6 Istaqꞌwi yaꞌ Jeremías: «Haꞌ kaw Komam Jahawil matzotel wetan, mayalni hakaꞌ tiꞌ: 7 Chihul naj Hanameel, iskꞌahol naj Salum yuxhta hamam takꞌatanh, chalno naj tawet: “Loqꞌilo intxꞌotxꞌan ay bꞌey Anatot, yuto hachnhe chu haloqꞌnilo txꞌotxꞌ, yuto jikꞌalto kobꞌa, hak tuꞌ chu yalno naj Hanameel tuꞌ tawet,” xhi Komam wetan.

8 »Yul naj Hanameel, iskꞌahol yuxhta inmaman, inkꞌatanhan bꞌey istiꞌ preso hakaꞌ yu yalni Komam Jahawil. Yalni naj wetan: “Wal tinanh loqꞌikꞌo intxꞌotxꞌan ay bꞌey Anatot ay yul ismajul txꞌotxꞌ Benjamín, yuto hachnhe chu haloqꞌnilo txꞌotxꞌ, kat iskankano txꞌotxꞌ yul haqꞌabꞌ, yuto jikꞌalto kobꞌa,” xhi naj wetan. Hak tuꞌ yu intxumnilojan tato haꞌ Komam Jahawil chejnhe naj yalno huneꞌ tuꞌ wetan.

9 »Inloqꞌnihan istxꞌotxꞌ naj Hanameel, iskꞌahol yuxhta inmaman, haꞌ ton txꞌotxꞌ ay bꞌey Anatot; inmalenan chꞌen melyu waqꞌan istoholo txꞌotxꞌ tet naj, waqꞌnihan hujlahonhebꞌ siclo chꞌen plata istoholo txꞌotxꞌ. 10 Inwatxꞌenan yumal txꞌotxꞌ, wanikojan issellohal, yaqꞌnikano firma ebꞌnaj testigo yinh huneꞌ hum tuꞌ. Inmalenan chꞌen melyu, waqꞌan istoholo txꞌotxꞌ yul chꞌen libra. 11 Lahwi tuꞌ winikanhan yumal txꞌotxꞌ hakaꞌtikꞌa chiꞌutelaxi, inchulnayojan teꞌ yuto wetxahan ye huneꞌ txꞌotxꞌ tuꞌ; wal teꞌ copia xin leyanto teꞌ. 12 Waqꞌnihan yumal txꞌotxꞌ tuꞌ tet naj Baruc iskꞌahol naj Nerías, naj iskꞌahol naj Maasías, sata naj Hanameel, iskꞌahol yuxhta inmaman, yebꞌ sata ebꞌnaj testigo aqꞌni firma yinh yumal txꞌotxꞌ, yebꞌ yinh sat sunil ebꞌnaj judío kutxaniko bꞌey istiꞌ preso tuꞌ.

13 »Walnihan tet naj Baruc sata sunil ebꞌnaj tuꞌ, hakaꞌ tiꞌ: 14 “Haꞌ Komam Yahawil kaw aykano yip, isDiosal Israel chalni: ‘Ito kabꞌebꞌ yumal txꞌo txꞌotxꞌ tiꞌ, huneꞌ teꞌ chulbꞌilayo tiꞌ yebꞌ teꞌ tonhe leyanto tiꞌ, kat hakꞌubꞌanto teꞌ yul hunu txꞌotxꞌ xi, haxinwal chikꞌuhikanto teꞌ yinh txꞌiꞌal tiempo,’ xhi Komam.

15 »”Yuto haꞌ Komam Yahawil yinh sunil, isDiosal Israel, chalni: ‘Haꞌ sat hetxꞌotxꞌ tiꞌ, chiloqꞌlaxo teꞌ nha yebꞌ txꞌo txꞌotxꞌ, yebꞌ ej tzꞌunubꞌ bꞌay ay teꞌ uva,’ xhi Komam,” kinchihan. 16 Lahwi tuꞌ waqꞌnikanojan yumal txꞌotxꞌ tet naj Baruc, txꞌotxꞌ inloqꞌan, intxahlihan tet Komam Jahawil walnihan hakaꞌ tiꞌ: 17 “¡Mam Jahawil, Wahawil! Hach tiꞌ watxꞌenhe satkanh yebꞌ txꞌo txꞌotxꞌ yu sunil hawip, yebꞌ yu yip haqꞌabꞌ leyantoj. Machi hunu tzet ye tuꞌ tiꞌ yaꞌta yul hasat. 18 Hach tiꞌ chayelo iskꞌulal hakꞌul yinh anma yinhxa ismilal isbꞌisil, chawanayo isyaꞌtajil yibꞌanh ebꞌnaj kꞌahole yu ej ismul ismam ebꞌnaj yakoj. Mamin hach tiꞌ Dios kaw nimankano yelapnoj, kaw ay hawip, Yahawil yinh sunil, hak tuꞌ habꞌi Mamin. 19 Kaw aykano hawip hawaqꞌni kuybꞌanile, kaw nimankano yelapno tzetaj chawatxꞌe, yuto chawil sunil tzet chisbꞌeybꞌalnhe ebꞌnaj winaj, chawaqꞌni ispaj tet hunun hatatikꞌa tzet chisbꞌeybꞌalnhe yebꞌ hatatikꞌa tzet chiswatxꞌe. 20 Hach tiꞌ, hawatxꞌe nimeta yechel yebꞌ nimeta kꞌaybꞌalkꞌule bꞌey txꞌotxꞌ Egipto, yexnheto xin hayeni kꞌaybꞌalkꞌule tuꞌ koxolanh tinanh, hanhonh Israel honhtiꞌanh; chayenipaxo xolaj sunil anma yuxin kaw chibꞌinakano habꞌi hakaꞌ chu isbꞌina yinh huneꞌ tzꞌayik tiꞌ. 21 Hawilti hakonhobꞌ Israel sat txꞌotxꞌ Egipto, hayeni nimeta yechel yebꞌ nimeta kꞌaybꞌalkꞌule, hawilti yu haqꞌabꞌ kaw aykano yip, leyanpaxilto haqꞌabꞌ yibꞌanh, hayenipaxo nimeta xiwkilal. 22 Lahwi tuꞌ hawaqꞌni huneꞌ txꞌo txꞌotxꞌ kaw yax sat tiꞌ tet, hakaꞌtikꞌa yu hawalnikano tet jichmamanh, yebꞌ hawaqꞌni bꞌinaho habꞌi, haꞌ huneꞌ txꞌotxꞌ tiꞌ hakaꞌta chꞌel yojomal noꞌ lech yebꞌ noꞌ kabꞌ sat txꞌotxꞌ. 23 Iskankano ebꞌnaj sat txꞌotxꞌ, yochen ebꞌnaj isyaxilal, yajaꞌ xin mach yabꞌe ebꞌnaj tzet hawala yebꞌ xin mach isyije ebꞌnaj chejbꞌanile, mach iswatxꞌe ebꞌnaj tzet hachej iswatxꞌe ebꞌnaj, yuxin hawati sunil hunteqꞌan isyaꞌtajil tiꞌ yibꞌanh ebꞌnaj.

24 »Wal tinanh xin hoyaniko ebꞌnaj caldeo yinhla iskꞌubꞌal konhobꞌ tiꞌ, yunhe yuchkꞌanto ebꞌnaj, kat yaqꞌni aykꞌayo ebꞌnaj konhobꞌ tiꞌ. Chiꞌalaxiko konhobꞌ tiꞌ yul isqꞌabꞌ ebꞌnaj kat yaniko ebꞌnaj howal yinh, ay mak chikam yu espada, ay mak chikam yu wahil, ay mak chikam yu howla yabꞌil. Lanhan yijni isbꞌa tzet hawalkanoj, lanhan xin hawilni yuni tinanh. 25 Mam Jahawil waxanhka chiꞌalaxiko konhobꞌ tiꞌ yul isqꞌabꞌ ebꞌnaj caldeo, yajaꞌ hach hawala yuxin inloqꞌan huneꞌ txꞌo txꞌotxꞌ tuꞌ, sata ebꞌnaj testigo, intolahan txꞌotxꞌ,”» xhi yaꞌ yinh istxah.

26 Istzotel Komam Jahawil tet yaꞌ Jeremías, yalni Komam hakaꞌ tiꞌ: 27 «Hanintiꞌan Yahawil hinan, isDiosal sunil tzet itzitz, ¿aymi hunu tzet ye tuꞌ yaꞌtaj inwatxꞌenan? 28 Yalnipaxo Komam hakaꞌ tiꞌ: Chiwakojan konhobꞌ tiꞌ yul isqꞌabꞌ ebꞌnaj caldeo yebꞌ yul isqꞌabꞌ naj Nabucodonosor, isreyal Babilonia, kat yokkano yu ebꞌnaj. 29 Chihul ebꞌnaj caldeo tuꞌ yaqꞌaꞌko howal yinh konhobꞌ tiꞌ, chiyaniko ebꞌnaj qꞌaꞌ yinh, chisnhusnito ebꞌnaj, kat istzꞌapaxkanto teꞌ nha bꞌay nhuslax teꞌ pom tet tioxh Baal yebꞌ bꞌay haltelax vino yebꞌalqꞌabꞌe tet komon dios yibꞌanh yakꞌalil hunteqꞌan teꞌ nha, hak tuꞌ yu yaqꞌnitij konhobꞌ tiꞌ inhowalan; 30 yuto ebꞌnaj yuninal Israel yebꞌ ebꞌnaj yuninal Judá hanhkꞌanhetikꞌa istxꞌojal chiswatxꞌe ebꞌnaj yettaxtikꞌa yichiti ebꞌnaj yinh istzehal. Haꞌ ebꞌnaj yuninal Israel hanhkꞌanhetikꞌa yaqꞌnitij ebꞌnaj inhowalan haꞌ chu ebꞌnaj yu tzetaj chiswatxꞌe ebꞌnaj yu isqꞌabꞌ, xhi Komam Jahawil. 31 Haꞌ huneꞌ konhobꞌ tiꞌ, hataxtikꞌa yet iswatxꞌi masanto tinanh kaw ischibꞌalnhetikꞌa inkꞌulan yehi, yebꞌ xin kaw lemannhetikꞌati inhowalan yinh, yuxin chiwilojan yinh insatan. 32 Chiwaqꞌni kꞌayolojan yu sunil ismul ebꞌnaj yuninal Israel yebꞌ yu ismul ebꞌnaj yuninal Judá, hunteqꞌan mule aqꞌnitij inhowalan, yebꞌ yu ismul ebꞌnaj yahawil ebꞌnaj, yebꞌ yu ismul ebꞌnaj iswiꞌehal konhobꞌ, yebꞌ yu ismul ebꞌyaꞌ sacerdote yebꞌ yu ismul ebꞌnaj chisbꞌaliko isbꞌa inchejabꞌojan, yebꞌ yu ismul ebꞌnaj Judá, yebꞌ yu ismul anma ay Jerusalén. 33 Ebꞌnaj tuꞌ, mach tꞌanhxiko ebꞌnaj winhan, wal xin haꞌ yichinh ebꞌnaj yati yinh insatan. Hataxtikꞌa yet yichebꞌanil waqꞌnihan iskuybꞌanil ebꞌnaj, naunhe xin inkachnihan ebꞌnaj, yajaꞌ mach yabꞌe ebꞌnaj, yebꞌ xin mach ischah ebꞌnaj kuybꞌanile tuꞌ. 34 Yanikto ebꞌnaj hunteqꞌan tioxh kaw yahbꞌeta, yul watutan bꞌay chibꞌina inbꞌihan, hak tuꞌ xin yu isbꞌaknito ebꞌnaj watuttuꞌan. 35 Iswatxꞌenpaxokanh ebꞌnaj altar kaw nahat yekanh istel tet tioxh Baal bꞌey akꞌal yet iskꞌahol naj Hinom, haꞌ bꞌey tuꞌ xin isnhus ebꞌnaj iskꞌahol yebꞌ iskutzꞌin xahanbꞌalil tet tioxh Moloc. Haꞌ hunteqꞌan tuꞌ maxhtaj hinan chejnhe ebꞌnaj iswatxꞌeni yebꞌ xin maxhtikꞌa ekꞌ yinh innabꞌalan ta chiswatxꞌe ebꞌnaj isyahbꞌetaj tuꞌ, hak tuꞌ yu isbꞌaknito ebꞌnaj Judá yu ismul yakoj.

36 »Hex tiꞌ cheyala ta haꞌ konhobꞌ tiꞌ chiꞌalaxoko yul isqꞌabꞌ naj isreyal Babilonia, ay mak chikam yu espada, ay mak chikam yu wahil, yebꞌ yu howla yabꞌil, kexchi. Yajaꞌ hanin Yahawilintiꞌan isDiosal Israel chiwalan: 37 Haninan chinkutxbꞌakojan heyet konhobꞌ, chiwinitijan sunil bꞌayejtuꞌwal waqꞌ sajlemotojan yet istit lemna inhowalan yinh, huneꞌ inhowalan kaw ayxakano ismay; chiwaqꞌ meltzohojan ebꞌnaj yul iskonhobꞌ tiꞌ hunelxa, chiwaqꞌnihan aqꞌankꞌulal tet ebꞌnaj, hak tuꞌ xin matzet chal iskꞌul. 38 Chiꞌok ebꞌnaj inkonhobꞌojan, kat wokan isDiosalo ebꞌnaj. 39 Chiwaqꞌ labꞌanbꞌolojan yanma ebꞌnaj, chinwatxꞌehan huneꞌ bꞌeh bꞌay chibꞌelwi ebꞌnaj, yu isxiw ebꞌnaj wetan yinh sunilbꞌal ej tiempo, yebꞌ yu yochen ebꞌnaj iskꞌulal, kat yochenpaxo yuninal ebꞌnaj. 40 Chintꞌinhbꞌakanojan intratohan aynhetikꞌa yinh sunilbꞌal tiempo yebꞌ ebꞌnaj: Mach chinbꞌejan wanayojan iskꞌulal yibꞌanh ebꞌnaj. Haninan chintzotelan yul yanma ebꞌnaj, hak tuꞌ xin chixiw ebꞌnaj wetan, machi xin chispohilo isbꞌa ebꞌnaj winhan. 41 Kaw chintzalahojan wanayojan iskꞌulal yibꞌanh ebꞌnaj, chiwaqꞌan txꞌotxꞌ tiꞌ tet ebꞌnaj yinh kaw sunil wanmahan yebꞌ yinh isyelal, yu yehayo ebꞌnaj sat txꞌotxꞌ,» xhi Komam.

42 Yalnipaxo Komam Jahawil hakaꞌ tiꞌ: «Hakaꞌtikꞌa yu wanitijan sunil hunteqꞌan nimeta isyaꞌtajil tiꞌ yibꞌanh konhobꞌ, hak tuꞌ chu wanayojan sunil iskꞌulal yibꞌanh ebꞌnaj, haꞌ ton hunteqꞌan iskꞌulal walan yinh ebꞌnaj. 43 Hex tiꞌ cheyal yinh konhobꞌ tiꞌ: “Kaw tzꞌinan chukanoj, matxa anma chikani, matxapaxo no noqꞌ chiꞌekꞌi kat yalaxpaxiko yul isqꞌabꞌ ebꞌnaj caldeo,” kexchi. Yajaꞌ xin haꞌ bꞌey tiꞌ chimeltzopaxo anma yiqꞌaꞌ ismajul sat txꞌotxꞌ hunelxa. 44 Chisloqꞌ anma istxꞌotxꞌ bꞌey tiꞌ, kat iswatxꞌen yumal, kat yok issellohal, kat yok isfirma ebꞌnaj chaqꞌ isbꞌa testigohal yinh yumal txꞌotxꞌ tuꞌ. Hak tuꞌ chiyu yul ismajul txꞌotxꞌ Benjamín, yebꞌ yulaj konhobꞌ ayko yinhla ishoyanil Jerusalén, yebꞌ yulajla konhobꞌ ayko yul ismajul txꞌotxꞌ Judá yebꞌ yulaj konhobꞌ ay bꞌey txꞌotxꞌ chewal txꞌotxꞌ, yebꞌ bꞌey yulaj konhobꞌ ay sat txꞌotxꞌ Sefela, yebꞌ yulaj konhobꞌ ay yul ismajul txꞌotxꞌ Neguev, yuto hanin Yahawilintiꞌan, hankawinan chiwalan tato haꞌ inkonhobꞌan ayto preso nan konhobꞌal, chiwaqꞌ meltzohojan yul iskonhobꞌ hunelxa,» xhi Komam.