Carta yato yaꞌ Jeremías tet ebꞌnaj ilaxto preso
29
Haꞌ hunteqꞌan tzotiꞌ tiꞌ yalto yaꞌ Jeremías yul carta tet ebꞌnaj ichamta winaj itzitzto yebꞌ tet ebꞌyaꞌ sacerdote, yebꞌ tet ebꞌnaj ischejabꞌ Komam Dios, yebꞌ tet sunil anma ah Jerusalén ilaxto preso yu naj Nabucodonosor bꞌey Babilonia. 2 (Yato yaꞌ huneꞌ carta tiꞌ, yet xaꞌilaxto yaꞌ rey Jeconías preso bꞌey Babilonia yebꞌ ix reina, yebꞌ ebꞌnaj chimunla yul palacio, yebꞌ ebꞌnaj yahaw konhobꞌ Judá yebꞌ ebꞌnaj yahaw Jerusalén, yebꞌ ebꞌnaj chiwatxꞌen sunil tzettaj ye tuꞌ, yebꞌ ebꞌnaj chiwatxꞌen nime nha.) 3 Ilaxto huneꞌ carta tuꞌ yu yaꞌ Elasa, iskꞌahol yaꞌ Safán, yebꞌ yaꞌ Gemarías, iskꞌahol yaꞌ Hilcías, yuto haꞌ ebꞌyaꞌ chejlaxto yu yaꞌ Sedequías, isreyal Judá bꞌey Babilonia, yunhe yapni ebꞌyaꞌ sata naj rey Nabucodonosor bꞌey Babilonia. Haꞌ huneꞌ carta tuꞌ chal hakaꞌ tiꞌ: 4 «Haꞌ Komam Jahawil kaw aykano yip, isDiosal Israel, chalni tet sunil anma ah Jerusalén yato preso bꞌey Babilonia hakaꞌ tiꞌ: 5 Watxꞌewe heyatut bꞌay chexehi, tzꞌunwe hetzꞌunubꞌ, kat heloni sat. 6 Mohyanhwej, kat ispitzkꞌa heyuninal, kat ismohyipaxo heyuninal tuꞌ, kat ispitzkꞌapaxo yuninal heyuninal, hak tuꞌ xin chichꞌibꞌkanh hebꞌisil bꞌey tuꞌ, mach xin chipax hebꞌisil. 7 Aweko yinh hekꞌul heyehikꞌo yinh aqꞌankꞌulal yul konhobꞌ bꞌay kexwato tuꞌan, txahlanhwe yinh konhobꞌ tuꞌ wetan hanin Yahawiltiꞌan, yunhe inkolwahan yinh, yuto ta ay aqꞌankꞌulal yul konhobꞌ tuꞌ, hex hunex cheyilpaxo aqꞌankꞌulal tuꞌ. 8 Yuto hanin Jahawil intiꞌan, yahawil yinh ebꞌnaj ángel yet howal ay satkanh, isDiosal Israel chiwalan tato mach cheyaqꞌ subꞌchaho hebꞌa yinh tzet chal ebꞌnaj chisbꞌaliko isbꞌa inchejabꞌojan ay texol; mach cheyabꞌepaxto tzet chiyal ebꞌnaj ahbꞌelom, mach cheyako yinh hekꞌul yinh wayike chiyal ebꞌnaj. 9 Yuto haꞌ tzet chal ebꞌnaj yinh hinbꞌi tuꞌan leqꞌtiꞌal. Hanin Yahawilintiꞌan chiwalan tato maxhtaj hinan chejnhe ebꞌnaj,» xhi Komam. 10 Chalnipaxto Komam Jahawil: «Hayet chitzꞌajna 70 (lahonhebꞌ iskanhwinaj) habꞌil heyapni bꞌey Babilonia tuꞌ, chinyenilojan iskꞌulal inkꞌulan teyinh, chiyijni isbꞌa tzet walkanojan, chexwaqꞌni meltzohojan hunelxa bꞌey hekonhobꞌ. 11 Hanin Yahawilintiꞌan wohtajan tzet nabꞌil wuhan teyinh, haꞌ tzet nabꞌil wuhan, haꞌ ton aqꞌankꞌulal, maxhtaj isyaꞌtajil, yu waqꞌnihan iskꞌulal teyet huneꞌ echmabꞌil heyu. 12 Haꞌ yinh huneꞌ tzꞌayik tuꞌ chinheyawtehan teyinh, kat heyul txahlo wetan kat wabꞌenan hetxah. 13 Chinhesayikꞌojan, kat wilchahan heyu, yuto chinhesayan yinh sunil heyanma. 14 Chinilchahan heyu, hanin Yahawilintiꞌan hankawinan chiwalan tato chexwilojan yul konhobꞌ bꞌay ayexiko preso tiꞌ. Chexwitijan bꞌey sunil nimeta konhobꞌ yebꞌ sunil bꞌay kexwaqꞌ sajlemotojan, chexwaqꞌni meltzohojan yul hunun hekonhobꞌ bꞌay kexwilojan, haꞌ hunteqꞌan tiꞌ, hanin Yahawilintiꞌan chiwalan,» xhi Komam.15 Yajaꞌ hex tiꞌ cheyalaꞌ: «Ayxa ebꞌnaj ischejabꞌ Komam Jahawil koxolanh bꞌey Babilonia tiꞌ,» kexchi. 16 Yajaꞌ hak tiꞌ yalni Komam Jahawil yinh yaꞌ tzꞌonhan yul istzꞌonhobꞌal yaꞌ rey David yebꞌ yinh sunil anma ay yul konhobꞌ, haꞌ ton heyet konhobꞌ mach ilaxto preso teyintaj. 17 Chalni Komam Jahawil kaw aykano yip, hakaꞌ tiꞌ: «Chiwatojan howal yinh hunteqꞌan anma tuꞌ, kat iskam yu espada, yu wahil, yebꞌ yu howla yabꞌil. Lahan chiꞌelkaniko anma tuꞌ wuhan hakaꞌ teꞌ higo qꞌanajxa, matxa kꞌulo islolaxi. 18 Chintzumbꞌekꞌojan ebꞌnaj yu howal, wahil yebꞌ yu howla yabꞌil. Sunil anma yul sat yibꞌanhqꞌinal tiꞌ chixiwilo yinh ebꞌnaj yet chiyilni ebꞌnaj, tzꞌaktiꞌ chuko ebꞌnaj sata sunil anma, yebꞌ txꞌixwilal, kat xin isxiwkanh anma yu ebꞌnaj yet chiyilni, kat yok bꞌuchwal yinh ebꞌnaj sata sunil hunteqꞌanxa nime konhobꞌ bꞌay chisajlemito ebꞌnaj. 19 Yu mach yabꞌe hunteqꞌan anma tiꞌ intzotiꞌan yal ebꞌyaꞌ inchejabꞌan. Haꞌ ebꞌyaꞌ inchejabꞌ tuꞌan chilan isbꞌeykꞌo yalaꞌ intzotiꞌan xol hunteqꞌan anma tiꞌ, yajaꞌ mach yabꞌe, hanin Yahawilintiꞌan, hankawinan chiwalan hunteqꞌan tiꞌ,» xhi Komam.
20 Yalnipaxo Komam: «Sunil hex ah Jerusalén, hex kexwatojan preso bꞌey Babilonia, abꞌewe tzet chiwalan. 21 Hanin Yahawilintiꞌan, Yahawil kaw aykano yip, isDiosal Israel, chiwalan yinh naj Acab, iskꞌahol naj Colaías yebꞌ yinh naj Sedequías, iskꞌahol naj Maasías, ebꞌnaj chihalni leqꞌtiꞌal teyet yinh inbꞌihan. Haꞌ ebꞌnaj tuꞌ chiwakojan ebꞌnaj yul isqꞌabꞌ naj Nabucodonosor, isreyal Babilonia, chischejni naj potxꞌlaxokamo ebꞌnaj yinh hesat. 22 Yu huneꞌ tuꞌ, yuxin sunil anma ah Judá ilaxto preso Babilonia, hayet chisqꞌanni tzꞌaktiꞌ yibꞌanh hunu maka, yalabꞌ hakaꞌ tiꞌ: “¡Iswatxꞌehabꞌ Komam Jahawil tawinh hakaꞌ yu Komam yinh naj Sedequías yebꞌ yinh naj Acab, yet isnhuslaxto ebꞌnaj yu naj rey Babilonia!” xhihojabꞌi. 23 Hak tuꞌ hul yibꞌanh ebꞌnaj yuto iswatxꞌe ebꞌnaj istxꞌojal xol anma Israel, yixnhenkanh ebꞌnaj yixal yet anmahil. Yal ebꞌnaj leqꞌtiꞌal yinh inbꞌihan, maxhtaj hinan chejnhe ebꞌnaj yalaꞌ hunteqꞌan tzotiꞌ tuꞌ, “hanin Yahawilintiꞌan chiwalan ta hak tuꞌ chiyuhi,” xhi Komam Jahawil,» xhito yaꞌ Jeremías yul iscarta.
24 Yalnipaxo Komam Jahawil tet yaꞌ Jeremías: «Tzotelanh tet naj Semaías ah Nehelam, chawalni hakaꞌ tiꞌ: 25 “Hak tiꞌ yu yalni Komam Jahawil, kaw aykano yip, isDiosal Israel: Hach tiꞌ hawato carta yinh habꞌi tet sunil anma ay bꞌey konhobꞌ Jerusalén, yebꞌ tet yaꞌ sacerdote Sofonías, iskꞌahol naj Maasías, yebꞌ tet sunil ebꞌyaꞌ sacerdote, hawalnito hakaꞌ tiꞌ: 26 ‘Haꞌ Komam Jahawil kach aniko sacerdotehal, selelo yaꞌ sacerdote Joiada, yunhe hawijbꞌan ebꞌnaj chimunla yul Yatut Komam; yuxin tato ay mak chisnakanh yul yet chisbꞌalniko isbꞌa ischejabꞌo Komam, hach tiꞌ chawakto yul preso, kat hawanikto yoj yul teꞌ cepo,’ xhi. 27 ¿Tzet yinh xin mach chachkachwa yinh yaꞌ Jeremías ah Anatot, yaꞌ chihalni tzetaj chiyu yet bꞌaqꞌinh, chal isbꞌa ischejabꞌo Komam? 28 Yuto yati yaꞌ huneꞌ carta jetanh bꞌey Babilonia tiꞌ, chalni hakaꞌ tiꞌ: ‘Txꞌiꞌal tiempo chexeh bꞌey Babilonia tuꞌ, yuxin watxꞌewe heyatut bꞌay chexehi, kat hetzꞌunni hetzꞌunubꞌ, cheloni sat hetzꞌunubꞌ tuꞌ,’ xhi yaꞌ Jeremías tuꞌ jetanh,” kachi,» xhi Komam.
29 Haꞌ xin yaꞌ sacerdote Sofonías awten huneꞌ carta tuꞌ yabꞌe yaꞌ Jeremías, ischejabꞌ Komam Dios. 30 Lahwi tuꞌ, yul istzotiꞌ Komam Jahawil tet yaꞌ Jeremías, yalni Komam: 31 «Halto tet sunil anma ayto preso bꞌey Babilonia: “Hak tiꞌ yalni Komam Jahawil yinh naj Semaías ah Nehelam, tato maxhtaj Komam chejnhe naj yalno hunteqꞌan tzotiꞌ tuꞌ, yuxin mach chikawxi hekꞌul yinh leqꞌtiꞌal chal naj. 32 Yuxin hanin Yahawilintiꞌan chiwalan tato chiwayojan isyaꞌtajil yibꞌanh naj Semaías ah Nehelam tuꞌ, yebꞌ yibꞌanh yuninal naj, machi hunu iskꞌahol naj chꞌehayo xol inkonhobꞌan, yebꞌ xin machi hunu iskꞌahol naj chiꞌilno iskꞌulal chiwayojan yibꞌanh inkonhobꞌan. Hanin Yahawilintiꞌan chiwalan tato yu haꞌ tzet yal naj Semaías tuꞌ, yuxin ok konhobꞌ manhkꞌomal wetan,” kachitoj,» xhi Komam tet yaꞌ Jeremías.