3 Hak tuꞌ yu winitijan naj Jaazanías, iskꞌahol naj Jeremías, naj iskꞌahol naj Habasinías, winipaxtijan ebꞌnaj yuxhta naj Jaazanías tuꞌ, yebꞌ sunil iskꞌahol naj. Winipaxtijan sunil yuninal yuninal ebꞌnaj recabita ay bꞌey tuꞌ. 4 Lahwi tuꞌ winitojan ebꞌnaj bꞌey Yatut Komam Jahawil bꞌey huneꞌ cuarto yet ebꞌnaj iskꞌahol naj Hanán, naj iskꞌahol naj Igdalías, naj ischejabꞌ Komam Dios. Haꞌ huneꞌ cuarto tuꞌ ayko iskawilal iscuarto ebꞌnaj yahawil yinh Yatut Komam, yebꞌ yibꞌanh iscuarto naj Maasías, iskꞌahol naj Salum, chitanhen ispultahil Yatut Komam. 5 Wanayojan isxhaluhal vino yebꞌ isvasohal vino sata ebꞌnaj yuninal ebꞌnaj recabita, walnihan tet ebꞌnaj: «Ukꞌwe vino tiꞌ,» kinchihan.

6 Yajaꞌ taqꞌwi ebꞌnaj wetan: «Mach chijukꞌanh vino tiꞌ, yuto haꞌ yaꞌ Jonadab, iskꞌahol naj Recab, jichmamanh halnikano jetanh: “Tajka ay bꞌaqꞌinh cheyukꞌ vino yebꞌ xin machojabꞌ bꞌaqꞌinh chukꞌ heyuninal, 7 yebꞌ xin mach chewatxꞌepaxokanh heyatut, mach chetzꞌun hetzꞌunubꞌ, mach chetzꞌun teꞌ uva, mach chekꞌubꞌapaxo sat teꞌ uva tuꞌ. Wal xin hanhe qꞌap mantiado cheyakanh heyatutoj, sunilbꞌal ej tiempo, hak tuꞌ xin ay hekawil yinh txꞌiꞌal tiempo sat txꞌo txꞌotxꞌ bꞌay chexehayoj,” xhi yaꞌ jetanh. 8 Haxa sunil tzet yalkano yaꞌ Jonadab, iskꞌahol naj Recab, jichmam tuꞌanh, haꞌ chikoyijehanh, yuxin mach chu jukꞌnihanh vino yinh sunilbꞌal ej tiempo, mach chu yukꞌnipaxo jixalanh, kokꞌaholanh yebꞌ kokutzꞌinanh. 9 Yebꞌ xin machi jatutanh chikowatxꞌekanhanh bꞌay chonhehanh, machi kotzꞌunanh teꞌ uva, machi kotxꞌotxꞌanh, machi kotzꞌunpaxojanh kotzꞌunubꞌanh. 10 Wal xin yulajnhe qꞌap mantiado ayonhanh, chikoyijenanh, chikowatxꞌenanh sunil tzet yalkano yaꞌ Jonadab, jichmamanh jetanh. 11 Yajaꞌ hayet yul naj Nabucodonosor isreyal Babilonia yaqꞌaꞌko howal yinh ej konhobꞌ ay sat txꞌo txꞌotxꞌ bꞌay ayonh tiꞌanh, kolahtiꞌnhen kobꞌahanh kotitanh jebꞌano kobꞌahanh bꞌey Jerusalén tiꞌ tet ebꞌnaj soldado ah Caldea yebꞌ tet ebꞌnaj soldado ah Siria, hak tuꞌ yu kokankanojanh bꞌey Jerusalén tiꞌ,» xhi ebꞌnaj wetan.

12 Yul istzotiꞌ Komam Jahawil tet yaꞌ Jeremías, yalni hakaꞌ tiꞌ: 13 «Hanin Yahawilintiꞌan, Yahawil yinh sunil, isDiosal Israel, chiwalan: As hal tet ebꞌnaj winaj ay bꞌey Judá yebꞌ tet anma ay bꞌey Jerusalén, ta haꞌ kaw hanin Yahawilintiꞌan chiwalan: “¿Tom maxhtikꞌa chexkuycha heyijen intzotiꞌan?” 14 Haꞌ yaꞌ Jonadab, iskꞌahol naj Recab, kachwakano yaꞌ tet yuninal tato mach chu yukꞌni vino, yuxin maxhtikꞌa chiyukꞌ yuninal yaꞌ tuꞌ vino masanto tinanh, yu isyijen ebꞌnaj chejbꞌanile yalkano yichmam tuꞌ. Hakinpax tuꞌan, hataxtikꞌa yet yichebꞌanil, yebꞌ xin naunhe chiwaqꞌnihan chejbꞌanile teyet, yajaꞌ mach cheyabꞌe tzet chiwalan. 15 Watojan sunil ebꞌnaj inchejabꞌan texol yettaxtikꞌa yichebꞌanil, yebꞌ xin naunhe, chalni ebꞌnaj teyet: “Bꞌejwe hebꞌeybꞌalnhen istxꞌojal, kat hewatxꞌen iskꞌulal, mach chexoktzujno yinta komon dios, mach cheyiyo hebꞌa tet, haxinwal ay hekawil sat txꞌo txꞌotxꞌ bꞌay ay hex tiꞌ, haꞌ ton txꞌotxꞌ yaqꞌkano Komam Jahawil tet jichmam,” xhi ebꞌnaj teyet, yajaꞌ xin mach hetxalbꞌa hetxikin yebꞌ xin mach heyabꞌe tzet yal ebꞌnaj inchejabꞌ tuꞌan. 16 Yinh kaw yeli haꞌ ebꞌnaj yuninal yaꞌ Jonadab, iskꞌahol naj Recab, isyije ebꞌnaj chejbꞌanile yalkano yichmam tet, yajaꞌ wal anma ay yul huneꞌ konhobꞌ tiꞌ, mach chisyije tzet chiwalan. 17 Yuxin hanin Yahawilintiꞌan, Yahawil kaw aykano yip, isDiosal Israel, chiwalan ta haꞌ tinanh chiwayojan sunil isyaꞌtajil xawalan teyet, hex ah Judá yebꞌ hex ah Jerusalén, yuto kintzotelan teyet, yajaꞌ mach heyabꞌe tzet walan, kexwawtehan, yajaꞌ mach kextaqꞌwi wetan,» xhi Komam Jahawil.

18 Yalni yaꞌ Jeremías tet ebꞌnaj recabita: «Hak tiꞌ yu yalni Komam Yahawil kaw aykano yip, isDiosal Israel: “Wal hex tiꞌ, yuto cheyije chejbꞌanile yalkano yaꞌ Jonadab heyichmam, chekꞌubꞌani, chewatxꞌen sunil tzet yalkano yaꞌ, 19 yuxin hanin Yahawilintiꞌan, Yahawil kaw aykano yip, isDiosal Israel chiwalan: Machi bꞌaqꞌinhal chikꞌayolo yuninal yaꞌ Jonadab, iskꞌahol naj Recab, wal xin aynhetikꞌako ebꞌnaj yinh insatan sunilbꞌal ej tiempo,” xhi Komam,» xhi yaꞌ Jeremías tet ebꞌnaj recabita.