꞌo naj, hanin Yahawilintiꞌan chiwalan ta chiwakanojan sat istxꞌotxꞌ, kat ismunla sat istxꞌotxꞌ, kat yehayo sat istxꞌotxꞌ,» xhi Komam Jahawil.
12 Walnipaxojan hunteqꞌan tzotiꞌ tiꞌ tet yaꞌ Sedequías, isreyal Judá: «Aweko hebꞌa yalanh ischejbꞌanil naj rey Nabucodonosor, yebꞌ yalanh yip iskonhobꞌ naj, haxinwal mach chexkami. 13 ¿Tzet yinh xin chawako habꞌa yebꞌ konhobꞌ tiꞌ yul isqꞌabꞌ kamikal yunhe hepotxꞌlaxkamo yu espada, kat hekam yu wahil, maka yu howla yabꞌil, hak tuꞌ yalni Komam Jahawil yinh ej konhobꞌ mach chako isbꞌa ischejabꞌo isreyal Babilonia? 14 Mach chawabꞌeto tzet chal ebꞌnaj chisbꞌaliko isbꞌa ischejabꞌo Komam chalni tawet tato mach chawako habꞌa yalanh ischejbꞌanil naj rey Babilonia, yuto leqꞌtiꞌal tzet chal ebꞌnaj tawet. 15 Yuto yal Komam: “Maxhtaj hinan chejnhe ebꞌnaj yalni hunteqꞌan tuꞌ, wal xin leqꞌtiꞌal chal ebꞌnaj yinh inbꞌihan, yuxin tato chayije tzet chal ebꞌnaj, chachintzumbꞌelojan bꞌey tiꞌ, kat kach wanitojan nan konhobꞌal kaw nahat yebꞌ konhobꞌ tiꞌ yu hetanhkaniloj yebꞌ ebꞌnaj chisbꞌaliko isbꞌa inchejabꞌojan chalni leqꞌtiꞌal teyet,” xhi Komam,» kinchihan tet naj rey Sedequías.
16 Intzotelpaxojan tet ebꞌyaꞌ sacerdote yebꞌ tet sunil konhobꞌ, walnihan: «Haꞌ Komam Jahawil chalni hakaꞌ tiꞌ: “Mach cheyabꞌeto tzet chiyal ebꞌnaj chisbꞌaliko isbꞌa inchejabꞌojan, chihalni leqꞌtiꞌal teyet, yuto chal ebꞌnaj tato yinh anhe chimeltzoti sunil munlabꞌal yet watutan, hunteqꞌan iqꞌbꞌilto Babilonia. Haꞌ tzet chal ebꞌnaj tuꞌ, leqꞌtiꞌal, 17 yuxin mach cheyabꞌeto tzet chiyal ebꞌnaj. Wal xin aweko hebꞌa yalanh ischejbꞌanil naj rey Babilonia, haxinwal mach chexkami, ¿tzet yinh xin chiꞌuchkꞌalaxto huneꞌ konhobꞌ tiꞌ?” xhi Komam. 18 Tato yeli ischejabꞌ Komam ye hunteqꞌan ebꞌnaj tuꞌ yebꞌ xin ta istzotiꞌ Komam chal ebꞌnaj, txahlojabꞌ ebꞌnaj tinanh tet Komam Yahawil kaw aykano yip, yunhe machi chiꞌilaxto munlabꞌal kantokanoj yul Yatut Komam Jahawil, yebꞌ tzetaj ay yul ispalacio yaꞌ isreyal Judá, yebꞌ tzetaj ay Jerusalén tiꞌ bꞌey Babilonia. 19 Yuto tzotelkano Komam Yahawil kaw aykano yip yinh hunteqꞌan nime oy ay yul yatut yebꞌ yinh niman pila nabꞌa bronce yebꞌ isbꞌatxobꞌal pila tuꞌ, yebꞌ munlabꞌal ay yul yatut kantokano bꞌey konhobꞌ tiꞌ. 20 Haꞌ hunteqꞌan tuꞌ mach yito naj rey Nabucodonosor bꞌey Babilonia, yet yinito naj yaꞌ rey Jeconías, iskꞌahol yaꞌ Joacim, isreyal Judá, yebꞌ ebꞌnaj nime winaj ah Judá yebꞌ ebꞌnaj ah Jerusalén. 21 Yuxin hak tiꞌ yalni Komam Yahawil yinh sunil, ebꞌnaj ángel yet howal ay satkanh, isDiosal Israel, yinh hunteqꞌan munlabꞌal kantokano bꞌey Yatut Komam, yebꞌ tzetaj ye tuꞌ kantokano bꞌey ispalacio yaꞌ isreyal Judá, yebꞌ tzetaj ye tuꞌ kantokano Jerusalén tiꞌ hakaꞌ tiꞌ: 22 “Haꞌ sunil hunteqꞌan munlabꞌal tuꞌ chiꞌilaxto bꞌey Babilonia, haꞌ tuꞌ xin chiꞌehi masanto chiꞌayilo istzꞌayikal bꞌay chiwalan tato chꞌilaxpaxti hunelxa bꞌey tiꞌ, haꞌ hunteqꞌan tiꞌ hanin Jahawil intiꞌan chiwalan,” xhi Komam,» xhi yaꞌ Jeremías.