Yaltekano Komam Dios tato chimeltzo anma Israel ilaxto preso bꞌey iskonhobꞌ hunelxa
30
Haꞌ hunteqꞌan tzotiꞌ tiꞌ yal Komam Jahawil tet yaꞌ Jeremías: 2 «Hanin Yahawilintiꞌan, isDiosal Israel chiwalan: Tzꞌibꞌnhe yul hum sunil tzet halbꞌil tawet wuhan. 3 Yuto chiꞌapni istzꞌayikal bꞌay chiwaqꞌ meltzohojan konhobꞌ Israel yebꞌ Judá ilaxto preso, chiwinitijan sat istxꞌotxꞌ hunelxa, haꞌ ton txꞌo txꞌotxꞌ waqꞌkanojan tet yichmam, kat yochen ebꞌnaj txꞌotxꞌ, haꞌ hunteqꞌan tzotiꞌ tiꞌ, hanin Yahawilintiꞌan chiwalan,» xhi Komam.4 Haꞌ hunteqꞌan tzotiꞌ tiꞌ yal Komam Jahawil yinh konhobꞌ Israel yebꞌ yinh konhobꞌ Judá, 5 hak tiꞌ yute yalni Komam hakaꞌ tiꞌ:
«¡Kaw chiꞌabꞌelax aw yu isyaꞌtajil yebꞌ yu xiwkilal!
¡Machi aqꞌankꞌulal!
6 ¿Qꞌambꞌewej tato ay hunu naj winaj tiꞌ chipitzkꞌa unin yinh?
Yajaꞌ xin chiwilan ta toxanhe tzabꞌaniko ebꞌnaj winaj yinh yiktaj,
hakaꞌ ebꞌix ix chiyabꞌe istit isyaꞌil yet lanhanxa ispitzkꞌa yunin;
sajpaqꞌpoxanhe sat sunil ebꞌnaj winaj yu isyaꞌil isyaꞌtajil.
7 ¡Haꞌ huneꞌ tzꞌayik tuꞌ, kaw nanxa islowi!
Matxa hunuxa tzꞌayik tiꞌ hakaꞌ huneꞌ tzꞌayik tuꞌ,
kaw hantanhekano isyaꞌtajil chiyil iskonhobꞌ yaꞌ Jacob yinh huneꞌ tzꞌayik tuꞌ,
yajaꞌ chikol-laxilo xol isyaꞌtajil.
8 Hanin Yahawilintiꞌan, Yahaw yinh sunil, chiwalan:
“Haꞌ yinh huneꞌ tzꞌayik tuꞌ chinkolilojan yalanh isyaꞌtajil,
chinqꞌahnitojan huneꞌ yugo ayko yibꞌanh isnuqꞌ,
kat inlinhnitojan noꞌ tzꞌum kꞌalnhe yugo tuꞌ,
hak tuꞌ xin matxa chꞌok ischejabꞌo nan konhobꞌal hunelxa,” kinchihan.
9 Wal xin chꞌok inchejabꞌojan, hanin Yahawilintiꞌan, isDiosal,
kat yokpaxo ebꞌnaj ischejabꞌo yikꞌal yaꞌ rey David, yaꞌ chiwakojan isreyaloj ebꞌnaj.
10 Hex yuninal yaꞌ Jacob, hex inchejabꞌan, mach chexxiwi, matzet chal hekꞌul yuto haninan chexinkolan yebꞌ heyuninal yul huneꞌ konhobꞌ kaw nahat,
bꞌay kexilaxto preso. Hanin Yahawilintiꞌan,
chiwalan teyet hex yuninal yaꞌ Jacob chexmeltzo bꞌey hekonhobꞌ,
kat hexew yinh aqꞌankꞌulal, machi mak chexxibꞌteni.
11 Haninan chiwalan ta ayinikojan heyetbꞌihoj yu kexinkolnilojan,
chintanhtzenilojan sunil nimeta konhobꞌ bꞌay kexwaqꞌ pujnahotojan.
Wal hex xin mach chexintanhtzelojan, yajaꞌ xin chiwayojan isyaꞌtajil teyibꞌanh hakaꞌ kaw yehi,
yuto mach chiꞌekꞌto yet wanayojan isyaꞌtajil teyibꞌanh,» xhi Komam.
12 Yuto hak tiꞌ yute yalnipaxo Komam Jahawil hakaꞌ tiꞌ:
«Haꞌ huneꞌ heyabꞌil tiꞌ machi yanhal,
haxa huneꞌ hetxꞌakil tiꞌ kaw yaꞌkanoj.
13 Machi mak chiꞌahilo iskꞌul teyinh kexyanhteni, matxa heyanhal.
14 Sunil ebꞌnaj xahan ay hex yu xakexto nahul yu ebꞌnaj,
matxa chexissayikꞌo ebꞌnaj, yuto haninan wakojan helahwilal,
hakaꞌ nime lahwilal chiyako hunu naj yinh mak bꞌay ayko ishowal.
Wayojan isyaꞌtajil teyibꞌanh yuto kaw hantanhekano hetxꞌojal yebꞌ kaw nimankano hemul.
15 ¿Tzet yinh xin kaw chiꞌel heyaw yu helahwilal?
Haꞌ isyaꞌil helahwilal tiꞌ machi yanhal,
yuto kaw hantanhekano hetxꞌojal yebꞌ kaw nimankano hemul,
yuxin wayojan isyaꞌtajil tiꞌ teyibꞌanh.
16 Yajaꞌ sunil ebꞌnaj chexaqꞌni kꞌayoloj, chitanhkanilo ebꞌnaj, haxa ebꞌnaj ayko ishowal teyinh,
chiꞌilaxoto ebꞌnaj preso nan konhobꞌal,
haxa ebꞌnaj kexxanhobꞌtanheni chixanhlaxikꞌo ebꞌnaj,
haꞌ ebꞌnaj ok eleqꞌ teyinh chꞌelqꞌalaxpaxto tzet ay ebꞌnaj.
17 Hanin Yahawilintiꞌan chiwalan, ta haninan chiwaqꞌan hekawil,
chiwanhtenan helahwilal,
waxanhka chal-lax teyinh ta bꞌejbꞌil hexkanoj, chalni anma hakaꞌ tiꞌ:
“Haꞌ Sión tiꞌ matxa mak chinanitij,” xhi teyinh,» xhi Komam.
18 Yalnipaxo Komam Jahawil hakaꞌ tiꞌ:
«Haninan chiwaqꞌ meltzohojan iskonhobꞌ yaꞌ Jacob ayto preso,
chinyenilojan iskꞌulal inkꞌulan yinh,
kat iswatxꞌelaxpaxkanh iskonhobꞌ yibꞌanh wonhan bꞌaytikꞌa aykanh;
kat iswatxꞌelaxpaxkanh watutan hakaꞌtikꞌa jilni huneꞌ bꞌabꞌelal.
19 Haꞌ inkonhobꞌ tuꞌan chiyaqꞌaꞌ yuchꞌandiosal wetan
kat yel yaw yu tzalahilal hakaꞌ konhobꞌ tzalahilal yehi,
chiwaqꞌni chꞌibꞌojan isbꞌisil, machi xin chipax isbꞌisil.
Chiwaqꞌpohchahojan yuninal, hak tuꞌ xin machi chipax isbꞌisil,
chiwakojan ismay, mach xin chiꞌilaxilo ispixan.
20 Haꞌ yuninal ebꞌnaj lahan chiꞌeliko hakaꞌ yet bꞌabꞌelal,
haꞌ iskonhobꞌ ebꞌnaj chiꞌehayo yinh hunelnhe yinh insatan,
chiwanayojan isyaꞌtajil yibꞌanh mak chiꞌetan ebꞌnaj.
21 Hanin Yahawilintiꞌan chiwalan ta haꞌ xol ebꞌnaj chꞌelti mak chꞌok yahawilo iskonhobꞌ ebꞌnaj,
yebꞌ xin haꞌ xol ebꞌnaj chꞌelti naj chꞌok yahawilo ebꞌnaj,
chinhitznikojan yahaw ebꞌnaj tuꞌ inkꞌatanhan,
kat ishitziko naj inkꞌatanhan, yuto
¿maktaxka chishin isbꞌa ishitziko inkꞌatanhan?
22 Inkonhobꞌan cheyukoj, kat wokan heDiosaloj,» xhi Komam.
23 Haꞌ ishowal Komam Jahawil chitit lemnahi, kat yay yibꞌanh iswiꞌ ebꞌnaj txꞌoj,
haꞌ ishowal tuꞌ, lahan hakaꞌ hunu niman howla jaqꞌeqꞌ chihul lemna yinh anhe.
24 Haꞌ ishowal Komam Jahawil mach chiꞌekꞌayoj,
masanta chiyij isbꞌa tzet chiyoche yebꞌ tzet ay yinh isnabꞌal.
¡Hayet islahobꞌal tzꞌayik tuꞌ chinachalo hunteqꞌan tiꞌ heyu!