4 Yawten yaꞌ Jeremías naj Baruc, iskꞌahol naj Nerías, istzibꞌnhen naj Baruc, istzꞌibꞌnhen naj yul hum sunil tzet xayal Komam Jahawil tet yaꞌ Jeremías tuꞌ. 5 Lahwi tuꞌ ischejni yaꞌ Jeremías naj Baruc yalni yaꞌ tet naj:

«Hanintiꞌan, mach chinchalaxiktojan yul Yatut Komam Jahawil, 6 yuxin hayet chiꞌayilo istzꞌayikal yet mach chiwaꞌ anma yu istxahli yul Yatut Komam, kat hawokto yul Yatut Komam tuꞌ, kat hawawten istzotiꞌ Komam maxatzꞌibꞌnhe mawalan tawet tiꞌ, yu yabꞌen konhobꞌ. Chawawtenpaxo yabꞌeꞌ sunil anma ah Judá chitit yulajla iskonhobꞌ. 7 Kꞌuxantaxka yahapno istxah anma sata Komam Jahawil, kat isbꞌejnikano anma tuꞌ isbꞌeybꞌalnhen istxꞌojal, yuto xayal Komam ta kaw lemanti ishowal yinh anma ay yul konhobꞌ tiꞌ, haꞌ ishowal tuꞌ kaw nanxa yoki,» xhi yaꞌ Jeremías.

8 Isyijen naj Baruc, iskꞌahol naj Nerías sunil tzet ischej yaꞌ Jeremías, ischejabꞌ Komam Jahawil; yawten naj istzotiꞌ Komam Jahawil yul Yatut Komam, hunteqꞌan istzꞌibꞌnheyoj.

9 Haꞌ yinh isbꞌalonhebꞌ ixahaw yet ishoꞌ habꞌilxa yok yaꞌ Joacim, iskꞌahol yaꞌ Josías, isreyalo Judá, yal-laxi tato haꞌ anma ay bꞌey Jerusalén yebꞌ anma tit bꞌey yul hunteqꞌanxa konhobꞌ yul ismajul Judá chꞌok yinh bꞌiskꞌulal yet mach chiwaꞌ yu istxahli sata Komam Jahawil. 10 Yawten naj Baruc sunil tzotiꞌ yal yaꞌ Jeremías tzꞌibꞌnhebꞌil yul hum yul Yatut Komam Jahawil yabꞌeꞌ anma. Haꞌ xin bꞌey iscuarto naj Gemarías naj tzꞌibꞌlom iskꞌahol naj Safán, ay bꞌey amaqꞌ nahat yekanh, ayko istiꞌ pulta akꞌ bꞌey Yatut Komam Jahawil, haꞌ tuꞌ yawte naj Baruc tzet istzꞌibꞌnheyo yul hum yabꞌeꞌ konhobꞌ.

11 Hayet yabꞌen naj Micaías, iskꞌahol naj Gemarías, naj iskꞌahol naj Safán, istzotiꞌ Komam Jahawil yawte naj Baruc yul hum, 12 isto naj bꞌey ispalacio yaꞌ rey, yokto naj yul iscuarto naj tzꞌibꞌlom. Haꞌ tuꞌ xin kutxaniko ebꞌnaj yahaw konhobꞌ tzꞌonhanikto ebꞌnaj, haꞌ ton naj Elisama naj tzꞌibꞌlom, naj Delaía iskꞌahol naj Semaías, naj Elnatán, iskꞌahol naj Acbor, naj Gemarías iskꞌahol naj Safán, yaꞌ Sedequías iskꞌahol naj Ananías yebꞌ sunil hunteqꞌanxa ebꞌnaj yahawil. 13 Yok naj Micaías yalno sunil tzotiꞌ yabꞌeꞌ naj yet yilni naj Baruc teꞌ hum yabꞌeꞌ konhobꞌ. 14 Ischejnito ebꞌnaj yahaw konhobꞌ tuꞌ naj Jehudí, iskꞌahol naj Netanías, iskꞌahol naj Selemías, iskꞌahol naj Cusi, yalno tet naj Baruc: «Iti teꞌ hum maxawaqꞌ yabꞌeꞌ anma, kat hatit kosatajanh,» xhito ebꞌnaj. Hak tuꞌ yu yinikanh naj Baruc, iskꞌahol naj Nerías teꞌ hum yul isqꞌabꞌ, istit naj sata ebꞌnaj yahaw konhobꞌ. 15 Yalni ebꞌnaj tet naj Baruc: «Ayanh tzꞌonhnoj, kat hawawten teꞌ hum tiꞌ jabꞌehanh tinanh,» xhi ebꞌnaj. Yok naj yilno teꞌ hum tuꞌ. 16 Hayet yabꞌen ebꞌnaj sunil tzet yal teꞌ, yekꞌ tꞌanhtꞌon ebꞌnaj yinh sat hunun, isxiwkanh ebꞌnaj, yalni ebꞌnaj tet naj Baruc: «Kaw yilal jalnihanh sunil hunteqꞌan tiꞌ tet yaꞌ rey,» xhi ebꞌnaj. 17 Isqꞌambꞌenpaxo ebꞌnaj tet naj Baruc:

—Hal jetanh yinh tzet yu hatzꞌibꞌnhen sunil hunteqꞌan tzotiꞌ yal yaꞌ Jeremías tawet tiꞌ, xhi ebꞌnaj.

18 Istaqꞌwi naj Baruc:

—Haꞌ yaꞌ Jeremías halni hunteqꞌan tzotiꞌ tiꞌ wetan, intzꞌibꞌnhenayojan yu tinta yul hum tiꞌ, xhi naj.

19 Yalni ebꞌnaj yahaw konhobꞌ tet naj Baruc:

—Wal tinanh, asiꞌ ebꞌa habꞌa yebꞌ yaꞌ Jeremías, machojabꞌ mak xin chiꞌohtanhen bꞌaytuꞌwal ay hex, xhi ebꞌnaj.

20 Yanikano ebꞌnaj yahaw konhobꞌ tuꞌ teꞌ hum yul iscuarto naj Elisama, naj tzꞌibꞌlom, lahwi tuꞌ isto ebꞌnaj yalno sunil hunteqꞌan tuꞌ tet yaꞌ rey bꞌey yamaqꞌil palacio. 21 Ischejnito yaꞌ rey tuꞌ naj Jehudí yinoti teꞌ hum, kankano yul iscuarto naj Elisama, naj tzꞌibꞌlom, yawten naj Jehudí teꞌ hum tuꞌ yabꞌeꞌ yaꞌ rey yebꞌ sunil ebꞌnaj yahaw ayko iskꞌatanh yaꞌ rey. 22 Wal yaꞌ rey ay yaꞌ bꞌey ispalacio bꞌay chiꞌeh yinh istzꞌayikal nhabꞌil, yinh isbꞌalonhebꞌ ixahaw yinh habꞌil tuꞌ, tzꞌonhanayo yaꞌ qꞌaxhno yinh tzaqꞌaꞌ, ayayto yul huneꞌ net. 23 Hayet xayawte naj Jehudí oxebꞌ maka kanhebꞌ majan tzꞌibꞌ yul teꞌ hum tuꞌ istzilnito yaꞌ rey xaj teꞌ yu chꞌen navaja, chiꞌokniko yu ebꞌnaj tzꞌibꞌlom, isnhusnito yaꞌ teꞌ yul qꞌaꞌ. Hak tuꞌ yu istzꞌato sunil teꞌ hum xol huneꞌ qꞌaꞌ tuꞌ.^a 24 Wal yaꞌ rey yebꞌ ebꞌnaj chimunla yinta yul palacio, machi hunu ebꞌnaj xiwi, yebꞌ xin machi ebꞌnaj istzililo xil isqꞌap yu isyenilo bꞌiskꞌulal yet yabꞌen hunteqꞌan tzotiꞌ tuꞌ. 25 Waxanhka ok naj Elnatán, naj Delaía yebꞌ naj Gemarías isqꞌanaꞌ tet yaꞌ rey tuꞌ ta mach chisnhusto teꞌ hum tuꞌ, yajaꞌ xin mach yabꞌeto yaꞌ rey tzet yal ebꞌnaj. 26 Wal xin ischejpaxo yaꞌ rey tuꞌ naj Jerameel, iskꞌahol naj Hamelec, yebꞌ naj Seraías, iskꞌahol naj Azriel, yebꞌ xin naj Selemías, iskꞌahol naj Abdeel, istzabꞌnoti naj Baruc, naj tzꞌibꞌlom yebꞌ yaꞌ Jeremías, ischejabꞌ Komam Dios, yajaꞌ xin yebꞌato Komam ebꞌnaj.

27 Yet xanhuslaxto teꞌ hum yu yaꞌ rey, teꞌ hum bꞌay istzꞌibꞌnheyo naj Baruc tzet yal yaꞌ Jeremías, yul istzotiꞌ Komam Jahawil tet yaꞌ Jeremías, yalni hakaꞌ tiꞌ: 28 «Iti hunuxa teꞌ hum chulbꞌilayoj, kat hatzꞌibꞌnhenpaxo hunteqꞌan tzotiꞌ hatzꞌibꞌnhe yul teꞌ hum yet bꞌabꞌelal, teꞌ isnhusto yaꞌ Joacim, isreyal Judá. 29 Chawalnipaxo hunteqꞌan tzotiꞌ tiꞌ tet yaꞌ Joacim, isreyal Judá: Hak tiꞌ yalni Komam Jahawil: “Hach tiꞌ hanhusto teꞌ hum, hakachni yaꞌ Jeremías hakaꞌ tiꞌ: ‘¿Tzet yinh xin hatzꞌibꞌnheko yinh teꞌ hum tato kaw yeli chihul naj rey Babilonia, kat istanhtzenilo naj txꞌotxꞌ konhobꞌ tiꞌ, chawalnipaxo ta matxa anma chikani yebꞌ matxa no noqꞌ chꞌekꞌi?’ 30 Yu huneꞌ tuꞌ, yuxin yal Komam Jahawil yibꞌanhilo yaꞌ Joacim, isreyal Judá: Matxa hunu yuninal hawuninal chꞌok tzꞌonhno yul istzꞌonhobꞌal yaꞌ rey David; haxa hanimanil xin chikan pakꞌno xol yoj tzꞌayik, yebꞌ xin xol yal chew yet aqꞌbꞌalil. 31 Chiwayojan isyaꞌtajil tawibꞌanh, chiwanipaxayojan isyaꞌtajil yibꞌanh yuninal hawuninal yebꞌ yibꞌanh ebꞌnaj hachejabꞌ, chiwanayojan hunteqꞌan isyaꞌtajil xawalan yibꞌanh ebꞌnaj yebꞌ yibꞌanh sunil anma ay bꞌey Jerusalén tiꞌ, yebꞌ yibꞌanh anma ah Judá, haꞌ ton hunteqꞌan isyaꞌtajil mach heje heyabꞌeꞌ,” kachi,» xhi Komam tet yaꞌ Jeremías.

32 Yiniti yaꞌ Jeremías huneꞌxa teꞌ hum chulbꞌilayoj, yaqꞌni yaꞌ teꞌ tet naj Baruc naj tzꞌibꞌlom, iskꞌahol naj Nerías, yok naj Baruc istzꞌibꞌnhenayo sunil tzotiꞌ yal yaꞌ Jeremías, hakaꞌtikꞌa hunteqꞌan tzotiꞌ yal yaꞌ yul teꞌ hum isnhusto yaꞌ Joacim isreyal Judá. Txꞌiꞌalto xin hunteqꞌanxa tzotiꞌ lahan yebꞌ hunteqꞌan yet bꞌabꞌelal tzꞌibꞌnhelaxkano yul teꞌ hum tuꞌ.