3 Ischejni yaꞌ rey Sedequías naj Jucal, iskꞌahol naj Selemías yebꞌ yaꞌ sacerdote Sofonías, iskꞌahol naj Maasías yunhe yalni ebꞌnaj tet yaꞌ Jeremías ischejabꞌ Komam hakaꞌ tiꞌ: «Txahlanh jinhanh tinanh tet Komam Jahawil, koDiosal,» xhi ebꞌnaj. 4 Wal yaꞌ Jeremías chꞌekꞌyaꞌ xol anma yul konhobꞌ yuto maxhto chꞌalaxikto yaꞌ yul preso. 5 Haꞌ ebꞌnaj issoldado naj faraón, el ebꞌnaj bꞌey Egipto, yabꞌenilo ebꞌnaj soldado caldeo hoyaniko yinh konhobꞌ Jerusalén huneꞌ tuꞌ, isbꞌejnikano ebꞌnaj konhobꞌ Jerusalén.

6 Yul xin istzotiꞌ Komam Jahawil tet yaꞌ Jeremías, ischejabꞌ, yalni Komam hakaꞌ tiꞌ: 7 «Hanin Yahawilintiꞌan, isDiosal Israel, xawalan ta hak tiꞌ chawute hawalni tet ebꞌnaj ischejabꞌ yaꞌ isreyal Judá, yaꞌ qꞌambꞌen wetan tzet chꞌelkanikoj, chawalni hakaꞌ tiꞌ: “Haꞌ ebꞌnaj issoldado naj faraón tit kolwal teyinh, meltzo ebꞌnaj bꞌey Egipto hunelxa. 8 Yuxin chititpaxo ebꞌnaj caldeo hunelxa, chanipaxiko ebꞌnaj howal yinh konhobꞌ tiꞌ, kat istanhtzenilo ebꞌnaj, kat istzꞌaloj. 9 Hanin Jahawil intiꞌan chiwalan ta mach cheyaqꞌ subꞌchaho hebꞌa hechukil, cheyalni: ‘Wal tinanh matxa tzet chal kokꞌul, yuto matxa chimeltzoho ebꞌnaj caldeo howal jinh,’ tajka kexchi. Chimeltzoho ebꞌnaj caldeo yaqꞌaꞌ howal teyinh. 10 Waxanhka chemaqꞌkamo sunil ebꞌnaj caldeo chiꞌaqꞌni howal teyinh, waxanhka haywanhxanhe ebꞌnaj chitokankano chiꞌok islahwilal heyu, yajaꞌ chiꞌahwano ebꞌnaj yul ismantiado, kat yaniko ebꞌnaj qꞌaꞌ yinh hekonhobꞌ tiꞌ, chisnhusnikanto ebꞌnaj,” xhi Komam Jahawil, kachi tet ebꞌnaj Israel.»

11 Hayet yel ebꞌnaj soldado caldeo bꞌey Jerusalén yu yabꞌelo ebꞌnaj ta lanhan yapni ebꞌnaj issoldado naj faraón, 12 yel yaꞌ Jeremías yul konhobꞌ Jerusalén, isto yaꞌ bꞌey txꞌotxꞌ Benjamín, yu ispohnilo isbꞌa yaꞌ xol anma Israel ay yul konhobꞌ Jerusalén. 13 Haxa yet lanhan yokto yaꞌ Jeremías yul ispultahil Benjamín tuꞌ, istzabꞌlaxayo yaꞌ yu naj yahawil yinh ebꞌnaj chitanhen pulta tuꞌ. Haꞌ naj tzabꞌnayo yaꞌ tuꞌ, haꞌ ton naj Irías iskꞌahol naj Selemías, haxa naj Selemías tuꞌ iskꞌahol naj Hananías ye naj, yalni naj Irías tuꞌ tet yaꞌ Jeremías: «Hach tiꞌ, hawetbꞌi habꞌa yebꞌ ebꞌnaj caldeo,» xhi naj. 14 Istaqꞌwi yaꞌ Jeremías, yalni yaꞌ: «Machoj, mach wetbꞌiho hinbꞌahan yebꞌ ebꞌnaj caldeo,» xhi yaꞌ. Yajaꞌ xin mach yabꞌe naj tzet yal yaꞌ Jeremías tuꞌ, istzabꞌayo naj yaꞌ, yinito naj yaꞌ sata ebꞌnaj yahaw konhobꞌ. 15 Kaw xin tit ishowal ebꞌnaj yahaw konhobꞌ tuꞌ yinh yaꞌ Jeremías, ishaten ebꞌnaj yaꞌ, yanito ebꞌnaj yaꞌ preso bꞌey yatut naj Jonatán, naj tzꞌibꞌlom, yuto alaxiko yatut naj presohal yu ebꞌnaj.

16 Hak tuꞌ yu yalaxayto yaꞌ Jeremías yul huneꞌ holan yalanh txꞌo txꞌotxꞌ, kaw xin txꞌiꞌal tzꞌayik alaxayto yaꞌ preso bꞌey tuꞌ.^a 17 Yajaꞌ ischej yaꞌ rey Sedequías ilaxoti yaꞌ Jeremías bꞌey yatut, isqꞌambꞌen yaꞌ yinh ewantajil tet yaꞌ Jeremías hakaꞌ tiꞌ: «¿Aymi tzet xayal Komam Jahawil tawet?» xhi yaꞌ.

Istaqꞌwi yaꞌ Jeremías: «Aytoni; mam rey hach tiꞌ chachalaxoko yul isqꞌabꞌ naj rey ah Babilonia,» xhi yaꞌ Jeremías.

18 Isqꞌambꞌenpaxo yaꞌ Jeremías tet yaꞌ rey Sedequías: «¿Tzet inmulan wakojan tawet yebꞌ tet ebꞌnaj chimunla tawinta yul palacio, yebꞌ xin tzet inmulan wakojan tet konhobꞌ yuxin chinhawakojan preso? 19 Yebꞌ xin ¿bꞌaytuꞌwal ay ebꞌnaj chisbꞌaliko isbꞌa ischejabꞌo Komam Dios chalni ta mach chihul naj rey Babilonia yaqꞌaꞌ howal jinh yebꞌ yinh konhobꞌ tiꞌ? 20 Wal tinanh mam rey wahawil, abꞌe nino tzet chinqꞌanan tawet tiꞌ tinanh, chawaqꞌni tzet chinqꞌantiꞌan; ta matxa chinhawaqꞌ meltzohojan preso bꞌey yatut naj Jonatán, naj tzꞌibꞌlom, yunhe mach chinkaman bꞌey tuꞌ,» xhi yaꞌ Jeremías.

21 Yu tuꞌ, yuxin ischej yaꞌ rey Sedequías ta haꞌ bꞌey yamaqꞌil teꞌ preso chikankano yaꞌ Jeremías preso, kat istanhelax yaꞌ bꞌey tuꞌ, yebꞌ xin ta chiꞌaqꞌlax hunun ispan yaꞌ yu ebꞌnaj watxꞌen pan chꞌekꞌ yul bꞌeh hunun tzꞌayik. Hak tuꞌ utelax yulbꞌal tzꞌayik yet ayto ixim pan yul konhobꞌ; iskankano yaꞌ Jeremías preso bꞌey yamaqꞌil teꞌ preso.