5 Istaqꞌwi yaꞌ Jeremías, ischejabꞌ Komam Dios tet naj Hananías sata ebꞌyaꞌ sacerdote yebꞌ sata sunil konhobꞌ kutxaniko bꞌey Yatut Komam Jahawil. 6 Yalni yaꞌ Jeremías: «¡Yubꞌojabꞌ tuꞌ! Yijabꞌ isbꞌa yu Komam Jahawil hakaꞌ hawalni tiꞌ. Tzettam saqꞌal ta chiyij isbꞌa tzet chawal tiꞌ yu Komam Jahawil, kat ismeltzo sunil munlabꞌal yet Yatut Komam Jahawil, hunteqꞌan ilaxto bꞌey Babilonia, kat ismeltzopaxti sunil anma ilaxpaxtoj; 7 yajaꞌ abꞌe yinh kaw kꞌul kat yabꞌenpaxo konhobꞌ tiꞌ tzet chiwalan. 8 Haꞌ hunteqꞌan ebꞌnaj ischejabꞌ Komam Jahawil ekꞌlena yet payat yet maxhto hinan yebꞌ yet maxhto hachpaxoj, yal ebꞌnaj ta chihul howal yebꞌ isyaꞌtajil, yebꞌ howla yabꞌil yinh anma ay yulajla nimeta konhobꞌ, 9 yajaꞌ xin aypaxo ebꞌnaj halni tato haꞌ aqꞌankꞌulal chiꞌaqꞌlax tet hunteqꞌan nime konhobꞌ tuꞌ, yuxin haꞌ mak chiyij isbꞌa tzet chala, haꞌ ton xin ischejabꞌ Komam Jahawil yehi,» xhi yaꞌ Jeremías.

10 Yinilo naj Hananías huneꞌ yugo ayko yibꞌanh isnuqꞌ yaꞌ Jeremías, ischejabꞌ Komam Jahawil, isqꞌahnito naj teꞌ. 11 Yichiko naj Hananías tuꞌ istzotel yinh sat sunil konhobꞌ: «Hak tiꞌ yute yalni Komam Jahawil hakaꞌ tiꞌ: “Hakaꞌ mayu haqꞌahnito huneꞌ yugo tiꞌ, hak tuꞌ chu inqꞌahnipaxtojan yet kabꞌ habꞌil hunteqꞌan yugo ayko yibꞌanh isnuqꞌ sunil nimeta konhobꞌ yu naj Nabucodonosor, isreyal Babilonia,” xhi Komam,» xhi naj Hananías.

Wal yaꞌ Jeremías xin paxto yaꞌ. 12 Lahwi isqꞌahnito naj Hananías huneꞌ yugo ayayo yibꞌanh isnuqꞌ yaꞌ Jeremías, ischejabꞌ Komam, istzotel Komam Jahawil tet yaꞌ Jeremías, yalni Komam hakaꞌ tiꞌ: 13 «Asiꞌ iskꞌatanh naj Hananías, kat hawalni tet naj tato hanin Yahawilintiꞌan chiwalan: “Haqꞌahto teꞌ yugo, yajaꞌ haxa hunu yugo hierro chiꞌok selelo teꞌ, 14 yuto hanin Yahawilintiꞌan, Yahaw yinh sunil, isDiosal Israel, chiwalan tato yugo hierro chiwakojan yibꞌanh isnuqꞌ sunil ej nimeta konhobꞌ tiꞌ yunhe yok yalanh yip naj rey Nabucodonosor, isreyal Babilonia, kat yok ischejabꞌo naj. Chiwanipaxikojan sunil no noqꞌ ay xolaj telaj yalanhpaxo yip naj,” xhi Komam tet naj Hananías,» xhi Komam tet yaꞌ Jeremías. 15 Lahwi tuꞌ yalni yaꞌ Jeremías tet naj Hananías hakaꞌ tiꞌ: «Hananías, wal tinanh, abꞌe tzet chiwalan, hach tiꞌ maxhtaj Komam Jahawil chejnhe hach, kaw mach yelo tzet chawako yipo iskꞌul konhobꞌ tiꞌ. 16 Yu tuꞌ yuxin chiyal Komam Jahawil hakaꞌ tiꞌ: “Wal tinanh chachwilojan sat txꞌo txꞌotxꞌ tiꞌ, haꞌ yinh huneꞌ habꞌil tiꞌ chachkami; yu tzet xahawala, yuxin meltzoko konhobꞌ tiꞌ manhkꞌomal wetan,” xhi Komam,» xhi yaꞌ Jeremías. 17 Haꞌ yinh ishuj ixahaw yinh huneꞌ habꞌil tuꞌ, kam naj Hananías.^a