Tzotiꞌ yal yaꞌ Jeremías tet yaꞌ rey Sedequías
34
Istzotiꞌ Komam Jahawil hul tet yaꞌ Jeremías yet yapni naj Nabucodonosor, isreyal Babilonia, yebꞌ sunil issoldado, yebꞌ sunil ebꞌnaj ay yulajla konhobꞌ ay sat txꞌo txꞌotxꞌ tiꞌ ayko yalanh yip naj, yu yaniko howal yinh konhobꞌ Jerusalén yebꞌ konhobꞌ ayko yinhla ishoyanil. Yalni Komam tet yaꞌ Jeremías tuꞌ hakaꞌ tiꞌ: 2 «Hanin Yahawilintiꞌan, isDiosal Israel, chiwalan tawet tato chachto hawalaꞌ tet yaꞌ Sedequías, isreyal Judá: Hak tiꞌ yalni Komam Jahawil hakaꞌ tiꞌ: “Wal tinanh chiwakojan huneꞌ konhobꞌ tiꞌ yul isqꞌabꞌ naj rey Babilonia, chaniko naj qꞌaꞌ yinh, kat istzꞌatoj. 3 Wal hach tiꞌ xin mach chachkolchalo yul isqꞌabꞌ naj, yinh kaw yeli chachtzabꞌlaxayoj, kat hawalaxiko preso, kat hawalaxiko yul isqꞌabꞌ naj rey. Haꞌ kaw isbꞌaqꞌ hasat chiꞌilni isbꞌaqꞌ sat naj rey Babilonia, kat hatzotel yebꞌ naj tꞌanhan ayachiko yinh sat naj, tꞌanhanpaxiko naj yinh hasat, chachokto yul konhobꞌ Babilonia.4 »”Hanin Yahawilintiꞌan chiwalan tato chiyu sunil hunteqꞌan tiꞌ, yajaꞌ xin chiwalan tawet hach Sedequías, isreyal Judá ta machi hunu mak tiꞌ chachpotxꞌnikamo yu chꞌen espada.a 5 Wal xin kaw yinh aqꞌankꞌulal chachkami, hakaꞌ yu isnhuslax teꞌ pom yet iskam ebꞌnaj hawichmam ekꞌlena reyal bꞌabꞌel tasataj, hak tuꞌ chu isnhuslax teꞌ pom yet chaxhkami, kat yoqꞌ anma tawinh, chalni: ‘¡Ay, makam komam rey!’ xhixanhe anma. Haꞌ hunteqꞌan tzotiꞌ tiꞌ, chiyij isbꞌa, yuto hanin Yahawilintiꞌan chiwalan,” xhi Komam Jahawil, kachi,» xhi Komam tet yaꞌ Jeremías.
6 Yalni yaꞌ Jeremías, ischejabꞌ Komam Dios sunil hunteqꞌan tzotiꞌ tiꞌ tet yaꞌ Sedequías, isreyal Judá bꞌey Jerusalén. 7 Wal ebꞌnaj issoldado naj rey Babilonia, lanhan yaqꞌni ebꞌnaj howal yinh Jerusalén yebꞌ yinh sunil hunteqꞌan konhobꞌ ay yul ismajul Judá kantokanoj, yanipaxiko ebꞌnaj howal yinh konhobꞌ Laquis yebꞌ yinh konhobꞌ Azeca, yuto haꞌ xol hunteqꞌan konhobꞌ ayko iskꞌubꞌal yul ismajul Judá, haxanhe kabꞌebꞌ konhobꞌ tuꞌ maxhto chiꞌuchkꞌalaxayoj.
Matxa yij isbꞌa huneꞌ trato chalni ta chibꞌejtzolax ebꞌnaj chejabꞌ hebreo
8 Istzotiꞌ Komam Jahawil hul tet yaꞌ Jeremías yet lahwi istꞌinhbꞌankano yaꞌ Sedequías istrato yebꞌ anma ay bꞌey Jerusalén, tato chibꞌejtzolax ebꞌnaj hebreo ayko chejabꞌoj. 9 Haꞌ yu iswatxꞌikano huneꞌ trato tuꞌ, to haꞌ sunil mak yet konhobꞌ isbꞌa ayko chejabꞌoj, winaj maka ix, chibꞌejtzolaxkanoj, yunhe machi hunu ebꞌnaj judío chiꞌaniko hunu yet judiosal chejabꞌoj, yuto yet konhobꞌnhe isbꞌa. 10 Hayet yabꞌen sunil ebꞌnaj yahawil yebꞌ sunil konhobꞌ tato tꞌinhbꞌalaxkano huneꞌ trato yinh ta chisbꞌejtzo hunun ebꞌnaj winaj yebꞌ ebꞌix ix ayko chejabꞌoj, yunhe matxa hunu mak chꞌaniko yet konhobꞌ chejabꞌoj; yijelax huneꞌ tzotiꞌ tuꞌ, isbꞌejtzolaxilo ebꞌnaj winaj yebꞌ ebꞌix ix ayko chejabꞌoj. 11 Yajaꞌ yinh istzujanilxa xin ismanhkꞌon ebꞌnaj huneꞌ tzotiꞌ tuꞌ, yinipaxti ebꞌnaj ebꞌnaj winaj yebꞌ ebꞌix ix aytikꞌako ischejabꞌo tuꞌ, yanipaxiko ebꞌnaj ischejabꞌo yinh yakꞌtohal hunelxa.
12 Yulpaxo istzotiꞌ Komam Jahawil tet yaꞌ Jeremías, yalni hakaꞌ tiꞌ: 13 «Hanin Yahawilintiꞌan, isDiosal Israel, chiwalan: Haꞌ yinh istzꞌayikal yet winiltijan ebꞌnaj heyichmam sat txꞌotxꞌ Egipto bꞌay ayiko ebꞌnaj chejabꞌoj, waqꞌnikanojan intratohan tet ebꞌnaj: 14 “Haꞌ yinh ishujuta habꞌil chebꞌejtzo heyet hebreohal xaꞌistxonh isbꞌa chejabꞌo teyet, wajebꞌnhe habꞌil chꞌok hechejabꞌoj, haxa yinh ishuj habꞌil xin, kat hebꞌejtzoni,” kinchihan. Yajaꞌ mach yabꞌe ebꞌnaj heyichmam tuꞌ, machi istxalbꞌa istxikin ebꞌnaj yinh tzet walan. 15 Wal hex tiꞌ xin xatikꞌa kexmeltzo yul inqꞌabꞌan hewatxꞌen istoholal yinh insatan, heyalni hunun hex ta chebꞌejtzolo heyet konhobꞌ ayko hechejabꞌoj, hetꞌinhbꞌanpaxkano hetrato yinh insatan yul watutan bꞌay chꞌaqꞌlax bꞌinaho inbꞌihan. 16 Yajaꞌ xin kexmeltzo teyintaj, hemanhkꞌon trato hetꞌinhbꞌakano tuꞌ, heyinilo ispixan inbꞌihan, hemeltzonpaxiko hunun ebꞌnaj winaj yebꞌ ebꞌix ix yok hechejabꞌo hunelxa, ebꞌnaj xatikꞌa hebꞌejtzoloj hakaꞌ chal iskꞌul. Yajaꞌ xin heyaqꞌ meltzoho ebꞌnaj, helanhni ebꞌnaj yebꞌ ebꞌix yok hechejabꞌo hunelxa.
17 »Yu tuꞌ, yuxin hanin Yahawilintiꞌan, chiwalan: Hex tiꞌ mach heyije tzet walan, yuxin mach hebꞌejtzolo heyet konhobꞌ ayko hechejabꞌoj, yuxin wal tinanh, hanin Yahawilintiꞌan chiwalan tato chiwakojan howal teyinh, kat hekam yu espada, yu howla yabꞌil yebꞌ yu wahil, chiwaqꞌni elojan hepixan sata sunil nimeta konhobꞌ ay sat txꞌo txꞌotxꞌ tiꞌ. 18 Chiwanikojan ebꞌnaj winaj manhkꞌon huneꞌ trato tiꞌ yul isqꞌabꞌ kamikal, ebꞌnaj mach isyije tzet istaqꞌweko yinh yet iswatxꞌi huneꞌ trato tiꞌ yinh insatan, yet ispohni yinh kabꞌ majan ischibꞌehal noꞌ wakax yekꞌto ebꞌnaj xolbꞌal noꞌ chibꞌe tuꞌ. 19 Haktikꞌapax tuꞌ xin chiwutehan ebꞌnaj yahawil Judá yebꞌ ebꞌnaj yahawil Jerusalén yebꞌ ebꞌnaj yahawil soldado, yebꞌ ebꞌyaꞌ sacerdote yebꞌ sunil anma ay yul konhobꞌ ekꞌto xolbꞌal ischibꞌehal noꞌ wakax tuꞌ.
20 »Chiwakojan ebꞌnaj yul isqꞌabꞌ ebꞌnaj ayko ishowal yinh, chiwanipaxikojan ebꞌnaj yul isqꞌabꞌ ebꞌnaj chisaynikꞌo ebꞌnaj yunhe ispotxꞌnikamoj, haꞌ isnimanil ebꞌnaj chiꞌok ischibꞌeho noꞌ chꞌik satkanh yebꞌ ischibꞌeho no noqꞌ ay sat txꞌo txꞌotxꞌ.
21 »Chiwanipaxikojan yaꞌ Sedequías, isreyalo Judá yebꞌ ebꞌnaj chimunla yinta yaꞌ yul ispalacio, yul isqꞌabꞌ ebꞌnaj ayko ishowal yinh, yebꞌ yul isqꞌabꞌ ebꞌnaj chisaynikꞌo ebꞌnaj, chiwanipaxikojan ebꞌnaj yul isqꞌabꞌ ebꞌnaj issoldado naj rey Babilonia, naj xaꞌisbꞌej yaqꞌni howal teyinh. 22 Yajaꞌ xin hanin Yahawilintiꞌan chiwalan tet ebꞌnaj ta chimeltzo ebꞌnaj yinh konhobꞌ tiꞌ yu yaniko ebꞌnaj howal yinh, kat yok yul isqꞌabꞌ ebꞌnaj, kat isnhuslaxkanto yu ebꞌnaj. Hak tuꞌ xin sunil ej konhobꞌ ay yul ismajul Judá chikan tzꞌinhnoj, matxa anma chꞌekꞌ yulaj konhobꞌ tuꞌ,» xhi Komam.