Konhobꞌ Jerusalén chiwatxꞌelaxkanh chiyiqꞌkanh yip hunelxa
33
Hayet aytoko yaꞌ Jeremías preso bꞌey yamaqꞌil teꞌ preso, istzotel Komam Jahawil tet yaꞌ yinh iskayel, yalni Komam: 2 «Hanin Yahawilintiꞌan, haninan watxꞌenhe txꞌo txꞌotxꞌ, kaw xin kꞌul yu inwatxꞌenkanojan txꞌotxꞌ, hanintiꞌan, Yahawil inbꞌihan. 3 Awte hinan tawinh, kat inpajtzenan tzet chaqꞌana, chinyenihan tzetaj kaw ay yelapno tawet, yebꞌ tzetaj ewanyehi, mach ohtabꞌilo hawu.a 4 Yuto hanin Yahawilintiꞌan, isDiosal Israel, chintzotelan yibꞌanhilo yatut anma ay yul konhobꞌ Jerusalén tiꞌ, yebꞌ yinh yatut ebꞌnaj rey ah Judá lanhan yuchkꞌalaxayo yu chꞌen nime chꞌen yet howal yebꞌ espada. 5 Nabꞌanhe chexelto heyaqꞌaꞌ howal yinh ebꞌnaj caldeo chul howal teyinh, yuto chinohilo yulaj teꞌ nha yu isnimanil ebꞌnaj winaj chikami, wal xin hankawinan chintanhtzelojan ebꞌnaj yu inhowalan kaw ayxakano ismay, yuto xawebꞌalo insatan tet huneꞌ konhobꞌ tiꞌ yu sunilal ismul yakoj. 6 Yajaꞌ xin haninan chiwanhtehan, chiwaqꞌnihan yanhal tet, chiwaqꞌnihan iskawil anma hunelxa, chiwaqꞌnihan niman aqꞌankꞌulal yebꞌ chiwaqꞌnihan isyelal tet. 7 Chiwaqꞌmeltzohotijan anma Judá yebꞌ anma Israel ayto preso nan konhobꞌal, kat inwatxꞌenpaxokanhan iskonhobꞌ chiyiqꞌnikanh yip hunelxa hakaꞌtikꞌa yet bꞌabꞌelal. 8 Chinsajnhehan yinh sunil ismul yako yul insatan, chiwaqꞌni nimankꞌulalan yinh sunil ismul yebꞌ yinh sunil ismanhkꞌomal wetan. 9 Chiwaqꞌ tzalaho inkꞌulan yinh konhobꞌ Jerusalén tiꞌ, chiyalni kꞌul-la tzotiꞌ winhan, chisyenilo isqꞌaqꞌal inmayan sata sunil nimeta konhobꞌ bꞌey sat txꞌo txꞌotxꞌ tiꞌ. Haꞌ sunil nimeta konhobꞌ tuꞌ chiyabꞌe isqꞌumal sunil iskꞌulal chinwatxꞌehan yinh konhobꞌ Jerusalén tiꞌ, kat isxiwkanh, kat isluylunkanh yet chiyabꞌen isqꞌumal sunil iskꞌulal, yebꞌ hanta aqꞌankꞌulal chiwaqꞌan tet anma Jerusalén yul konhobꞌ tiꞌ,» xhi Komam.10 Yalnipaxo Komam Jahawil hakaꞌ tiꞌ: «Hex tiꞌ cheyala ta haꞌ huneꞌ konhobꞌ tiꞌ kan tzꞌinhnoj, machi anma, machi no noqꞌ chiꞌekꞌi. Yel cheyala, haꞌ yulajla konhobꞌ ay yul ismajul Judá, yebꞌ yulaj bꞌeh Jerusalén kaw tzꞌinan, machi anma, machi no noqꞌ chiꞌekꞌi, 11 yajaꞌ xin, chiꞌabꞌelaxo aw yebꞌ bꞌit yebꞌ yet tzalahilal, kat yabꞌelaxo bꞌit yet qꞌinh yet ebꞌnaj tzehtaj yebꞌ ebꞌix qꞌopotaj chimohyi, chꞌabꞌelax yul isnuqꞌ ebꞌnaj chꞌaqꞌni yuchꞌandiosal chaqꞌni isyebꞌalqꞌabꞌ yul watutan. Chiꞌabꞌelax yal-lax hakaꞌ tiꞌ: “¡Jaqꞌaꞌweko ismay Komam Yahawil kaw aykano yip, yuto kaw chitzꞌay iskꞌul Komam jinh yinh sunilbꞌal ej tiempo!” xhi. Hanin Yahawilintiꞌan, hankawhinan chiwalan tato chiwaqꞌmeltzohotijan inkonhobꞌan ayto preso nan konhobꞌal, yu iswatxꞌipaxokanh hunelxa, hakaꞌtikꞌa yet bꞌabꞌelal,» xhi Komam Jahawil.
12 Yalnipaxo Komam Yahawil yinh sunil, hakaꞌ tiꞌ: «Haꞌ sat txꞌo txꞌotxꞌ chikan tzꞌinhno tiꞌ yebꞌ bꞌay matxa anma chiꞌekꞌi yebꞌ xin matxa no noqꞌ, chulpaxo istzꞌayikal bꞌay chitanhelaxo noꞌ meꞌ yinh hunta bꞌulan istxamla konhobꞌ yu ebꞌnaj tanhem meꞌ. 13 Haꞌ bꞌey ej konhobꞌ ay bꞌey txꞌotxꞌ chewal txꞌotxꞌ yebꞌ konhobꞌla ay bꞌey txꞌotxꞌ Sefela, yebꞌ konhobꞌla ay bꞌey txꞌotxꞌ Neguev yebꞌ konhobꞌla ay bꞌey txꞌotxꞌ Benjamín, yebꞌ yinhla ishoyanil Jerusalén yebꞌ konhobꞌla ay bꞌey txꞌotxꞌ Judá chiꞌil-lax yinh ebꞌnaj tanhem meꞌ, chisbꞌisni ebꞌnaj ismeꞌ,» xhi Komam Jahawil.
14 Chalnipaxo Komam Jahawil hakaꞌ tiꞌ: «Chihul istzꞌayikal bꞌay chiyij isbꞌa tzotiꞌ kꞌul walkanojan yinh yuninal Israel yebꞌ yinh yuninal Judá. 15 Haꞌ yinh huneꞌ tzꞌayikal tuꞌ yebꞌ yinh hunteqꞌan tiempo tuꞌ, chiwakojan huneꞌ yikꞌal yaꞌ rey David yinh reyalil, haꞌ naj tuꞌ kaw toholkano naj. Chiswatxꞌe naj iskꞌulal yebꞌ istoholal sat txꞌo txꞌotxꞌ tiꞌ. 16 Haꞌ yinh huneꞌ tzꞌayik tuꞌ chikolchakanilo Judá, haxa Jerusalén chiꞌehikꞌo yinh kaw istꞌinhanil, hak tiꞌ chiyu yal-lax yinh konhobꞌ tiꞌ hakaꞌ tiꞌ: “Haꞌ Komam Jahawil chiwatxꞌen istoholal jinh,” haꞌ chij isbꞌihoj,» xhi Komam.
17 Yuto hak tiꞌ yu yalnipaxo Komam Jahawil: «Mach chꞌekꞌto yet wanikojan huneꞌ yikꞌal yaꞌ David, isreyalo Israel, kat yok tzꞌonhno yul istzꞌonhobꞌal yaꞌ David.b 18 Mach chiꞌekꞌpaxto yet wanikojan yikꞌal ebꞌyaꞌ sacerdote yebꞌ yikꞌal ebꞌnaj levita yu isnhusni no noqꞌ xahanbꞌalil wetan, kat isnhusni ebꞌnaj sat tzꞌunubꞌ yebꞌalqꞌabꞌe wetan chiyaqꞌni ebꞌnaj hunteqꞌan xahanbꞌal wetan hunun tzꞌayik,» xhi Komam.
19 Hul istzotiꞌ Komam Jahawil tet yaꞌ Jeremías, yalni Komam: 20 «Hanin Yahawilintiꞌan chiwalan hakaꞌ tiꞌ: “Tato chu ishekꞌlax intzotiꞌan walkanojan yinh tzꞌayik, yebꞌ ta chu ishekꞌlax intzotiꞌan yinh aqꞌbꞌal, matxa tzꞌayik yebꞌ aqꞌbꞌal yinh hakaꞌ tuꞌ, wal xin mach chu ishekꞌlaxi. 21 Hak tuꞌ xin mach chu istanhayo tzet tꞌinhbꞌabꞌilkano wuhan tet yaꞌ David inchejabꞌan, yet walnikanojan tato huneꞌ iskꞌahol yaꞌ chꞌok reyalo isseleloj. Machi tanhpaxayo tzet tꞌinhbꞌabꞌilpaxo wuhan tet ebꞌnaj levita yebꞌ tet ebꞌyaꞌ sacerdote chimunla yinh inmunilan. 22 Hakaꞌ isbꞌisil ej txꞌumel ay satkanh, yebꞌ arena ay istiꞌ haꞌ mar, mach chu isbꞌislaxi, hak tuꞌ chu waqꞌni pohchahojan isbꞌisil yikꞌal yaꞌ David inchejabꞌan, yebꞌ yikꞌal ebꞌnaj levita chimunla yinh inmunilan,» xhi Komam.
23 Hulpaxo istzotiꞌ Komam Jahawil tet yaꞌ Jeremías, yalni hakaꞌ tiꞌ: 24 «¿Tom maxhto chinachalo hawu tzet chal anma yet chalni hakaꞌ tiꞌ: “Haꞌ kabꞌ majan konhobꞌ issikꞌilo Komam Jahawil, haꞌ ton Israel yebꞌ Judá, xayintanhenkanilto ebꞌnaj Komam?” xhi. Yu tuꞌ yuxin matxa yelapno inkonhobꞌan yu anma, yebꞌ xin matxa nime konhobꞌo yul sat anma,» xhi Komam. 25 Hak tiꞌ yalnipaxo Komam Jahawil: «Ta chisbꞌej yijni isbꞌa tzet tꞌinhbꞌabꞌilkano wuhan yinh tzꞌayik yebꞌ yinh aqꞌbꞌal, yebꞌ ta chisbꞌej satkanh yebꞌ txꞌo txꞌotxꞌ isyijen ischejbꞌanil aykano wuhan, 26 chiwintanhepaxkaniltojan yikꞌal yaꞌ Jacob, chal tuꞌ, yebꞌ yikꞌal yaꞌ David inchejabꞌan, ta hak tuꞌ xin matxa mak chꞌok yahawilo yinh anma titna yinh yaꞌ Abraham, yaꞌ Isaac yebꞌ yinh yaꞌ Jacob yinhxa tzujanil tiꞌ. Wal xin mach chishekꞌ isbꞌa tzet tꞌinhbꞌabꞌilkano wuhan, yuxin chiwaqꞌ meltzohojan ebꞌnaj Israel ayto preso nan konhobꞌal, chinyenilojan iskꞌulal yinh ebꞌnaj,» xhi Komam.