4 Yuxin yal ebꞌnaj yahaw tuꞌ tet yaꞌ rey hakaꞌ tiꞌ: «Haꞌ huneꞌ yaꞌ winaj tiꞌ kamojabꞌ tinanh, yuto chikabꞌkonkanh iskꞌul ebꞌnaj soldado matokankano yul konhobꞌ tiꞌ yu tzotiꞌ chiyal yaꞌ, kat ispaxpaxo yip konhobꞌ yu tzet chal yaꞌ tuꞌ, yuto haꞌ huneꞌ yaꞌ winaj tiꞌ, maxhtaj aqꞌankꞌulal choche yinh konhobꞌ tiꞌ, wal xin to haꞌ howal chisqꞌantij,» xhi ebꞌnaj.

5 Istaqꞌwi yaꞌ rey Sedequías tet ebꞌnaj: «Ilwej tzet cheyute yaꞌ, yul heqꞌabꞌ ay yaꞌ, wal hinan matzet tzꞌaj walaꞌan teyinh,» xhi yaꞌ.

6 Hak tuꞌ yu istzabꞌnayo ebꞌnaj yaꞌ Jeremías, yanayto ebꞌnaj yaꞌ yul huneꞌ kꞌuh yu txꞌanh lasu. Huneꞌ kꞌuh tuꞌ yet naj Malaquías iskꞌahol naj Hamelec yehi, ay bꞌey yamaqꞌil teꞌ preso; yajaꞌ xin machi ha haꞌ yul huneꞌ kꞌuh tuꞌ, tzꞌotzꞌewnhe ayayto yich, yuxin hayet yalaxayto yaꞌ Jeremías yul kꞌuh tuꞌ, isto sutna yaꞌ xol tzꞌotzꞌew.

7 Hayet yabꞌen naj Ebed-melec ah Etiopía, naj eunuco chimunla yul ispalacio yaꞌ rey ta alaxayto yaꞌ Jeremías yul kꞌuh, wal yaꞌ rey tzꞌonhanayo yaꞌ bꞌey pulta yet yaꞌ Benjamín. 8 Yel naj Ebed-melec bꞌey yatut yaꞌ rey, istit naj tzotelo tet yaꞌ, yalni naj: 9 «Mam rey wahawil, haꞌ tzet maswatxꞌe ebꞌnaj yinh yaꞌ Jeremías, ischejabꞌ Komam Dios kaw mach kꞌuloj, yuto mayayto ebꞌnaj yaꞌ yul huneꞌ kꞌuh, haꞌ tuꞌ xin chikamo yaꞌ, yuto matxa tzet chilolax yul konhobꞌ tiꞌ,» xhi naj.

10 Yuxin haꞌtikꞌa naj Ebed-melec chejlaxto yu yaꞌ rey, yalni yaꞌ tet naj: «Ito 30 (lahonhebꞌ iskawinaj) ebꞌnaj winaj ay bꞌey tiꞌ tawintaj, kat hato hawinohati yaꞌ Jeremías yul kꞌuh tuꞌ, yaqꞌ isbꞌa maxhto chikam yaꞌ,» xhi yaꞌ.

11 Yinito naj Ebed-melec ebꞌnaj winaj tuꞌ yintaj, isto naj yinoti hunteqꞌan xilqꞌape xilxa yebꞌ tzilmonaxatoj bꞌay kꞌuwan xilqꞌape yalanhayto cuarto bꞌay kꞌuwan chꞌen melyu bꞌey palacio, isto naj bꞌey huneꞌ kꞌuh bꞌay ayayto yaꞌ Jeremías, yanayto naj hunteqꞌan xilqꞌape tuꞌ yu txꞌanh lasu tet yaꞌ Jeremías, 12 yalni naj Ebed-melec ah Etiopía tet yaꞌ Jeremías: «Akto hunteqꞌan xilqꞌape xilxa yebꞌ tzilmonaxato tiꞌ yalanh haqꞌabꞌ yunhe mach chaxhlawi yu txꞌanh lasu yet chachjinahtijanh,» xhi naj. Isyijen yaꞌ Jeremías tzet yal naj Ebed-melec. 13 Hak tuꞌ yu yinahti ebꞌnaj yaꞌ Jeremías yu txꞌanh lasu, yahti yaꞌ yul huneꞌ kꞌuh tuꞌ. Lahwi tuꞌ iskankano yaꞌ Jeremías bꞌey yamaqꞌil teꞌ preso.

14 Lahwi tuꞌ, ischejni yaꞌ rey Sedequías ilaxoti yaꞌ Jeremías ischejabꞌ Komam Dios, yu istzotel yaꞌ tet yaꞌ bꞌey yet yox pulta yul Yatut Komam Jahawil, yalni yaꞌ rey Sedequías tet yaꞌ Jeremías:

—Ay huneꞌ inqꞌambꞌebꞌalan tawet, yajaꞌ machojabꞌ hunu tzet ye tuꞌ tiꞌ chawebꞌayo wetan, xhi yaꞌ rey.

15 Istaqꞌwi yaꞌ Jeremías:

—Mam rey, ta chiwalilojan tawet yinh kaw yeli, ¿tom mach chinhamaqꞌaꞌ kamojan xin? Yebꞌ xin ta ay hunu istzꞌajanil hakꞌul chiwalan, machim chawabꞌepaxoj, xhi yaꞌ Jeremías.

16 Yaqꞌni bꞌinaho yaꞌ rey Sedequías isbꞌi Komam Dios yinh ewantajil tet yaꞌ Jeremías, yalni yaꞌ:

—¡Itzitz Komam Jahawil, Komam chiꞌaqꞌni kokawil chiwalnihan ta mach chaxhinchej potxꞌlaxo kamojan, mach chaxhwapaxikojan yul isqꞌabꞌ ebꞌnaj chiyoche kach ispotxꞌoꞌkamoj! xhi yaꞌ rey Sedequías.

17 Yalni yaꞌ Jeremías:

—Hak tiꞌ yalni Komam Jahawil, kaw aykano yip, isDiosal Israel, hakaꞌ tiꞌ: “Ta chawako habꞌa yul isqꞌabꞌ ebꞌnaj yahawil issoldado naj rey Babilonia, ay hakawil chal tuꞌ, yebꞌ xin mach chinhuslaxto konhobꞌ tiꞌ, hak tuꞌ xin mach chaxhkam yebꞌ makta ay yul hawatut. 18 Yajaꞌ ta mach chawako habꞌa yul isqꞌabꞌ ebꞌnaj yahawil issoldado naj rey Babilonia chiwakojan konhobꞌ tiꞌ yul isqꞌabꞌ ebꞌnaj caldeo tuꞌ,^a kat isnhusnikanto ebꞌnaj, wal hach tiꞌ xin mach chachkolcha yul isqꞌabꞌ ebꞌnaj,” xhi Komam, xhi yaꞌ Jeremías.

19 Yalni yaꞌ rey Sedequías tet yaꞌ Jeremías:

—Chinxiwan tet ebꞌnaj judío xaꞌekꞌto yetbꞌiho ebꞌnaj caldeo, kꞌuxantaxka walaxikojan yul isqꞌabꞌ ebꞌnaj, kat wekꞌyaꞌan yu ebꞌnaj, kat kinispotxꞌnikamojan ebꞌnaj, xhi yaꞌ. 20 Istaqꞌwi yaꞌ Jeremías:

—Mach chachalaxoko yul isqꞌabꞌ ebꞌnaj judío ayko yinta ebꞌnaj caldeo tuꞌ, yije istzotiꞌ Komam Jahawil chiwalan tawet tiꞌ tinanh, haxinwal ay hakawil, hak tuꞌ xin mach chachkami; 21 yajaꞌ ta mach chawoche hawaqꞌako habꞌa yul isqꞌabꞌ ebꞌnaj caldeo tuꞌ xin, haꞌ hunteqꞌan tzotiꞌ tiꞌ yal Komam Jahawil wetan: 22 Haꞌ sunil ebꞌix ix chitokan bꞌey hapalacio, chiꞌilaxilti ebꞌix, kat yalaxiko ebꞌix yul isqꞌabꞌ ebꞌnaj yahawil issoldado naj rey Babilonia, haꞌ kaw xin ebꞌix chihalni hakaꞌ tiꞌ:

23 »Chiꞌilaxolti sunil ebꞌix hawixal yebꞌ hawuninal kat yalaxoko yul isqꞌabꞌ ebꞌnaj caldeo, wal hach tiꞌ xin mach chachkolcha yul isqꞌabꞌ ebꞌnaj, wal xin chachtzabꞌcha yu naj rey Babilonia, chachyaniko naj preso, chisnhusnikanto naj konhobꞌ tiꞌ, xhi Komam Jahawil, xhi yaꞌ Jeremías.

24 Istaqꞌwi yaꞌ rey Sedequías tet yaꞌ Jeremías:

—Machi bꞌay chawalikꞌo huneꞌ tiꞌ, haxinwal mach chachkami. 25 Ta chiyohtanhelo ebꞌnaj yahaw konhobꞌ ta makintzotelan tawet, kat yulo ebꞌnaj takꞌatanh kat yalni ebꞌnaj ta chawalilo tet ebꞌnaj tzet maxawal wetan, yebꞌ xin ta matzet chawebꞌa tet ebꞌnaj, yunhe mach chachispotxꞌkamo ebꞌnaj; kat isqꞌambꞌenpaxo ebꞌnaj tzet walan tawet. 26 Chawal tet ebꞌnaj hakaꞌ tiꞌ: “Manqꞌanan tet yaꞌ rey ta matxa chinmeltzohojan preso bꞌey yatut naj Jonatán,” kachi, xhi yaꞌ rey Sedequías.

27 Lahwi tuꞌ yul sunil ebꞌnaj yahawil konhobꞌ iskꞌatanh yaꞌ Jeremías, yok ebꞌnaj yaqꞌno isqꞌambꞌebꞌal tet yaꞌ, yok yaꞌ Jeremías tuꞌ yalno tet ebꞌnaj hakaꞌ yu yalni yaꞌ rey tet yaꞌ. Hak tuꞌ yu ispaxto ebꞌnaj, yel ebꞌnaj iskꞌatanh yaꞌ Jeremías, yuto machi hunu mak abꞌenilo tzet yal yaꞌ Jeremías tet yaꞌ rey. 28 Iskankano yaꞌ Jeremías bꞌey yamaqꞌil teꞌ preso masanto istzꞌayikal yet istzabꞌcha konhobꞌ Jerusalén; haꞌ bꞌey yamaqꞌil teꞌ preso xin ay yaꞌ Jeremías yet istzabꞌcha konhobꞌ Jerusalén.