31
Haꞌ kaw Komam Jahawil chalnipaxo hakaꞌ tiꞌ: «Haꞌ yinh hunteqꞌan tiempo tuꞌ, haninan chinokan isDiosalo hunun majan ebꞌnaj Israel, kat yok ebꞌnaj inkonhobꞌojan,» xhi Komam.2 Chiyalnipaxo Komam Jahawil hakaꞌ tiꞌ: «Haꞌ anma elkanh yul isqꞌabꞌ kamikal tet chꞌen espada,
waqꞌan iskꞌulal inkꞌulan tet bꞌey txꞌotxꞌ desierto,
yet lanhan issayni anma Israel bꞌay chixewi, xhi Komam.
3 Payxatax isye isbꞌa Komam Jahawil jet, yalni hakaꞌ tiꞌ:
“Kaw xahan ay hex wuhan yinh sunilbꞌal tiempo,
yuxin machi kꞌayto istzꞌay inkꞌulan teyinh.
4 Hex Israel chexinwatxꞌekanhan, kat hewatxꞌikanokanh,
chexkanhalwi yu tzalahilal, cheyaniko chꞌen pandereta.
5 Chetzꞌunuꞌ teꞌ uva yinhla iswonhanil txꞌotxꞌ Samaria hunelxa,
haꞌ mak chitzꞌunni teꞌ uva tuꞌ chiyaqꞌ tzalaho iskꞌul islohni sat teꞌ.
6 Yuto chiꞌapni istzꞌayikal bꞌay chꞌel yaw ebꞌnaj chitanhen konhobꞌ yinhla iswonhanil txꞌotxꞌ Efraín,
chalni ebꞌnaj hakaꞌ tiꞌ: ‘Ahanhwewanoj,
tonhwe bꞌey Sión jiqꞌayo kobꞌa tet Komam Jahawil, koDiosal,’ xhi ebꞌnaj,”» xhi Komam.
7 Chalnipaxo Komam hakaꞌ tiꞌ:
«Bꞌitnanhwe yinh niman tzalahilal yinh iskonhobꞌ yaꞌ Jacob,
elojabꞌ heyaw yinh kaw ip yu tzalahilal yinh konhobꞌ kaw iswiꞌehal yeko yinh nimeta konhobꞌ.
¡Abꞌelaxojabꞌ hebꞌit, kat heyalni hakaꞌ tiꞌ: “Mam Jahawil, kol hakonhobꞌ tiꞌ,
haꞌ ton haywanhxa anma Israel aykanoj!” kexchi.
8 Haninan chiwaqꞌ meltzotijan bꞌey txꞌotxꞌ norte,
chinkutxbꞌanikojan sunil bꞌay pujanto bꞌay kaw nahat yekanto yul sat yibꞌanhqꞌinal tiꞌ.
Haꞌ xol anma tuꞌ chitit anma mach chu yilni,
anma mach chu yekꞌi,
ebꞌix ix ayxa tzet yehi, yebꞌ ebꞌix tolto watxꞌi iskꞌul,
kaw hunbꞌulan chu ismeltzoti bꞌey tiꞌ.
9 Hayet chitohi chꞌoqꞌi, yajaꞌ chiwaqꞌ meltzohojan yinh sunil iskꞌulal inkꞌulan,
chiwijbꞌanikꞌojan istiꞌla ha haꞌ, yebꞌ yul bꞌeh kaw tohol bꞌay machi txaqꞌmohi,
yuto haninan ismam anma Israel, haxa Efraín,
haꞌ inbꞌabꞌel kꞌaholan,» xhi Komam.
10 Yalnipaxo Komam: «Hex nimeta konhobꞌ,
abꞌewe intzotiꞌan, hanin Yahawilintiꞌan,
kat heyalnikꞌo tet ej konhobꞌ ay istiꞌla haꞌ mar,
hunteqꞌan konhobꞌ kaw nahat; cheyalni hakaꞌ tiꞌ:
“Haꞌ Komam aqꞌni sajlemoto anma Israel,
haꞌ Komam chikutxbꞌanpaxiko anma tuꞌ,
kat istanheni hakaꞌ chu istanhelax noꞌ meꞌ yu naj chitanhen noꞌ,” kexchi.
11 Yuto hanin Yahawiltiꞌan, inkolan iskonhobꞌ yaꞌ Jacob,
inkolilojan yul isqꞌabꞌ konhobꞌ ekꞌbꞌal kaw ay yip yibꞌanh iskonhobꞌ yaꞌ Jacob.
12 Chihul ebꞌnaj kat yahwi ebꞌnaj yinh kaw ip yu tzalahilal yinh istzalanil wonhan Sión,
kat yaqꞌni tzalaho iskꞌul ebꞌnaj yinh hanta iskꞌulal inkꞌulan yinh ebꞌnaj,
yuto ay isvino ebꞌnaj, ay yaceite ebꞌnaj,
ay ismeꞌ ebꞌnaj, ay iswakax ebꞌnaj.
Lahan chꞌeliko ebꞌnaj hakaꞌ hunu peyabꞌ bꞌay ay tzꞌunubꞌ hayebꞌil,
matxa bꞌaqꞌinhal chiyabꞌe ebꞌnaj isyaꞌtajil.
13 Chikanhalwi ebꞌix qꞌopo yu tzalahilal,
hakpax tuꞌ ebꞌnaj tzehtaj yebꞌ ebꞌnaj ichamtaj,
chiwaqꞌan tzalahilal tet ebꞌnaj selelo oqꞌil,
chiwaqꞌnihan yaqꞌlobꞌal yanma, niman tzalahilal chiwaqꞌan tet selelo isyaꞌtajil yil yet yalanhtokanoj.
14 Chiwaqꞌ nohojan iskꞌul ebꞌyaꞌ sacerdote,
kaw aynhetikꞌa tzet chislo ebꞌyaꞌ yinh kaw niman,
haxa inkonhobꞌan chiyaqꞌ tzalaho iskꞌul yinh sunil iskꞌulal chiwaqꞌan tet,
haꞌ hunteqꞌan tiꞌ hanin Yahawilintiꞌan chiwalan,» xhi Komam.
15 Chalni Komam Jahawil hakaꞌ tiꞌ: «Chiꞌabꞌelax aw bꞌey konhobꞌ Ramá,
ay mak chꞌoqꞌ yu nime bꞌiskꞌulal.
Haꞌ ix Raquel chꞌoqꞌ yinh yunin, mach xin chisje ix chꞌaqꞌlax isnimanbꞌal iskꞌul,
yuto kamnaxa yunin ix,» xhi Komam.a
16 Chalni Komam Jahawil: «Mach chachoqꞌi, matxahojabꞌ chiꞌay yal hasat,
yuto hanin Yahawilintiꞌan chiwalan ta chiwaqꞌan iskꞌulal ispajo selel isyaꞌtajil chawil tiꞌ,
chiwinilojan ebꞌnaj hawunin sat istxꞌotxꞌ ebꞌnaj ayko ishowal yinh ebꞌnaj,
chiwaqꞌni meltzohojan ebꞌnaj.
17 Hanin Yahawilintiꞌan chiwalan ta haꞌ tzet chiyu yet bꞌaqꞌinh,
haꞌ chꞌok yipo hekꞌul tinanh, chiwaqꞌ meltzohojan ebꞌnaj hawunin sat istxꞌotxꞌ hunelxa.
18 Wabꞌehan yoqꞌ konhobꞌ Efraín yu bꞌiskꞌulal, yalni hakaꞌ tiꞌ:
“Konhhakuyanh hawaqꞌni tzꞌum jijaꞌanh hakaꞌ iskuylax hunu noꞌ wakax mach yohtajo ismunlahi,
yajaꞌ xin konhkuychahanh hawu, Mamin.
Aqꞌonhmeltzohojanh yul haqꞌabꞌ yuto hach tiꞌ Yahawil hach, koDiosalanh.
19 Yuto hayet lahwi kopohnilo kobꞌahanh tawinh konani kobꞌahanh;
hayet lahwi janiko komulanh,
toxanhe nhohanayo honhanh yet chonhekꞌanh, kotxꞌixwikanhanh,
istak kokꞌulanh yu sunil komulanh jakojanh yettax jichitijanh,”
xhi konhobꞌ Efraín wetan.
20 Haꞌ konhobꞌ Efraín lahan hakaꞌ hunu kꞌahole kaw xahan aya,
hak tuꞌ ye yul insatan,
yebꞌ xin lahan hakaꞌ hunu nichꞌan unin bꞌay kaw chonhtzalakoj,
hak tuꞌ ye yul insatan.
Yichitax waqꞌni bꞌinahojan huneꞌ konhobꞌ tiꞌ, mach hunelo chito nahul wuhan,
kaw yaꞌ chuko yinh wanmahan yu bꞌiskꞌulal yinh,
kaw yeli kaw chitzꞌaykanh inkꞌulan yinh,
haꞌ hunteqꞌan tiꞌ, hanin Yahawilintiꞌan chiwalan.
21 Hex Israel aweko yechel bꞌeh bꞌay chextohi,
haxinwal yet chexmeltzohi chiꞌilcha bꞌeh tuꞌ heyu, kaw kam cheyil bꞌeh.
Hex Israel meltzanhwe yul bꞌeh bꞌay kextohi,
meltzanhweti bꞌey hekonhobꞌ tiꞌ.
22 ¿Bꞌaqꞌinh chebꞌej heyekꞌ tukton hakaꞌ mak kꞌaynatoj,
hakaꞌ hunu ix ix manhkꞌom?
Hanin Yahawilintiꞌan chinwatxꞌehan tzet maxhto chiyu yul sat yibꞌanhqꞌinal tiꞌ;
haꞌ ebꞌix ix chihoynayo ebꞌnaj winaj,» xhi Komam.b
23 Hak tiꞌ yute yalnipaxo Komam Jahawil kaw aykano yip, isDiosal Israel hakaꞌ tiꞌ: «Chꞌaqꞌlax bꞌinaho yulajla konhobꞌ yul ismajul Judá yet chiwaqꞌni meltzohojan ebꞌnaj Israel, chalni hakaꞌ tiꞌ: “¡Yaqꞌabꞌayo Komam Jahawil isyaxil yibꞌanh wonhan sikꞌbꞌililo yu bꞌay chibꞌeybꞌalnhelax istoholal!” xhi. 24 Chiꞌehpaxo anma yulajla konhobꞌ yul yet Judá hunelxa, hakpax tuꞌ ebꞌnaj munlawom chistzꞌun istzꞌunubꞌ, yebꞌpaxo ebꞌnaj tanhem meꞌ chiꞌehpaxo bꞌey tuꞌ. 25 Yuto haninan chiwaqꞌan xewilal tet yanma makta sikomxa aya, chiwaqꞌnihan tzalahilal tet yanma makta bꞌiskꞌulal yehi,» xhi Komam.
26 Lahwi wilnihan hunteqꞌan tuꞌ, yel lemna inwayanhan, wekꞌ tꞌanhtꞌonan, haꞌ tzet inwayke tuꞌan kaw kꞌulchꞌankanoj.
Huneꞌ akꞌ trato
27 Chalnipaxo Komam Jahawil hakaꞌ tiꞌ: «Chꞌapni istzꞌayikal bꞌay chintzꞌunayojan konhobꞌ Israel yebꞌ konhobꞌ Judá, chiwaqꞌni chꞌibꞌojan isbꞌisil anma, yebꞌ xin chiwaqꞌni chꞌibꞌojan isbꞌisil no noqꞌ. 28 Hanin Yahawilintiꞌan chiwalan ta hakaꞌ yu yok yinh inkꞌulan inhokꞌnikanhan konhobꞌ Israel, wuchkꞌantojan, intanhtzenilojan wanayojan isyaꞌtajil yibꞌanh; hak tuꞌ chu yokpaxo yinh inkꞌulan intzꞌunnayojan konhobꞌ Israel tiꞌ, chinwatxꞌenkanhan hunelxa. 29 Haꞌ yinh huneꞌ tzꞌayik tuꞌ, matxa chal-lax hakaꞌ tiꞌ: Haꞌ ebꞌnaj mame chiloni teꞌ pahla uva, haxa ebꞌnaj uninale chiyabꞌe ispohto yichla ye yu ispahil teꞌ, mach xhihoj; 30 wal xin hunun mak chikam yu ismul. Haꞌ mak chiloni teꞌ pahla uva, haꞌ chiꞌabꞌen ispohto yichla ye yu ispahil teꞌ.
31 »Hanin Yahawilintiꞌan chiwalan hakaꞌ tiꞌ: Chul huneꞌ tzꞌayikal bꞌay chintꞌinhbꞌakanojan huneꞌ akꞌ trato yebꞌ anma Israel, yebꞌpaxo anma Judá. 32 Haꞌ huneꞌ tuꞌ mach lahano hakaꞌ huneꞌ trato intꞌinhbꞌakanojan tet yichmam ebꞌnaj yet wok tzabꞌnojan yinh isqꞌabꞌ ebꞌnaj yet winiltijan ebꞌnaj sat txꞌotxꞌ Egipto. Yaj xin mach isyije ebꞌnaj huneꞌ trato tꞌinhbꞌabꞌilkano wuhan yebꞌ ebꞌnaj, waxanhka xin hakaꞌ yichamil ebꞌnaj wekojan, xhi Komam Jahawil. 33 Yalnipaxo Komam: Haꞌ huneꞌ akꞌ trato tꞌinhbꞌabꞌilkano wuhan chiwaqꞌan tet anma Israel yinh huneꞌ tzꞌayik tuꞌ. Chiwakojan kuybꞌanile yinh isnabꞌal, chintzꞌibꞌnhenpaxikojan yinh yanma, kat wokan isDiosaloj, kat yok ebꞌnaj inkonhobꞌojan. 34 Matxa hunu ebꞌnaj chꞌok kuyno yet anmahil, matxa yilalo chal ebꞌnaj tet yuxhta hakaꞌ tiꞌ: “Ohtanhelo Komam Jahawil,” mach xhihoj, yuto sunil ebꞌnaj chinohtanhenilojan, anma machi yelapnoj, anma ay yelapnoj, yuto chiwaqꞌ nimankꞌulalan yinh ismul, matxa bꞌaqꞌinhal xin chinnatijan ismul,» xhi Komam.c
35 Haꞌ Komam Jahawil kaw aykano yip, Komam chꞌaqꞌni aholo tzꞌayik yu ismujli yet tzꞌayikal,
yaqꞌnikano chejbꞌanile tet ixahaw yebꞌ tet txꞌumel yu ismujli yet aqꞌbꞌalil.
Yaqꞌnipaxkano chejbꞌanile tet haꞌ mar yu ishanhoni yet chibꞌili, kat yah tixhla haꞌ.
Komam Jahawil, kaw aykano yip, hak tuꞌ isbꞌi Komam, haꞌ chalni tiꞌ:
36 «Hanin Yahawilintiꞌan chiwalan teyet, ta ay hunu tiempohal bꞌay matxa chisyije tzꞌayik yebꞌ ixahaw yebꞌ txꞌumel chejbꞌanile chiwalkanotiꞌan,
chiꞌapnipaxo tzꞌayikal bꞌay matxa chipoh yikꞌal anma Israel yul insatan chal tuꞌ.
37 Hanin Yahawilintiꞌan chiwalpaxojan, tato chiyu ismalelax satkanh yebꞌ ta chiyu
ismalelax hanta yehayto yich txꞌo txꞌotxꞌ; chiyu intanhtzenilojan yuninal anma Israel,
yu sunil istxꞌojal tzet iswatxꞌe.
38 »Hanin Yahawilintiꞌan, chiwalan ta chihul istzꞌayikal bꞌay chiwatxꞌelaxkanh konhobꞌ Israel inkonhobꞌojan, chitaichiti konhobꞌ tuꞌ bꞌey torre Hananeel masanta chꞌapni yinh huneꞌ pulta chij isbꞌi Istxikin. 39 Kat yekꞌ txꞌanh txꞌanh chimalen yibꞌanhahto istzalanil Gareb, kat yekꞌ ishoyno Goa. 40 Yebꞌ sunil akꞌal bꞌay chimujlax kamom, yebꞌ bꞌay chitixhlaxto tanh, masanta sunil txꞌo txꞌotxꞌ ay istiꞌla haꞌ Cedrón, kat yapni bꞌey pulta yet noꞌ cheh ayko yinh yetkꞌulal bꞌay chiꞌahilo tzꞌayik; haꞌ sunil tuꞌ wetan chukanikoj, yebꞌ xin matxa bꞌaqꞌinh chꞌetalaxtoj, matxa bꞌaqꞌinhal chiꞌuchkꞌalaxtoj,» xhi Komam.